Mateo 25
25
Kɛkpalɛ Denɔ Badzɛ Lɔfɔ Gɛ Betinyi Anyɛ Shu
1“Nɛ kibe lɛ nɛ mɛ owũsise bukusiɔŋakɔ nɔ bɔ za ansɛ badzɛ lɔfɔ gɛ ba yɛkɔ balɛ bakanɛgbɛ pɛ be koeyi avɛ sɛ tɛ ba da tsyanɔ adzɛenyine. 2Batieti edzi bagã klɛ tieti edzi bebuinyi. 3Bagɛ eti nyibui na yɛkɔ balɛ bakanɛgbɛ pɔ ba dɛ yɛkɔ bubɔ kanyaka plɛnɔa lɛ. 4Bagɛ be nyibui, nɛ xũ, ba yɛkɔ bubɔ akpɛ epulim evunɔ plɛnɔ balɛ bakanɛgbɛ. 5Adzɛenyine nɛ aba wɔ kide bɔɛ nɛ yɛ tɛbɛba nɛm, klɛ so ba tɔ klɛ la kpa kɔlɔɛ dɔ klɛ la ba vɛnɔ tra.
6“Nɛ elishi nɛ shitibha ogugu oyi sɛ, ‘Adzɛenyine nɛ naa! No koeyi ɔba tɛ nɔ bɔ tsyanɛ yɛ mɔ!’
7“Ɔkɛlɛ badzɛ nɛ gɛ ti nyianyɛ ne vualɔ klɛ le deke balɛ bakanɛgbɛ. 8Bagɛ be ti nyibui nɛ etsre bagɛ nyibui nɛ asɛ, ‘Nɔkɔ lɔ wɔnɔ bubɔ nɛ bɔɛ, bulɔ bakanɛgbɛ nɛ eeni.’
9Bubite nyinyibui nɛ asɛ, “ ‘Ao,’ ‘bulɔ bubɔ nɛ dɛ kpe kɔɔ lɔ pɛ bu zɛ ba na wɔnɔ tsyɛ. No tsodzi ɔvɛ, agɛ aadɛ nɛ ɔkɔ tɛ no do bu tuli ɔkɔ shu.’
10“Pɔ gɛ be tsodzi atɔ nɔ kidzo avɛ bubɔ nɛ obu kɔ, ko klɛ adzɛenyine nɛ ebe ku. Bubite nyinyibui nɛ gɛ balɛ ba bala kɔ ishu nɛ bubɔ mɛ nɛ xũ na tsyanɔ adzɛenyine klɛ la ga vɛ adzɛ nɛ ɔgbanɔkɔ nɛ buvugbla nɛ mɛ. Klɛ ba da opupu.
11“Kɛlɛe de mɛ tieti gugɔɛ nɛ tsya ba ba. Ɔkɛlɛ ba ɖɔ asɛ, ‘Apalete! Apalete!’ ‘Danɛ opupu nɛ ɔkɔ lɔ!’
12“Pɔ be tsre balɛ asɛ, ‘Itsre nɔ kɛgba sɛ, iti nyi nɔ.’
13“Kɛlɛ so nɔ za nɛ awɔ̃, alasɛ no tinyi kiwi nɔɔ ɔdɔgɔsɛ ɔɖɔ nɛ mɛ.
Kɛkpalɛ Denɔ Baxwɛdɛ Tɛata Shu
14“Klɛ kɛ zɛ ba za ansɛ anɔ gɛ aaga kidzo, klɛ eklu yɛ baxwɛdɛ klɛ ayɛkɔ yɛ kɛnɔmɛdɔ nɛ akpɛ ahwɛ kɔa lɛ. 15Terikpo akɔ yɛ Sidi Akpãteti, abhla akɔ yɛ Akpãtabha, klɛ agugɔɛ nɛɛ akɔ yɛ Kɛkpãtirikpo, akɔ akanyaka nɛ yɛ tɛzɛzam nu. Klɛ ashɛ̃ avɛ yɛ kidzo nɛa bha. 16Anyɛ nɛ gɛ ayɛkɛ Akpãteti nɛ avɛ ada ayɛkɔ yɛayɛ na kpɛ kɛxwɛ wɛwam klɛ amɔ tieti atrɔ agɛ ba kɔ yɛ nɛa bha. 17Kana, aga yɛkɛ Tɛabha nɛ tsyɛ amɔ tɛabha atrɔ agɛ bakɔ yɛ nɛa bha. 18Pɔ agɛ yɛ ayɛkɛ kɛkpãtrikpo nɛ xũ ashɛ̃, klɛ ede bu ozi klɛ ayɛkɔ yɛayɛ nɛ ekpu.
