लूका 19
19
येशू नुङ कर फक्पा जखायस
1येशू यरीहो शहर दु़म्तो लक्तोङा बेम्डी। 2मेराम शहरडा जखायस नङकाम कोले कर फक्पामिमकु ङाउ बाइडा। गु छो़म खाप्चीनुङमा बाइडा। 3गुका येशू सु़ रेछा र्वाक्साका रेम्मु माल्तोङा लेड्डु़, लावो गु कतिसो़ट्पा बाइडा, मा सेर्पा मु़चु़मिम बाम्डिमका गुका येशूलाई मेल्वासु़वा। 4मेम्मिमका येशूलाई रेम्मु लागि गु ङादो-ङादो लस्तामा कोले बैससीकु धक्साडला हुङडा। हेङालोने येशू मेराम लाम्दीभालङा बिक्तोङा बेम्डी।
5येशू मेसिन्डा रोम्फाम्डी, मा गुमीका जखायसथो़ रेप्मिडिमा र्वाम्डी, “ए जखायस, दाला लुकामा योका, हेङालोने आनेप गो इमा नेमडा बुमु बासिक्पा बु।” 6गु लुक्तामा योक्ल्याड्डा। मेकोतिमा छो़म गेर्सिद्वाक्तो गुमीलाई उमा नेमडा येड्डु़।
7मु़चु़मिमका ओराम ल्वाम्डिमा आरे र्वाक्तो सु़म्बुर्मा किन्मु चो़म्मिडी, “ओराम येशू ने छु़लचो़कु नेमडा बाप्डा लस्ता।”
8मेकोतिमा जखायस येस्तामा ङाचो़ येशूलाई र्वाक्ता, “रेप्नी, ङाचो़, गो आमा को फ्वा खाप्ची उनी हाम वो मेबाट्पा मु़चु़मिमलाई ग्वाक्पुमी, मा कोङनिम मु़चु़लामका कर फमु थारीका लु-फेले बेसाका रउतोम बु माला गो मेरामकाम ब्ल गुणा ख्लोक्साक्पु।”
9मेकोतिमा येशूका मेरामलाई र्वाम्डी, “आनेप गाना नुङ इ नेमडाम खोत्लेङा सेल्सिट्निम बु, हेङालोने गाना वो अब्राहामकु चो़ ङा सो़।#१९:९ अब्राहामका होङङा माम्चु़नीडा थो़रलु़पा 10हेङालोने दाम्पा मु़चु़मिमलाई माल्मु नुङ सेल्मु लागि मिनीचो़ योक्ताम सो़।”#मत्ती १८:११
सो़नाकु खउलुङकाम सीसि-सो़म्दी
(मत्ती २५:१४-३०)
11मे मु़चु़मिमका ओराम ल्वा थो़त्तोङा बेम्डिलो येशूका मेर्मिमनुङ सीसि-सो़म्दी र्वाम्डी। हेङालोने गुमी यरूशलेम फार्डाङा बाम्डी। मु़चु़मिमका माम्चु़नीका साखाम थो़मुङा खाप्मिडिम बु र्वाक्पा माल्मिडिम बाइडा। 12गुमीका मेर्मिमनुङ र्वाम्डी, “कोले डोक्पु मु़चु़ हप थुम्सिमुमा ख्लोम्सिमु लागि होनोवाम हपकाडा लमु न बु़डु़। 13गुका को धु़म (१०) उ डु़ल्चो़मिमलाई येड्डु़मिमा खोत्लेलाई को कोले सो़नाकु खउलुङ ग्वाक्तु़मी, मा र्वाक्ता, ‘गो ख्लोसिङुमा मेरोङुमिमसम्म ओरामका हापा खउलुङ डु़प्नी।’
14“लावो उ नेब्दीडाम मु़चु़मिमका गुलाई मेद्वाम्थाल्मिवा। मेम्मा होनोवाम नेब्दीडा आरे र्वाप्डा सेलाचो़मिमलाई थु़र्मिडी, ‘ओराम मु़चु़ आकी हप दु़म्मु मेबासी सो़।’
15“गु हप दु़स्तामा रोक्ताम चङडा गुका सो़नाकु खउलुङ ग्वाक्तु़मिम डु़ल्चो़मिमलाई उमाडा येन्बेड्डु़मी। मेकोतिमा मेर्मिमका ब्यापार बेम्डिमा हाङको खउलुङ डु़प्मिडी र्वाक्साका थो़मु न बु़डु़।
16“ङादो कोले डु़ल्चो़ रोक्तामा आरे र्वाक्ता, ‘ङाचो़, इनी सो़नाकु खउलुङका को धु़म हापा खउलुङ डु़म्तोम बु।’
