MATIUS 24

Yésus Mada' Ratnan Tabpa Ruma' Allah

(Mrk 13.1–2; Luk 21.5–6)

1Yésus neremuat rat bang Ruma' Allah ineh, idi uned Ieh nalan, anak-anak sekola'Neh iné' Neneh idi nemada' pudut Ruma' Allah ineh sirenNeh. 2Iamo' kebala Yésus, “Muyuh nier amung iniké? Ui pebala nemuyuh, na miak ketecan sebuleng batu ieni luk na miak uen ngusag peh.”

Susa' Idi Dereh

(Mrk 13.3–13; Luk 21.7–19)

3Kareb Yésus tudo luun Pegkung Saitun, amung-amung anak sekola'Neh iné' lulem matun Neneh, keburi'deh, “Ngelio kuan kai idanké amung ini miak mangun. Anunké tanu' luk mada' ratnan acingMu idi kekiped tana'?”

4Idi kebala Yésus, “Matar do'-do' pad lemulun na naluk nemuyuh. 5Ngaceku mula' lemulun sikal macing bang ngadanKu, kebaladeh, ‘Ui ini Keristus,’ idi ideh miak naluk mula' lemulun. 6Idi na miak na muyuh ninger ratnan pebunu' idi bala luk ratnan pebunu' teh. Ngerawé do'-do' pad muyuh na megagap, na miak na amung ini mangun; iamo' nateh ini kekipedneh. 7Bawang sikal pebunu' dengan bawang baken, idi babpat sikal pebunu' dengan babpat baken; idi inan teh iru' luk rayeh macing, idi teh miak mangun ruyuh tana' aput-aput tana'. 8Amung ini, ieh ineh pun-pun luk medereh.

9 # Mat 10.22 “Idi muyuh miak kamen idi ruen ngedereh, idi pitayen pana'. Amung lemulun miak megateh nemuyuh ngaceku ngadanKu. 10Kareb idi mula' lemulun lemubed ratnan anudeh, idi sikal masui lun dengandeh, idi seburur megateh inan seburur baken. 11Idi mula' nabi luk mebalih macing idi naluk mula' lemulun. 12Idi ngaceku luk dat amé'-amé' mula', kareb ineh awa lun mula' metalang peh. 13#Mat 10.22 Iamo' lemulun luk tuman pad macing kekipedneh uen ngulun. 14Idi Bala luk Do' ratnan Imet ini miak badéndeh macing aput-aput tana'; pad mangun ku luk nekali' kuan amung-amung pupu; pangeh ineh idi teh ieh kekipedneh.

Dat Luk Ngacing Tot

(Mrk 13.14–23; Luk 21.20–24)

15 # Dan 9.27; 11.31; 12.11 “Muyuh miak nier ‘Dat luk Ngacing Tot’ tuped bang su luk meligan, maya' kudeng luk bida' Nabi Daniel. (Do' lemulun luk maca' kali' ilungneh!) 16Idi kareb ineh teh do' lemulun luk bang tana' Yudia buro amé' luun pegkung. 17#Luk 17.31 Aleg lemulun luk luun buduk ruma' temurun ngalap anun-anun binaweh rat bang ruma'neh. 18Aleg lemulun luk déi' lati' muli' ngalap kuyu'neh. 19Mesusa' kuan decur luk mali' idi luk niti' anak areb ineh! 20Do' muyuh sembayang pad muyuh na buro kareb luk meteneb, idi kareb Aco luk ina Mudeng pana'. 21#Dan 12.1; Lin 7.14 Ngaceku kareb ineh macing aceh dereh luk rayeh tu-tu, ieh ineh mepad dereh luk rayeh tu-tu, ieh ineh mepad kudeng luk nateh nangun rat pun-pun tana' pad macing nekini, idi na tu-tu miak mangun muci. 22Iamo' kudeng kareb ineh na ruen Allah mekamu', kali' rungen seburur pana' na miak uen ngulun; iamo' ngaceku lun luk pinili' Allah, kareb ineh ruenNeh mekamu'.

23“Idi kudeng seburur lemulun pebala nemuyuh bang kareb ineh, ‘Siruh, ini Keristus!’ idi ‘Ineh Keristus!’—aleg muyuh manu. 24Ngaceku tuda'-tuda' Keristus luk mebalih idi nabi luk mebalih miak macing idi nganau' tanu' luk rayeh idi kekamen luk nan mawa, pad naluk, kudeng miak, lun luk pinili' pana'. 25Ngerawé do'-do'! Ui pangeh nemada' nemuyuh atun.

