Mátyuu 26

Ba/nam Jisos Dyiju

(Mâk 14:1-2; Lûk 22:1-2; Jǒn 11:45-53)

1Ké nkéré mú Jisos oo/tángê kángkáng byěm ḿbyín o-mîng, o-raa ne bǎmgbán emen o/fu, 2ací afee, wǎ eringe nyí ben bamu ba-nyît ng, kyi/chi kyi-kyú dyijî-kyifen eten ńkyí Shwôm, ne ba/chi ba-níbî Wǎn mú Onet ba-kye ba/fu, bamán ǎ ké kyikwap ńkyí badashwân onet.

3Batu-banchi kyifen-Osówo ne bakínkán-banet-Jûs kâng ba-cibi kyikit kyibónge ké kyibám-butu ńkyí Káfas mú mu otu-nchi kyifen-Osówo, 4ne ba-tóbê eringe nyí badakám Jisos ké kadip ba-ju. 5Ba-raa ne barî ba/fu, byi*dachi byi-chi kánkyí ké nkéré mún mú dyijî* kyi*fí éné* banet ba/chi ba-twóp bě bunwa.

Ba/pwó Jisos Bakút ké Dyishí, ké Oshê mú badakó Bétányi

(Mâk 14:3-9; Jǒn 12:1-8)

6Ké nkéré mú Jisos mu ké kyise ńkyí Sámon mú o/mû o-rwôm m kyibî-orwôm, ké Bétányi, 7onyinyi obónge o/bê o-kâm ǎ ne ókpúmá-bakút ḿbé badanyîn kyinung ne ba-shwane e to kasî, o-pwó Jisos kámbé ké dyishí, nkéré mú Jisos mu o-ryí i byiryíng. 8Nké ké nkéré mú bǎmgbán emen ba/ri kánkyí, kafâ ka/kpet esa kámbé. Ba-bí ba/fu, ebóng kyi/chi ne ba-bên bakút ḿbén. 9Ké ebóng, ba/mû ba-man n eshee bakút ḿbén ké bujê-akpuga, ba-kúng kányí ba-kye banet-kyikpu.

10Jisos o/nyît ńkyí ba/mû mbe ba-raa ng, ne o-raa ne mbé o/fu, ebóng kyi/chi ne ben bamu ba-kyâ onyinyi mún afaníkong. Ké ebóng, nyǐ oo/chi mě chwǒm ńkyí kyinong kyinong. 11Ben ba-man ba-kyú ne banet-kyikpu kángkáng nkéré, nké me mm*ba/chi n-kyú ne ben kángkáng nkéré*. 12Ńkyí nyǐ o/chi, nyǐ o/pwó mě bakút ḿbén ké byiko, eringe nyí oda mě ekpá byiko ḿbyí bada mě eryii. 13Kû n̂g ezîim ńkyín ba/fu, nang kyikit kyirá ńkyí ba/chi ba-sét Bǎmpém ḿbén ḿbé Banong ké ejíí emúmú, ńkyí nyǐ oo/chi něen ba/chi ba-sét kánkyí ké ozîim emen.

Júdas o/bángê o/fu, Nyǐ o-chi i ba-kám Jisos

(Mâk 14:10-11; Lûk 22:3-6)

14Ḿgbán emen obónge kâng ké burwám-bǎmgbán emen ḿbé ashí diǐkpú ne afee mú odabángê Júdas-Esakáryot o-dim o-kâm batu-banchi kyifen-Osówo. 15O-bí kámbé o/fu, ben ba/chi ba-kye mě ebóng, â n/níbî Jisos n-kye běn. Ba-pan akpuga bujam esim diǐkpú nyí ba/chi ké syílyíba ba-kye ǎ. 16Kyi-fím ányi kâng, Júdas o-kpet ekyé bukwóp ḿbú bunong, ḿbú nyǐ odachi ba-kám Jisos.

