PUDUT 27
27
Isak Ngeperuan Ni Yakub
1Kareb Isak mengered idi ieh nebuser, idi ieh nenawar ni Esau, anakneh luk atun idi nepebala neneh, “O Asi!”
Idi Esau nengor, “Anun idi, Ama'?”
2Kebala Isak, “Siruh, ui pangeh mengered; idi na ui kali' idan karebku maté. 3Do' iko ngalap binor idi ilebmu amé' bang pulung nakap pung kuanku. 4Idi nanek aceh kikidku, mepad kudeng luk inanku geregan, idi nguit ineh amé' negku. Kareb ui pangeh nekuman ineh, idi ui miak ngeperuan namu kareb nateh ui maté.”
5Idi Ribeka neninger bala Isak ni Esau. Idi Esau iné' nganup. 6Idi kebala Ribeka ni Yakub, “Bala i tamam kuan kinanakmu Esau ui pangeh neninger, 7kebalaneh, ‘Do' nguit kuanku aceh pung, idi nganau' aceh kikidku. Kareb ui pangeh nekuman ineh, idi ui miak maré peruan kuanmu kareb nateh ui maté.’ 8Ngaceku ineh, O Asi, do' ninger balaku idi nganau' anun-anun luk belénku namu. 9Do' iko amé' bang laman, idi nguit dueh anak amék luk melamu kuanku, idi ui miak nanek ineh ku kikid i tamam, ieh ineh mepad kudeng luk inanneh geregan. 10Idi iko miak nguit ineh amé' ni tamam pad ieh kuman, idi ieh ngeperuan namu kareb nateh ieh maté.”
11Idi kebala Yakub kuan tinanneh Ribeka, “Iamo Esau ineh selemulun luk mebuluh kubilneh, idi ui lemulun luk melana kubil. 12Kian, tamanku miak ngakem negku lek, idi ui mangun kudeng selemulun luk naluk neneh, pad ui ngacing kediman kuan bururku, idi baken peruan.”
13Kebala tinanneh, “Kedimanmu kuan dui, O Asi, iamo' do' iko maya' balaku, idi amé' ngalap dueh amék ineh kuanku.” 14Idi ieh iné' ngalap anak amék ineh, idi ieh nenguit ineh kuan tinanneh, idi tinanneh nenganau' ineh ku kikid, mepad kudeng luk inan tamanneh geregan. 15Idi Ribeka nengalap ayung Esau luk meraga luk bang ruma'neh, idi nekungayungneh ni Yakub. 16Idi dueh-dueh ticu'neh idi dierneh ibpuneh ku kubil amék ineh. 17Idi ieh nemaré kikid ineh idi ruti luk pangeh inau'neh, bang palad anakneh Yakub.
18Idi Yakub iné' matun tamanneh, kebalaneh, “O Ama'!”
Idi kebala Isak, “Anun idi, Asi, anakku sapeh iko ni?” 19Kebala Yakub kuan tamanneh, “Ui ini Esau, anakmu luk rayeh, idi ui pangeh nenganau' mepad kudeng luk bilamu. Nekini do' iko tumui idi tudo kuman pung luk ilapku, pad iko maré peruan negku.”
20Idi kebala Isak, “Kudeng apehké iko mesaget nengalap ineh, Asi?”
Idi kebalaneh, “Ngaceku Tuhan Allahmu nengedengan negku.”
21Kebala Isak ni Yakub, “Do' iko amé' muneng, pad ui miak ngakem namu. Matuké iko anakku Esau?” 22Idi Yakub iné' muneng nan tamanneh, idi Isak nengakem neneh, kebalaneh, “Balamu kudeng bala Yakub, iamo' ticu' ini ticu' Esau.” 23Iamo' na ieh nengiti neneh ngaceku ticu'neh dueh-dueh mebuluh kudeng ticu' Esau. Kareb ieh lélé ngeperuan neneh, 24idi ieh nengitun, “Matuké iko Esau?”
Kebalaneh, “Matu.”
