Mateo 24

Kɛdɔmumɔ Nɛ Kibe Nɛ Obekekɔ

1Yesu ashɛ̃ nɛ busɔlɛvu nɛm pɛ agaa vɛ klɛ yɛ badɔkpasɛ na ba tɔnɔ yɛ klɛ ba baka yɛ buvu nɛ bui. 2Ebisi asɛ, “Nɔɔ mɔ ebuia nɛ petee xãa?” “Itsre nɔ kɛgba sɛ, ba tɛ ba shɛnahwɛ kɛklãgbu kanyaka atrɔ klɛ ɔhaɛa bha, ba ba tsɛ kɛkanyaka ebho.”

3Gɛ Yesu ezhidzi Olivɛ butu nɛa bha, yɛ badɔkpasɛ nɛ aba yɛ ɔbha nɛ tɛkpukpum. Klɛ ba ɖɔ asɛ, “Tsre lɔ, ” “kibe ɖueɖu mɛ kibui nɛ ba ba kɛlɛ mɛ, klɛ kide gɛ ba dzi wɔ tɛbɛba nɛ kɛdɔmumɔ nɛ kibe nɛ tibibeke mɛ?”

4Yesu ebui lɛ nu asɛ, “No lu awɔ̃ sɛ tɛ anɔnyanɔ atɛ ba wɛɛ nɔ. 5Alasɛ banɔ gelee ba baa ba nɛ mɛ kinyi mɛ, aza ɖɔ asɛ, ‘mɛ nu Kristo,’ klɛ ba baa wɛɛ banɔ gelee. 6No bo nu buyu anɛ buyutɛta kɛdɔ, pɔ no di klɛ ɔkɔ sɛ kɛtɛ hwanɛ nɔ. Alasɛ tɛ ebuia nɛ aba kɛlɛ mɛ, pɔ tɛbibeke nɛ mɛ lɛ gɛ baa ba. 7Amadi aba lɔ kititi nɛ amadi shu, klɛ bukusiɔŋakɔ ba lɔ kititi nɛ bukusiɔŋakɔ shu. Bubhɛ ba dɔ klɛ busukpa ba hwa nɛ ɛzakɔ gelee. 8Anɛ nɛ petee le nu ansɛ eyimumɔ ɛyamtɛtã kesikpɛkpɛ.

9“Ɔkɛlɛ la ba yɛkɔ wɔnɔ akpɛ ahwɛ kɔ sɛ ba kpatɔnɔ klɛ be be yi nɔ, klɛ amadi nɛ petee atɛ ba pɛɛ wɔnɔɛ bui akpɛ mɛ so. 10Nɛ kibe lɛ nɛ mɛ banɔ gelee ba ba shɛnahwɛ tɛyɛyɛkɛŋa nɛ shu klɛ la ba ga aglɔ esi klɛ la tɛa dɛmɛ aglɔɛbui, 11klɛ itro batɔnu gelee ba baa wɛ̃ klɛ la ba wɛɛ banɔ gelee. 12Nɛ kɛtɔkpum gɛganɛ kabha wuwu, banɔ gelee ɔhaglɔ ɖuɖɔ na ba yɔ, 13pɔ anɔɔ nɛ gɛ aza gɛganɛɛ be be bu yɛ. 14Klɛ ba ba ɖɔ bukusiɔŋakɔ kibui nɛ akana kanɔ nɛ mɛ petee ansɛ kibuimɔɖɔ kɔ amadi nɛ petee, klɛ flogo pɛ obekekɔ nɛ ɔbɔ ba.

