MATIUS 26

Gayam Ratnan Ngaté Yésus

(Mrk 14.1–2; Luk 22.1–2; Yah 11.45–53)

1Kareb Yésus pangeh nemada' amung-amung bala ineh, idi kebalaNeh kuan anak-anak sekola'Neh, 2#Pur 12.1–27 “Muyuh kali', kareb pangeh dueh aco, inan Irau Paska idi Anak-Lemulun barén pad Ieh uen nalib.”

3Kareb ineh nepamung lun imam-imam rayeh, idi lun rayeh ratnan pupu ineh déi' bang ruma' Imam Rayeh, luk ngadanneh Kayapas. 4Idi ideh pegayam nakap dalan pad ideh miak ngakem Yésus dengan lulem idi ngaté Neneh. 5Iamo' keburi'deh, “Aleg kareb irau, pad na luk idi ria' arang lun mula'.”

Yésus Inumau Déi' Baitani

(Mrk 14.3–9; Yah 12.1–8)

6Kareb Yésus tudo déi' Baitani bang ruma' Simun luk mét susud ineh, 7#Luk 7.37–38 inan seburur decur iné' matun Neneh, luk nenguit aceh seréi' umau luk do' buen idi luk meraga, idi ieh nengutang umau ineh luun uluh Yésus kareb Ieh netudo kuman. 8Kareb anak-anak sekola'Neh nekali' ratnan ineh, idi ideh museh, keburi'deh, “Anunké punneh umau ineh uenneh nuso mo'? 9Umau ini petulu pisuen dengan raga luk mikat idi barén kuan lun masi'.”

10Yésus nekali' baladeh, idi Ieh nepebala nedeh, “Ngudehké muyuh ngesusa' decur ineh? Ieh nenganau' luk do' kuanKu. 11#Bad 15.11 Ngaceku lun masi' megéi' idi dengan muyuh; iamo' Ui ini na megéi' idi dengan muyuh. 12Ieh nengutang umau ini luun bururKu, pianneh nganau' bururKu temina' kuan tanemKu. 13Ngerawé do'-do' Iapeh-iapeh pana' aput-aput tana' ini Bala luk Do' ini badén, su ineh teh kekamen decur ini miak tetanen teh mangun ku terawé ratnan ieh.”

Yudas Pian Masui Yésus

(Mrk 14.10–11; Luk 22.3–6)

14Idi seburur rat arang pulu' dueh anak sekola' ineh luk ngadanneh Yudas Iskariot, iné' matun imam-imam rayeh, 15keburi'neh, “Anunké luk barén muyuh negku kudeng ui maré Yésus nemuyuh?” Idi ideh nemaré neneh teluh ngepulu' balad pirak. 16Rat kareb ineh Yudas nenakap dalan, pad ieh miak maré Yésus bang paladdeh.

Yésus Kuman Irau Paska Dengan Anak-Anak Sekola'Neh

(Mrk 14.12–21; Luk 22.7–14, 21–23; Yah 13.21–30)

17Kareb aco luk pun-pun ratnan Irau Ruti luk Na Lamud, anak-anak sekola' ineh iné' matun Yésus, keburi'deh, “Su apehké luk pianMu inan kai nganau' temina' pad Iko miak kuman Irau Paska?”

18Idi keburi'Neh nedeh, “Amé' muyuh bang bawang rayeh, matun seburur lemulun luk netemina' idi pebala neneh, ‘Keburi' Guru, tarekKu pangeh muneng; idi bang ruma'Mu Ui sikal kuman Irau Paska dengan anak-anak sekola'Ku.’ ”

19Idi anak-anak sekola' ineh nemaya' ecuk Yésus nedeh, idi ideh nenganau' temina' Irau Paska ineh.

20Kareb malem aco Yésus netudo kuman dengan pulu' dueh anak sekola' ineh. 21Idi uneddeh kuman, Yésus nepebala nedeh, “Ui pebala nemuyuh, inan sebuleng rat arang muyuh luk sikal masui Negku.”

22Idi ideh mesusa' tu-tu niat, idi anid-aniddeh nengimun pebala Neneh, keburi'deh, “Uiké ieh, O Tuhan?”

23 # Nani 41.9 Idi kebala Yésus, “Ieh luk ngerereb ruti bang bigan pad-pad denganKu, ieh ineh luk masui Negku. 24Anak-Lemulun amé' rungen, mepad kudeng luk inayud ratnan Ieh, iamo' mesusa' tu-tu kuan lemulun luk masui Anak-Lemulun. Meluun do' lemulun ineh na tinganak.”

25Idi keburi' Yudas luk nemasui Neneh, “Uiké ieh lek, O Guru?”

Idi keburu' Yésus neneh, “Mepad kudeng luk bilamu.”

Irau Tuhan

(Mrk 14.22–26; Luk 22.15–20; 1 Kor 11.23–25)

26Laba' ideh kuman, Yésus nengalap ruti idi nesembayang, idi nemuri' neneh, idi Ieh nemaré kuan anak-anak sekola'Neh, kebalaNeh, “Ngalap idi kuman' ini bururKu.”

