SEKARIA 3
3
Luk Sinier Nabi Ratnan Imam Luk Rayeh
1 #
Esr 5.2; Lin 12.10 Bang aceh luk sinier teh Tuhan nemada' Yosua, Imam Rayeh, sirenku Ieh netuped pa kiung melaikat Tuhan. Idi Sétan netuped iring Yosua pian ngadu' neneh. 2#Yhu 9 Idi kebala melaikat Tuhan kuan Sétan ineh, “Do' Tuhan ngukum namu O Sétan. Do' Tuhan luk mawa inan Yerusalim ngukum namu. Lemulun ini mepad kudeng aceh kayuh luk ilap rat bang apui.”
3Idi Yosua netuped su ineh. Idi ieh ngayung ku kuyu' luk melutak. 4Idi kebala melaikat kuandeh luk ngedengan neneh déi' Surga, “Ngelengu kuyu' lemulun ini luk melutak.” Idi kebalaneh ni Yosua, “Ui pangeh nenala' sala'mu, idi miak maré kuyu' luk mebaruh namu.”
5Idi ieh nengecuk nedeh luk ngedengan neneh nganau' aceh sigar luk meligan luun uluh Yosua. Idi ideh nenganau' luk icuk ineh idi nengayung neneh kareb melaikat Tuhan tuped su ineh.
6Idi keala melaikat ni Yosua, 7“Tuhan luk Melalud pangeh nepebala, Kudeng iko maya' ukumKu idi nganau' kekamen luk biréKu namu, idi iko miak ngimet bang ruma'Ku idi natad ruma'Ku pana'. Idi Ui miak ninger sembayangMu, mepad kudeng Ui ninger sembayang amung melaikat luk pa kiungKu. 8#Yer 23.5; 33.15; Sek 6.12 O Yosua, Imam Rayeh, do' iko ninger idi lun rurum luk tudo pa atunmu pana'. Muyuh ineh aceh tanu' ratnan luk do' luk miak mangun muci. Ui miak maré demulunKu, luk titen Angat! 9Ui naped pa kiung Yosua aceh batu luk inan tudu' mateh! Idi Ui miak ngarit aceh arit luunneh, idi bang aceh aco mo' Ui miak nala' amung sala' tana' ini. 10#Mik 4.4 Bang aco sineh, anid burur muyuh miak nawar nelun denganneh amé' tudo dengan mawang niat bang kabun anggur idi gita' muyuh.”
Currently Selected:
SEKARIA 3: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
