PUDUT 6
6
Ratnan Dat Lemulun
1Idi kareb lemulun ineh iuk-iuk mula' luun tana', idi pangeh ideh nenginul tuda'-tuda' anak decur, 2idi anak-anak deléi luk ratnan Allah nenier anak-anak decur luk ratnan lemulun pelaba do' taga, idi ideh nengalap nedeh ku awandeh padpad piandeh. 3Idi Tuhan nepebala, “RohKu na miak mudeng bang niat lemulun macing ruked-ruked, ngaceku ieh ratnan ulun tana' ini, iamo' ieh miak mulun 120 lak mo'.” 4 Idi bang kareb ineh inan mula' lemulun luk medita' idi rayeh bang tana' ini, idi muci ratnan ineh peh, pangeh anak-anak deléi luk ratnan Allah nepamung dengan decur-decur luk ratnan lemulun, idi ideh nenginul tuda'-tuda' anak. Idi anakdeh ineh mesangit idi luk mebala bang kareb luk mon.
5Kareb Tuhan nenier sala' lemulun luk bang tana' ini pelaba ula', pad ieh ngerawé idi geregan ku luk dat mo' kidi-kidi, 6idi Tuhan nenginuud ngaceku lemulun luk pangeh inau'Neh bang tana', idi Ieh mesusa' niat. 7Idi Tuhan nepebala, “Ui pian ngaté lemulun luk pangeh inau'Ku luun tana'. Idi Ui pian ngaté amung-amung pung idi suit teh. Ui nginuud ngaceku Ui pangeh nemudut nedeh.” 8 Iamo' Tuhan méi' kuan Noh.
Noh Mudut Aludneh
9-10Ini bala ratnan Noh. Ieh inan teluh anak, Sem, Ham, idi Yapet. Noh ineh selemulun luk matu idi mesiri niat arang lemulun bang kareb ineh. Idi ieh perurum dengan Allah. 11Amung lun baken pelaba dat siren Allah idi aput tana' mula' ria'. 12Idi Allah nenier luun tana', matu-matu ieh pelaba dat, ngaeku amung-amung lemulun luk luun tana' nepanu' ku dat.
13Idi kebala Allah ni Noh, “Ui pian ngaté amung-amung lemulun, ngaceku tana' ini pangeh pinu'deh ku sala'deh. 14Do' iko mudut aceh alud rayeh ratnan kayuh luk do'; idi do' iko nganau' neneh mula' takep, idi ngamut pa luun idi pa lubangneh. 15Do' kadangneh 75 depeh, pipangneh 12 depeh setangal, idi dita' neh 7 depeh setangal. 16Idi do' iko nganau' aponeh, idi necan semikuh arang apo dengan alad ku gisuman. Idi do' nganau' sebuleng tanga' mo'. Idi do' nganau' alud dengan teluh parung. 17Idi Ui ngacing ereb pa luun tana', pad ngaté amung-amung pudut luk inan niat. Idi amung-amung luk luun tana' miak maté. 18Iamo' Ui ngacing pejani'Ku namu. Do' iko semuet bang alud rayeh ineh, dengan awanmu idi anak-anakmu dengan awandeh. 19-20Do' iko nguit semuet bang alud ineh puar-puar pung idi suit, tineh idi deléi, pad iko ngasa' nedeh. 21Idi do' iko nguit ratnan anun-anun akan luk miak kenen muyuh, idi pung idi suit pana'.” 22 Idi Noh nenganau' amung-amung luk icuk Allah neneh.
Currently Selected:
PUDUT 6: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