17“हपका मेरामलाई र्वाक्ता, ‘छ्यावा! गाना छो़म जो़पा डु़ल्चो़, कतिकलङडाङा थो़रलु़इमिम दु़म्ना, को धु़म शहरडला गाना साखाम थो़पा दु़म्ना।’
18“मेकोतिमा कोङमी डु़ल्चो़ रोक्तामा आरे र्वाक्ता, ‘हप, इनी कोले सो़नाकु खउलुङका ङोले हापा खउलुङ डु़प्तोम बु।’
19“हपका मेरामलाई र्वाक्ता, ‘जो़पा बेन्ना गाना वो ङोले शहरडा साखाम थो़मु ल्वाना।’
20“कोङमी डु़ल्चो़ रोक्तामा आरे र्वाक्ता, ‘ङाचो़, रेप्नी, इनी सो़नाकु खउलुङ आसिन्डा बु। ओराम खउलुङ गो रुमालडा बत्तोमा जु़ल्तोम बाइडा। 21गो गानीडाम छो़म ङिङ्डो, हेङालोने गानी सिपे-लेम्पेडा जु़ल्पा मु़चु़ बुनी। गानी मेडु़प्निवाम खउलुङ रनी, मा गानी त्वाका मेख्लिनिवाम मा-के वो रु़म्निमा लनी।’
22“हपका मे डु़ल्चो़लाई र्वाक्ता, ‘गाना इ सिलामका लुक्ताम ल्वालामकाङा गो मुमा बेनी, ए मेजो़पा न-गोनुङमा डु़ल्चो़ बाम आमा मेएँ मेराम रपा, मा हाम मेख्लिउवाम बु मेराम रु़पा गो आ न-थो़म मान्थिम मु़चु़ बुङु र्वाक्साका गाना चनामङा बाइडा। 23आमा सो़नाकु खउलुङ हेङा बैंकडा मेजु़ल्साक्ङिवा? गो रोङुलो उ चो़नुङ ने मे खउलुङ डारुवा नी।’
24“मेकोतिमा हपका उ फार्डा येम्सिक्पा मु़चु़मिमलाई र्वाक्ता, ‘ओराम डु़ल्चो़लामका मे सो़नाकु खउलुङ रोट्निमा को धु़म सो़नाकु खउलुङ बाट्पालाई ग्वाक्नी।’
25“मेर्मिमका हपनुङ र्वाम्डी, ‘ङाचो़, मेरामनुङ ने को धु़म (१०) सो़नाकु खउलुङ बुथानी।’
26“हपका र्वाक्ता, ‘गो गानीलाई र्वाङु, उहेम मु़चु़का मेर्मिमलाई ग्वाक्मा खारी जो़होमका बोमी, मेर्मिमका आथावो हापा डार्मी, लावो उहेम मु़चु़का हाम वो मेबोमी मेर्मिमकाडा बाट्पा याक्के वो रोन्ला सो़म्सिमी।#मत्ती १३:१२; मर्क ४:२५; लूक ८:१८ 27गो मेर्मिमडला साखाम थो़पुमिम मेद्वाक्पा मे आमा स्वाक्चिमो मु़चु़मिमलाई आसिन्डा रेट्नी, मा मेर्मिमलाई आ ङादोडा सेट्नी’।”
येशू यरूशलेमगोनो हुम्डिम
(मत्ती २१:१-११; मर्कूस ११:१-११; यूहन्ना १२:१२-१९)
28येशूका ओराम सीसि-सो़म्दी र्वामु दु़म्मिडिमा गुमी यरूशलेमथो़ लम्डी। 29गुमी जैतून पोप्चङ र्वामा फार्डाम बेथफागे नुङ बेथानिया देलडा रोम्थिम्डिमा गुमीका उनी सीसिपामिमगोडाम नलेलाई आरे र्वाम्डिमा ङादो थु़र्सोम्डी, 30“इकी ङादोनोम देलडा लक्ची। गाची मेराम देलगोनो हुची होङङा मेसिन्डा कोले गधाकु चो़ डार्ची। मेराम गधाकु चो़डला ओम्लोसम्म सु़वो मु़चु़ हुङडाम मिबु। मेरामलाई डिचिमा आसिन्डा फिची। 31कोङनिम मु़चु़का ‘हेङा गधाकु चो़ डिन्चिमिम?’ र्वाम्डिमा हिलाबेम्डी माला, ‘ङाचो़का ओराम चाहेबोमी’ र्वाक्ची।”
32मेकोतिमा मे नले सीसिपाचिप लक्ची, मा गुमीका मेर्चिपलाई र्वाम्डिम होम्साकाङा डार्थिक्ची। 33मेर्चिपका गधाकु चो़ डिन्मु खाप्चिलो मे गधाकु मु़चु़का मेर्चिपनुङ हिलाबु़डु़, “गाची ओ गधाकु चो़ हेङा डिन्चिमिम?”
