MATIUS 27
27
Yésus Inuit Amé' Matun Pilatus
(Mrk 15.1; Luk 23.1–2; Yah 18.28–32)
1Kareb pekak uka-uka, amung-amung imam rayeh idi lun rayeh pupu ineh pana' nepegayam ratnan Yésus, pian ngaté Neneh. 2Idi ideh nengaling Neneh, idi nenguit Neneh idi nemaré Neneh kuan Pilatus, luk ngimet bawang ineh.
Até Yudas
(Kek 1.18–19)
3Kareb Yudas luk nemasui Yésus, nekali' neneh nengukum Neneh, ieh nenginuud, idi nengelubed teluh ngepulu' balad pirak ineh kuan imam-imam rayeh idi lun rayeh ineh. 4Keburi'neh, “Ui mesala' ngaceku ui nemasui dara' aceh lemulun luk na mesala'!”
Iamo' keburi'deh, “Mekudeh ieh? Baken kai, iamo' iko luk mabeh ini.”
5Idi ieh nemapet balad pirak ineh bang Ruma' Allah idi nuli', idi iné' perieret.
6Imam-imam rayeh nengamung balad pirak ineh, keburi'deh, “Na tau miak nipa ini bang pati' rigit pupuk ngaceku ini tabpar dara'.” 7Idi ideh nepegayam idi nemutut pad ideh nemelih tana' ratnan tukang mipi' kuden mangun ku lengutan kuan lun sakai. 8#Kek 1.18–19 Ngaceku ineh tana' ineh titendeh Tana' Dara', macing aco sini pana'.
9Kareb idi pangeh mangun luk bila Nabi Yeremia, kebalaneh, “Idi ideh nenguit teluh ngepulu' balad pirak, ieh ineh ragaNeh luk imo lun Israil. 10#Sek 11.12–13 Idi ideh nemaré ineh ku belih tana' tukang mipi' kuden mepad kudeng luk pangeh bila Tuhan kuanku.”
Tuda'-Tuda' Itun Pilatus Nan Yésus
(Mrk 15.2–5; Luk 23.3–5; Yah 18.33–38)
11Idi Yésus netuped pa kiung Lun luk Ngimet Bawan gineh; idi ieh nengitun Yésus, keburi'neh, “Ikoké Raca' lun Yahudi?”
Idi keburi' Yesus neneh, “Mepad kudeng balamu.” 12Idi kareb Yésus inadu' imam-imam rayeh idi lun rayeh-rayeh teh, idi Ieh nungeng.
13Idi kebala Pilatus Neneh, “Naké Iko ninger mula' adu'deh Namu?”
14Iamo' Yésus na nengor sebila' bala pana', pad Lun luk Ngimet Bawang ineh mawa tu.
Yésus Ngalap Ukum Maté
(Mrk 15.6–15; Luk 23.13–25; Yah 18.39—19.16)
15Kareb Irau Paska, Lun luk Ngimet Bawang megéi' muit seburur lemulun luk tinutup kuan lun mula', ieh ineh idé-idé luk piandeh. 16Kareb idi inan seburur lemulun bang tutup luk pelaba dat, ngadanneh Barabas. 17Idi kareb lun mula' nepamung, Pilatus nengitun nedeh, “Sapehké luk pian muyuh ui muit kuan muyuh? Barabaské, kian Yésus luk titen Keristus?” 18Ieh nekali' ideh pangeh nemaré Neneh ngaceku ideh temaruh.
19Laba' Pilatus tudo bang ruma' besara', awanneh nengecuk mada' neneh, keburi'neh, “Aleg iko nganau' anun-anun pana' kuan lemulun luk matu ini; ngaceku aco sini pelaba susa' niatku ku nupiku Neneh.”
20Imam-imam rayeh idi lun rayeh-rayeh nengubuk nelun mula' pad ideh mutuh muit Barabas idi ngaté Yésus. 21Iamo' kebala Lun luk Ngimet Bawang, “Sapehké rat arang didueh luk pian muyuh ui muit kuan muyuh?”
Idi keburi'deh neneh, “Barabas.”
22Pilatus nepebala nedeh, “Kudeng pieh kudeng ineh anunké luk ruenku kuan Yésus luk titen Keristus?”
Idi keburi'deh neneh, “Do' Ieh uen nalib.”
