लूका 18
18
कुदु़मार निया बेला सो़सिपा अर्दोमेकु सीसि सो़म्दी
1येशूकु उनी सीसिपामिमका हेल्लो लोवो सो़म्दी बोमिनु़, मा उनी पाउ मेसोनु़ र्वाक्पा नका येशूका मेर्मिमनुङ ओराम सीसि-सो़म्दी र्वाम्डी: 2“कोले शहरडा माम्चु़नीकु ङिम मेजु़ल्पा, मा मु़चु़मिमथो़ न मेसोक्पा निया बेपा मु़चु़ बाइडा। 3मेराम शहरडाङा कोले अर्दोमे वो बाइडा। मे अर्दोमे उमाडा रोक्तामा र्वाक्थाल्ला, ‘आमा स्वाक्चिमो मु़चु़नुङ दु़स्ताम रिबुसी ल्वाकु निया बेङसाङनीका।’
4“कोलेम-नलेम ने गुका मेराम मेसेमकु ल्वाङा मेथो़सु़वा। लावो चङडा उ नड्डा मिम्स्ता, ‘गो माम्चु़नीडाम वो मेङिङु, मा मु़चु़मिमथो़ वो न मेसोक्पु। 5लावो ओराम मेसेमका छो़म दु़खा ग्वाङ्डिमका ओरामकु रिबुसी ल्वाकु निया बेउसाक्पु। मेएँ माला ने ओराम हेल्लो लोवो रोमा आमा बुइ पु़’।”
6मेकोतिमा येशूका र्वाम्डी, “मेजो़पा न-गोनुङमा निया बेपा मे मु़चु़लामका हाम-हुम ल्वा सीन्सिट्नी। 7हाम नेम्फु सिन्था माम्चु़नीकु नङडा सो़म्दी बेपा उनी मु़चु़मिमकाम माम्चु़नीका निया मेबोम्सामी मा? हाम मेर्मिमकाम लागि निया बोमु गुमी छु़मी मा? 8गो गानीलाई र्वाङु, गुमीका दालाङा मेर्मिमकु निया बोमी। लावो मिनीचो़ सुबुडा योलो हाङको मु़चु़का गुडला थो़रलु़पा डारु़मी मा?”
फरिसी नुङ कर फक्पा मु़चु़कु सीसि-सो़म्दी
9त्वाप माम्चु़नीकु न-गो होप्माम बुङु र्वाक्साका थो़रलु़पा मा वाङमिमलाई हाम ना हामकाम मिम्पा कोङ मु़चु़लाई येशूका ओराम सीसि-सो़म्दी र्वाम्डी, 10“फरिसी नुङ कर फक्पा मु़चु़ सो़रनेमगोडा सो़म्दी बेप्डा लक्ची। 11मे फरिसी येम्स्तामा आरे र्वाक्तो सो़म्दी बु़डु़, ‘माम्चु़नी, गो गानीलाई आलासो़ र्वाङु, हेङालोने गो वाङमिम मु़चु़मिम होप्माम खुचु़वा मेबुङु, मु़चु़मिमलाई मेजो़पा मेबेउमी, मा नाम्सु़रु़ मेबेउ। मेम्मा ओराम कर फक्पा मु़चु़ होप्माम वो गो मेबुङु। 12गो हप्ताका नक खेप उपास बुङु। गो रउमिम खउलुङ खोत्लेकाम दशांश वो ग्वानिनी।’
13“लावो कर फक्पा मु़चु़ ने होनोङा येम्स्तामा पाह्रीथो़ मेरेप्साका उ धक्ची डेप्तो र्वाक्ता, ‘ए माम्चु़नी, गोडला न-थो़म रेम्बेनी।’
14“गो गानीलाई र्वाङु, मे फरिसी मेएँ, कर फक्पा मु़चु़ माम्चु़नीकु न-गो होप्माम दु़स्तामा उ नेम ख्लोस्ता। हेङालोने उहेम मु़चु़का उ त्वापलाई डोक्पु मिम्सी मेरामलाई माम्चु़नीका याक्के दु़म्बेन्मी, मा उ त्वाप याक्के दु़म्पा मु़चु़ ने माम्चु़नीका डोक्पु दु़म्बेन्मी।”#मत्ती २३:१२; लूक १४:११