15“Kɛlɛ so onu gɛ no li ɔzakɔ bhubhui pɛ nɔ mɔ ‘ebusobui nɛ gɛ akɔ butsyrɔ,’ gɛ alɛ bui la ɖɔ ganɔ atɔnu Daniɛlɛa bha nɛɛ—kɔ adɔkla nɛ enu klɛesi— 16kɛlɛ tɛ nɔ kɔ bagɛ alɛ Yuɖia nɛ be si avɛ betu nɛa bha. 17Tɛ kɔ anɔnyanɔ gɛ etsri yɛ ovutɔ ada mɛ ezhi ba kesi sɛ aba yɛkɔ yɛ kɛdɔnyɛdɔ nɛ buvu nɛ mɛ. 18Tɛ kɔ anɔnyanɔ gɛ alɛ ayakpa mɛ nɛ etsodzi avɛ sɛ atɛ yɛkɔ yɛ kabhawi. 19Kɛlɛ za lɛ ba za gɛganɛɛ kɔ bayamunɔ anɛ bamumɔ vuvɔ nɛ ewia lɛlɛ nɛ mɛ! 20No kulukpaya sɛ tɛ wɔnɔ kisi be nɛ tɛ dzi bublɔɛ be ɔdɔgɔsɛ nɛ kimuenewi nɛa bha. 21Alasɛ kibe lɛ nɛɛ butɔ piim ba za, gɛ bu dɛ sɔnɔ bukanyaka denɔ kanɔ nɛ mɛ kesikpɛkpɛ ɔbɔ nanɔ ɔtsɔ̃—klɛ butɛa fla sɔnɔ bukanyaka di. 22Otɔsɛ ganɛ bubhui le bhui ewi alɛ nɛa bha agɔ, anɔnyanɔ agɛ ta fla gɔ, pɔ nɛ agɛ be ti bu kɔ lɔ nɛ so, ewi alɛlɛ nɛa bha aba tsɛ. 23Nɛ kibe lɛ nɛ mɛ onu gɛ anɔ teli etsre wɔa sɛ, ‘Di, Kristo nɛ naa!’ ɔdɔgɔsɛ, ‘Yɛ eli ɔkɛ̃ naa!’ tɛ yɛkɛ lɛa bha ɔŋa. 24Alasɛ itro be Kristo nɛ itro batɔnu nɛ ba ba wɛ̃ klɛ ba ba bhɛtɛ kɛdɔmumɔ gbɛgbla nɛ ebui gɛ abhɛtɛ bi sɛ tɛ ba yɛkɔ awɛɛ bagɛ be klu nɛ tsyɛ—onu gɛ kɛ ba kɛlɛ mɛ ana. 25Di, ɛtɛ tsre nɔ kpɛ otugba.

26“Kɛlɛ so onu gɛ anɔ teli etsre nɔ asɛ, ‘Yɛ naa, gɛ ede ayakpam ekoeyi,’ no ti koeyi ɔtɔ, ɔdɔgɔsɛ, ‘Yɛ eli ɔkɛ̃ naa, nɛ kɛmɛ bevu nɛ mɛ,’ nɔ tɛ yɛkɛ klɛa bha ɔŋa. 27Alasɛ ansɛ gɛ subhaɛfu nɛ kii de kiwiɔyɛkɔ pɛɛ kɛɛ wɛŋ nɛ kiwiɔdɔkɔ, kana Anɔdzyrame yɛ Eyi nɛ tɛbɛba nɛ baa za. 28Ɔkɛlɛ gɛ kɛdɔtsitsi lɛɛ, ɔkɛlɛ eshishi nɛ ebe xogo.

29“Nɛ ewi tsutsɔmɔa lɛ nɛe de ko,

“ ‘kiwi nɛ ba dɔ otumu,

klɛ wele nɛ atɛa tã;

awɛ̃wɛ̃ nɛ aba wɔlɛ denɔ kɛlɛɛ mɛ,

klɛ owũsise banɔ nɛ aba hwa.’

30“Nɛ kibe lɛ nɛ mɛ Anɔdzyrame yɛ Eyi nɛ kɛdɔmumɔ nɛ ba wɛ̃ nɛ owũsise, klɛ amadi petee nɛ kesukpa nɛa bha na be tsishu. Ba ba mɔ Anɔdzyrame yɛ Eyi nɛ ɔmunɔ nɛ mɛ gɛ ede owũsise nɛ aaba, nɛ kemi anɛ ishubhubhui gbɛgbla mɛ. 31Klɛ aba kpɛ yɛ baxwɛdɛ nɛ buxulɔ̃ɛ bubɔ gɛganɛɛ kɛdɔ kukulu, klɛ be be xogo yɛ banɔ nɛ gɛ ebu nɛ alɛ talɛ̃ nɛ mɛ, denɔ owũsise nɛ obekekɔ ɔyɛkɔ vɛnɔ ɔgɔgɔɛkɔ.

32“Ɔtsɔ̃ nɛ nɔ kpasɛ kɛdɔ odenɔ kabhɔosi nɛ shu. Kibe nɔ nɛ gɛ ɔlɛ ɛshɛ nɛ lɛ vuvɔvuvɔ klɛ awulakpa nɛ ekoeyi avuvɔ, no ti sɛ ekpe nɛ etsu aba. 33Kɛɛ za na tsyɛ, onu gɛ nɔ mɔ ebuia nɛ petee, no ti sɛ etsu aba nɛ wɔ kedunu nɛ kpɔ̃. 34Itsre nɔ kɛgba sɛ, tɛmumɔɛ nɛ mɛ tɛ ba fla ɔdɔ nanɔ kibe lɛ gɛ ebuia nɛ petee aba kɛlɛ mɛ. 35Owũsise anɛ kesukpa aba ba fla, pɔ mɛ kibui nɛ tɛ ba fla di.