34मेर्चिपका र्वाक्ची, “ङाचो़का ओराम चाहेबोमिमिम बु।”
35सीसिपाचिपका मे गधाकु चो़ येशूकाडा रेट्ची, मा उची हुम-ये गधाकु चो़डला हम्चिमा येशूलाई मेडला गट्ची।
36येशू यरूशलेमथो़ लाम्दिम्डिलो मु़चु़मिमका उनी हु-येमिम प्लु़म्डिमा गुमी लाम्दिपा लाम्दीभाल हम्मिडी। 37येशू जैतून पोप्चङ धालु़म लाम्दीडा रोम्थिम्डी। मेकोतिलो सेर्पा उनी सीसिपामिमका गुमीका बेम्डिम खोत्ले यु़मखारी ल्वाम्डिमका गेर्सिद्वाक्तो डोक्पु लो़लामका माम्चु़नीलाई आलासो़ ग्वाक्तो उनी नङ कोमु चो़म्मिडी।
38“मिप्रङमाकु नङडा योक्पा हप आलाकाम सो़।
माम्चु़नी नुङ मु़चु़कु न-गो भ्रसिनु़
मा पाह्रीला माम्चु़नीकु यु़म-झ्वानु़।”#भज ११८:२६
39मेकोतिमा सेर्पा मु़चु़मिमगोलामका कोङ-कोङ फरिसीमिमका येशूनुङ र्वाम्डी, “ए ङाचो़, इनी सीसिपामिमलाई आरे मेर्वाक्नी बेनिमा भुर्निमी।” 40लावो येशूका मेर्मिमलाई र्वाम्डी, “गो गानीलाई र्वाङु, ओर्मिम वाय-वाय बाम्डी माला ने लुङमिम वो येमिमा माम्चु़नीकु नङ कोमी।”
यरूशलेमकु दुथाम येशू ख्राप्मिडिम
41येशू यरूशलेम फार्डा रोम्फाम्डी, मा मे शहर ल्वाम्डिमा ख्राप्मिडी, 42“गानी हाम बेनिवामा माम्चु़नीकु न भ्रसी र्वाक्पा यरूशलेमडाम मु़चु़मिमका चक्निवाम माला नु़यावा। लावो ओम्लो इनी मिक्सी ड्यास्ताम बु। 43गानीडला आरेप्माम थारी रो, इनी स्वाक्चिमो मु़चु़मिम इनी शहरकु होनोलाम-आथो़लाम ब्रोलुङ चिर्मी, मा गानीलाई बालाम वो स्वामु मेग्वानी। 44मेकोतिमा मेर्मिम मु़चु़का इनी शहर फाल्मी, मा मेगोडा बाट्पा गानी खोत्लेलाई सेनिमी। मेगोडा चिर्मा कोले लुङ वो मेर्मिमका मेजु़ल्मी। हेङालोने माम्चु़नीका गानीलाई सेल्ला योम्डिम जो़पा थारीडा थो़रलु़मु गानी मेद्वानिवा।”
सो़रनेमगोडा येशू
(मत्ती २१:१२-१७; मर्कूस ११:१५-१९; यूहन्ना २:१३-२२)
45मेकोतिमा येशू सो़रनेमगोनो हुम्डी, मा भ्रेट्पा मु़चु़मिमलाई मेलामका पाखा कोल्मिडी। 46मेम्मा गुमीका मेर्मिमलाई र्वाम्डी, “माम्चु़नीकु सिजेमडा र्याक्मा बु, ‘आमा सो़रनेम सो़म्दी बेखोप नेम दु़म’, लावो गानी ने ओराम नेमलाई खुचु़वामिमकु घ्रो़म्खोप बुडखुम बनेबेन्निम बु।”#यशै ५६:७; यर ७:११
47मेकोतिमा येशूका हेल्लो लोवो सो़रनेमगोडा सीन्थाल्मिडी। लावो ङाउ डु़म्लाचो़मिम, यहूदीकु डु़म्ला सीपा पातु़म्रीमिम मा यहूदीकु ङाउमिमका गुमीलाई सेन्मु माल्थाल्मिडी।#लूक २१:३७ 48मेमङा लोवो मेर्मिमका गुमीलाई सेन्मु बासिक्पा ल्वा हाम वो मेडार्मिवा, हेङालोने खोत्ले मु़चु़मिमका गुमीका सीट्मिडिम ल्वा न सोक्साका जो़होमका थो़म्थाल्मिडी।
Currently Selected:
लूका 19: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