Jisos o/ryí Byiryíng-Dyijî-Kyifen ńkyí Shwôm ne Bǎmgbán Emen

(Mâk 14:12-21; Lûk 22:7-14; Jǒn 13:21-30)

17Ké mbwôp kashú-dyicí-dyijî-kyifen ńkyí Berêt, bǎmgbán emen ba/ba ǎ ekâm ba-bí ǎ ba/fu, kyikit kyirá ńkyí wo amu a-ryuu ng a/fu, be byida-rám byiryíng-dyijî-kyifen ńkyí Shwôm, byi-tî ǒ.

18O-faa kámbé o/fu, ca n̂g kyikit-onyinchéng obónge ké Jerúsélem, ba-sét ǎ ba/fu, ntánge byiraa-Osówo o/fu, nkéré emen oo/fyi. Bǎmgbán emen ne nyǐ ba/chi ba-chi dyijî ké kyise eyên.

19Bǎmgbán emen ba-chi wǎ eringe nyí Jisos o/sét kámbé, ba-rám byiryíng-dyijî ándyi.

20Ké nkéré mú dyikurúku dii/fyi, Jisos ne bǎmgbán emen ḿbé ashí diǐkpú ne afee ba-kyú me ba/fu, mbé ba-ryí i byiryíng. 21Ké nkéré mú mbe ba-ryí i byiryíng ámbyi, Jisos o-raa o/fu, me mu n-sét ng běn ntûntû n/fu, onet obónge ké burwám enen o/chi o-chi ba-kám mě.

22Kafâ ka-bírî bǎmgbán emen, ba-kpet ǎ ebí ké onet ké onet ba/fu, *chí me nké amu a-raa ng ké ntûntû* ǎ Otu Kyítá*.

23Jisos o-faa o/fu, onet mú o/tip berêt emen ké dyicáng dyibónge ne me nké o/chi o-chi ba-kám mě. 24Wǎn mú Onet o/chi o-kpú wǎ eringe nyí ejá-Osówo nyí ba/sáng kyísí e/sét e/fu, nyǐ o/chi o-kpú, nké kyi/chi kyi-bên kanong kanong ne onet ámu mú o/chi o-chi ba-kám Wǎn mú Onet. Kyi/mû kyi/chi kyi-kyú kanong ne onet ámu, â ba/mû ba*da ǎ efwon*.

25Júdas mú o/chi ba-kám ǎ, o-raa o-bí ǎ o/fu, *chí me nké amu a-raa ng ké ntûntû* ǎ ntánge byiraa-Osówo*.

Jisos o-faa o/fu, éné nké wo a/fu.

Byiryíng ḿbyí Otu Kyítá

(Mâk 14:22-26; Lûk 22:15-20; 1 Koríntyan 11:23-25)

26Ké nkéré mú mbe ba-ryí i byiryíng, Jisos o-yip berêt, o-kó Osówo asǎma, o-ját kámú o-kye bǎmgbán emen. O-raa o/fu, koo n̂g ba-ryí, nyín něen enyam-byiko ejí.

27O-kúng to kâng mmîk-bato, o-kó Osówo asǎma, o-kye kámbé to. O/fu, jwáp n̂g ashí enen amúmú. 28Ké ebóng, nyín něen baróng ejí ḿbé ba/kúlî ocím mú Osówo o/ryí o-sem byiko emen, baróng ejí ḿbé ba/chi ba-byí mě ké byiko, ké dyishí-banet chwóó, ké byibî epwoo. 29Me mu n-sét ng běn n/fu, me mm*ba/chi n-chîjwáp bato ḿbén* tata dyicí ńdyí ndajwáp ḿbé bafyîfî ne ben ké Butu ḿbú Bonchí ejí.

30Ba-kwán kâng okwan, ne ba-dim ba-wâa ké kaku ńké Ólif.