येशूका चो़च्चो़मिमलाई जि ग्वाम्डिम
(मत्ती १९:१३-१५; मर्कूस १०:१३-१६)
15येशूका उनी ल्वा जु़ल्साका जि ग्वामिनु़ र्वाक्साका मु़चु़मिमका उनी चो़च्चो़मिमलाई उनीमाडा रेट्मिडी। लावो सीसिपामिमका ओराम ल्वाम्डिमा मेर्मिमलाई भुर्मिडी। 16मेकोतिमा येशूका चो़च्चो़मिमलाई उनीमाडा येट्मिडी, मा सीसिपामिमलाई र्वाम्डी, “चो़च्चो़मिमलाई आमाडा रोमु ग्वाक्नी, मेर्मिमलाई मेभोप्नी। हेङालोने ओ चो़च्चो़मिम होङङा याक्के दु़म्साका थो़रलु़पामिमङा माम्चु़नीकु किब्दीगोडा हुमु ल्वामी। 17आच्छाङा गो गानीलाई र्वाङु, उहेम मु़चु़का चो़च्चो़काम होङङा न बेसाका माम्चु़नीडा थो़र मेबु़ मेराम हेल्लो वो माम्चु़नीकु किब्दीगोडा हुमु मेल्वासु़।”
खाप्चीचो़
(मत्ती १९:१६-३०; मर्कूस १०:१७-३१)
18कोले यहूदी ङाउका येशूलाई आरे र्वाक्तामा हिलाबु़डु़, “ए जो़पा ङाचो़, हेल्लो वो मेसिपा त्वारो़म ल्वामु गो हाम बोमु बासी?”
19येशूका मे ङाउलाई र्वाम्डी, “गाना हेङा गोलाई जो़पा र्वानामिम? माम्चु़नीडाम वाङमिम सु़ वो जो़पा मेबुमी। 20गाना माम्चु़नीकु ओर्मिम डु़म्ला चना: ‘नाम्सु़रु़ मेबोमु, मु़चु़ मेसेन्मु, मेखुमु, मा वाङमिमनुङ लिमा मेथेन्मु, मा त्वाकु माम-पापलाई डोक्पु मिम्मु बासी’।”#प्रस २०:१२-१६; व्य ५:१६-२०
21गुका र्वाक्ता, “ओर्मिम खोत्ले डु़म्ला गो याक्के बाङ्डोलो आथामङा बेत्तोगेङडोम बु।”
22ओराम ल्वा थो़म्डिमा येशूका मेरामलाई र्वाम्डी, “गाना आथावो कोले ल्वा बोमुबासिक्पा बु। गानानुङ बाट्पा खोत्ले इ खाप्ची भ्रेडामा उनी हाम वो मेबाट्पा मु़चु़मिमलाई मेराम खउलुङ ग्वाकामी। मेम्मा पाह्रीला गाना खाप्ची ल्वाना, मा बिका मा आमा चङचङ लाम्दिया।” 23लावो ओराम ल्वा थो़स्तु़मा मे यहूदी ङाउका उ ङाली डस्तु़, हेङालोने गुनुङ छो़म खाप्ची बाइडा।
24मेकोतिमा मेरामका उ ङाली डस्तु़म येशूका ल्वाम्डी। मेम्मिमका गुमीका र्वाम्डी, “खाप्चीचो़ ने माम्चु़नीकु किब्दीगोडा हुमु छो़म छो़पा दु़म। 25चु़ल्बीकु ग्वाङलामका ऊँट लुमु छो़मिम होङङा माम्चु़नीकु किब्दीगोडा खाप्चीचो़ हुमु छो़।”
26मेकोतिमा सेर्पा मु़चु़मिमका ओराम ल्वा थो़म्डिमा गुमीनुङ हिलाबेम्डी, “मेम माला उहेम मु़चु़ सेल्सिमु चाप्सु़ मा?”
