Axwɛwɛwa 1

Ba Yɛkɔ Yesu Avɛnɔ Owũsise

1Tiofilɔs Maɖɔyi, Nɛ mɛ keplukpa tutɔpu nɛ mɛɛ, ɛŋlɔmɛ kɛdɔ denɔ ebui nɛ petee gɛ Yesu akpɛ kesi pɛ abhɛtɛ klɛ aakasɛ 2ɔkɔ dɔ nanɔ kiwi lɛ nɛ gɛ ba yɛkɔ yɛ avɛnɔ owũsise, nɛ kibe lɛ nɛ gɛ aɖɔ kɛxwɛ nɛ gɛ ba baa wa nɛ ganɔ Ɔfufɔɛ Dzyɔgo nɛa bha nɛ etsre yɛ banɔkpɛkpɛ gɛ eklu. 3Nɛ yɛ butɔ nɛede nɛɛ, Yesu ebu yɛ shu akasɛ banɔ klɛ abhɛtɛ ebui gelee ayɛkɔ akasɛ sɛ alɛ nɛ ɛkpã. Awɛ̃ nɛ balɛ amɛ ganɔ ewi afɛtalɛ̃ mɛ klɛ aɖɔ kaɖɔ denɔ Kpaya bukusi ɔŋakɔ nɛ shu. 4Nɛ kiwi tilia bha, gɛ edzi aŋa kɛdɔ nɛ balɛ, akɔa lɛ ɔshãa na sɛ: “Nɔ tɛ shɛ nɛ Yerusalɛm, pɔ nɔ dzrɔ opo kɛdɔ nɛ gɛ mɛ Aka na ɖɔa sɛ aba kɔnɔ, gɛ klɛ shuibui nɔ tɛ nu denɔ mɛ ɔkɔ gɛ ɛɖɔ. 5Alasɛ Yohanɛsɛ akpɛ buni kɔ anɔ nɛ buni, pɔ nɛ ewi bhli teli mɛ, ba ba kpɛ buni kɔnɔ nɛ Ɔfufɔɛ Dzyɔgo.”

6So gɛ ba ba tsya, be bisi yɛ asɛ, “Apalete, nɛ kibee nɛ mɛ obo tsodzini bukusi ɔŋakɔ nɛ odzuesi kɔ Izraɛlanɛ nɛ dza?”

7Yesu ebui lɛ nu etsrea lɛ asɛ: “Kɛma kɔnɔ sɛ tɛ noti ebe ɔdɔgɔsɛ ewi nɔɔ nɛ gɛ Maka atrɔ nɛ yɛnahwɛ kabhaŋɛŋam elu. 8Pɔ nɔ bɔ yɛkɛ kemi onu gɛ Ɔfufɔɛ Dzyɔgo nɛ ɔɔba wɔnɔa bha, klɛ no bo dzi mɛ bebuimɔɖɔ nɛ Yerusalɛm, klɛ nɛ Yuɖia petee anɛ Samaria, ɔyɛkɔ ɔdɔnanɔ kesukpa nɛ ibekekɔ.”

9Gɛ Yesu aɖɔ ebuia nɛ beke, be be feke yɛ ewunɔ nɛ balɛ nahwɛ amɛ, klɛ ɔmunɔ obo kpu yɛ nɛ balɛ amɛ.

10Badɔkpasɛ na za eze di kɛlɛɛ nɛm tsyutsyuɛtsyuɛ gɛ ashɛ̃ avɛ, nɛ ɔklɛɔ lɛlɛ nɛ ko, gɛ be se di nɛɛ ɔmɔ banɔ tɛabha nɛ bawi fufum gɛ beli balɛ ɔbha. 11Banɔ nɛ asɛ, “Galelianɛ mɔ, kide no li kititi nɛ ɔkɛŋ pɛ no zoo di kɛlɛm ana? Yesua nɛ gɛ ba yɛkɔ ashɛ̃nɔ avɛnɔ owũsise nɛ wɔnɔ ɔbha, ebe tsodzi aba ansɛ kana gɛ nɔ mɔ yɛ gɛ ashɛ̃ avɛ owũsise.”