Jisos o/sét Wááng o/fu, Pyíta o/chi o-né ǎ

(Mâk 14:27-31; Lûk 22:31-34; Jǒn 13:36-38)

31Jisos o-sét kámbé kâng o/fu, buchú ḿbú kurún ḿbún ben ashí amúmú ba/chi ba-chêe ba-mîng mě, ké ebóng, ejá-Osówo nyí ba/sáng kyísí e/fu, Osówo o/chi o-ju mbâm ebû, ne dyibóng-ebû dyi/chi dyi-jaa byiryibyiryi. 32Nké ké nkéré mú Osówo oo/jwóbê mě ké bukyû, me n/chi m-bwóp běn kashú n-wâa Gályílyi.

33Pyíta o-faa ǎ o/fu, me mm*ba/chi m-mîng ǒ ne banyá* nang ḿbé áku kángkáng ba/mîng ǒ.

34Jisos o-faa Pyíta o/fu, zîim ńkyín a/fu, ne otúkwa o-kûkó ké buchú ḿbú kurún, wo a/chi a-fu kampén kachât a/fu, wo a*fí a-nyît ng mě*.

35Pyíta o-faa o/fu, me mm*ba/chi n-fu ne banyá n/fu, me n*fí n-nyît ng ǒ* â nang nkyi ńkyí ndakpú ne wo*.

Ne mbé bǎmgbán-Jisos ashí amúmú ba-raa to eringe ebónge.

Jisos o/fé Nshwam ké Kyikit ńkyí badakó Geséményi

(Mâk 14:32-42; Lûk 22:39-46)

36Jisos ne bǎmgbán emen ba-dim kâng ba-wâa ké kyikit ńkyí badakó Geséményi, ne o-raa ne mbé o/fu, kyú n̂g nyín, n-ca ké kashú n-da-fé nshwam. 37O-kpî Pyíta ne bwǎn-Zébédyi ashí afee. Bafip ne ofong ekédê byi-sú ǎ byiko, 38ne o-sét kámbé o/fu, bafip baa/sú mě ké dyityém éné wǎ m-kpú u. Kyú n̂g nyín ba-bám ne me ké kyikû.

39O-tín o-jâ ké kashú kaǎnyín, o-fé bushú kyísí, ne o-fé nshwam o/fu, Kyítá, â kyi-nwa ng echi, koo mě mmîk-busông eri mún. Nké *chí ńkyí me mu n-ryuu ng* nké ńkyí wo amu a-ryuu ng.

40O-bwa kâng esim o-kâm bǎmgbán emen ámbe ashí achât, ne o-ri o/fu, ba-kú ba-rê ng. O-raa kâng ne Pyíta o/fu, ebóng ńkyí ben ashí achât baa*man ebám ne me ké kyikû* ké nang kaǎnyín-nkéré*. 41Kû n̂g ebám ba-fâ nshwam, eringe nyí baa*ba/chi ba-nung ké okan*. Dyityém ndyi dyi-ryuu ng, nké enyam-byiko nké nyi kyeekyee.

42Jisos o-chîdim ké kampén kafee o-da-fé nshwam. O/fu, â mmîk busông eri mún oo*nwa ekoo* kyi*da/shwôm tata me n-jwáp kámú* kyichi kâng wǎ eringe nyí wo a/kabe. 43O-chîbwa esim kabónge o-ba-ri bǎmgbán emen mbe ba-rê ng. Mbé ba*da/man ebâa achi ebe*.

44Jisos o-chîmîng kámbé o-dim o-da-fé nshwam ké kampén kachât, o-raa dyizong-ejá ányi ebónge. 45Ne o-bwa esim kâng o-kâm bǎmgbán emen, o-raa o/fu, ben ba/tôong ba-rê ng? Nkéré oo/fyi mú badaníbî Wǎn mú Onet ba-kye ké abwô nyí busa ḿbú banchi byibî. 46Bûu n̂g nensang, byi-dim m̂. Onet mú mu o-bâ echi ba-kám mě oo/fárâng.