23Iamo' kebala Pilatus, “Ngudeh, sala' anunké luk pangeh inau'Neh?”
Iamo' ideh nengitang, keburi'deh, “Do' Ieh uen nalib.”
24 #
Bad 21.6–9
Kareb Pilatus nekali' balaneh na ulek, iamo' mangun meluun mula' ria', idi ieh nengalap abpa' idi nemaru' paladneh pa kiung lun mula' ineh, kebalaneh, “Ui meligan ratnan dara' lemulun luk matu ini! Muyuh sebuleng mabeh dara'Neh.”
25Idi amung-amung lemulun ineh nengor balaneh, keburi'deh, “Aganeh kai idi anak-anak kai mabeh dara'Neh.”
26Idi Pilatus nemuit Barabas kuandeh iamo' ieh nemebal Yésus idi nemaré Neneh nedeh, pad Ieh uen nalib.
Lun Pebunu' Situnga Nan Yésus
(Mrk 15.16–20; Yah 19.2–3)
27Pangeh ineh, lun pebunu' Pilatus nenguit Yésus amé' bang ruma' Lun luk Ngimet Bawang ineh, idi Pilatus nengamung amung bawehneh idi nengecuk nedeh ngelibut Yésus. 28Idi ideh nengelengu ayung Yésus idi nengayung Neneh ku kuyu' luk mesia'. 29Idi ideh nengapid tabpa' ku pataNeh idi nengerareng ineh luun uluhNeh, idi ideh nemaré rukud bang paladNeh, idi ideh netekeradung pa kiungNeh idi nesitunga Neneh. Keburi'deh, “Tabi' Raca' lun Yahudi.” 30Idi ideh nengelica' Neneh, idi nengalap rukud ineh, idi nenecat uluhNeh. 31Idi pangeh ideh nesitunga Neneh, ideh nengelengu kuyu' ineh rat Neneh, idi nengayung Neneh ku ayungNeh sebuleng, idi nenguit Neneh remuat pad Ieh miak uendeh nalib.
Yésus Sinalib
(Mrk 15.21–32; Luk 23.26–43; Yah 19.17–27)
32Idi kareb ideh neremuat, ideh nekali' aceh lemulun rat Kiréni, luk ngadanneh Simun; idi ieh sinaaddeh maan salib Yésus. 33Kareb ideh nacing su luk inan ngadanneh Golguta, ilungneh, Su luk inan Perupuk Uluh, 34idi ideh nemaré abpa' anggur luk pinuar ku luk mepét, rupenNeh. Kareb Ieh nenila' ineh, na Ieh sikal ngirup.
35 #
Nani 22.18
Ideh nenalib Neneh, idi ideh nemabpat ayungNeh kuandeh maya' udi. 36Idi ideh netudo déi' idi nematar Neneh. 37Idi ideh nenganau' aceh adu Neh luk inayud pa luun uluhNeh, “Ini Yésus luk Raca' lun Yahudi.” 38Kareb ineh inan dueh burur lun mano sinalib peranga' dengan Yésus, seburur pa tinueh idi seburur pa kabingNeh.
39 #
Nani 22.7; 109.25 Idi lemulun luk nelemaba su ineh neguyo Yésus idi ideh tuka'-tuka' uluh. 40#Mat 26.61; Yah 2.19 Keburi'deh, “Neh! Iko luk ngusag Ruma' Allah idi mudut neneh teh bang teluh aco mo' kinioneh, do' ngulun bururMu sebuleng. Kudeng matu Iko Anak Allah, temurun ratnan salib ineh.”
41Kudeng ineh teh imam-imam rayeh idi guru-guru Ukum idi lun rayeh-rayeh nesitunga Neneh, keburi'deh, 42“Ieh pangeh nengulun lun baken, iamo' na Ieh melalud ngulun bururNeh sebuleng. Kudeng Ieh Raca' pupu Israil, do' Ieh temurun nekini ratnan salib idi tau miak manu Neneh. 43#Nani 22.8 Ieh merapet inan Allah, do' Allah ngulun Neneh nekini, kudeng Ieh mawa Neneh; ngaceku keburi'Neh, ‘ui ini Anak Allah.’ ”
44Idi lun mano luk sinalib denganNeh nengedat Neneh kudeng ineh teh.
