Máláka 3
3
1Óburúkpâbí mú o/rêe o-shwôm o/faa o/fu, n/chi n-twóm [onet-kyitwóm ejí] o-ba-bwât kiǐfáng o-tî mě. Ne Óburúkpâbí mú ben bamu ba-kyé ng o/chi o-bâ ké kiǐtí-kyise-kyifen emen echi baa*tî ekpu*. Onet-kyitwóm mú bamu ba-ryuu ng ba/fu, ben ba-ri ng o/chi o-bâ o-ba-sét ocím ejí mú n/ryí n-sem byiko ejí.
2Nké yeě o/chi o-man ecíp dyityém o-bwom ké dyicí ńdyí nyǐ o/chi o-bâ. Yeě o/chi o-man efem â nyǐ o/bê. Nyǐ o/chi o-kyú wǎ nsôp mú odashwane, wǎ okwâ-bure. 3Nyǐ o/chi o-ba-pan banet mpan wǎ onet mú odabwât syílyíba o-chi o-kûnwa o-shwôm. Eringe nyí nree bure odabwât syílyíba ne gûl o-chi byi-firi kanong, éné to nké onet-kyitwóm mú Óburúkpâbí o/chi o-bwât banchi kyifen-Osówo ba-firi kanong, eringe nyí mbé badakûman echi byifen ḿbyí byinong ba-kye Óburúkpâbí. 4Kyi-fím ányi kâng, byifen ḿbyí banet ḿbé Júda ne Jerúsélem mbe ba-chi i ba-kyâ Óburúkpâbí byi/chi byi-kû ǎ enyîn, wǎ eringe nyí byi/mû byi-nyîn n ǎ ké nkéré mú o/shwôm ké esim.
5Óburúkpâbí mú o/rêe o-shwôm o/raa o/fu, n/chi m-byí m-ba-pan běn mpan, ne kii*ba/chi kyi-kúng mě nkéré ne n-sét banet ḿbé mbe ba-chi i bambirirím* ne ḿbé mbe ba-chi i byinam* ne ḿbé mbe ba-bên n dyizîn ejí* ne ḿbé baa*kye banet-bǎmkpóngé ebe akpuga ebe kerededet* ne ḿbé mbe ba-cít ng banyǐnkú ne bwǎn-byibén ne bacinbánet* ne kángkáng banet ḿbé ba*fí ba-kyâ mě ofê*.
Eyáré nyí badakye Óburúkpâbí
6Me n-chi i Óburúkpâbí mú o/rêe o-shwôm, ne me nn*yángê*. [Ne ké bubwô ámbu, ben mú kyikû-banet ńkyí Jekôp ba*da/tánê ne kángkáng*.] 7Ben, wǎ banchí enen ḿbé kpákpá, baa/bírî byije ejí esim, ne ba*da/tî kámbyí*. Bwa n̂g esim ba-kâm mě, ne me to n/chi m-bwa n-kâm běn. Nké ben bamu ba-bí ng ba/fu, be byi-chi i nǎ ne byi-bwa esim byi-kâm ǒ. 8Me mu m-bí ng běn n/fu, kyi-nwa ng ńkyí onet oda mě ejii me Osówo kajii? Kii*nwa ńkyí bada mě ejii kajii* nké ben bamu ba-jii ng mě kajii. Ben bamu ba-bí ng ba/fu, byimu byi-jii ng ǒ kajii nǎ. Bamu ba-jii ng mě kajii ké eyáré nyí kyikit kyibónge ekye ké byikit diǐkpú ne ké byifen ḿbyí bamu ba-chi i ba-kyâ mě. 9Me nn/shú běn ashí amúmú, ké nǎ, oshê omúmú mu o-jii ng mě kajii. 10Bâ n̂g ne eyáré enen nyí badakye kyikit kyibónge ké byikit diǐkpú kerededet ké kiǐtí-kyise-kyifen ejí echi, eringe nyí byiryíng byidajê ké nkyí. Kan n̂ mě, ne ben ba/chi ba-ri ba/fu, me n/chi m-bâa afyi nyí bubóng n-kye běn eyáré nyí kángkáng azong-byěm ḿbyí byinong. 11Mm*ba/chi m-bángê agurubí a-bên běn byíkwôn* ne byíkwôn enen byi/chi byi-zím chwóó. 12Ne kángkáng eshê nyí ké ejíí e/chi e-kó běn banet ḿbé mbe ké bunyîn-dyityém, ké nǎ, esí enen e/chi e-kú mě enyîn.
Osówo o/ryí Ocím o/fu, Nyǐ o-ri ng Banet Bafip
13Óburúkpâbí o/raa o/fu, ben baa/raa byibî-byiraa kyi-kim ne me. Nké ben bamu ba-bí ng ba/fu, be byi/raa ebóng kyi-kim ne wo. 14Ben baa/raa ba/fu, kyi*da/byí chwǒm* ńkyí onet odafé Osówo*. Ebóng be byidachi ńkyí nyǐ mu o-sét ng, ne ńkyí byidafu byi-tông ng Óburúkpâbí mú o/rêe o-shwôm byi/fu, byiko byi/kpú bě ké ńkyí be byi/chi. 15Wǎ eringe nyí be byimu byi-ri ng, bantông byiko nké mbe ké bunyîn-dyityém. Byibî-banet byi*fí byi-já ng byěm nké nke* mbe ba-yip ng to byibî-byěm ebe ba-kan n pyêp ecíbî mú Osówo mu o-cíbî ng, nang chwǒm kii*chi kámbé*.
16Banet ḿbé mbe ba-shî ng Óburúkpâbí ba-raa kâng ne barî, ne Óburúkpâbí o-fwôo atông o-jwo ńkyí ba/raa. Ba/bwom ké bushú emen ba-sáng azîn nyí kángkáng banet ké nwet, ḿbé mbe ba-shî ng Óburúkpâbí, ba-kyâ ǎ ofê. 17Óburúkpâbí mú o/rêe o-shwôm mu o-raa ng o/fu, mbé ba/chi ba-kyú banet ejí. Ké dyicí ńdyí n/chi n-faa ojá, mbé ba/chi ba-kyú banet ḿbé ejí me oyén. Me n/chi n-ri kámbé bafip wǎ eringe nyí bonchí mu o-ri ng wǎn emen mú mu o-kyâ ǎ ofê bafip. 18Banet ejí ba/chi ba-chîri ńkyí kyidachi onet mú onong ne ńkyí kyidachi kyibî-onet, ne ńkyí kyidachi onet mú mu o-fâ mě ne mú o*fí o-fâ mě*.
Currently Selected:
Máláka 3: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