27गुमीका र्वाम्डी, “मु़चु़मिमका बोमु मेचापा खारी माम्चु़नीका बोमु चाम्मी।” 28मेकोतिमा पत्रुसका र्वाक्ता, “रेप्नी, गुकु खोत्ले आकी नेम-किम डिसाका इनी चङचङ लाम्दित्तोकोम बु।”
29येशूका उनी सीसिपामिमलाई र्वाम्डी, “आच्छाङा गो गानीलाई र्वाङु, उहेम मु़चु़का माम्चु़नीकु किब्दीकाम लागि उ नेम-किम लोवो नाइमे लोवो वा-ल्वाक लोवो माम-पाप लोवो उ चो़च्चो़मिम लोवो डिडु़, 30मेरामका ओम्लो मे डिड्डु़मडाम वो हापा ल्वासु़, मा दिफु रोक्पा थारीका हेल्लो वो मेसिपा त्वारो़म ल्वासु़।”
येशूका उनी सिमुकु दुथाम सो़म्डिम
(मत्ती २०:१७-१९; मर्कूस १०:३२-३४)
31येशूका को-न (१२) उनी सीसिपामिमलाई कोर्थो़ लम्डिमा र्वाम्डी, “रेप्नी, ओम्लो गुइ यरूशलेमथो़ लक्तोङा लेडिमिम बु। माम्चु़नीलाम-जेपामिमका मिनीचो़कु दुथाम र्वाम्डिम होङङा खोत्ले मेसिन्डा दु़म। 32यहूदीमिमका गुलाई वाङसामामिमकु ल्वाडा ग्वामी, मा मेर्मिमका गुलाई नालेडान्मी, मेजो़पा बोमी, मा थक्सी बेन्मी। 33मेर्मिमका गुलाई कोक्तेकु रिवाका याल्मी मा सेन्मी। लावो सुलेमनेम गु सिमुलाम बगे।”
34सीसिपामिमका ओराम ल्वा कोले वो थेसिमेथेट्मिवा। ओराम ल्वाका हाम र्वामु माल्लु़म मेराम थक्साका जु़ल्मा बाइडा। गुमीका हामकु दुथाम र्वाम्डिम मेराम ल्वा मेर्मिमका मेचम्वा।
मिक्सीका मेल्वापा मु़चु़लाई येशूका ल्वापा दु़म्बेट्मिडिम
(मत्ती २०:२९-३४; मर्कूस १०:४६-५२)
35येशू यरीहो शहरडा रोम्थिम्डिलो मेसिन्डा मिक्सीका मेल्वापा कोले मु़चु़ लाम्दी फार्डा गन्तासिट्डामा बित्तोङा लेड्डु़। 36सेर्पा मु़चु़मिम मेरामकु फारभाल लक्तोङा लेट्पा थो़स्तु़मा, “आसिन्डा हाम दु़म्त्तोङा लेडु़?” र्वाक्तामा हिलाबु़डु़। 37मे मु़चु़मिमका मेरामलाई र्वाम्डी, “नासरतडाम येशू ओभालङा लक्तोङा लेन्मी।”
38मेम्मिमका मेरामका आरे र्वाक्तो डोक्पु लो़लामका येस्ता, “ए येशू, दाऊदकु चो़,#१८:३८ ख्रीष्टकाम कोले नङ गोडला न-थो़म रेम्बेनी!” 39ङादो-ङादो लाम्दिपा मु़चु़मिमका मेरामलाई लिबा बाया बेम्डिमा भुर्मिडी, लावो गुका मेरामडाम वो हापा डोक्पु लो़लामका येस्तामा र्वाक्ता, “ए दाऊदकु चो़, गोडला न-थो़म रेम्बेनी!”
40येशूका मेराम मु़चु़ येस्ताम थो़म्डिमा येम्सिम्डी, मा मेराम मु़चु़लाई उनीमाडा फिन्बेट्मिडी। मेकोतिमा मेराम मु़चु़ उनी फार्डा रोक्तामा येशूका मेरामलाई हिलाबेम्डी, 41“गो इमा लागि हाम बेउनु़ र्वाक्पा इ न बु?”
गुका र्वाक्ता, “ङाचो़, गो आ मिक्सीका ल्वापा दु़म्ङुनु़।”
42मेकोतिमा येशूका मेराम मु़चु़लाई र्वाम्डी, “गाना इमा मिक्सीका ल्वानानु़। गोडला बेन्नाम इमा थो़रका नु़बेट्नाम बु।” 43मेकोतिलोङा गुका उ मिक्सीका ल्वास्ल्याड्डु़, मा माम्चु़नीकु नङ कोक्तो येशूकु चङचङ लाम्दीडा। ओराम ल्वाम्डिमा खोत्ले मु़चु़मिमका वो माम्चु़नीकु नङ कोम्डी।
Currently Selected:
लूका 18: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