27Idi Ieh nengiding aceh sangkir, idi nemaré ubur, idi nemaré nedeh, kebalaNeh, “Ngirup muyuh amung ratnan sangkir ini, 28#Pur 24.8; Yer 31.31–34 ngaceku ini dara'Ku, ieh ineh dara' pejani' Allah luk inutang kuan lun mula' mangun ku aceh dalan ngalap do' ratnan sala'. 29Iamo' Ui pebala nemuyuh, Ui na sikal ngirup abpa' anggur teh pad macing aco Ui ngirup neneh sekua' teh dengan muyuh bang Imet TamanKu.”

30Idi pangeh ideh menani aceh nani, idi ideh neremuat idi iné' déi' Pegkung Saitun.

Yésus Mada' Atun Ratnan Pétrus Ngalum Neneh

(Mrk 14.27–31; Luk 22.31–34; Yah 13.36–38)

31 # Sek 13.7 Kebala Yésus nedeh, “Amung-amung muyuh miak buro necan Negku bang dacem ini, ngacem pangeh inayud, ‘Allah miak ngaté Lun Matar dumba, idi amung-amung dumba luk sengeriudan ineh mepatad.’ 32#Mat 28.16 Iamo' muci ratnan Ui tumui, idi Ui sikal amé' pa atun muyuh macing déi' Galilia.”

33Idi kebala Pétrus Neneh, “Sagan pana' amung-amungdeh necan Namu, ui sebuleng na tu sikal necan Namu.”

34Idi kebala Yésus neneh, “Ngerawé do'-do', bang dacem ini, kareb nateh lal ngekook, iko ngalum Negku teluh kua'.”

35Idi kebala Pétrus Neneh, “Sagan pana' ui pitayen pad-pad denganMu, na tu ui sikal ngalum Namu.”

Kudeng ineh teh bala amung-amung anak sekola' ineh.

Yésus Sembayang Bang Kabun Getsémani

(Mrk 14.32–42; Luk 22.39–46)

36Pangeh ineh Yésus nemaya' anak sekola'Neh macing su luk ngadanneh Getsémani, idi kebalaNeh nedeh, “Do' muyuh tudo ieni laba' Ui amé' sembayang pa déi'.” 37Idi Ieh nenguit Pétrus idi dueh anak Sabdi maya' Neneh, idi Ieh petacu meberat niat pad Ieh pelaba susa'. 38Idi kebalaNeh nedeh, “Mesusa' tu-tu niatKu, malé maté ayuKu; tudo ieni muyuh denganKu idi matar pad muyuh na rudap.”

39Idi Ieh nenalan pa atun sesuut, idi Ieh netekeradung idi sembayang, kesembayangNeh, “O Ama', kudeng miak, do' sangkir ini labén Negku; iamo' baken maya' pianKu, iamo' maya' pianMu.”

40Idi Ieh iné' matun anak-anak sekola' ineh idi Ieh nenier nedeh rudap, idi kebalaNeh ni Pétrus, “Adui, naké muyuh miak matar bang sejam mo' denganKu? 41Matar idi sembayang, pad muyuh na semuet bang tutun; sagan pana' niat muyuh geregan, iamo' burur muyuh melaya' peh.”

42Idi sekua' teh Ieh iné' sembayang, kesembayangNeh, “O Ama', kudeng sangkir ini na miak buro pad Ui ngirup ineh, aganeh pianMu miak mangun.” 43Idi sekua' teh Ieh nelemubed, idi Ieh nenier nedeh uned rudap, ngaceku ideh pelaba dacep mateh.

44Idi Yésus neburo rat nedeh sekua' teh idi iné' sembayang seketeluh kua', idi Ieh nesembayang mepad kudeng sembayangNeh luk atun teh. 45Idi Ieh iné' matun anak-anak sekola'Neh, idi keburi'Neh nedeh, “Do' muyuh rudap nekini idi ngato erur muyuh. Siruh, karebneh malé macing idi Anak-Lemulun miak barén bang palad lun mesala'. 46Tumui! Do' tau nalan. Siruh, ieh luk masui Negku macing peh!”

Yésus Kikem

(Mrk 14.43–50; Luk 22.47–53; Yah 18.3–12)

47Uned Yésus pebala, idi Yudas nacing, ieh ineh sebuleng rat arang pulu' dueh anak sekola'Neh, dengan mula' tu-tu lemulun luk nengimet pelapet idi kayuh ieh ineh lemulun luk icuk imam-imam rayeh idi lun rayeh ratnan pupu Yahudi. 48Lemulun luk nemasui Yésus pangeh nemaré aceh tanu' kuandeh, keburi'neh, “Lemulun luk ui muen, Ieh ineh Yésus; do' muyuh ngakem Neneh.” 49Kareb Yudas nacing, idi ieh petacu iné' matun Yésus, keburi'neh, “Bulé' Guru,” idi ieh nemuen Neneh.

50Idi kebala Yésus neneh, “O Aca', do' mesaget nganau' luk pianmu.”

