PUDUT 35

Allah Ngeperuan Ni Yakub Déi' Baitel

1 # Pud 28.11–17 Kebala Allah ni Yakub, “Do' iko temina' amé' déi' Baitel idi tebawang déi'. Idi nganau' aceh bubpun kuan Allah luk pangeh siniermu kareb iko neburo ratnan kinanakmu Esau.”

2Idi kebala Yakub kuan amung uang tetek ruma'neh idi kuan amung-amung lun luk denganneh, “Do' nala' amung-amung akang lun pupu baken luk arang muyuh, idi ngeligan burur muyuh idi ngelibal amung-amung ayung muyuh. 3Do' tau nalan amé' Baitel, ngaceku ui sikal nganau' aceh bubpun déi' kuan Allah luk pangeh nengedengan negku kareb ui bang susa'ku, idi luk idi denganku kareb ui nalan.” 4Idi ideh nemaré kuan Yakub amung-amung akang lun pupu baken luk pangeh ilapdeh ineh, idi amung-amung abédeh. Idi Yakub nenanem amung ineh pa liang lawa kayuh luk meraben luk muneng ku bawang Sikem ineh.

5Kareb Yakub idi anak-anakneh nenalan, idi Allah nengacing aceh tot kuan amung-amung bawang luk libutdeh ineh, pad ideh na miak ngerada' nedeh. 6Idi Yakub dengan amung-amung lun denganneh nacing déi' Lus luk titen Baitel, luk bang tana' Kanaan. 7Idi déi' ieh nemudut aceh bubpun, idi ieh neneten ngadanneh El-Baitel, ngaceku su ineh Allah nengegala' bururNeh kuan Yakub kareb Yakub neburo ratnan kinanakneh Esau. 8Idi Debora pana' naté, ieh ineh luk ngasa' ni Ribeka, idi ieh tinanem pa acep aco déi' Baitel, pa liang lawa kayuh luk meraben luk titen “Kayuh luk Meraben luk inan Nangi'.”

9Idi Allah nesilagan ni Yakub teh, kareb ieh nacing rat déi' Mesopotamia, idi Ieh nengeperuan neneh. 10#Pud 32.28 Kebala Allah neneh, “Ngadanmu ineh Yakub. Iamo' rat pad sini iko tetanen Israil.” Idi Allah neneten neneh Israil. 11Idi kebalaNeh neneh, “Ui ini Allah luk Meluun Lalud. Do' iko mula' anak. Idi pupu luk mula', idi raca'-raca' pana' miak mangun rat namu. 12#Pud 17.4–8 Idi tana' ini luk pangeh biréKu ni Ibrahim idi Isak ineh miak barénKu namu, idi nan anak-anak inulmu teh.” 13Idi Allah nekemikit necan neneh. 14Idi Yakub nenaped aceh batu mangun ku aceh terawé, su luk inan Tuhan nepebala neneh. Idi ieh nengutang baré luk rupen luunneh, dengan umau pana'. 15#Pud 28.18–19 Idi Yakub neneten su ineh Baitel.

Até Rakel

16Idi ideh nenalan rat déi' Baitel; idi kareb lélé macing déi' Eprata, idi Rakel pana' nenganak, idi tenganakneh mikat. 17Idi bang ieh mét nenganak ineh, kebala decur luk mileh ngimet lun nenganak ineh neneh, “Aleg iko matot ngaceku anak mini deléi.” 18Idi kareb ieh ibo-ibo niat (ngaceku ieh maté), ieh neneten ngadanneh ineh Binoni, iamo' tamanneh neneten ngadanneh Beniamin.

19Kareb Rakel naté, idi ieh tinanem iring dalan amé' déi' Eprata (ieh ineh Baitlahim). 20Idi Yakub nenaped aceh batu ku aceh terawé su ineh; ieh ineh etu tanem Rakel luk idi macing nekini. 21Idi Yakub nenalan rat déi', idi ieh nelupo bal pudut luk medita' déi' Eder.

Anak-anak Deléi Yakub

(1 In 1.38–42)

22Kareb Yakub tudo bang bawang ineh idi Rubin iné' pamung rudap dengan Bilha, apid tamanneh. Kareb Israil nekali' ratnan ineh, ieh megateh niat.

Idi Yakub inan pulu' dueh anak deléi. 23Idi amung anak deléi Lia: ieh ineh Rubin (anak Yakub luk atun), Simion, Liwi, Yahuda, Iskar, idi Sebulon. 24Idi amung anak deléi Rakel: ieh ineh Yusup idi Beniamin. 25Idi anak deléi Bilha luk demulun Rakel: ieh ineh Dan idi Naptali. 26Idi anak deléi Silpa luk demulun Lia: ieh ineh Gad idi Aser. Idi amung anak deléi ini tinganak déi' Mesopotamia.

Até Isak

27 # Pud 13.18 Idi Yakub nacing nan tamanneh Isak déi' Mamré, luk muneng ku Hebron, su luk inan Ibrahim idi Isak netebawang. 28Idi ulun Isak meratu ualuh ngepulu' lak. 29Idi Isak naté kareb ieh mengered. Idi ieh tinanem anak-anakneh, ieh ineh Esau idi Yakub.

Currently Selected:

PUDUT 35: BLD

Highlight

Copy