Mátyuu 8

Jisos o/chi Onet-Kyibî-Orwôm o-nyange

(Mâk 1:40-45; Lûk 5:12-16)

1Jisos o-fím kyíbóng-kaku ánke o-shû kyísí, bujê-banet ba-dim ne nyǐ ké kyikû. 2Onet obónge mú o/mû o-rwôm m kyibî-orwôm o-bâ kâng o-kâm ǎ, o-tím arông kyísí ké bushú emen, ne o-raa ne nyǐ o/fu, bonchí, â kyi/nyîn ǒ, a-man n mě echi n-nyange.

3Jisos o-tan bubwô o-ta ǎ. O-faa o/fu, kyi-nyîn n mě, orwôm eyên oman. Ké abe ányi, orwôm ámu o-waa ányi o-man. 4Ne Jisos o-sét ǎ kâng o/fu, fwôo atông a-jwo, *dachi a-sét onet nang obónge* nké ca ocǎng kyikit-nchi kyifen-Osówo o-jebe ǒ enyam-byiko eyên. Ne a-chi kâng kyifen a-kye Osówo wǎ eringe nyí Músis o/sét. Eringe nyí kyidatông nang yeě nang yeě o-nyît o/fu, orwôm eyên oo/man.

Jisos o/chi Ḿgbán mú Onet-Dyishí-Basúja ḿbé Rûm o-nyange

(Lûk 7:1-10)

5Ké nkéré mú Jisos oo/nung ké Kapánum, onet-dyishí mú o/mû o-tún n bajam-basúja batánge ḿbé Rûm o/bê o-kâm ǎ, ne o-tîm ǎ arông o/fu, ochwáp ǎ. 6O-sét ǎ o/fu, bonchí, ḿgbán ejí mu ké byise, ké karíng sáre o-rwôm m, ocen oo*man ecen* ne mu o-ri ng busông kanong kanong.

7Jisos o-faa ǎ o/fu, me n/chi m-bâ m-ba-chi ǎ o-nyange.

8Mú onet-dyishí-basúja ámu o-faa ǎ o/fu, kyi*fí éné* ǎ bonchí*. Me n*da/kwárê mú wo adanung ké kyise ejí*. Kye busa nké nke ne ḿgbán ejí o/chi o-nyange. 9Me to mu onet mú mu ké bubwô ḿbú bakínkán-banet-ashí-basúja, ne me mu to ne basúja ḿbé mbe ké bubwô ejí. Me n-sét ng mún n/fu, dim, o-dim. N-sét mú áku n/fu, bâ, o-bâ. Ne n-sét ng to ósóng ejí n/fu, chi ńkyín, o-chi.

10Ké nkéré mú Jisos o/jwo ńkyín, byiko byi/kaa ǎ, ne o-raa ne banet ḿbé ba/mû mbe ba-câ ne nyǐ ké kyikû o/fu, me mu n-sét ng běn n/fu, me n*da/ri ne dyizong-dyityém efé ne me něen* wǎ ńdyín* ké onet-Ézerel nang obónge*. 11Zîim m̂ ńkyín ba/fu, banet chwóó ba/chi ba-fím ké kyicê ńkyí esû edabyí ne ńkyí edaríbî, ba-ba-kyú me ké ókpákpúrúk, ké dyijî, ké Butu ḿbú Osówo ne be Ébarahâm ne Ázik ne Jekôp. 12Nké ḿbé ba/mû ba/chi ba-kyú me ne mbé ké Butu ḿbú Osówo, ba/chi ba-twóp kámbé kyíjí ké kyifip, kyikit ńkyí ba/chi ba-kûtii ba-ryí i asháng. 13Ne Jisos o-raa ne onet-dyishí-basúja ámu o/fu, ca dyijê, ne ńkyí wo a/fé dyityém eyên ké nkyí kyi/chi kyi-chi kyi-kye ǒ.

Ne ḿgbán-onet-dyishí-basúja ámu o-waa ké abe ányi o-nyange.

Jisos o/chi Banet Chwóó ba-nyange

(Mâk 1:29-34; Lûk 4:38-41)

14Jisos o-dim o-wâa kyikit-Pyíta, ne o-ri boné-onyi-Pyíta ányi ké karíng sáre mu o-rwôm m mbyép-byiko. 15O-ta ǎ ké bubwô, mbyép-byiko ámu o-man ǎ. Ne o-bûu nensang, o-kye Jisos byiryíng.

