Máláka 2
2
1Óburúkpâbí mú o/rêe o-shwôm o/raa ne banchi kyifen emen o/fu, kyije ńkyín kyi/kim ne ben. 2Ba-man ba-kye mě ofê ké byěm ḿbyí bamu ba-chi i. Â ba*fí ba-fwôo ng atông ba-jwo ńkyí mu n-sét ng* n/chi n-shú běn. N/chi m-bên byěm ḿbyí bamu ba-koo ng, ḿbyí bamu ba-kpen n ké mbyí. Ké ntûntû, mm/bên kámbyí nyáá, ké nǎ, ba*fí ba-kúng ng kyije ejí róró*. 3N/chi n-kye bwǎn enen busông, n-yip abîng-enyam nyí bamu ba-chi i kyifen n-sabe běn ké bashú, ne ba/chi ba-yip běn ba-twóp ké kyikit ńkyí mbe ba-pwó ng abîng-enyam. 4Nkéré ámu kâng nké ben ba/chi ba-nyît ba/fu, me n/fé běn kyije ńkyín, eringe nyí ocím ejí mú n/ryí ne banchi kyifen ejí ḿbé kyikû-banet ńkyí Lyíva oo*ba/chi o-bên*.
5Ké ocím ejí mú n/ryí, me n/ryí kámbé ocím n/fu, n-kyâ kámbé dyikpen, n-chi kámbé ba-kyú kanong, ne byěm ḿbyín nké n/kye kámbé eringe nyí mbé bada mě ekye ofê. Ké ací nyí áku, mbé ba/kye mě ofê, ba-shî mě. 6Mbé ba/tángê byěm ḿbyí dángdáng, *chí ḿbyí byi*fí dángdáng*. Mbé ba/kyú ké bunyîn-dyityém ne me. *Chí mbé bayén nké nke ba/chi ńkyí kyi/mû kanong* nké ba/chwáp to banet bakíri chwóó ba-mîng byibî echi. 7Nkyi bǎmkpóngé ḿbé banchi kyifen ejí ńkyí badatángê banet ba-nyît mě kanong kanong. Banet baca ba-kâm kámbé ba-da-kwâa ńkyí me mu n-kabe ng, ké nǎ, mbé ba-chi i banet-kyitwóm ḿbé Óburúkpâbí mú o/rêe o-shwôm.
8Nké kántîk, ben banchi kyifen ejí baa/mîng kiǐfáng ńkyí dángdáng. Byěm ḿbyí bamu ba-tángê e bii/chi banet ba-kú ba-chi i byibî. Baa/bên ocím mú n/ryí ne ben. 9Ké bubwô ámbu, me to n/chi n-chi banet ḿbé Ézerel ba-né běn, ké nǎ, ben ba*fí ba-chi i ńkyí n/sét běn* ne â ba-kú ba-tángê e banet ejí, ba*fí ba-kúng ng kángkáng banet eringe ebónge*.
Banet ḿbé Ézerel ba*da/fé Dyityém ne Osówo*
10Be kángkáng byi*fí ne bonchí obónge dí*. *Chí Osówo obónge nké o/chi bě ashí kángkáng*? Ebóng kâng ńkyí byimu byi-bên n ocím mú byi/ryí ne barî, ne ebóng byimu byi-bên n ocím mú Osówo o/ryí ké dyizîn emen ne banchí eten ḿbé kpákpá. 11Banet ḿbé Júda baa/bên ocím ebe mú ba/ryí Osówo, ne baa/chi kiǐtí-kyibî-chwǒm-ociring ké Jerúsélem ne ké oshê omúmú. Mbé baa/bên kiǐtí-kyise-kyifen-Osówo echi ńkyí nkyi kyi-jê ng Óburúkpâbí. Banet baa/bé banyinyi ḿbé mbe ba-fâ esówo ekíri. [ 12Kyi/bát Óburúkpâbí ofîm onet mú o/chi dyizong-chwǒm ńdyín o-byí ké oshê mú Ézerel, ne o*dachi o-chî ǎ ebángê o-kyú ké byifen ḿbyí oshê eten mu o-chi i o-kyâ Óburúkpâbí mú o/rêe o-shwôm*.]
13Chwǒm kyikíri ńkyí bamu ba-chi i nkyi něen. Ben bamu ba-cok ng kyikit-kyifen echi ńkyí Óburúkpâbí ne batíí, ba-tii ng bukyû, ké nǎ, nyǐ o*fí to o-koo ng byifen ḿbyí bamu ba-chi i ba-kyâ ǎ*. 14Ben bamu ba-bí ng ńkyí kyi/chi ne o*fí to o-koo ng kámbyí*. Nkyi, ké nǎ, nyǐ mu o-nyît ng o/fu, ben baa/bên ocím enen mú ba/ryí onyi mú ben ba/bé ké nkéré mú ba/mû ba/tôong byisat. Onyi ámu o/mû onyi-dyityém, nké ben baa/bên ocím mú ba/ryí ǎ, nang ké ba/mû ba/ryí ocím ké bushú ḿbú Osówo ba/fu, ben ba-fâ dyityém enen ne nyǐ. [ 15Osówo o*da běn echi enyam-byiko ebónge ne dyityém dyibónge ne nyǐ*?] Ebóng kyi/chi ne Osówo o-chi éné. O/chi kánkyí, ké nǎ, o/fu, ben bafwon bwǎn ḿbé badakyú banet ḿbé Osówo ḿbé ntûntû. Ké bubwô ámbu, onet nang obónge o*dachi o-bên ocím emen mú o/ryí onyi emen*. 16Osówo Óburúkpâbí mú Ézerel o/raa o/fu, dyibé eman dii*nyîn mě*. Kyi-sa ng mě, â onet obónge ké burwám enen o/chi onyi emen dyizong-kyibî-chwǒm ánkyi. Tî n̂g ké dyityém enen ba/fu, ben baa*bên ocím mú ba/ryí onyi enen ba/fu, ba-fâ dyityém ne nyǐ*.
Dyicí-Mpan dii/fárâng
17Ben baa/chi Óburúkpâbí o-kyee ké byiraa enen. Ké nǎ, ben bamu ba-bí ng ba/fu, be byi/cen nǎ ne byi-chi ǎ o-kyee. Ben bamu ba-raa ng ba/fu, Óburúkpâbí mú o/rêe o-shwôm mu o-kabe ng o/fu, kángkáng banchi byibî mbe kanong. Ké ntûntû, banchi byibî ba-nyîn n ǎ. Ba-bwa ba-bí to ba/fu, Osówo mú o/fu, nyǐ oo*ryí acît* mu nyá.
Currently Selected:
Máláka 2: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
