PUDUT 28

1Idi Isak nenawar ni Yakub idi nepetabi' neneh, kebalaneh, “Aleg iko ngalap awan ratnan decur lun Kanaani. 2Do' iko nalan amé' déi' Mesopotamia déi' ruma' Betuil luk tepunmu. Ngalap aceh decur ratnan anak Laban luk taman pinakenmu ineh. 3Idi do' Allah luk Meluun Lalud ngeperuan awehmu ineh pad iko mula' anak, pelé iko mangun ku taman tuda'-tuda' pupu. 4#Pud 17.4–8 Do' Ieh ngeperuan namu idi inulmu mepad kudeng Ieh nengeperuan ni Ibrahim, pad iko ngimet tana' ini luk inanmu tudo luk pangeh biré Allah kuan Ibrahim!” 5Idi Isak nengecuk Yakub nalan amé Mesopotamia matun ni Laban luk anak Betuil lun Arami ineh, ieh ineh kinanak Ribeka tinan Yakub idi Esau.

Apid Esau Seketeluh

6Idi Esau nekali' Isak nengeperuan ni Yakub, idi Yakub icukneh amé' déi' Mesopotamia pad ngaweh déi'. Idi teh ieh kali' kareb Isak nengeperuan neneh, idi ieh nemebpeng neneh na ngalap decur lun Kanaani. 7Idi teh ieh kali' Yakub nemaya' bala taman-tinanneh, pad ieh iné' déi' Mesopotamia. 8Idi Esau kali' tamanneh Isak na sikal ku anak decur lun Kanaani, 9idi ieh iné' matun Ismail idi nengalap Mahalat anak Ismail Ibrahim, luk kinanak Nebayot ku apidneh.

Nupi Yakub Déi' Baitel

10Yakub nenalan rat Birsiba, idi iné' déi' Haran. 11Idi ieh nacing nan aceh natad luk inan ucu', idi ieh nerudap déi', ngaceku aco pangeh macep. Idi ieh nengalap aceh batu ratnan natad ineh idi nenganau' neneh ku laganeh, idi ieh netelubid sikal rudap. 12#Yah 1.51 Idi ieh nenginupi, idi inan aceh ican luk tuped rat luun tana', macing déi' langit. Idi inan tuda'-tuda' melaikat umak ican ineh idi temurun teh! 13#Pud 13.14–15 Idi ieh nenier Tuhan tuped iringneh. Idi kebala Allah, “Ui ini Tuhan, Allah Ibrahim idi Isak; idi tana' su luk inanmu telubid ineh pana' Ui miak maré kuanmu idi inulmu. 14#Pud 12.3; 22.18 Idi inulmu miak mangun kudeng abuh tana' ula'deh. Idi ideh miak ngimet aput tana'. Idi rat namu idi ratnan inulmu amung-amung pupu bang tana' ini miak ngalap peruan. 15Ngerawé do'-do', Ui idi denganmu, idi matar namu bang amung-amung lawému. Idi Ui miak ngelubed namu amé' bang bawang ini. Ui na necan namu pad Ui pangeh ngacing amung jani'Ku namu.”

16Idi Yakub nekulat, idi kebalaneh, “Tuhan idi ieni, idi na ui nekali' Neneh.” 17Idi ieh matot, kebalaneh, “Su ini inan luk katot! Kali' rungen ini ruma' Allah, idi tanga' surga teh.”

18Idi Yakub netumui pekak uka-uka, idi ieh nengalap batu luk inau'neh ku laganeh ineh, idi nenaped ineh mangun ku aceh terawé, idi ieh nengutang umau saitun luunneh. 19Idi ieh neneten ngadan su ineh Baitel. (Iamo' atun ngadan bawang ineh Lus.) 20Idi Yakub nepejani', kebalaneh, “Kudeng Iko idi denganku idi matar negku bang amung lawéku, idi maré akan idi ayungku, 21idi kudeng Iko nguli' negku dengan do' amé' ruma' tamanku, kali' rungen Iko mangun ku Allahku. 22Idi batu ini luk pangeh tipedku ku aceh terawé ineh, miak mangun ku su inanku sembayang Namu. Idi ui miak maré kuanMu babpat pulu' ratnan anun-anun luk barénMu negku.”

Currently Selected:

PUDUT 28: BLD

Highlight

Copy