25Idi kebala Isak, “Do' nganau' akan ineh muneng negku. Pangeh ui kuman ineh idi ui ngeperuan namu.” Idi Yakub nenganau' akan ineh muneng neneh idi Isak nekuman. Idi Yakub nemaré abpa' anggur rupenneh. 26Idi kebala tamanneh neneh, “O Asi, do' iko amé' muneng idi muen negku.” 27Idi kareb Yakub iné' muen tamanneh, petacu Isak kali' buen ayungneh, idi ieh nengeperuan neneh, kebalaneh, “Buen anakku ini mepad kudeng buen lati' luk inan Tuhan pangeh nemaré peruan! #Ibr 11.20 28Idi do' Allah ngebpeh kuanmu ipup rat déi' langit, pad tana'mu mebaleng idi padé idi abpa' anggurmu petap. 29#Pud 12.3 Idi do' tuda'-tuda' bawang mangun ku demulunmu, idi tuda'-tuda' pupu tekunal pa kiungmu. Do' iko ngimet amung-amung pupumu sebuleng, idi inul tinanmu pana' miak tekunal pa kiungmu. Idi kediman kuan idé-idé luk ngediman namu, idi peruan kuan idé-idé luk ngeperuan namu!”
Isak Ngeperuan Ni Esau
30Pangeh Isak nemaré peruan kuan Yakub, idi Yakub neburo. Kareb ineh Esau nacing rat nakap pung ineh. 31Idi ieh nenganau' kikid, idi nenguit ineh kuan tamanneh, kebalaneh, “O Ama', tumui iko, idi kuman luk ilapku, pad iko miak ngeperuan negku.”
32Idi kebala Isak, “Idéké iko ini?” Idi kebalaneh, “Ui ini Esau, anakmu luk atun.”
33Idi Isak pelaba gegker, kebalaneh, “Idéké luk nengeret pung ineh idi luk nenguit ineh iné' negku? Ui nekuman ineh kareb nateh iko nacing. Idi ui pangeh nengeperuan neneh. Idi kali' rungen peruan ineh kuanneh macing ruked-ruked.”
34Kareb Esau neninger bala tamanneh, idi ieh nengitang idi mesusa' niat, kebalaneh kuan tamanneh, “O Ama', maré peruan kuanku teh.”
35Kebala Isak, “Kinanakmu nacing dengan naluk, idi nengalap peruanmu ineh.”
36 #
Pud 25.29–34
Idi kebala Esau, “Naké ieh matu titen lun, Yakub? Ngaceku nekini dueh kua' ieh pangeh nenaluk negku. Idi ieh pangeh nengaro babpatku luk rayeh. Idi nekini peruanku pana' ilapneh.” Idi kebala Esau, “Naké iko maré peruan kuanku teh?” 37Idi kebala Isak neneh, “Ui pangeh nengiding neneh mangun ku tuanmu, idi ui pangeh nenganau' amung-amung pupuneh mangun ku demulunneh. Ui pangeh nemaré kuanneh padé idi abpa' anggur teh. Anunké luk barénku namu peh?”
38 #
Ibr 12.17
Idi kebala Esau nan tamanneh, “Inanké aceh peruanmu teh, O Ama'? Barénmu aceh peruan kuanku teh.” Idi Esau nangi'.
39Idi kebala Isak neneh,
“Luk inanmu tebawang na tana' mebaleng,
idi na luk idi ipup kuan lati'mu.
40 #
Pud 36.8; 2 Rac 8.20 #Ibr 11.20 Iamo' ratnan pelapetmu iko miak mulun,
idi iko mangun ku demulun kinanakmu.
Iamo' kareb iko sikal metueh rat neneh,
iko miak mepuit ratnan imetneh.”
41Idi Esau megateh ni Yakub ngaceku peruan luk biré tamanneh kuanneh. Keterawéneh, “Aco luk inan temido até tamanku pangeh muneng. Kareb ineh ui ngaté ni Yakub.”
42Iamo' Ribeka nekali' ratnan terawé Esau ineh, idi ieh nengecuk nawar ni Yakub, kebalaneh, “Do' iko ninger, kinanakmu Esau pian ngua' datmu idi ngaté namu. 43Idi nekini, Asi, do' maya' balaku. Do' iko temina' idi buro matun kinanakku Laban déi' Haran. 44Idi do' iko tudo déi' pad macing niat kinanakmu do', 45pad ieh mekelupan kekamenmu luk neneh; idi muci ui ngecuk lemulun nawar namu rat déi'. Ngudehké ui tacin medueh bang seaco?”
Isak Ngecuk Yakub Amé' Matun Ni Laban
46Idi kebala Ribeka ni Isak, “Ui pangeh musam ku awan Esau luk pupu baken. Kudeng Yakub ngalap seburur decur lun Hiti, meluun do' ui maté.”
Currently Selected:
PUDUT 27: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
