Axwɛwɛwa 2

Ɔfufɔɛ Dzyɔgo Nɛ Ɔba Nɛ Pentekoste

1Gɛ Pentekoste kiwi nɛ na, Banɔkpɛkpɛ nɛ petee be xogo aza ɔkɔ trokpo. 2Nɛ kɛba tilim ko olim toli oyi anasɛ kɛlɛɛ gɛganɛ tili kɛ fu denɔ owũsise ba yuku nɛ bupa nɛm gɛ be zhiedzi. 3Bamɔ kɛdɔ tili anasɛ kifu ɛlɛklɛmɛ gɛ ba dɔ anɔnyanɔa bha terikpo terikpo. 4Balɛ petee be yuku nɛ Ɔfufɔɛ Dzyɔgo klɛ la kpa kaɖɔɔ ɖɔ nɛ benuhu bhlatɔ mɛ ansɛ gɛ Ɔfufɔɛ nɛ oyɛkɔalɛ.

5Ɔtsɔ̃ banɔ teli ba za Yerusalɛm gɛ be nu Yuɖanɛ nɛ ge si Kpaya fu denɔ amadi kanyakam nɛ owũsise nɛesi. 6Gɛ be nu ogugu nɛɛ, banɔɛza tili koeyi ba klɛ kɛbhɛtɛ balɛ bi, alasɛ anɔnyanɔ enu kibui nɛ gɛ ba ɖɔ nɛesi nɛ yɛnahwɛ bunuhu mɛ. 7Kɛbhɛtɛ balɛ bi so nɛɛ, be bisi asɛ, “Banɔa nɛ petee gɛ aɖɔaɖɔ ganɛ Galelianɛ le nu dza? 8Kɛlɛ klɛɛ lɛ dzi so pɛ bulɔ mɛ anɔnyanɔ enu kibui nɛesi nɛ yɛnahwɛ bunuhu mɛ? 9Patians, Medis anɛ Elamaɛts, banɔ gɛ alɛ Mesopotemia, Yuɖea anɛ Kapadokɛa, Pɔntus anɛ Asia, 10Frigia anɛ Pamfilia, Egibte anɛ Libia bupɛ nɛm gɛ ebunɔ Sirene ɔbha, befu nɛ gɛ ede Roma 11(gɛ be nu Yuɖanɛ nɛ bagɛ be tsyina eku Yuɖanɛ busɔlɛ mɛ), Kreteanɛ anɛ Arabanɛ— bunu gɛ be bu Kpaya ebuiyiyinɔanɔ nɛ aɖɔ nɛ bulɔ nahwɛ benuhum!” 12Kɛ bhɛtɛ alɛ kibi klɛ kɛfutsu alɛ so, bakpa aglɔ bisi sɛ, “Kide kibui nɛ kasɛ?”

13Pɔ, banɔ teli ba kpɛalɛ butsɔ, klɛ la ɖɔ asɛ, “Bulu bulɛ buku alɛ.”

Petro Aɖɔ Kaɖɔ Akɔ Banɔɛza

14Ɔkɛlɛ Petro alɔ kititi nɛ banɔ Lɔfɔntoli, klɛ adanɛ yɛ olim klɛ aɖɔ kaɖɔ kɔ banɔɛza na sɛ: “Mɛɔhayɛalɛ Yuɖanɛ nɛ wɔnɔ petee gɛ nɔ lɛ Yerusalɛm, kɔ mɛ bu kibuii nɛesi kɔ nɔ, nɔ ta batɔ mɔɔ mɔ nɛ kibui nɛ gɛ ɛba ɖɔ. 15Banɔa nɛɛ be di buku bulu, ansɛ kana gɛ no dii lɛ. Kɛvulɔ ɛɖa tizhita ko nɛɛ! 16Kɛ ma na, kibui nɛ atɔnu Yoɛl aɖɔ lu asɛ,

17Kpaya aɖɔ asɛ, “ ‘Nɛ ewi gɔgɔɛ nɛ mɛ,

Ɛba bu mɛ Ɔfufɔɛ nɛ ɛbalɛ anɔnyanɔa bha.

Wɔnɔ beyianyɛ anɛ beyiadzɛ ba ba ɖɔ ebui elu,

wɔnɔ banyɛnsɔ na ba mɔɛ dɔ,

wɔnɔ banɔ shishe na ba za balɛla.

