MATIUS 23

Yésus Mebpeng Na Maya' Lawé Guru-Guru Ukum Idi Lun Parisi Teh

(Mrk 12.38–39; Luk 11.43, 46; 20.45–46)

1Idi kebala Yésus kuan lun mula' idi anak-anak sekola'Neh, 2“Guru-guru Ukum idi lun Parisi luk ngegala' bala Ukum Musa. 3Ngaceku ineh, do' muyuh nganau' idi maya' amung ukum luk bida'deh nemuyuh; iamo' aleg muyuh nginud kekamendeh, ngaceku ideh pebala dengan tang mo', iamo' kekamendeh na petulu dengan luk bida'deh. 4Meluun teh ideh ngabet babeh luk meberat, idi ideh ngerareng luun tudung lun baken; iamo' ideh sebuleng na pian ngedengan nedeh mabeh babeh ineh sekua' pana'. 5#Mat 6.1; Bad 6.8; Iap 15.38 Iamo' amung-amung kekamendeh inau'deh siren lemulun; idi su luk inandeh nganug ayat-ayat luun madudeh idi luun langendeh pelaba rayeh, idi ideh nganau' ramoi luk rayeh balad iring kuyu'deh. 6Idi ideh sikal tudo su luk meluun do' kareb irau, idi luun tudo su luk meluun do' kareb irau, idi luun kerusi lun rayeh bang ruma' sembayang teh. 7Idi ideh pian buren lemulun déi' kadai, idi ideh sikal ku lemulun neten nedeh, ‘Guru.’ 8Aleg muyuh tetanendeh ‘Guru’, ngaceku sebuleng mo' luk Guru muyuh, idi muyuh amung-amung denganak peh. 9Idi aleg muyuh neten idé'idé lemulun luk bang tana' ini ‘Taman’, ngaceku sebuleng mo' Taman muyuh, ieh ineh luk bang surga. 10Idi aleg muyuh tetanendeh ‘Lun Rayeh’, ngaceku sebuleng mo' luk Lun Rayeh muyuh, ieh ineh Keristus. 11#Mat 20.26–27; Mrk 9.35; 10.43–44; Luk 22.26 Iamo' lemulun luk meluun rayeh arang muyuh, do' ieh mangun ku lun ngasa' nemuyuh. 12#Luk 14.11; 18.14 Idi idé-idé luk ngedita niatneh sebuleng, ieh ineh miak uen ngebeneh peh; idi idé'idé luk ngebeneh niatneh sebuleng, ieh ineh miak uen ngedita' peh.

Yésus Ngedat Nedeh Ngaceku Siayu

(Mrk 12.40; Luk 11.39–42, 44, 52; 20.47)

13“Mesusa' kuan muyuh guru-guru Ukum idi lun Parisi, lun luk siayu! Muyuh ngitek tanga' Imet surga kuan lun baken, ngaceku muyuh sebuleng na sikal semuet, idi muyuh mebpeng nelun baken luk sikal semuet teh.

14“Mesusa' kuan muyuh guru-guru Ukum idi lun Parisi, lun luk siayu! Muyuh ngabud ruma' decur tinula', idi teh muyuh sibala mo'-mo' bang sembayang luk mekadang! Ngaceku ineh, meluun rayeh ukum muyuh peh.

15“Mesusa' kuan muyuh guru-guru Ukum idi lun Parisi! Lun luk siayu! Muyuh ngelibut abpa' rayeh idi tana' teh, sikal ngalap sebuleng lemulun semuet bang sembayang; idi kareb ieh pangeh nesemuet, muyuh nganau' neneh ku anak apui dueh kua' mela ratnan burur muyuh sebuleng.

16“Mesusa' kuan muyuh lun nguyut luk mebuser, luk pebala, ‘Idé-idé luk pebulung ku Ruma' Allah ineh, aganeh mo', iamo' idé-idé luk pebulung ku amas luk bang Ruma' Allah, ieh luk mabeh bulung ineh peh.’ 17Muyuh lun mebacé luk mebuser! Anunké luk meluun rayeh lek, amas, kian Ruma' Allah luk ngeligan amas ineh lek? 18Idi teh kebala muyuh, ‘Idé-idé luk pebulung ku bubpun, aganeh mo', iamo' idé-idé luk pebulung ku luk biré, luk luun bubpun, ieh lu mabeh bulung ineh peh.’ 19Muyuh lun mebuser, sapehké luk meluun rayeh lek, binaweh luk biré luun bubpun, kian bubpun ineh lek luk ngeligan luk biré muyuh? 20Ngaceku ineh idé-idé luk pebulung ku bubpun, ieh pana' pebulung ku bubpun ineh, idi ku amung-amung luk biré luunneh. 21Idi idé-idé luk pebulung ku Ruma' Allah, ieh pebulung ku Ruma' Allah ineh, idi ku Tuhan luk mudeng bang Ruma' Allah pana'. 22#Yes 66.1; Mat 5.34 Idi lemulun luk pebulung ku surga, ieh pebulung ku kerusi Allah, idi ku Tuhan luk tudo luun kerusi Allah ineh teh.