Idi ideh iné' ngakem Yésus, idi nengimet Neneh ét-ét. 51Idi sebuleng rat arang lun dengan Yésus nenatang ticu'neh idi nengangat pelapetneh, idi nenarad demulun Imam Rayeh, idi nemulu' lalidneh. 52Idi keburi' Yésus neneh, “Do' ngusong pelapetmu bang binanneh, ngaceku lemulun luk ngaté ku pelapet miak pitayen ku pelapet teh. 53Naké iko kali' Ui miak sembayang mutuh ratnan TamanKu pad Ieh petacu maré mela pulu' dueh baweh melaikatNeh kuan nekini pana'? 54Iamo' kudeng Ui nganau' kudeng ineh, kudeng apehké miak macing bala Surat Allah luk pebala, idi na miak na mangun kudeng ini?”

55 # Luk 19.47; 21.37 Idi Yésus nepebala kuan lun mula', “Muyuh remuat ayu-ayu sikal pebunu' dengan lun manoké, dengan pelapet idi kayuh pad ngakem Negku? Anid-anid aco Ui netudo mada' ago déi' bang Ruma' Allah, idi nateh muyuh nengakem Negku. 56Iamo' amung ini pangeh mangun pad ngacing bala Surat Allah luk bila nabi-nabi.”

Idi amung-amung anak sekola'Neh nenecan Neneh, idi neburo.

Yésus Inuit Amé' Besara'

(Mrk 14.53–65; Luk 22.54–55, 63–71; Yah 18.13–14, 19–24)

57Lemulun luk pangeh nengakem Yésus nenguit Neneh amé' matun Kayapas, Imam Rayeh, ieh ineh su luk inan guru-guru Ukum idi lun rayeh pupu ineh nepamung. 58Pétrus nemaya' Neneh rat mado macing bang sikang ruma' Imam Rayeh, idi ieh nesemuet idi netudo dengan amung-amung lun pulis, ngaceku sikal nier kekipedneh. 59Idi imam-imam rayeh idi amung-amung tebubpun besara' nenakap lun nekali' luk mebalih ratnan Yésus, pad ideh miak ngaté Neneh. 60Idi na luk kali'deh, sagan pana' inan mula' lun nekali' luk mebalih luk iné'. Iamo' muci ratnan kareb ini, dueh burur iné'. 61#Yah 2.19 Idi keburi' didueh, “Lemulun ini pangeh pebala, ‘Ui miak ngusag Ruma' Allah idi mudut neneh bang teluh aco kinioneh.’ ”

62Idi Imam Rayeh netuped, idi kebuli'neh nan Yésus, “Naké Iko ngor adu'deh Namu ineh?” 63Iamo' Yésus pirud mo'. Idi keburi' Imam Rayeh Neneh, “Ui ngecuk Namu pebulung ku ngadan Allah luk mulun, idi mada' nekai kudeng matu Iko Keristus Anak Allah.”

64 # Dan 7.13 Kebala Yésus neneh, “Mepad kudeng luk bilamu. Iamo' Ui pebala nemuyuh, rat pad sini muyuh miak nier Anak-Lemulun tudo pa tinueh Luk Melalud, idi amé' luun iaput rat surga.” 65#Uk 24.16 Idi Imam Rayeh nenarak ayungneh, keburi'neh, “Ieh pangeh nenguyo! Anunké ulekneh lun nekali' kuan tau teh? Nekini muyuh pangeh neninger kuyoNeh. 66Anunké terawé muyuh?”

Idi kebaladeh, “Do' Ieh pitayen peh.”

67 # Yes 50.6 Idi ideh nengelica' kiungNeh, idi nemukut Neneh; idi sebuang nemepag Neneh, 68keburi'deh, “Do' Iko mada' nekai, O Keristus, idéké lemulun luk nemepag Namu?”

Pétrus Ngalum Yésus

(Mrk 14.66–72; Luk 22.56–62; Yah 18.15–18, 25–27)

69Idi Pétrus netudo setau' déi' sikang; idi seburur anak adi' decur iné' matun neneh, keburi'neh, “Iko ini teh luk dengan Yésus, lun Galilia ineh.”

70Iamo' Pétrus nengena pa kiung amung-amungdeh, keburi'neh, “Na ui kali' ilung balamu.” 71Idi ieh iné' munung tanga' sikang ineh, idi seburur anak adi' decur luk baken teh nenier neneh, idi keburi'neh nedeh luk tuped déi', “Lun ini pangeh perurum dengan Yésus, lun Nasarét teh.”

72Idi sekua' teh ieh nengena dengan pebulung, keburi'neh, “Na ui miti lemulun ineh.”

73Idi segageh teh lemulun luk tuped déi' iné' ni Petrus, kebaladeh, “Matu iko seburur rat arangdeh, ngaceku buri'mu miti kai.”

74Idi Pétrus nengimun ngediman idi pebulung, keburi'neh, “Na tu ui miti lemulun ineh.”

Idi lal pana' petacu nengekook peh. 75Idi Pétrus nengerawé bala Yésus atun, keburi'Neh, “Kareb nateh lal ngekook, iko miak ngalum Negku teluh kua'.” Idi ieh neremuat idi nenangi' dengan singap-singap.

Currently Selected:

MATIUS 26: BLD

Highlight

Copy