Ba/kám Jisos

(Mâk 14:43-50; Lûk 22:47-53; Jǒn 18:3-12)

47Jisos o/mû o/tôong o-raa ng, ńdyí Júdas mú o/mû ké burwám-bǎmgbán emen ḿbé ashí diǐkpú ne afee o/baribi. Bujê-banet ba/mû ne nyǐ ké kyikû ne bushwám ne echí, ḿbé batu-banchi kyifen-Osówo ne bakínkán-banet-Jûs ba/twóm kámbé. 48Júdas mú mu o-chi i ba-kám ǎ o/mû oo/sét kámbé ńkyí nyǐ odachi. O/fu, onet mú me n/chi n-rwâm ǎ, nyǐ nké ben bamu ba-ryuu ng. Kám m̂ ǎ.

49Ké nkéré mú Júdas o/ribi, o-shwôm oshwǒm o-kâm Jisos, o-raa o/fu, bunyîn-dyityém bukyú ne wo, ǎ ntánge byiraa-Osówo, o-rwâm ǎ.

50Jisos o-faa ǎ o/fu, ca kashú babap kyi-kim ne nkyí, ǎ ocín.

Mbé kâng ba-bâ ba-kám Jisos ba-níbî ǎ kanong kanong. 51Onet obónge ké burwám-banet ḿbé ba/mû ne Jisos o-zú kashwám emen o-kpet ósóng-otu-nchi kyifen-Osówo mú onyinchéng ké butông o-két. 52Jisos o-raa kâng ne nyǐ o/fu, bwa ne kashwám eyên a-shwá ké nkwóp, ké ebóng, kángkáng banet ḿbé mbe ba-kúng ng kashwám ba-kpú u ké nké. 53Wo a*fí a-nyît ng a/fu, me m-man n esét Bonchí ejí n/fu, ochwáp mě*? ne ké abe ányi, nyǐ o-man n mě etwóm barím ḿbé banong ḿbé baa*nwa epan* ḿbé bannwa byití*? 54Nké ké bukwóp ámbu, ejá-Osówo nyí ba/sáng kyísí e-cen n nǎ ne e-kyú ntûntû, nyí e/fu, kyi-man kyi-chi ké bukwóp ḿbún.

55Jisos o-raa kâng ne bujê-banet ámbe o/fu, ben ba/bê mě ekám ne bushwám ne echí wǎ me n-chi i njii kajii? Kángkáng ací, me m/mû mu n-kyú u me, n-tángê e ké kiǐtí-kyise-kyifen-Osówo echi, ne ben ba*da mě ekám*. 56Nké ḿbyín něen kángkáng bii/chi, eringe nyí ńkyí bamkpábé ḿbé badasét byiraa-Osówo ba/sáng ké ejá-Osówo nyí ba/sáng kyísí, kyidakyú ntûntû.

Bǎmgbán emen kángkáng ba-mîng ǎ kâng ba-chêe.

Jisos o/bwom ké Bushú-Esuk nyí Banet-Jûs nyí Eryên

(Mâk 14:53-65; Lûk 22:54-55, 63-71; Jǒn 18:13-14, 19-24)

57Banet ḿbé ba/kám Jisos ba/kúng ǎ ba-dim ne nyǐ ké kyise ńkyí Káfas mú otu-nchi kyifen-Osówo, ké kyikit ńkyí bantánge Byije-Músis ne bakínkán-banet-Jûs ba/cibi. 58Pyíta o-câ ne nyǐ ké kyikû kwán ké esim tíbítíbí tata ba-ribi ké kyibám ńkyí kyise-otu-nchi kyifen-Osówo ámu. O-nung ké kafâ-kyibám ánkyi o-da-kyú me ne ḿbé bambâm kyibám ánkyi, eringe nyí odari kángkáng byěm ḿbyí byi/chi byi-chi. 59Batu-banchi kyifen-Osówo ne kángkáng banet-esuk nyí banet-Jûs nyí eryên ba-kan ekyé ejá-mpan nyí badasét ba-bât Jisos, eringe nyí bada ǎ eju, 60nké ba*da/ri nang ebónge* nang ké banet chwóó ba/basét kyisédéng ba-bât ǎ. Ké nkuli kyikû, banet ashí afee ba-tín ba-bâ ké kashú, 61ba-raa ba/fu, onyinchéng mún o/fu, nyǐ o-man n ebú kiǐtí-kyise-kyifen-Osówo echi, ne â ací a/shwôm achât, o-chîbi kánkyí.