18Nɛ mɛ baxwɛdɛ nɛ tsyɛ, banyɛ anɛ badzɛ,

Ɛba bu mɛ Ɔfufɔɛ nɛ kasɛ nɛ ewia lɛlɛ nɛm,

klɛ ba ba ɖɔ ebui elu.

19Ɛba bhɛtɛ ebui gɛ eyinɔanɔ nɛ owũsise anɛ kabha

nɛ ebuimumɔ nɛ kesukpa nɛa bha nɛ kesi,

dzyosu nɛ kifu nɛ ɛgba gɛ bu ɔnyɔ.

20Kiwi nɛ ba tsyina dzi otumu

klɛ wele ebe tsyina dzyi dzyosu

flogo pɛ Apalete anɛ bugbɛgbla nɛ ishudɛdanɛ kiwi nɛ ba ba.

21Klɛ anɔnyanɔɛ di gɛ ekulu

Apalete nɛ kinyi nɛɛ be be bui.’

22“Izraɛlanɛ mɔ, nɔ tatɔ kibui nɛ, Yesu Nazarɛtɛ eyi nɛɛ edzi anɔ gɛ Kpaya ebu kɔnɔ ganɔ ebui gɛ abhɛtɛ bi mɛ, ebui yiyinɔanɔ nɛ kɛdɔmumɔm gɛ Kpaya abhɛtɛ nɛ wɔnɔɛ shi ganɔ yɛa bha, ansɛ gɛ wɔnɔ nahwɛ no nyi. 23Anɔa nɛɛ bayɛkɔ yɛ akpɛahwɛ kɔ nɔ ganɔ Kpaya tɛtɛtrɔ nɛ kibuititi kpɛ otugbam, klɛ wɔnɔ, ganɔ atɔkpumgɛganɛ banɔ tɛpɛplɛnɔm nɛɛ, no yi yɛ ganɔ yɛ tɛkpɛkplasɔ butsiosi shu. 24Pɔ Kpaya anyɛmɛ yɛ edenɔ butsi mɛ, klɛ ebule yɛ edenɔ butsi butɔ ahwɛmɛ, alasɛ kɛdɛ bhɛtɛ sɛ tɛ butsi nyɛna yɛ kpɛ bulɛ ahwɛmɛ. 25Daviti aɖɔ edenɔ yɛ shu asɛ:

“ ‘Ɛmɔ Apalete nɛ kibenyɛbe nɛ mɛ amɛ.

Alasɛ alɛ mɛ kɛŋa ahwɛmɛ,

Ɛtɛ ba hwa.

26Kɛlɛso mɛ idzyi nɛ adɔ klɛ mɛ kɛnɛkɛ mɔ same,

mɛ anɔosi nɛ tsyɛ ɔbɔ za kidzoenudidi mɛ,

27alasɛ ɔtɛ bɔ shɛnahwɛ mɛshu olu odzrem,

ɔdɔgɔsɛ ɔbɔ kɔ sɛ wɔ Anɔ Dzyɔgo nɛ atsɔmɔ.

28Oti bu ɛkpã edzo nɛ ɔkasɛ mɛ,

obo yuku mɛm nɛ same nɛ wɔa mɛ.

29“Madzyalɛ mɔ, ɛba tsre nɔ nɛ ishua bha yɛyɔkɛ̃am sɛ bulɔ akashishe Daviti etsi klɛ ba vubɔ yɛ, klɛ yɛ odzre nɛ ɔkɔ lɛ ɔkɛ̃ nɛ ɔbɔ nanɔ oboe wi. 30Pɔ edzi atɔnu klɛ eti asɛ Kpaya atɛ ɖɔ elu ganɔ atabu kɛkam akɔ yɛ asɛ, aba yɛkɔ yɛ ɛyameyi teli edzu yɛ kegbu nɛa bha. 31Daviti atɛ mɔ kɛgɛ Kpaya aba bhɛtɛ nɛ otugba so, aɖɔ kaɖɔ denɔ Kristo tɛnyɛnyɛmɛ denɔ butsi mɛ shu asɛ, ba dɛ shɛnahwɛ yɛshu akpɛ odzrem, ɔdɔgɔsɛ yɛ ishuidzya nɛ mɔ tɛtsutsɔmɔ. 32Kpaya eti feke Yesua nɛ amɛna ɛkpãm, klɛ bulɔ petee bu nu bebuimɔɖɔ kɔ kɛlɛ gba. 33Be feke yɛ ada kpɛ Kpaya kɛŋahwɛ mɛ, klɛ ayɛkɛ Ɔfufɔɛ Dzyɔgo nɛ edenɔ Yaka ɔkɔ ansɛ gɛ aɖɔelu klɛ atɛ balɛ kɛ gɛ nɔɔ mɔ pɛ noo nu nɛ elu. 34Alasɛ Daviti yɛ edi wu avɛ owũsise, pɔ tsyɛ aɖɔ asɛ,