Até Yésus
(Mrk 15.33–41; Luk 23.44–49; Yah 19.28–30)
45Idi rat muned aco aput-aput tana' ineh medacem pad macing tangal musul aco. 46#Nani 22.1 Idi kareb lélé tangal musul aco Yésus nengitang, kebalaNeh, “Eli, Eli, lema Sabaktani?” ilungneh, “AlahKu, AllahKu, anunké punneh Iko necan Negku?”
47Kareb ideh neninger tangNeh, idi sebuang rat arang lemulun luk tuped déi' nepebala, “Lun ini nawar Elia.” 48#Nani 69.21 Idi petacu seburur rat arangdeh nupun idi nengalap aceh lemut batu, idi nenganau' neneh panu' ku abpa' luk malam idi nenganau' neneh nan paped kayuh, idi nemaré neneh rupenNeh.
49Iamo' keburi' lun baken, “Aganeh, do' tau nier kudeng Elia sikal amé' ngulun Neneh.”
50Idi sekua' teh Yésus nengitang idi niatNeh neputut.
51 #
Pur 26.31–33
Idi denak-denak dicing Ruma' Allah ineh nedarak upa dueh rat pa luun macing pa beneh; idi tana' nesigio teh, idi batu-batu nebila' peh. 52Idi tanem-tanem mukab teh; idi mula' butung lun luk meligan luk pangeh naté netumui. 53Ideh neremuat rat bang lengutan, idi pangeh Yésus netumui rat arang lun naté, idi ideh nesemuet bang Bawang luk Meligan idi megala' kuan lun mula'.
54Idi kareb lun rayeh lun pebunu' idi lemulun luk tudo denganneh matar Yésus nekali' tana' meruyuh, dengan amung-amung luk pangeh mangun, ideh pelaba tot, idi keburi'deh, “Matu, Ieh Anak Allah.”
55Idi inan mula' decur su ineh luk nenier amung-amung ineh rat mado, idi luk pangeh nemaya' Yésus rat Galilia, idi luk nengasa' Neneh. 56#Luk 8.2–3 Idi arangdeh Mariam Magdalina, Mariam luk tinan Yakub idi Yusup, idi tinan anak-anak Sabdi ineh.
Ratnan Nanem Yésus
(Mrk 15.42–47; Luk 23.50–56; Yah 19.38–42)
57Idi kareb malem aco, nacing aceh lun do', ngadanneh Yusup rat Arimatia, idi ieh pana' seburur anak sekola' Yésus. 58Idi ieh iné matun Pilatus idi nemutuh butung Yésus idi Pilatus nengecuk maré neneh. 59Idi Yusup nengalap butung ineh idi nengelilib neneh ku kibung luk do'. 60Idi ieh nengerareng neneh bang tanemneh sebuleng luk mebaruh, luk pangeh kinuerneh ratnan batu; idi ieh negelubid aceh batu rayeh nepingakeb munung tanem ineh idi ieh neburo. 61Idi déi' Mariam Magdalina idi Mariam luk baken ineh teh, netudo muneng ku tanem.
Ratnan Lun Matar Tanem
62Idi kenebpa, ieh ineh kareb Aco luk inan Mudeng, imam-imam rayeh idi lun Parisi nepamung amé' matun Pilatus, 63#Mat 16.21; 17.23; 20.19; Mrk 8.31; 9.31; 10.33–34; Luk 9.22; 18.31–33 keburi'deh, “O Tuan, kai ngerawé bala lun naluk ineh kareb Ieh mulun, keburi'Neh, ‘Pangeh teluh aco idi Ui sikal tumui teh.’ 64Ngaceku ineh do' Tuan ngecuk lemulun ngeraben tanemNeh pad macing aco luk keteluh, pad anak-anak sekola'Neh na miak amé' mano Neneh, idi pebala nelun Ieh pangeh tumui rat arang uned lun naté. Idi kekipedneh raruh lemulun meluun dat ratnan luk pun-pun.”
65Idi Pilatus nepebala nedeh, “Muyuh pana' inan lun matar, do' muyuh amé' idi ngeraben tanemneh maya' amung-amung ileh muyuh.”
66Idi ideh iné' ngeraben tanem ineh, idi nenalit batu tanem ineh idi lun matar ineh pana' nemaya' nedeh.
Currently Selected:
MATIUS 27: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