23 # Uk 27.30 “Mesusa' kuan muyuh guru-guru Ukum idi lun Parisi! Lun luk siayu! Muyuh maré babpat pulu' ratnan bawing, bua' ladeh, idi kulit kayuh luk mén; iamo' luk meluun rayeh ratnan Ukum Musa, ieh ineh ukum luk matu, éi, idi anu, tican muyuh. Ini luk petulu ruen muyuh, iamo' luk baken ineh pana' aleg necan. 24O muyuh lun nguyut luk mebuser, luk meker ku ritek, iamo' muyuh nelen pung unta!

25“Mesusa' kuan muyuh guru-guru Ukum idi lun Parisi! Lun luk siayu! Muyuh maru' luun sangkir idi bigan, iamo' bang lubangneh mepanu' ku pano idi lili. 26O iko lun Parisi luk mebuser, do' iko maru' bang lubang sangkir idi bigan ineh atun, pad luunneh pana' meligan.

27 # Kek 23.3 “Mesusa' kuan muyuh guru-guru Ukum idi lun Parisi! Lun luk siayu! Muyuh mepad kudeng tanem batu luk sinat ku apur, sagan pana' do' ayu luunneh, iamo' bang lubang mepanu' ku tulang-tulang lun naté idi puar-puar luk nan megeni'. 28Kudeng ineh teh ayu burur muyuh mepad kudeng lun luk matu siren lun baken, imao' bang niat, muyuh mepanu' ku saluk idi luk dat.

Yésus Ngegala' Ratnan Ukum Luk Macing Kuandeh

(Luk 11.47–51)

29“Mesusa' kuan muyuh guru-guru Ukum idi lun Parisi! Lun luk siayu! Muyuh nganau' tanem nabi-nabi, idi ngayung tanem lemulun luk matu, 30kebala muyuh, ‘Kudeng tau idi kareb tepun tau mulun mon, kali' rungen tau na perurum dengan lemulun luk nengeruat dara' nabi-nabi.’ 31Matu muyuh ngamo ratnan muyuh inul lemulun luk nengaté nabi-nabi atun! 32Mangeh mo' kekamen tepun muyuh. 33Muyuh menipeh idi inul menipeh, kudeng apehké muyuh mepuit ratnan ukum apui? 34Ngaceku ineh Ui pebala nemuyuh, Ui ngecuk nabi-nabi, lun mileh, idi guru-guru amé' nemuyuh; sebuang muyuh miak ngaté idi nalib; sebuang muyuh miak mabpet bang ruma' sembayang muyuh idi masut nedeh rat aceh bawang macingku bawang baken teh, 35pad muyuh mabeh amung-amung dara' lemulun luk matu luk pangeh inutang bang tana' ini, ngimun ratnan dara' Abil selemulun luk matu pad macing dara' Sekaria Barakia, luk pinaté muyuh arang Ruma' Allah idi bubpun. 36Matu, Ui pebala nemuyuh, amung ukum ini miak macing kuan inul ini.

Awa Yésus Kuan Yerusalim

(Luk 13.34–35)

37“O Yerusalim, Yerusalim! Iko ngaté nabi-nabi, idi mitung lemulun luk icuk amé' namu ku batu-batu. Tuda' kua' Ui sikal ngamung anak-anakmu mepad kudeng aceh tineh lal luk ngerukub anak-anakneh liang iladneh, iamo' na muyuh sikal! 38Nekini, ruma' muyuh pangeh tican ali-ali. 39Ngaceku Ui pebala nemuyuh, muyuh na miak nier Negku rat pad sini peh, pad macing muyuh pebala, ‘Samal kuanNeh luk macing bang ngadan Tuhan.’ ”

Currently Selected:

MATIUS 23: BLD

Highlight

Copy