Jénésis 48

Jekôp o/jware Éferem ne Manáse

1Ńdyí ka/chîrí, ba/sét Josêf ba/fu, bonchí emen mu o-rwôm m. Ne Josêf o-kúng bwǎn emen ashí afee, Manáse ne Éferem o-dim Jekôp edari. 2Ńdyí ba/sét Jekôp ba/fu, Josêf mú wǎn emen oo/bê ǎ ebari, Jekôp o/nyîi asa o-bûu o-kyú me ké karíng. 3Jekôp o-sét Josêf o/fu, Osówo mú o/rêe o-shwôm o/byí o-kâm mě ké Lûz ké esí nyí Kínan, o-jware mě. 4O-sét mě o/fu, n/chi n-kye ǒ bwǎn chwóó eringe nyí kyikû-banet eyên kyidabírî eshê chwóó. N/chi n-kye bwǎn eyên esí ńnyín e-firi nyí ebe ne banyá.

5Jekôp o-raa o-ca kashú o/fu, Josêf, Éferem ne Manáse ḿbé a/fwon ké Éjip ne me n-kûbê ba/já mě, wǎ eringe nyí Rúben ne Syímyon ḿbé bwǎn ejí ba/já mě. 6Â a/chîfwon bwǎn bakíri, baa*já mě to*. Bukyû ḿbú ba/chi ba-ryí bu/chi bu-cen ké abwô nyí Éferem ne Manáse. 7Me mu n-chi i ńkyín ké bubwô-Ríchel mú boné eyên. O/fé mě bafip o-kpú ké esí nyí Kínan, fáráng ne Efyírata, ké nkéré mu n-fyi ng Mesopotémya. N/ryii ǎ ányi ké bukô-bukwóp ḿbú mbe ba-jâ Efyírata. Ba-kú ba-kó ng Efyírata kántîk, Bételehêm.

8Ké nkéré Jekôp o/ri bwǎn ḿbé Josêf, o/bí Josêf o/fu, yeě mu ne bwǎn-banyinchéng ḿbén.

9Josêf o-faa ǎ o/fu, bwǎn ejí něen ḿbé Osówo oo/kye mě nyín ké Éjip.

Jekôp o-raa o/fu, bâ ne mbé n-jware kámbé. 10Jekôp o/mû o*fí to o-jang ng erángê* ké nǎ, o/mû oo/kâa. Josêf o-tín bwǎn ámbe ba-fárâng ǎ, ne o-rwâm kámbé, o-fé kámbé ocím. 11Jekôp o-sét Josêf o/fu, me m/mû n*da/kabe n/fu, n-chî ng ǒ eri* nké kántîk, Osówo oo/bángê mě n-chîri to ne bwǎn eyên. 12Ne Josêf o-fîm kámbé ké byiká ḿbyí Jekôp, ne o-tíngê kyísí o-kye bonchí ofê.

13Ne o-kúng Éferem o-fé Jekôp ké kyicê ńkyí bubwô-éku, o-tî Manáse ké ńkyí bubwô-etyebéng. 14Nké Jekôp o/pín abwô emen o-yip bubwô-etyebéng o-twôom Éferem ké dyishí, nang ké Éferem o/mû wǎsíng, o-twôom Manáse mú okínkán bubwô-eku. 15Ne o-kye Josêf ojware o/fu,

kyi/bát Osówo mú banchí ejí, Ébarahâm ne Ázik ba/fé ǎ, ojware bwǎn ḿbén.

Kyi/bát Osówo mú oo/nen mě n-ribi tete dyicí ńdyí kurún, ojware kámbé.

16Kyi/bát orím mú Osówo mú oo/nyii mě ké kángkáng afaníkong ojware kámbé.

Kyi/bát dyizîn ejí ne ńdyí banchí ejí, Ébarahâm ne Ázik, dyiwaa ne banyá ké bubwô-bwǎn ḿbén.

Kyi/bát bafwon bwǎn chwóó, kyikû-banet ebe kyi-jê.

17Kyi*da/nyîn Josêf* ńkyí bonchí emen o/yip bubwô-etyebéng o-twôom Éferem ké dyishí*. Ne o-níbî bonchí ké bubwô o/fu, nyǐ o-yángê e kámbú o-twôom ké dyishí ńdyí Manáse, 18o-sét bonchí o/fu, *chí éné* ǎ bonchí*. Wǎn mún nké mu okínkán. Twôom ǎ bubwô-etyebéng ké dyishí.

19Bonchí emen o-né, o-sét ǎ o/fu, me mu n-nyît ng, ǎ wǎn ejí. Bwǎn ḿbé Manáse ba/chi ba-kyú to biǐtí-banet, nké nche emen o/chi o-kyú kiǐtí o-shwôm ǎ, ne bwǎn emen ba/chi ba-firi biǐtí-eshê.

20Ne o-jware kámbé ké dyicí ándyi o/fu, banet ḿbé Ézerel ba/chi ba-kûkó azîn enen ké nkéré ba-kú ba-jware ng banet. Ba/chi ba-kûraa ba/fu, kyi/bát Osówo ojware ǒ wǎ eringe nyí o/jware Éferem ne Manáse. Jekôp o/chi něen ne o-chi Éferem o-firi okínkán.

21Ne Jekôp o-sét Josêf kâng o/fu, wo amu a-nyît ng a/fu, ací aa/fárâng nyí ndakpú, nké Osówo o/chi o-kyú ne wo, o-bwa ne wo esim ké esí nyí banchí eyên ḿbé kpákpá. 22Wo nké n/kye ǒ Shékem, *chí bwǎn-bané eyên*. Kyikim-esí ánkyi ńkyí kyidajang ebát byiryíng, ńkyí n/nwa byití ne banet ḿbé Ámórit ne n-koo.

Currently Selected:

Jénésis 48: BKY

Highlight

Copy