Zákaryâ 3
3
Akat nyí o/ri kyi-kim ne Otu-Nchi Kyifen-Osówo
1Ké akat akíri, Óburúkpâbí o/tông mě Jóshwa mú otu-nchi kyifen-Osówo ké o/bwom ké bushú ḿbú orím onong mú Óburúkpâbí. Sátan mú mu Otu-Byibî-Barím o/bwom to ányi fáráng ne Jóshwa. Oo/kpá byiko ḿbyí odabât Jóshwa kyiraa. [ 2Orím mú onong mú Óburúkpâbí] o-raa ne Sátan o/fu, Sátan, kyi/bát Óburúkpâbí obîn ǒ. Kyi/bát Óburúkpâbí mú Jerúsélem mu o-jê ng ǎ okét mpan o-bên ǒ. Onyinchéng mún mu wǎ kyichí ńkyí ba/tut ba-fîm ké okwâ.
3Jóshwa o/mû o/bwom ányi ne banunut-byídí ké byiko. 4Orím mú onong ámu o-raa ne barím ḿbé banong, ḿbé ba/fím ne nyǐ kyíbóng ba-bâ o/fu, pii n̂g banunut-byídí ḿbé onyinchéng mún o/fé. Ne o-raa kâng ne Jóshwa o/fu, me nn/kúng byibî eyên n-dim ne mbyí, ne n/chi n-kye ǒ byídí ḿbyí byifyîfî ḿbyí adabwá.
[ 5O-kye barím ḿbé mbe ne nyǐ ké kyikû busa o/fu, yip n̂g] etam nyí efyîfî ba-cít Jóshwa ké dyishí. Mbé ba-chi éné, ne ba-kúng kâng byídí ḿbyí byifyîfî ba-fé ǎ, orím mú onong ámu mú Óburúkpâbí o-bwom ányi.
6Ne orím mú onong ámu o-sét Jóshwa o/fu, 7Óburúkpâbí mú o/rêe o-shwôm o/sét o/fu, â wo a/tî byije ejí a-chi bǎmkpóngé ḿbé me n/kye ǒ, wo a-waa ng wǎ onet-dyishí mú kiǐtí-kyise-kyifen ejí echi ne bufâ-kabám emen, ne me n/chi n-jwo banshwam eyên wǎ eringe nyí mu n-jwo ng banshwam ḿbé barím ejí ḿbé banong, ḿbé mbe ba-bwom m ké bushú ejí. 8Fwôo kâng atông a-jwo, ǎ Jóshwa, mú amu otu-nchi kyifen ejí. Ben to banchi kyifen ejí ḿbé bamu ne nyǐ ké kyikû, ben mú bamu ekap nyí kanong ńké nke ka-bâ ké kashú, fwôo n̂g to atông ba-jwo ńkyí n/fu, n/fu, me n/chi n-kúng ḿgbán ejí mú bada ǎ ekó Kyire-Kyichí n-tông běn. 9Me mu n-tî ng buká bubónge ne bakô káchâtkányi ké bushú ḿbú Jóshwa. Me n/chi n-sáng chwǒm ké mbú, ne ké dyicí dyibónge nké nke, n/chi n-fîm byibî ḿbyí mbyi ké esí ńnyín. 10Ké nkéré mú dyicí ándyi dii/fyi, nang yeě nang yeě o/chi o-kó orî-onet emen o/fu, obâ o-ba-jêe kanong ne bunyîn-dyityém ḿbú busi ḿbú byichí emen ḿbyí byidazím byirim.
Currently Selected:
Zákaryâ 3: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
