लूका 16
16
छो़म मिम्साका खारी बेपा मु़चु़
1येशूका उनी सीसिपामिमलाई र्वाम्डी, “कोले खाप्चीचो़काम उ खाप्ची रेप्साक्पा कोले मु़चु़ बाइडा। खोत्ले उ खाप्ची मेराम मु़चु़का ब्लाम-ब्लाम बु़होम बु र्वाक्साका वाङमिम मु़चु़का मे खाप्चीचो़लाई थो़बेट्मिडी। 2मेम्मिमका मे खाप्चीचो़का मेरामलाई येड्डु़मा हिलाबु़डु़, ‘इमा दुथाम गो हाम-हुम थो़त्तोङा लेट्पु। खोत्ले खाप्चीकु हिसाब गोलाई रेम्बेट्ङी। आथाडा आनो गाना आमा खाप्ची रेम्मु मेल्वाना।’
3“मे खाप्ची रेप्साक्पा मु़चु़का उ नडा मिम्स्ता, ‘गोलाई आमा नेमहपका खाप्ची रेपा खारीलामका ख्लुमु खाम्ङी, गो हाम बोमु? ये-दडा खारी बेसाका पोमु आ सो मिबु, बिमुमा पोमु ने क्रो़म लु़। 4गो हाम बोमु बासी र्वाक्पा आमा नड्डा रोक्ताम बु। ओराम खारी बोमु डिट्पुमिम चङडा मु़चु़मिमका हेसाका उनी नेमडा येन्ङिमिमा हुनाखाना बोङिमी, मा ख्लो़ङिमी मेराम खारी गो बेउजो़लु।’
5“मेकोतिमा गुका उ नेमहपकु जेर मोक्पा खोत्ले मु़चु़मिमलाई कोले कोले बेसाका येड्डु़मी, मा ङादो रोक्पा मु़चु़नुङ हिलाबु़डु़, ‘गाना नेमहपकु जेर हाङको सोमु बासिक्पा बु?’
6“मेरामका र्वाक्ता, ‘सु धु़मसङ (३,०००) लिटर जैतूनकु तेल।’
“मेकोतिमा मे खाप्ची रेप्साक्पा मु़चु़का मेरामलाई र्वाक्ता, ‘इमा तमसुक रङामा दाला गन्सामा को-ङो सङ (१,५००) लिटर र्याक्थाडा।’
7“मेकोतिमा गुका कोङमीलाई हिलाबु़डु़, ‘इमा जेर हाङको सोमु बासिक्पा बु?’
“गुका र्वाक्ता, ‘सु सङ ङो धु़म (३५०) क्विन्टल जेप्सेर।’ गुका मेरामलाई र्वाक्ता, ‘इमा तमसुक रङामा सु सङ (३००) क्विन्टल र्याका।’
8“मेकोतिमा मे खाप्ची रेपा मु़चु़का मिम्साका बु़डु़म खारी ल्वास्तु़मा खाप्चीचो़का उ नङ कोक्साड्डु़। मेम्साकाङा माम्चु़नीकु मु़चु़मिमडाम वो सु़म्दिसेरडाम मु़चु़मिमका वाङमिम मु़चु़नुङ छो़म मिम्साका खारी बोमी। 9मेम्मिमका गो गानीलाई र्वाङु, सु़म्दिसेरडाम इनी खाप्ची ग्वाक्साका इनी त्वाकाम लागि ङोप्सो़ बनेबेन्जो़ल्नी। इनी साम लमा खउलुङ हाम ना हामकाम दु़मलो माम्चु़नीका गानीलाई पाह्रीला हेल्लो लोवो बुमु लागि येनी।
10“उहेम मु़चु़ याक्के खारीडा थो़रलु़इमिम दु़म, मेराम मु़चु़ डोक्पु खारीडा वो थो़रलु़इमिम दु़म। उहेम मु़चु़ याक्के खारीडा थो़रमेलु़इमिम दु़म, मेराम मु़चु़ डोक्पु खारीडा वो थो़रमेलु़इमिम दु़म। 11मेम्मिमका गानी सु़म्दिसेरडाम खाप्ची रेम्मु थो़रलु़पा मेदु़म्निवा माला ने माम्चु़नीका गानीलाई हेसाका पाह्रीलाम आच्छाङाकाम खाप्ची रेपा दु़म्बेनी मा? 12गानी वाङमिमकु खाप्ची रेम्मुडा थो़रमेलु़इमिम दु़म्नी माला इनीमा खाप्ची माम्चु़नीका हेसाका ग्वानी मा?
