Luka 21

Adzɛ Gɛ Etsianyɛ Kɛdɔkukɔ

1Gɛ Yesu ebu amɛ ewunɔ amɔ behuelete akpɛ kɔba nɛ busɔlɛ kɛdɔdzyudzyɔ kesugba nɛ mɛ. 2Aza mɔ anyɛtsi etsyutsyuini gɛ akpɛ kɔba xwɛtsɛ tɛabha nɛ kesugba nɛ mɛ. 3Yesu aɖɔ sɛ, “Ɛtsre nɔ kɛgbɛagba, etsyutsyuinia akpɛ kɔba gɛ ekpe adɛ anɔnyanɔ ayɛ. 4Banɔ anɛ petee ba kɔ balɛ kɔba nɛ balɛ ehoeyi mumɔ nu, pɔ adzɛ nɛ yɛ kitsyui nɛ mɛ akpɛ yɛ kɔbɔ gugɔɛ gɛ alɛ yɛ ahwɛ gɛ yɛabha aba za.”

Kɛdɔmumɔ Nɛ Kanɔɛmɛ Bibeke Shu

5Ye badɔkpasɛ teli bà ɖɔ kibui dɛnɔ busɔlɛvu gɛ be dzu nɛ aklãngbu pupudi shu klɛ nɛ ɛyɛmɛyuyɔ gɛ ba kɔ Kpaya. Pɔ Yesu aɖɔ sɛ, 6“Anasɛ kɛdɔ nɛ gɛ nɔ mɔ nɛ́ ɔkɛ nɛ, kibe ba ba gɛ kɛklãgbu tirikpo tɛ ba wɔ kɛlɛ ɔhaglɔ abha, kɛkanyaka ba be bui lɛ atɛ̃ lu kesi.”

7Be bisi asɛ, “Adɔkasɛ, kibeɖuweɖu ebuianɛ petee la ba bɛ lɛmɛ? Klɛ kide gɛ bakasɛ sɛ ebuianɛ la ba ba?”

8Ebuilɛnu asɛ: “ Nɔ di ishuabha sɛ ba dɛ wɔɛ nɔ. Alasɛ be gelee aba ɖɔ sɛ, ‘Mɛ nu yɛ,’ klɛ, ‘Kibe nɛ na.’ Nɔ tɛ tɔnɔ alɛ. 9Kibenɔ gɛ nɔ nu buyu tɛta nɛ kititilɛlɔ nɛ ɔma shu, nɔ tɛ sifu. Ebuanɛ la ba ba putɔ, pɔ kanɔ bibeke tɛ ba ba nɛ kibe lɛlɛ nɛ.”

10Ɔkɛlɛ aɖɔ tsre alɛ asɛ: “Amadi abɔ lɔɛtiti nɛ alɛ ɔhaglɔ shu, klɛ bukusiɔŋakɔ nɛ bukusiɔŋakɔ shu. 11Busukpa ba hwa gɛganɛ, bubhɛ nɛ banyazizi nɛ́ ɛzakɔ bhlatɔ tili, klɛ kifusisi ebui nɛ̀ ebuimumɔ gɛganɛ denɔ owũsise.

12“Pɔ flogo gɛ anɛ nɛ petee aba ba, ba be vu nɔ klɛ ba ba yɛkɔ nɔ akpɛ ahwɛ. Ba ba yɛkɔ nɔ akɔ bebhuiklu nɛ oxogokɔvu nɛ mɛ klɛ la ba kpɛ nɔ vu, klɛ la ba gbanɛ nɔ vɛnɔ bekusi nɛ̀ ba mani nɛ ɔkɔ nɛ mɛ nyi nɛ tɔkpu. 13Kɛɛ nɛ ba kɔ sɛ no bo dzi kibuimɔɖɔ kɔ alɛ. 14Pɔ nyɛna shu sɛ ɔtɛ kpɛ shutɔ ɔkpɛ otugba, kɛga gɛ ɔbɔ ga gɛ ɔbo bu shunu. 15Alasɛ ɛba kɔ wɔ ebuiɖɛɖɔ nɛ kibuinyinyi sɛ ba gɛ bata pɛɛ wɔɛbui ba tɛ bana kibui nɛ shu shɛ̃nahwɛ pɛnɔ betsyinɛ la ɖɔ. 16Wɔnɔ aka anɛ wɔnɔ eni alɛ, badzya, beshopo anɛ ɛbhɛya lɛ kuratsyɛ aba kpɛ wɔnɔ ahwɛ kɔ le yi. 17Alasɛ mɛ so banɔ petee be gunɔ. 18Pɔ wɔnɔ kɛtɔkputɛka tirikpo tsyɛ tɛ ba pɔ tɛ̃ 19Tɛzɛza mɔmɔ ba kɔ wɔ za nɛ kpã.