62Otu-nchi kyifen-Osówo ámu o-bûu nensang, o-bí Jisos o/fu, wo a*fí ne ojá mú adafaa ké kyiraa ńkyín ńkyí ba/sét ba-bât ǒ*? 63Nké Jisos o/cíbî ńké emen pyêp. Otu-nchi kyifen-Osówo o-chîraa ne nyǐ o/fu, ké dyizîn ńdyí Osówo mú mu okpó, me n/sét ǒ n/fu, sem Osówo. Sét bě â wo a-chi i onet ámu mú Osówo o/kúng ǎ butu, mú mu Wǎn mú Osówo.

64Jisos o-faa ǎ o/fu, éné nké wo a/fu. Nké me mu n-sét ng běn ashí kángkáng n/fu, kyi-fím ké nkéré mún kyi-ca kashú, ben ba/chi ba-ri Wǎn mú Onet me ké kyicê ńkyí bubwô-etyebéng-Osówo mú kángkáng busa ne ké mu o-bâ to ké ófíbí mú kyíbóng.

65Ké nkéré mú o/raa ńkyín, otu-nchi kyifen-Osówo ámu o-ját byídí ké byiko, o-raa o/fu, oo/cábê Osówo. Be byi*fí to byi-ryuu ng byi/fu, ntûesé okíri ochîsét*. Ben baa/jwo byibî-byiraa emen ḿbyí o/raa. 66Ben ba/kabe nǎ.

Mbé ba-faa ba/fu, o/chi kyibî, ne o-man o-kpú.

67Ba-shú ǎ kâng akorong ké bushú, ba-díp ǎ buchí. Banet ḿbé ba/díp ǎ akwâ 68ba-raa ba/fu, sét bě, ǎ onet mú Osówo o/kúng ǎ butu. Kabe onet mú o/díp ǒ.

Pyíta o/né Jisos

(Mâk 14:66-72; Lûk 22:56-62; Jǒn 18:15-18, 25-27)

69Pyíta o/mû o/tôong ányi kyíjí me ké kyibám, ńdyí wǎn-onyinyi obónge mú mu ḿgbán-otu-nchi kyifen-Osówo o/ba ǎ ekâm o-raa o/fu, wo to a/mû ne Jisos mú o/fím Názáret.

70Nké nyǐ o/né kánkyí ké bushú ebe ashí kángkáng. O-faa o/fu, me n*fí n-nyît ng ńkyí wo amu a-raa ng*. 71Ne o-byí kâng o-wâa ké mpúbi. Wǎn-onyinyi okíri mú mu to ḿgbán o-ri ǎ, o-raa ne banet ḿbé mbe ányi o/fu, nyǐ o/mû ne Jisos mú o/fím Názáret.

72Pyíta o-chîné kánkyí, o-faa o/fu, me n/sem Osówo n/fu, me n*fí n-nyît ng onyinchéng ámu*.

73Ké nkéré mú kaa/bwon kaǎnyín, banet ḿbé ba/mû ba/bwom ányi ba-bâ ba-kâm Pyíta. Ba-raa ba/fu, ké ntûntû, wo to onet ebe. Ké ebóng, ejá eyên nyí amu a-raa ng nyi wǎ nyí ebe.

74Pyíta o-sem Osówo o/fu, kyi/bát Osówo okye mě busông, â me n*fí n-sét ng ntûntû*. Me n*fí n-nyît ng onyinchéng ámu*.

Ké abe ányi, otúkwa o-waa o-kó. 75Ne Pyíta o-zîim ńkyí Jisos o/mû o/sét ǎ o/fu, ne otúkwa o-kûkó, wo a/chi a-fu kampén kachât a/fu, wo a*fí a-nyît ng mě*. O-byí kyíjí, o-da-tii kanong kanong.

Currently Selected:

Mátyuu 26: BKY

Highlight

Copy