19“Nɛ kibe dzidze tilie de apalete nɛ ebe de kidzo nɛ mɛ aba klɛ ebe bisi balɛ kana gɛ ba ga nɛ ehoeyi. 20Anyɛ nɛ gɛ ayɛkɛ Akpãteti nɛ ayɛkɔ teti bhlatɔ ata amɛna. Klɛ asɛ, ‘Apalete,’ ‘ɔkɔ mɛ Sidi Akpãteti. Di, Ɛmɔ teti trɔ yɛa bha.’
21Yɛ apalete nɛ asɛ, ‘Wɔ naa bhɛtɛ, axwɛdɛ dzyɔgo gɛ ba ba yɛkɛ wɔa bha ŋa! Ɔza tɛyɛyɛkɛ ŋa mɛ nɛ kɛdɔ bhli nɛ gɛ ɛkɔ wɔ, ɛba yɛkɔ wɔ idzu ebui anɛ kɛdɔ gelee nu. Ba tɛ ɔbɔ mɔ same ɔplɛnɔ wɔ apalete!’
22“Anyɛ nɛ gɛ ayɛkɛ Akpãtabha nɛ tsyɛ aba. Asɛ, ‘Apalete,’ ‘ɔkɔ mɛ Sidi Akpãtabha, di, ɛmɔ tabha trɔ.’
23“Apalete nɛ asɛ, ‘Ɔnaa bhɛtɛ, axwɛdɛ dzyɔgo gɛ ba ba yɛkɛ wɔa bha ŋa! Ɔza tɛyɛyɛkɛ ŋam nɛ kɛdɔ bhli nɛ gɛ ɛkɔ wɔ, ɛba yɛkɔ wɔ idzu ebui anɛ kɛdɔ gelee nu. Ba tɛ ɔbɔ mɔ same ɔplɛnɔ wɔ apalete!’
24“Klɛ anyɛ nɛ gɛ ayɛkɛ Sidi Kɛkpãtrikpo nɛ tsyɛ aba. Klɛ asɛ, ‘Apalete,’ ‘Inyi sɛ anɔ gɛganɛ onu, gɛ oobu kɛdɔ nɛ ɔklɛ gɛ ɔdɛ ɖa kɛdɔ klɛ ɔyalɛ kɛdɔ nɛ ɔklɛ gɛ ɔdɛ hwɛ kɛdɔ. 25Kɛlɛ so isi wɔɛ fu klɛ mɛ ɛyɛkɔ ehoeyi nɛ gɛ ɔkɔm nɛ da tsu ozi pɛ ɛyɛkɔ kpɛ. Di, kɛ gɛ nu wɔɛyɛ nɛ nɛɛ.’
26“Apalete nɛ etsre yɛ asɛ, ‘Wɔ kɛtɔkpum gɛganɛ anɔ onu, axwɛdɛ avuvɔ onu! Kɛlɛ so onyi sɛ ibui dɔ nɛ ɔklɛ gɛ ɛdɛ ɖa kɛdɔ klɛ mɛ yalɛ kɛdɔ nɛ ɔklɛ gɛ ɛdɛ hwɛ dɔ? 27Kɛbɔ, anlo ɔtɛ yɛkɔ kɔba nɛ ɔdɔ kpɛ bagɛ baa bala kɔba nɛ ahwɛ, pɛ ata mɔ atrɔ pɛ onu gɛ ide ba pɛ ɛta ba yɛkɛ.
28“ ‘Yɛkɛ ehoeyi nɛ yahwɛ tɛ ɔyɛkɔ kɔ agɛ evunɔ Akpã lɔfɔ. 29Alasɛ aanɔ gɛ kɛdɔ lɛ yahwɛ ba za ba kɔ yɛ atrɔ, klɛ kɛdɔ ba kpe nɛ yahwɛ. Aanɔ nɛ gɛ kɛdɔnyɛdɔ ma yɛ ahwɛ, kibhliyi nɛ gɛ lɛ yahwɛ nɛ tsyɛ ba ba yɛkɛ kɛlɛ nɛ yahwɛ. 30Klɛ tɛ ɔyɛkɔ axwɛdɛ zhuzhɔlɛa lɛlɛ nɛ ɔtɛɛ kpɛ ɔtɔ nɛ otumu mɛ, ɔklɛ gɛ iyuyo nɛ eletɛtã alɛ.’
Ibhoshi Nɛ Bepidzya
31“Onu gɛ Anɔdzyrame yɛ Eyi nɛ aaba nɛ yɛ ishu bhuibhui mɛ, pɛ yɛ baxwɛdɛ nɛ peteea lɛ aplɛnɔ yɛ, ebe zhiza yɛ bukusiegbu nɛa bha nɛ owũsise nɛ ishu bhuibhui mɛ. 32Amadi nɛ petee le be xogo nɛ yɛ amɛ, klɛ aba tsya banɔ nɛ mɛ ansɛ gɛ ibhoshi agbɛgbanɔ aba tsya ibhoshi ebu nɛ bepidzya nɛɛ shi. 33Aba yɛkɔ ibhoshi nɛ elu yɛ kɛŋa mɛ klɛ bepidzya na ba za yɛ kɛbɛtɛkpɛ mɛ.