“ ‘Apalete nɛ aɖɔ etsre mɛ Apalete na sɛ,

“Za mɛ kɛŋam

35ɔdɔ nanɔ kibe lɛ gɛ eba bhɛtɛ baga dɛ ɖɔ wɔ

nɛ be dzi wɔ butsrukpɔ kegbu kɔ wɔ ɛtsrɛ. ’ ”

36“Kɛlɛso kɔ Izraɛl petee aza kidzoenu didi mɛ sɛ, Kpaya atɛ bhɛtɛ Yesua nɛ, gɛ nɔ kplasɔ, nɛ Apalete anɛ Kristo.”

37Gɛ banɔ nɛ nu kibui nɛɛ, kibhui balɛ kite mɛ ohui klɛ baa ɖɔ tsre Petro anɛ Banɔkpɛkpɛ gɔgɔɛ nɛ asɛ, “Badzya mɔ, kide lɔ ba bhɛtɛ?”

38Petro ebui lɛ bunu asɛ, “No tsyina kitem tɛ nɔ yɛkɛ bunikpɛkpɛ, wɔnɔ mɛ anɔnyanɔ, nɛ Yesu Kristo kinyim kɔ wɔnɔ buzizi tɛ yɛyɛkɔ tsye. Klɛ nɔ bɔ yɛkɛ Ɔfufɔɛ Dzyɔgo mɛ kɛdɔkukɔ. 39Tɛtutrɔɛ nɛ lɛ kɔ wɔnɔ nɛ wɔnɔeyia lɛ nɛ bagɛ ba lɛ odzidzekɔ, nɛ kɔ bagɛ balɛ bulɔ Apalete Kpaya nɛ ebe klu.”

40Nɛ ebui gelee mɛ Petro akpɛa lɛ ɔshã, klɛ ebisi denɔ balɛ ahwɛ mɛ sɛ, “No bu wɔnɔ ishu odenɔ tɛmumɔ tsutsɔmɔɛ nɛm.” 41Banɔ nɛ gɛ ba yɛkɛ kibui ba kpɛ buni akɔa lɛ, klɛ banɔ ansɛ akpãtata balɛ la za yɛkɔ ata tɛkpikpe nɛm kiwi lɛlɛ.

Bagɛ Bayɛkɛaŋa Nɛ Ketsumzɛza

42Ba yɛkɔ balɛ ishu akɔ Banɔkpɛkpɛ anɛ kɛdɔ kɛkasɛ nɛ ketsukpɛkpɛ, kɔ kɛdɔŋɛŋa nɛ kɔ kpayakuklu. 43Anɔnyanɔ eyuku nɛ kifu, klɛ banɔkpɛkpɛ na bhɛtɛ ebui yiyinɔanɔ anɛ ebuimumɔ gelee. 44Bagɛ bayɛkɛaŋa nɛ petee baza ketsukpɛkpɛm klɛ la bhɛtɛ kɛdɔnyɛdɔ tirikpo. 45Ba dɛ balɛ ishuidɔ anɛ kɛdɔzɛza anɔahwɛ nɛ petee, klɛ ba ma ehoeyi na kɔ anɔnyanɔ ansɛ gɛ apɛɛ. 46Kiwinyɛwi nɛɛ bee xogo nɛ busɔlɛvu nɛ kɛma nɛm. Ba bhɛtɛ kɛdɔŋɛŋa nɛ balɛ bapam klɛ ba ŋa nɛ ketsum nɛ samɛ nɛ idzyi dzyɔgo mɛ, 47nɛ Kpaya kabhakpɛkpɛ anɛ samɛ mumɔ nɛ ɔhayɛ eshutukubui didi mɛ denɔ banɔ nɛ petee ɔkɔ. Klɛ Apalete nɛ abhɔ tikpikpe nɛm atrɔ kiwinyɛwi ɔplɛnɔ bagɛ be ti bu.

Currently Selected:

Axwɛwɛwa 2: tcd

Highlight

Copy