13“कोले डु़ल्चो़का नले नेमहपकु चापे-डुपे बोमु मेचाप्सु़। मे डु़ल्चो़का कोले नेमहपलाई रिखाम बु़, मा कोङमीलाई मेद्वाकु़। कोलेका र्वामिम थो़पा दु़म्साका कोङमीलाई हाम ना हामकाम मिम्डु़। गानी माम्चु़नीकु खारी नुङ खउलुङ डु़पा खारी निफिङा बोमु मेचाम्नी।”#मत्ती ६:२४
14खउलुङकु रारी बेपा फरिसीमिमका ओराम ल्वा थो़म्डिमा गुमीलाई सेम्ला बेट्मिडी। 15मेकोतिमा गुमीका मेर्मिमलाई र्वाम्डी, “गानी मु़चु़मिमकु ङादोडा माम्चु़नीकु न-गो होप्माम दु़म्साका रेम्बेपा लिन्सिनी, लावो माम्चु़नीका इनी न-गोडाम ल्वा चमी। मु़चु़मिमका डोक्पु मिम्मिमिम ने माम्चु़नीकु ङादोडा हाम ना हामकाम दु़म।
16“कु-रु़दु़म ग्वाक्पा यूहन्ना रोमु ङादोसम्म मोशाकु डु़म्ला नुङ माम्चु़नीलाम-जेपामिमकु सिजेमका गानीलाई क्रिन्निम बाइडा। लावो ओम्लो माम्चु़नीकु किब्दीकु दुथाम जो़पा-सेला गो थो़बेत्तोमिम बु, मा खोत्ले मु़चु़मिम माम्चु़नीकु किब्दीगोडा चाप्तो मेचाप्तो हुमु माल्तोङा बोमी।#मत्ती ११:१२-१३ 17सुबु नुङ धामु दाम्मु चाप्सु़, लावो माम्चु़नीकु डु़म्लागोडाम कोले याक्के ल्वा वो मेदाम।#मत्ती ५:१८
18“उहेम मु़चु़का उ त्वाकु नाइमे ङेडु़मा कोङमी मेसेमलाई लालीकुन्दा बु़ माला मेराम मु़चु़का नाम्सु़रु़ बु़। मेम्मा उ वोचु़का ङेडु़मिम मेसेमलाई लालीकुन्दा बेपा मु़चु़का वो नाम्सु़रु़ बु़।#मत्ती ५:३२; १ कोर ७:१०-११
खाप्चीचो़ नुङ उ हाम वो मेबाट्पा लाजरस
19“कोले खाप्चीचो़ बाइडा। मेरामका हापा थिकाम बैजनी रङकाम हुम-ये नुङ ये-सेम फस्थाल्ला, मा पेत्तो-डुत्तो एलेङगी बेत्तो हेल्लो लोवो बाइथाल्ला। 20मेरामकु नेमगोनो हुपा लाम्चोकोडा कोले लाजरस नङकाम उ हाम वो मेबाट्पा बिपा मु़चु़लाई मु़चु़मिमका रेसाका चार्थाल्मिडी। मेरामकु खोत्ले रो़मडा पार कोङङा बाइडा। 21मे खाप्चीचो़का क्लेसु़मा पारु़मिम पोमु-डुमुका ङा वो लाजरसका उ ख्वाचेप खोबेन्मु न बु़थाल्लु़। ख्लेबामिम वो रोम्थाल्मिडिमा उ पार लेम्थाल्मिडी।