34“Ɔkɛlɛ Ekusi nɛ ebe tsre ɛgɛ li kɛŋa nɛ mɛ asɛ, ‘Nɔ ba, wɔnɔ bagɛ mɛ Aka nɛ atɛ yula, nɔ yɛkɔ wɔnɔ ɔŋakɔ, gɛ bukusiɔŋakɔ nɛ gɛ ba bala lu kɔ nɔ denɔ kanɔ nɛ kesikpɛkpɛ. 35Alasɛ bubhɛ yim klɛ nɔ kɔ mɛ kɛdɔ mɛ ŋa, oniwɛ ɔtam klɛ nɔ kɔ mɛ kɛdɔ tili mɛ wɛ̃, idzi efu klɛ no kulu mɛ ɔmɛna wɔnɔ mɛ, 36Ibisi kɛpɔtɛ klɛ nɔ da kɛpɔtɛ ɔkɔ mɛ, ɛɛnya klɛ no di mɛa bha, ɛza buvu klɛ nɔ bɔ sra mɛ odi.’
37“Ɔkɛlɛ anɔnɛna nɛ ebe builɛ nu asɛ, ‘Apalete, kibe ɖueɖu lɔ mɔ wɔ gɛ bubhɛ yi wɔ pɛ bu kɔ wɔ kɛdɔ ɔŋa, pɛ ɔdɔgɔsɛ klɛ bu kɔ wɔ kɛdɔ tili sɛ ɔwɛ̃? 38Kibe ɖueɖu lɔ mɔ wɔ ansɛ efu pɛ bu yɛkɛ wɔ kpɛ bulɔɛ shi, pɛ ɔdɔgɔsɛ obisi kɛpɔtɛ pɛ bu ba da kɛpɔtɛ kɔ wɔ? 39Kibe ɖueɖu mɛ bu mɔ wɔ pɛ ɔɔnya ɔdɔgɔsɛ ɔza buvu pɛ bu ba mɔ wɔ di?’
40“Ekusi nɛ ebe bui lɛ nu asɛ, ‘Ítsre nɔ kɛgba sɛ, kɛdɔnyɛdɔ nɔ bhɛtɛ kɔ anɔ bhli kanyaka nɛ madzyalɛa nɛ mɛ, mɛ nɔ bhɛtɛ kɔ.’ 41“Ɔkɛlɛ aba ɖɔ tsre bagɛ bedzi yɛ kɛbɛtɛkpɛ nɛ mɛ asɛ, ‘Nɔ shɛ nɛ mɛ ɔbha, wɔnɔa gɛ ba ɖɔɛ bui akpɛ, ayɛkɔ tɛ̃a kpɛ kifu gɛ tɛba ni di mɛ gɛ ba bala elu kɔ ɔfufɔɛkpã nɛ ɛlɛ baxwɛdɛ. 42Alasɛ bubhɛ yi mɛ klɛ nɔ dɛ kɔ mɛ kɛdɔnyɛdɔ sɛ ɛŋa, oniwɛ ɔta mɛ klɛ nɔ dɛ kɔ mɛ kɛdɔnyɛdɔ sɛ ɛwɛ̃, 43Idzi efu klɛ nɔ dɛ yɛkɛ mɛ ɔkpɛ wɔnɔɛ shi, ibisi kɛpɔtɛ nɔ dɛ da kɛpɔtɛ kɔ mɛ, ɛɛnya klɛ mɛ za buvu no dɛ di mɛa bha.’
44“Balɛ tsyɛ be be bui lɛ nu aɖɔ sɛ, ‘Apalete, kibe ɖue be bu mɔ gɛ bubhɛ yi wɔ, oniwɛ ɔta wɔ, odzi efu, obisi kɛpɔtɛ, ɔɔnya ɔdɔgɔsɛ ɔza buvu, pɛ bu dɛ plɛnɛ wɔ?’
45“Ɛbe bui lɛ nu asɛ, ‘Itsre nɔ kɛgba sɛ, kɛdɔnɔ nɛ gɛ nɔ dɛ bhɛtɛ kɔ anɔ bhli tsyɛ nɛ banɔa nɛ mɛ, nɔ dɛ bhɛtɛ kɔ mɛ naa lɛlɛ.’
46“Ɔkɛlɛ la ba shɛ avɛ ede tsoku batɔtɛtɛta mabeke mabeke mɛ, pɔ banɔnɛna na ba vɛ ɛkpã mabeke mabekemɛ.”
Currently Selected:
Mateo 25: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