Anɔnyanɔ Eti Nyi Kiwi Ɔdɔgɔsɛ Kibe

36“Anɔnyanɔ eti nyi kiwi nɔɔ pɛ ɔdɔgɔsɛ ɔɖɔ nɛ mɛ, baxwɛdɛ nɛ owũsise tsyɛ ti nyi, Kpaya yɛ Eyi nɛ tsyɛ eti nyi, Aka nɛ owũsise nɛ ko yɛe nyi. 37Anasɛ gɛ kɛza nɛ Nowa kibe, kana kɛba za nɛ Anɔdzyrame yɛ Eyi nɛ tɛ bɛ ba mɛ. 38Alasɛ flogo tɛ kesukpa nɛa bha ka ba yɛkɛ buni, banɔa za ŋɛdɔ klɛ ba wɛ̃ dɔ, baa gbanɔ adzɛ klɛ baa yɛkɔ adzɛ akɔ sɛ ba gbanɔ, ɔdɔ nanɔ kibe lɛ gɛ Nowa etsoku otsyokpo nɛ mɛ; 39klɛ be di ti kibuinyɛbui denɔ kɛ gɛ baa ba nɛ shu, ɔdɔ nanɔ kibe lɛ gɛ buni nɛ ba gbɛgba klɛ bu yɛkɔ balɛ petee ashɛ̃nɔ. Kana kɛba za nɛ Anɔdzyrame yɛ Eyi nɛ tɛ bɛba mɛ. 40Banɔ tɛa bha ba za ayakpam; ba ba yɛkɔ terikpo klɛ la ba shɛ̃nahwɛ agɔgɔɛ shu elu. 41Badzɛ tɛa bha ba ba za hɔ kɛdɔ nɛ buhɔa bha, ba ba yɛkɔ terikpo klɛ ba shɛnahwɛ abhla nɛ shu elu.

42“Kɛlɛ so nɛ nɔ za nɛ awɔ̃, alasɛ no ti nyi kiwi nɔɔ nɛ gɛ klɛa bha wɔnɔ Apalete nɛ aba ba. 43Pɔ nu kibui nɛesi sɛ: Otɔ sɛ apalete nɛ eti elishim ɔɖa nɔɔ nɛ mɛ gɛ ezi nɛ aba ba, ata za nɛ awɔ̃ klɛ agɛ ta kɔ sɛ ezi nɛ ebe tsoku bulɛ mɛ. 44Kɛlɛ so alasɛ wɔnɔ tsyɛ nɔ za tɛbɛbala mɛ, alasɛ Anɔdzyrame yɛ Eyi nɛ aba ba nɛ ɔɖɔ nɔɔ nɛ mɛ gɛ otoo di kidzoe nu.

45“Kɛlɛ anee yɛ enu axwɛdɛ gɛ tɛyɛyɛkɛŋa lɛ yɛahwɛ klɛ enyi bui, gɛ yɛahwɛ apalete nɛ ayɛkɔ baxwɛdɛ nɛ akpɛ nɛ yɛ bupa nɛ mɛ sɛ tɛ aza kɔa lɛ kɛŋɛŋa nɛ ɔɖɔ dzyɔgo nɛ mɛ? 46Kɛ ba pɛ kɔ axwɛdɛ nɔɔ nɛ gɛ yɛ apalete nɛ aba ba mɔ yɛ sɛ aabhɛtɛ kana onu gɛ etsodzi aaba. 47Itsre nɔ kɛgba sɛ, aba yɛkɔ yɛ edzu yɛ kɛnɔmɛdɔ petee nu. 48Pɔ kɛɛ lɛ sɛ axwɛdɛ nɔa lɛlɛ nɛ kɛtɔkpu mɛ gɛganɛ klɛ aɖɔ nɛ ishum asɛ, ‘Ma palete nɛ aba za ɔklɛ kibe dzidze,’ 49klɛ aba kpa yɛ baxwɛdɛ glɔa lɛ nɛ tu klɛ aŋa pɛ awɛ̃ dɔ nɛ beluwɛ̃. 50Axwɛdɛ nɛ yɛ apalete nɛ aba ba nɛ kiwi nɔ nɛa bha gɛ etee di yɛ dzoenu klɛ nɛ ɔɖɔ nɔɔ nɛ mɛ gɛ etinyi. 51Ebe bhui yɛ akpɛ bupɛpɛpɛ mɛ klɛ aba kɔ yɛ kɛxwɛ nɛ betroni nɛ shi, nɛ ɔkɛlɛ gɛ iyuyo nɛ eletɛtã alɛ.

Currently Selected:

Mateo 24: tcd

Highlight

Copy