Bayɛkɔ Matias Akpɛ Yuɖasɛ Kinyim

12Kɛlɛ be tso dzi ashɛ̃ avɛ Yerusalɛm denɔ kɛtukpɛ tili gɛ be klua sɛ Olivbesi Butu nɛa bha, gɛ enu ansɛ ɔtsɛkɔ torikpoe dzogɛga ko denɔ ɔmagbla nɛm. 13Gɛ be de ku nɛɛ, bewu avɛ kabhavu nɛm nɛ ɔklɛ gɛ ba za. Bagɛ ba za ɔklɛ nɛ balɛ enu Petro, Yohanɛsɛ, Yakobo anɛ Andrɛasɛ, Filipo anɛ Tomasɛ, Batolomeo anɛ Mateo; Yakobo gɛ enu Alfeosɛ yɛeyi anɛ Simɔnɛ gɛ enu bagɛ ba wɛlãkɛ Yuɖanɛ nɛ kɛtɔkpu nɛ teli, anɛ Yuɖasɛ gɛ enu Yakobo yɛeyi. 14Balɛ petee ba za ketsukpɛkpɛm kibenyɛbe eeklukpaya, ɔyɛkɔplɛnɔ badzɛ anɛ Maria Yesu yɛeni, anɛ Yesu yɛadzyalɛ.

15Nɛ ewi alɛlɛ nɛm nɛɛ Petro alɔ kititi nɛ bagɛ bayɛkɛaŋa nɛ shi, (banɔ gɛ balɛ tɛkpɛkpem ba za ansɛ kɛfɔɛfɔ nɛ afɛtabha) 16klɛ asɛ, “Badzya mɔ, alasɛ tɛ Kpayɛbui ŋuŋlɔmɛ nɛ ba kɛlɛm gɛ Ɔfufɔɛ Dzyɔgo nɛ ɔɖɔ kukuuku ganɔ Daviti onugbu mɛ denɔ Yuɖasɛ nɛ gɛ akɔ bagɛ be vu Yesu nɛ tɛpɛplɛnɔ. 17edzi bulɔ mɛayɛ teli gɛ yɛ tsyɛ abhɛtɛ tili nɛ Kpayɛxwɛ nɛm.”

18(Denɔ kɛbhɛ nɛ gɛ ayɛkɛ nɛ yɛ kɛtɔkpum gɛganɛ nɛm so nɛɛ, Yuɖas ede dzi kesukpa; kalɛ mɛ avɛ ede tsu oliesi, yɛ anɔ osi nɛ lɔ tayɛɛ klɛ yɛ tɛwɛlɛ nɛ petee fu koeyi. 19Anɔnyanɔ ga lɛ Yerusalɛm nɛ nu yɛ dɔ, klɛ so, be dzu kesukpɛa lɛ nɛ kinyi nɛ balɛ bunuhu mɛ asɛ Akeldama, gɛ kɛlɛesi kɛlɛ nu sɛ, Dzyosu Kesukpa.)

20Petro asɛ, “Alasɛ,” ba ŋlɔmɛ akpɛ Ɛdzɛeplukpa nɛ mɛ asɛ,

“ ‘Kɔ yɛ bupa nɛ wɔ akpɛkpa,

kɔ sɛ anɔnyanɔ atɛ za bulɛ mɛ,’

klɛ,

“ ‘Kɔ sɛ anɔbhlatɔ ayɛkɛ yɛ ɔzakɔ nɛ otugbazɛzam.’

21Kɛlɛ so nɛɛ kɛlɛ sɛ tɛ bu klu banɔ nɛ gɛ aza plɛnɔ lɔ nɛ ɔmayɛ teli denɔ kibelɛ nɛm petee gɛ Apalete Yesu aavɛ pɛ aaba nɛ bulɔɛshi, 22denɔ Yohanɛsɛ bunikpɛkpɛ nɛ kesikpɛkpɛ ɔbɔ nanɔ kibe lɛ gɛ ba yɛkɔ Yesu ashɛ̃nɔ nɛ bulɔ ɔbha. Kɛlɛ so alasɛ tɛ banɔa nɛ teli edzi ebuimɔɖɔ plɛnɔ lɔ nɛ yɛ tɛlulɔ denɔ bekpum nɛ shu.”

23So nɛɛ ba ba kasɛ banɔ tɛabha teli kɛwɔɛ, balɛ enu: Yosɛfu gɛ beklu asɛ Basabas (gɛ bekee klu tsyɛ asɛ Yustus) nɛ Matiasɛ. 24Kɛlɛ be klukpaya sɛ, “Apalete, wɔ onyi anɔnyanɔ idzyim. Kasɛ lɔ anɔɔ nɛ gɛ yɛ obu nɛ banɔ tɛabha nɛ kishi 25sɛ tɛ yɛ ayɛkɔ anɔkpɛkpɛ Kpayɛxwɛ, nɛ shu gɛ Yuɖas ashɛ̃nahwɛ elu pɛ ashɛ̃ avɛ yɛ ɔvɛkɔ.” 26Nɛ ɔklɛ nɛɛ be tsoku kebisim, klɛ kebisi nɛ kadɔ Matiasɛ abha, so ba yɛkɔ yɛ ata banɔkpɛkpɛ lɔfɔntoli.

Currently Selected:

Axwɛwɛwa 1: tcd

Highlight

Copy