Mátyuu 9

Jisos o/chi Onyinchéng mú mu o-rwôm m Kyibok o-nyange

(Mâk 2:1-12; Lûk 5:17-26)

1Jisos o/nung ké ókpǐ o-nyáng baya, o-bwa esim ké oshê emen. 2Banet ba-bâ ne onyinchéng obónge sáre ké karíng, mú mu o-rwôm m kyibok ba-kâm ǎ. Jisos o-ri obánge mú mu ké atyém-banet ámbe, ne o-sét mú onyinchéng ámu mú mu o-rwôm m kyibok o/fu, cíp dyityém, ǎ wǎn ejí, mm/pwoo ǒ byibî eyên.

3Ne kyicê-bantánge Byije-Músis ḿbé ba/mû ányi ba-raa ké atyém ebe ba/fu, onyinchéng mún mu o-cábê ng Osówo.

4Jisos o-nyît ńkyí mbé ba/mû ba-kabe ng, ne o-bí kámbé o/fu, ebóng ben bamu ba-kabe ng azong-byibî-byěm ámbyi. 5Kyirá kyidasóng efu, ńkyí ndafu mm/pwoo ǒ byibî eyên aa, aa ńkyí ndafu, bûu nensang a-kpet ecen. 6Me n/chi n-tông běn wááng wááng ba-ri ba/fu, Wǎn-Onet mu ne busa ké ejíí ḿbú odapwoo byibî. Ne o-waa ányi o-sét mú onyinchéng ámu mú o/mû o-rwôm m kyibok o/fu, bûu nensang a-yip karíng eyên a-dim dyijê.

7Onyinchéng ámu o-bûu nensang o-dim dyijê. 8Ké nkéré banet ámbe ba/ri akat ńnyín, bushî bu-róng kámbé, ne ba-kpee Osówo ké dyizong-busa wǎ ńdyín ńdyí o/yip o-kye banet.

Jisos o/kó Mátyuu

(Mâk 2:13-17; Lûk 5:27-32)

9Jisos o-mîng kyikit ánkyi. Ké nkéré mú mu o-cen n o-câ, o-ri nkoo akpuga-dyishí mú odabángê Mátyuu ányi me ké kyikit-bǎmkpóngé emen. Jisos o-sét ǎ o/fu, bâ ne me ké kyikû.

Mátyuu o-bûu nensang, o-dim ne nyǐ ké kyikû.

10Ké nkéré mú Jisos mu o-ryí i byiryíng ké kyise-Mátyuu, bankoo akpuga-dyishí chwóó ne banchi byibî to chwóó ba/bê ba-kâm ǎ, ba-kpet eryí byiryíng ne nyǐ ne bǎmgbán emen. 11Banet-ncibi mú badakó Fárasyî ba/ri ńkyín, ne ba-bí bǎmgbán-Jisos ba/fu, ebóng kyi/chi ne ntánge byiraa-Osówo enen mu o-ryí i byiryíng ne bankoo akpuga-dyishí ne banchi byibî.

12Jisos o-jwo ńkyí ba/raa, ne o-faa kámbé o/fu, banet ḿbé ba*fí ba-rwôm m* baa*ryuu nchi bakye* nké kyi*da/shwôm ḿbé mbe ba-rwôm m nké bada ǎ eryuu*. 13Ca n̂g ba-da-kyé kyikû ba-nyît kyi-kim ne ejá-Osówo ńnyín, nyí ba/sáng kyísí, nyí e/raa e/fu, me n*fí n-ryuu ng byifen echi ḿbyí byirim-byitú* nké mu n-ryuu ng dyityém ecángê. Me n*da/bê biǐtí-banet ekó* nké banchi byibî.

Ḿbím kyi-kim ne Esong ecíp

(Mâk 2:18-22; Lûk 5:33-39)

14Bǎmgbán-Jǒn mú Nkye banet osoo mú Osówo kâng ba-bâ ba-kâm Jisos, ba-bí ǎ ba/fu, ebóng kyi/chi ńkyí be ne banet-Fárasyî byimu byi-cíp ng esong kángkáng nkéré, nké bǎmgbán ḿbé eyên ba*fí ba-cíp ng esong nang kabónge*.

15Jisos o-faa kámbé o/fu, ben ba/kabe ba/fu, banet ḿbé ba/kó kámbé ké dyijî-dyibé ba-kyú u ké busa-dyityém? â oyén-dyibé mu ányi ne mbé? Kyi*fí éné*. Nké nkéré o/chi o-bâ mú ba/chi ba-yip oyén-dyibé ba-dim ne nyǐ, ne fím ányi, mbé ba/chi ba-kûcíp esong.

16Onet o*fí nang obónge mú odakúng kaǎcê-kyídí ńké kafyîfî o-tim mbyí mú ké okâa-kyídí*. Ké ebóng, dyizong-mbyí ándyi etim dyi-ját ng kyídí, dyi-bwa dyi-chi ochǐng mbyí o-bwa o-rêe o-shwôm. 17Nang onet to o*fí nang obónge mú odakúng bato ḿbé dyicí o-fé ké bakâa-byiféng*. Â o/chi éné, bakâa-byiféng ámbe ba/chi ba-ché. Bato kâng ba-pwôo, bakâa-byiféng to ba-bên. Nké bato ḿbé dyicí ba-fâ ké byiféng-bato ḿbyí byifyîfî, ne mbyí byimúmú byi/chi byi-kyú kanong.