22“चङडा मे उ हाम वो मेबाट्पा लाजरस सिडा, मा पाह्रीचो़मिमका मेरामकु पेल लम्डिमा पाह्रीला अब्राहामनुङ जु़ल्मिडी। मे खाप्चीचो़ वो सिडा, मा क्लु़म्मिडी। 23मे खाप्चीचो़कु पेलका खादीगोयु़ छो़म मेझापा दु़खा इम्तोङा लेड्डु़। मेकोतिलो गुका अब्राहामनुङ गन्तासिट्पा लाजरसलाई ल्वास्तु़। 24मेकोतिमा गुका डोक्पु लो़लामका येस्तामा अब्राहामनुङ र्वाक्ता, ‘ए कुर्चाङ बेब अब्राहाम, गोडला न-थो़म रेम्बेनिमा लाजरसलाई आमायु़ थु़र्नी। मेम्मा मेरामका उ ब्रेप्चोकु जु़जु़ कुगोयु़ प्लु़म्साका आ लेमडा लु़प्नु़मा गोलाई पपया दु़म्नु़। हेङालोने गो मुकु भुल्मुगोडा छो़म मेझापा दु़खा इम्तोङा लेट्पु।’
25“लावो अब्राहामका र्वाक्ता, ‘ए योयो, गाना मिम्डा, गाना सुबुडा बान्नालो जो़पा-जो़पा फन्सिट्ना, पेन्ना-डुन्ना, मा एलेङगी बेन्ना। लाजरसका ने छो़म दु़खा ल्वास्तु़म बाइडा। मेम्मिमका ओम्लो गुलाई आसिन्डा दु़खा मिबु, मा गाना ने दु़खा इम्तोङा लेना। 26मेम कोङङा मेएँ, इनीमा नुङ आकीमा थेतेडा छो़म डोक्पु छेन्द्रुङमा बु। मेम्मिमका ओलामका पोलु़म ख्वाक्साका सु़ वो इनीमायु़ योमु मेचाम्मी, मा मेलामका वो सु़ वो छेन्द्रुङमा ख्वाक्साका आकीमाडा गेमु मेचाम्मी।’
27“खाप्चीचो़का अब्राहामनुङ र्वाक्ता, ‘ए कुर्चाङ बेब अब्राहाम, गो गानीलाई र्वाङु, गानी लाजरसलाई सुबुडाम आकी नेमडा थु़र्नी, 28हेङालोने मेसिन्डा आमा ङोले तारापा ल्वाकमिम बुमी, मा मेरामका मेर्मिमलाई र्वानु़। मेएँ माला ने मेर्मिम सिमिलो आरेप्मामङा दु़खा इम्मु बासिक्पा खादीगोयु़ मेयोमिनु़।’
29“लावो अब्राहामका र्वाक्ता, ‘मोशा नुङ माम्चु़नीलाम-जेपामिमका र्वाम्डिम खाजेम मेर्मिमनुङ बु। मेगोडा र्याक्मा सिजेमका र्वामिम होम्साका मेर्मिम दोमिनु़।’
30“खाप्चीचो़का अब्राहामनुङ र्वाक्ता, ‘मेएँ कुर्चाङ बेब अब्राहाम, सिमुलाम बक्साका कोङनिम मेर्मिमकाडा लमी माला कोङङा मेर्मिमका उनी छु़ल न-गोलामका मिम्सिसाका माम्चु़नीडा ख्लोम्सिमी।’
31“अब्राहामका गुलाई र्वाक्ता, ‘मोशा नुङ माम्चु़नीलाम-जेपामिमकु सिजेम थो़मिमा उनी छु़ल न-गोलामका मिम्सिसाका मेख्लोम्सिमी माला सिमुलामका कोङनिम बगेङा लोवो मेर्मिमका मेथो़मी’।”
Currently Selected:
लूका 16: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
