PUDUT 37
37
Yusup Idi Kinanak-Kinanakneh
1Idi Yakub netudo bang bawang Kanaan su luk nan tamanneh netudo. 2Ini bala ratnan inul Yakub. Kareb ulun Yusup pulu' tudu' lak, idi ieh matar aya'deh dengan kinanakneh, luk anak Bilha idi Silpa, apid tamanneh ineh. Idi Yusup nemada' tamanneh ratnan kekamen luk dat luk inau' kinanakneh.
3Idi Israil mawa ku Yusup meluun ratnan anakneh luk baken, ngaceku ieh anakneh bang kareb ieh pangeh mengered. Idi ieh nenganau' kuanneh aceh kuyu' luk kadang langen. 4Iamo' kareb kinanakneh nenier tamandeh mawa neneh meluun ratnan amung-amung kinanakneh, idi ideh megateh neneh pad ideh na sikal pebala neneh dengan do'.
5Idi Yusup nenginupi, idi kareb ieh nemada' ineh kuan kinanak-kinanakneh idi ideh pelaba gateh neneh. 6Kebalaneh nedeh, “Ninger muyuh ratnan nupiku. 7Idi kareb tau déi' lati' uned ngangel nunguh padé, idi angelku ineh netumui idi netuped, idi angel dimuyuh ineh pana' nacing muneng iringneh, idi netekunal iring angelku ineh.”
8Idi kebala kinanak-kinanakneh neneh, “Miakké iko mangun ku raca' kai? Miakké iko ngimet nekai?” Ngaceku ineh ideh meluun gateh neneh ngaceku balaneh ratnan nupineh ineh.
9Idi Yusup nenginupi teh idi ieh nemada' ineh kuan kinanak-kinanakneh, kebalaneh, “Ui inan nupi teh, idi aco idi bulan dengan pulu' aceh gituen netekunal pa kiungku.”
10Idi nupi ini bilaneh nan tamanneh idi kinanak-kinanakneh. Idi tamanneh nemebpeng neneh, kebalaneh, “Kudeng apehké nupi ineh? Miakké ui idi tinanmu dengan amung-amung kinanakmu macing idi tekunal pa kiungmu?” 11#Kek 7.9 Idi kinanak-kinanak Yusup mét niat neneh, iamo' tamanneh megéi' ngerawé bala ineh.
Yusup Pinasui Idi Tiban Iné' Masir
12Kareb kinanak-kinanak Yusup iné' matar aya' tamandeh déi' Sikem, 13idi kebala Yakub ni Yusup, “Ui pian namu amé' su luk inan kinanakmu ngasa' aya' tau déi' Sikem.”
Idi kebala Yusup neneh, “Mo, miak ui amé'.”
14Idi kebala Yakub neneh, “Do' iko amé' matun kinanak-kinanakmu, idi nier kudeng ideh do', dengan amung aya' ineh teh, idi iko miak nguit bala kuanku teh.” Kudeng ineh Yakub nengecuk neneh nalan rat Ruan Hebron.
Idi Yusup iné' dei' Sikem. 15Idi inan seburur lemulun luk nepapu' neneh déi' kareb ieh nalan-nalan déi' bang laman ineh. Idi kebalaneh neneh, “Anunké luk tekapenmu?”
16Idi kebala Yusup, “Ui nakap kinanak-kinanakku luk ngasa' aya'deh. Miakké iko mada' negku su apeh luk inandeh?” 17Idi kebala lemulun ineh, “Ideh pangeh nenalan rat ieni, ngaceku ui neninger baladeh kudeng ini, ‘Do' tau amé' déi' Dotan.’ ” Idi Yusup iné' nakap kinanak-kinanakneh, idi ieh nepapu' nedeh déi' Dotan.
18Kareb ideh nenier neneh rat mado, kareb nateh ieh nacing nedeh, idi ideh neperurum sikal ngaté neneh. 19Kebaladeh seburur dengan seburur, “Ini lun luk nginupi di macing peh. 20Idi nekini do' tau amé' ngaté neneh idi nala' neneh bang subuk ini. Idi tau miak pebala ieh pangeh kinan aceh pung luk mesangit. Idi pangeh ineh tau miak nier kudeng apeh nupineh ineh mangun.”
21Kareb Rubin neninger baladeh, idi ieh pian muit neneh, kebalaneh, “Aleg tau ngaté neneh. 22Iamo' do' nala' neneh bang subuk luk bang laman ini, iamo' aleg ngurat neneh.” Ieh nepebala kudeng ineh, ngaceku ieh sikal muit ni Yusup rat bang paladdeh, pad ieh miak nguit neneh lemubed matun tamanneh. 23Idi kareb Yusup nacing inan kinanak-kinanakneh, idi ideh nengelengu kuyu'neh luk kadang langen. 24Idi ideh nengakem neneh idi nala' neneh déi' bang subuk. Iamo' subuk ineh tekering.
25Uneddeh kuman, denak-denak ideh nenier tuda'-tuda' lun Ismail luk nalan pekarur rat Giliad, maya' untadeh. Idi ideh nguit ilu' idi tuda'-tuda' luk do' buen amé' bawang Masir. Ideh nenalan rat Giliad amé' Masir. 26Idi kebala Yahuda nan kinanak-kinanakneh, “Anunké ulek tau ngaté kinanak tau idi ngapung neneh? 27Do' tau masui neneh nelun Ismail ini, pad tau na ngurat neneh, ngaceku ieh kinanak tau luk isuut, idi ieh sebuleng uang idi sebuleng dara' dengan tau.” Idi ideh nemaya' balaneh. 28#Kek 7.9 Idi kareb uned lun pepua' luk rat déi' Midian ineh lemaba, idi ideh nenginat usup rat bang subuk ineh, idi nemasui neneh nelun Ismail ineh dengan raga dueh ngepulu' balad pirak. Idi ideh nenguit ni Yusup amé' déi' Masir.
29Kareb Rubin nelemubed iné' ku subuk ineh, idi nenier Yusup na idi bang subuk ineh, idi ieh nengerarek ayungneh. 30Idi ieh nelemubed matun kinanak-kinanakneh, kebalaneh, “Anak ineh na idi. Anunké luk ruenku?”
31Idi ideh nengaté sebuleng amék, idi ideh nengerereb kuyu' Yusup ineh bang dara'neh. 32Idi ideh nenguit kuyu' ineh idi nemada' ineh siren tamandeh, kebaladeh, “Ini luk ilap kai. Do' nier kudeng ini kuyu' anakmu.”
33Idi ieh nengiti ineh, kebalaneh, “Ini kuyu' anakku. Kali' rungen ieh pinaté pung luk mesangit. Kali' rungen Yusup ineh inita' pung.” 34Idi Yakub nengerarak ayungneh, idi nenacung. Idi ieh netemido bang tuda'-tuda' aco ngaceku anakneh na idi. 35Idi amung-amung anakneh luk deléi idi decur nacing ngubuk neneh. Iamo' na ieh sikal buken, kebalaneh, “Ngaceku anakku ini na idi, ui temido pad macing bang su inan até.” Idi kudeng ineh tangi' tamanneh neneh.
36Idi lun Midian nemasui usup déi' bawang Masir kuan Potipar, seburur lun tareh raca', ieh ineh lun rayeh luk nginita raca'.
Currently Selected:
PUDUT 37: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