Wǎn-Onyinyi mú Onet-Dyishí-Banet-Jûs ne Onyinyi mú o/ta Nkyû-Jisos

(Mâk 5:21-43; Lûk 8:40-56)

18Ké nkéré mú Jisos mu o-sét ng kámbé ńkyín, onet-dyishí mú banet-Jûs o-bâ o-kâm ǎ. O-tím arông kyísí ké bushú emen, ne o-sét ǎ o/fu, wǎn ejí mú onyinyi oo/kpú abeabe. Nké bâ a-ba-twôom ǎ bubwô ké byiko, ne o/chi o-jwóbê.

19Jisos o-bûu kâng nensang o-dim ne nyǐ ké kyikû. Bǎmgbán emen to ba-dim ne nyǐ ké kyikû.

20Onyinyi obónge mú oo/ri busông kanong kanong ké aje diǐkpú ne afee, ḿbú bunyinyi mbu bu-byí i ǎ, o-câ Jisos ké esim, o-ta ocím-nkyû emen. 21O-raa ké dyityém emen o/fu, â m/kpikpat n-ta nkyû emen, n/chi n-nyange.

22Jisos o-bírî achi ké esim o-ri ǎ, o-sét ǎ o/fu, cíp dyityém, ǎ wǎn ejí. Dyityém eyên ńdyí a/fé ne me dii/chi ǒ a-nyange. Ké abe ányi, onyinyi ámu o-waa o-nyange.

23Jisos kâng o-da-nung ké kyise-onet-dyishí-banet-Jûs ámu. Ké nkéré mú o/ri banet ḿbé mbe ba-kim m ane ké bukyû, ne banet ḿbé ba/firi buubuu, 24o-sét kámbé o/fu, shwôm m̂ kyíjí ashí amúmú. Mú wǎsíng o*da/kpú* mu o-rê ng orěng.

Mbé kángkáng ba-kpet ǎ efát kakim. 25O-ró ng kámbé o-bâ, nyǐ o-shwôm o-da-nung ké nfût mú mú wǎsíng-onyinyi ámu, o-níbî ǎ ké bubwô, mú wǎsíng-onyinyi o-bûu nensang. 26Bǎmpém kyi-kim ne chwǒm ńkyín ba-káng ké kángkáng kyicê-oshê ámu.

Jisos o/chi Banyinchéng Ashí Afee ḿbé Achi a/sêe Kámbé ba-kûrángê

27Jisos o-mîng kyikit ánkyi. Ne ké nkéré mú mu o-cen n o-câ, banyinchéng ashí afee ḿbé achi a/sêe kámbé ba-kpet ecen ba-câ ne nyǐ ké kyikû. Ba-wonge ba/fu, wǎn-Otu Dívit, ri bě bafip.

28Ké nkéré mú Jisos oo/nung ké kyise, banyinchéng ámbe ashí afee ba-dim ba-kâm ǎ. Nyǐ o-bí kámbé o/fu, ben ba/bángê ne atyém enen ba/fu, me m-man n echi ńkyín dí.

Mbé ba-faa ba/fu, byi/bángê, ǎ bonchí.

29Jisos o-ta kámbé ké achi kâng, o-raa o/fu, kyi/bát kyichi kâng éné wǎ eringe nyí ben ba/bángê. 30Ne achi ebe a-bâa. Jisos o-kuri kámbé ekó o/fu, *da n̂g echi ba-sét onet nang obónge ńkyín*.

31Nké mbé ba/dim ba-sét bapem kyi-kim ne Jisos ba-káng ké kángkáng kyicê-oshê ámu.

Jisos o/chi Onyinchéng mú o/mû Kiǐmyímé o-kûraa

32Ké nkéré mú banyinchéng ámbe ba-kú ba-dim m, banet bakíri ba-níbî onyinchéng obónge mú o*fí o-man n eraa kyiraa* ké ebóng, mu ne kyibî-bucí, ba-ba-kye Jisos. 33Ké nkéré mú Jisos o-ró ng kyibî-bucí ánkyi o-bâ, onyinchéng ámu o-kpet eraa kyiraa. Nang yeě mú o/mû ányi o/waa ocím ké dyishí fúú. Ba-kpet eraa ba/fu, be byi/mû byi*da/ri ne dyizong ńdyín* ké Ézerel*.

34Nké banet-ncibi mú badakó Fárasyî ba/faa ba/fu, Otu-Byibî-Barím nké mu o-kyâ ǎ busa ḿbú mu o-ró ng kámbé.

Jisos o/ri Banet Bafip

35Jisos kâng o-cen o-wáp o-ri kángkáng eshê ne kángkáng boǒshê to ḿbú boǒníng, o-tángê banet ké byise-ékwâbashi ebe ḿbyí banet-Jûs, o-sét Bǎmpém ḿbé Banong kyi-kim ne Butu ḿbú Osówo, o-chi to banet ba-nyange ké kángkáng azong-byirwóm ne ké kángkáng azong-busông to nyí ba/mû ba-ri ng. 36Ké nkéré mú nyǐ o/ri azu-bujê-banet, bafip ba-chi ǎ ne mbé, ké ebóng, ofong o/mû mu o-kédê ng kámbé, ne ba*fí ne onet mú odachwáp kámbé* wǎ etám-ebû nyí e*fí ne onet mú odatún kányí*. 37Jisos o-raa kâng ne bǎmgbán emen o/fu, byiryíng byi/jê ḿbyí badafuu, nké banfufǔng ḿbé badafuu kámbyí ba-tî ba*da/jê*. 38Fé n̂g nshwam ba-kye oyén-kyifát, eringe nyí o/chi o-twóm banfufǔng ḿbé badafuu byiryíng emen ba-tî.

Currently Selected:

Mátyuu 9: BKY

Highlight

Copy