20“Kibenɔ nɛ gɛ ɔmɔ beyutugbani gɛ ba kana Yerusalɛm atsya nɔ bɔ ti sɛ kanɔ mɛ obekekɔ tsobunɔ. 21Kɛlɛ kɔ bagɛ ba lɛ Yuɖea be si avɛ betunɛabha, kɔ bagɛ lɛ ɔma gbɛgbla nɛ mɛ be koeyi, klɛ kɔ sɛ ba gɛ lɛ ɛmabhlibhli nɛ mɛ be ti tsoku ɔmagbɛgbla nɛ mɛ. 22Alasɛ kɛɛ nɛ kɛlɛ nu kibe kɔ batɔ tɛtɛtɛta nɛ kɛlɛmɛ tɛbɛba kɔ kɛgɛ ba ŋlɔmɛ elu nɛ petee. 23Kɛlɛ lɛ ba gɛganɛ nɛ ewui alɛlɛ nɛ mɛ kɔ bayamunɔ anɛ̀ bagɛ banuvɔ lɛ balɛ ahwɛ! Butɔ gɛganɛ ba ba kesukpa nɛ mɛ klɛ batɔtɛtɛ̀ta ba ba banɔ alɛlɛ nɛabha. 24Ba be yi alɛ nɛ kɛpamɛ klɛ ba ba yɛkɔ alɛ anasɛ bevuza kɔ ɛma petee. Bagɛ be dinu Yuɖanɛ ba be tu ɔtsɛrɛ nɛ Yerusalɛm abha ɔdɔnanɔ kibɛ na kɔ ba gɛ bedinu Yuɖanɛ nɛ be na.

25“Kɛdɔmumɔ ba wɔɛ̃ nɛ kiwui, woele anɛ awũwɔɛ nɛ amɛ. Nɛ kesukpa nɛabha, amadi nɛ aba za butɔ anɛ bufutsufutsu mɛ nɛ aƒu nɛ tɛtutɔkɔ anɛ tɛhuhwa mɛ. 26Banɔ be tsiabhɛbhɛ denɔ kɛfusisi mɛ, be di ebui nɛ gɛ la ba nɛ kanɔ nɛabha, alasɛ owũsise mɛ dɔ bhɛbhɛtɛ ba shuku. 27Nɛ kibelɛlɛ nɛ mɛ ba ba mɔ Anɔdzyrame Yi gɛ àba nɛ ɔmunɔ nɛ mɛ, nɛ́ kemi nɛ̀ ishudɛdanɛ gbɛgbla mɛ. 28Kibenɔ nɛ gɛ ebuianɛ la kpɛesi aba, lɔɛ titi tɛ ofeke wunɔ atɔkpu owunɔ, alasɛ wunɔ tɛyɛyɛkɛ tso bunɔ.”

29Yesu ɛtsre alɛ kɛkpalɛ nɛ sɛ: “Nɔ di kabhɔ osi nɛ isi nɛ̀ petee. 30Kibenɔ nɛ gɛ lɛ tsrakɛ awlakpa, wunɔ nahwɛ nɔ sɛ ekpe tsobunɔ. 31So onuana, kibenɔ gɛ nɔ mɔ ebuianɛ la ba lɛ mɛ, noti sɛ Kpaya bukusiŋakɔ nɛ tsobunɔ.

32Itsre nɔ kɛgbɛagba sɛ, tɛmumɔɛ nɛm tɛ ba fla ɔdɔnanɔ kibelɛ gɛ ebuianɛ petee la bɛlɛmɛ. 33owũsise anɛ kesukpa bafla, pɔ mɛ ebui nɛ la tɛ ba fla.

34Nɔ di shuabha, odinuana wunɔ dzyi aba yɛ nɛ̀ butɔ, tɛbubuku, nɛ kifu sisi ɛkpã zɛza, klɛ kiwui lɛlɛ kɛba ba wɔabha nɛ matimati mɛ anasɛ kɛgbatɛtɔ. 35Alasɛ kɛ ba ba nɛ ba lɛ petee gɛ ba lɛ kesukpa nɛ ɔkɔnyɔkɔ. 36Nɔ di ishu abha kibenyɛbe, klɛ tɛ nɔ klukpaya sɛ tɛ nɔ bɔna koeyi nɛ alɛ petee gɛ la pɛɛ sɛ tɛ la ba mɛ, klɛ tɛ nɔ bɔna kititilɛlɔ nɛ Anɔdzyrame Eyi nɛ amɛ.”

37Kelizɛza kanyaka Yesu akasɛdɔ nɛ busɔlɛvu nɛ mɛ, klɛ ɔwlago kanyaka ekoeyi avɛ ada za elishimɛ nɛ butu nɛ gɛ be klu asɛ Olivɛ Butu nɛabha, 38klɛ banɔ nɛ petee aba kɛvlɔ pini sɛ tɛ ba be nu yɛ bui nɛ busɔlɛvu nɛ mɛ.

Currently Selected:

Luka 21: tcd

Highlight

Copy