26 # Luk 17.23–24 “Kudeng lun pebala nemuyuh, ‘Siruh, Ieh idi déi' su luk ali-ali!’—aleg muyuh amé' déi'; idi kudeng ideh pebala, ‘Siruh, Ieh idi bang takep!’—aleg muyuh manu ku baladeh. 27Ngaceku acing Anak-Lemulun mepad kudeng kilep luk rat pa busat aco idi melagan pad macing pa acep aco.

28 # Luk 17.37 “Ngaceku iapeh-iapeh ina butung, su ineh teh inan suit kanui mepamung.

Acing Anak-Lemulun

(Mrk 13.24–27; Luk 21.25–28)

29 # Yes 13.10; 34.4; Yeh 32.7; Yo 2.10, 31; 3.15; Lin 6.12–13 “Idi kareb pangeh dereh ineh, petacu mateh aco medacem, bulan pana' na maré acangneh, gituen-gituen merurug rat bang langit, idi amung-amung lalud luk déi' langit ineh pana' mebubuh teh. 30#Dan 7.13; Lin 1.7 Pangeh ineh, tanu' Anak-Lemulun megala' bang langit; idi amung pupu bang tana' ini temido, idi ideh miak nier Anak-Lemulun amé' luun laput rat surga, dengan lalud idi rasat luk rayeh. 31Idi Ieh sikal ngecuk melaikat-melaikatNeh dengan serupit luk rayeh uni, pad ideh ngamung lun luk pinili'Neh ratnan apat busat bui, ieh ineh rat iring langit pad macing iring selipa.

Bada' Ratnan Lawa Gita'

(Mrk 13.28–31; Luk 21.29–33)

32“Do' muyuh sibada' ratnan pinginud aceh lawa gita'. Kareb angatneh mebata' idi donneh pun mua', muyuh kali' kareb melau' pangeh muneng. 33Kudeng ineh teh muyuh ini, kareb muyuh nier amung-amung ineh, do' muyuh kali' karebneh pangeh muneng, munung tanga' peh. 34Ngerawé do'-do'! Inul ini na miak metutu', pad macing amung ini mangun. 35Langit idi tana' miak metutu', iamo' balaKu na miak metutu'.

Seburur Pana' Na Kali' Aco Idi Karebneh

(Mrk 13.32–37; Luk 17.26–30, 34–36)

36“Iamo' ratnan aconeh idi karebneh seburur pana' nateh kali', sagan pana' melaikat luk déi' surga, idi Anak ineh pana' nateh kali', iamo' Taman sebuleng. 37#Pud 6.5–8 Idi acing Anak-Lemulun mepad kudeng bang kareb Noh. 38Mepad kudeng kareb nateh ereb, ideh nekuman, nengirup, idi nengaweh, pad macing aco Noh nesemuet bang alud rayeh ineh; 39#Pud 7.6–24 iamo' ideh na kali' megala' pad macing ereb luk nengabud amungdeh. Kudeng ineh teh acing Anak-Lemulun. 40Kareb ineh inan dueh burur deléi déi' lati'; seburur lapen idi seburur tacin. 41Inan teh dueh burur decur luk peruyung tupeh déi' lepo; seburur lapen idi seburur tacin. 42Matar do'-do', ngaceku muyuh na kali' aco sapeh luk Tuhan muyuh macing peh. 43Ngerawé do'-do', kudeng tuan ruma' pangeh nekali' karebneh luk inan lun mano macing, kali' rungen ieh matar idi na ieh nima' ruma'neh uen ngusag. 44#Luk 12.39–40 Ngaceku ineh do' muyuh megéi' temina', ngaceku Anak-Lemulun sikal macing bang aceh kareb luk na kali' muyuh.

Demulun Luk Mileh Idi Luk Na Mileh

(Luk 12.41–48)

45“Idéké demulun luk lutep idi mileh, luk icuk tuanneh matar uang ruma'neh, pad maré luk kenendeh bang kareb luk petulu? 46Samal kuan demulun ineh luk mekeribpeh tuan nganau' kudeng ineh kareb ieh macing. 47Matu, Ui pebala nemuyuh, tuanneh miak maré neneh ngimet amung-amung binawehneh. 48Iamo' kudeng demulun ineh dat, ieh mmiak pebala bang niatneh, ‘Tuanku mio macing,’ 49idi ieh ngimun mebal lun denganneh, idi ieh kuman idi ngirup dengan lun mabuk. 50Idi tuan demulun ineh miak macing kareb seaco luk ieh na nginulat neneh, idi bang aceh kareb luk na kali'neh. 51Tuanneh miak ngaté neneh pad ieh ngalap babpat dengan lun luk siayu, idi su ineh lemulu tangi'-tangi' idi pekatep lipen.

Currently Selected:

MATIUS 24: BLD

Highlight

Copy