16Ké nkéré mú dyikurúku dii/fyi, banet ba-kpî banet chwóó ḿbé mbe ne byibî-bací, ba-ba-kye Jisos. Jisos o-raa, byibî-bací ámbyi byi-byí kámbé ké byiko, ne o-chi kángkáng banet ḿbé ba/mû mbe ba-rwôm m ba-nyange. 17Nyǐ o/chi ńkyín, eringe nyí ńkyí mkpábé mú odasét byiraa-Osówo, mú odabángê Azáya o/sét, kyidakyú ntûntû. Ńkyí o/fu, nyǐ oyén nké o/kúng erwôm eten, ne o/kúng to byirwóm eten ḿbyí byidakáng oshê omúmú.

Banet ḿbé ba/chi ba-kyú Bǎmgbán ḿbé Jisos

(Lûk 9:57-62)

18Jisos o/ri bujê-banet ḿbé ba/wáp ǎ ba-fé ké kafâ, ne o-sét bǎmgbán emen o/fu, banyáng ba-jâ bukô-baya ḿbú áku. 19Ntánge Byije-Músis obónge o-bâ o-kâm ǎ. O-sét ǎ o/fu, bonchí, me mm/kpá byiko ḿbyí ndadim ne wo, nang a-wâa nyá, nang nyá.

20Jisos o-faa ǎ o/fu, banfâ mbe ne bǎmbwó, bunurung mbu ne aju, nké Wǎn-Onet o*fí ne kyikit ńkyí odarí sáre o-jáng*.

21Onet okíri mú o/mû o-cen n ne nyǐ ké kyikû o-sét ǎ o/fu, bonchí, mîng mě kpá m-bwa esim, n-da-ryii bonchí ejí.

22Jisos o-faa ǎ o/fu, bâ ne me ké kyikû, mîng banet ḿbé baa/kpú ba-ryii banet ebe ḿbé baa/kpú.

Jisos o/chee Afú nyí Aryên

(Mâk 4:35-41; Lûk 8:22-25)

23Jisos o-nung ké ókpǐ, bǎmgbán emen ba-dim ne nyǐ ké kyikû. 24Kyibî-afú kyi-waa ányi kyi-kpet etugi ké baya, kyi-fím ányi bunâng-baya bu-cít ókpǐ. Nké Jisos o/mû mu o-rê ng. 25Bǎmgbán emen ba-dim ba-da-jwóbê ǎ. Ba-sét ǎ ba/fu, nyángê bě, ǎ Otu Kyítá. Be byi/firi ké bukwóp-bukyû.

26Jisos o-faa kámbé o/fu, ben bamu ba-jang ng eshî ebóng. Dyityém enen ńdyí ba/fé ne me dyi*da/jê*. Ne o-bûu kâng nensang o-nyán afú ne bunâng-baya. Ne byikit kángkáng byi-chee beem!

27Nang yeě nang yeě o/waa ocím ké dyishí fúú, ba-kpet ebí ba/fu, ebóng dyizong-onet něen mú nang afú nang bunâng-baya byida ǎ ekye ofê.

Jisos o/chi Banyinchéng Ashí Afee ḿbé mbe ne Byibî-Bací ba-nyange

(Mâk 5:1-20; Lûk 8:26-39)

28Jisos o-ribi ké esí nyí banet-Gádara, ké kyicê-baya ńkyí áku. Banyinchéng ashí afee ba-fím ké akun ba-ba-kâm ǎ. Banet ámbe ba/mû ne byibî-bací, ne ba/mû ba-chi i bushî kanong kanong ḿbú onet nang obónge o*fí mú odarêe dyityém o-cen ké bukwóp ámbu*. 29Ba-waa ányi ba-wonge ba/fu, wo amu a-ryuu ng a/fu, a-chi i bě ebóng, ǎ Wǎn-Osówo. Wo aa/bê bě busông ebakye, ne ochíchí-nkéré o-kûfyi?

30Dyibóng-akûk ńdyí dyi/jê kanong kanong dyi/mû ányi fáráng dyi-ryí i baryî. 31Byibî-bací ámbyi byi-tîm Jisos arông byi/fu, â amu a-bâ bě ebaró, twóm bě byi-da-nung dyibóng-akûk ándyi ké byiko.

32Jisos o-sét kámbyí o/fu, ca n̂g. Ne byi-byí kâng byi-da-nung akûk ké byiko. Dyibóng-akûk ándyi dyimúmú dyi-zóngê dyi-shû ké bukô-kiǐmbém, dyi-da-róng ké baya, dyi-jwáp omu, dyi-kpú.

33Banet ḿbé ba/mû mbe ba-tún n akûk ányi ba-chêe ba-jâ ké oshê, ba-da-sét kiǐshwô ánkyi kyimúmú, ne ńkyí kyi/chi banet ámbe ḿbé ba/mû ne byibî-bací. 34Ne kángkáng banet ké oshê ámu ba-dim ba-kâm Jisos. Ké nkéré mú ba/ri ǎ, ba-tîm ǎ arông ba/fu, odim ké esí ebe.

Currently Selected:

Mátyuu 8: BKY

Highlight

Copy