लूका 15
15
दाम्पा भेन्दाकु सीसि-सो़म्दी
(मत्ती १८:१२-१४)
1 #
लूक ५:२९-३०
कोलेम कर फक्पा मु़चु़मिम नुङ छु़लचो़मिम खोत्ले येशूकु सिजेम थो़प्डा उनीमाडा रोक्तोङा लेट्मिडी। 2मेम्मिमका यहूदीमिमकु डु़म्ला सीपा पातु़म्रीमिम नुङ फरिसीमिमका आरे र्वाक्तो सु़म्बुर्मा किन्मु चो़म्मिडी, “ओराम मु़चु़ ने छु़लचो़मिमनुङ बु, मा मेर्मिमनुङङा पु़-डुङु़ वो।”
3मेकोतिमा गुमीका मेर्मिमलाई ओराम सीसि-सो़म्दी र्वाम्डी: 4“गानीगोडाम सु़का को सङ उ भेन्दामिमडाम कोले भेन्दा दाम्लो गु-गुले (९९) भेन्दामिम उनी जाखोपडा पार्जो़लु़मा मे दाम्पा कोले भेन्दा मेडार्थु़मसम्म मेमालु़ मा? 5मे दाम्पा भेन्दा डारु़मिम चङडा गेर्सिद्वाक्तो गुका उ बालामडला मेरामलाई कुडु़, 6मा नेमडा रोमा उ ङोप्सो़मिम नुङ उ साउखोरेमिमलाई येडु़मी। मेकोतिमा मेर्मिमलाई र्वा, ‘गुइ गेर्सिडी, हेङालोने आमा दाम्स्ताम भेन्दा गो डार्तोम बु।’ 7गो गानीलाई र्वाङु, मेम्साकाङा उनी छु़ल न-गोलामका मिम्सिमुमा माम्चु़नीडा ख्लोम्सिमु मेबासिक्पा माम्चु़नीकु मिक्सीलामडा जो़पा मिम्सिक्पा गु-गुले (९९) मु़चु़मिमडाम वो उ त्वाकु छु़ल न-गोलामका मिम्सिक्साका माम्चु़नीडा ख्लोसिक्पा कोले छु़लचो़काम लागि पाह्रीला खोत्ले छो़म गेर्सिट्मी।
दाम्पा खउलुङकु सीसि-सो़म्दी
8“कोले मेसेमनुङ को धु़म (१०) मत्तोकु सिक्का बाइडा। कोले दाम्स्तु़ माला गुका धिप्री चासाका बाय छिसु़मा मेडारु़मिमसम्म आथाजो़होम मेमालु़ मा? 9दाम्स्ताम खउलुङ डारु़मिम चङडा गुका उ ङोप्सो़मिम नुङ उ साउखोरेमिमलाई येडु़मिमा र्वा, ‘गुइ गेर्सिडी, हेङालोने दाम्स्ताम आमा खउलुङ गो डार्तो।’ 10गो गानीलाई र्वाङु, आरेसाका उ त्वाकु छु़ल न-गोलामका मिम्सिक्साका माम्चु़नीडा ख्लोसिक्पा कोले छु़लचो़काम लागि पाह्रीला माम्चु़नी नुङ पाह्रीचो़मिम गेर्सिद्वामी।”
यु़म्पा तारापाचो़कु सीसि-सो़म्दी
11मेकोतिमा येशूका मेर्मिमलाई र्वाम्डी, “कोले मु़चु़काम नले तारापाचो़ बाच्ची। 12कोलेम उ छारीचो़का र्वाक्ता, ‘पाआ, गो ल्वामुबासिक्पा इनीमा खाप्चीकु दो़दो़वा ग्वाङनी।’ मेकोतिमा उमा पापका उ खाप्ची मेर्चिपलाई दो़यु़साड्डु़ची।
13“कोलेम नलेम चङडा मे उ छारीचो़का खोत्ले उ खाप्ची भ्रेड्डु़मा कोङमीङा नेब्दीडा लस्ता। मेम्मा मेसिन्डा फुङदास बेसाका खोत्ले उ खउलुङ पार्डु़। 14मेरामका खोत्ले उ खउलुङ हुक्सोड्डु़म थारीकाङा मेराम नेब्दीडाम खोत्लेङा मा-के हुक्तामा गुलाई पोमु-डुमुकाम खेरेला दु़स्ता। 15मेकोतिमा गु पोमु-डुमुकाम लागि मेराम नेब्दीडाम कोले मु़चु़काडा हाम-हुम खारी बेप्साड्डा लस्ता। मेराम मु़चु़का मेरामलाई उ येडा ब्वामिम रेम्बेड्डु़। 16गु छो़म क्रु़मसिडामा ब्वाजामङा वो पोमु गुलाई जो़पा लु़डा। लावो गुलाई सु़का वो पोमु-डुमु मेग्वाक्मिवा।
17“उ न छेस्तामा उ नड्डा र्वाक्ता, आमा पापका खउलुङ ग्वाक्साका रेड्डु़मिम मु़चु़मिमका ने खोहोम पोमिमा क्लेन्मी वो, लावो गो ने आसिन्डा क्रु़मका सिमुखापुमिम बु। 18गो पापकाडाङा ख्लोसिङुमा लङु, मा र्वाङु, ‘पाआ गो पाह्रीलाम माम्चु़नी नुङ इनी कोर्थो़लाम छु़ल बेउतोम बु। 19आथाडा आनो गो इनी तारापाचो़ र्वामु वो मेघ्रेन्ङी। लावो गोडला इनी न-थो़म रेम्बेसाका इनी खउलुङ ग्वाक्साका रेट्निम मु़चु़ होप्माम बेङिनिमा जु़ल्ङिनी।’ 20मेकोतिमा गु बक्तामा उ नेम ख्लोस्ता।
“लावो हापा होनोवा गु नेम बिक्तोङा लेड्डु़म उ पापका ल्वास्तु़, मा उ पापकाम छो़म थो़म भ्रो़स्तामा ओन्तो लक्साका उ चो़लाई सोकोफोप्डु़मा चुप बु़डु़।
21“उ तारापाचो़का र्वाक्ता, ‘पाआ, गो पाह्रीलाम माम्चु़नी नुङ इनी कोर्थो़लाम छु़ल बेउतो। आथा गो इनी तारापाचो़ र्वामु मेघ्रेट्पा बुङु।’
22“लावो उ पापका डु़ल्चो़मिमलाई र्वाक्ता, ‘दाला छो़म जो़पा ये-सेम रेट्निमा ओरामलाई फबेट्नी। मेकोतिमा उ ब्रेप्चोडा चुकुरिम बाबेट्नी, मा खेलयु़ सो़लो़प ख्लु़सिबेट्नी। 23मेम्मा चाडकाम लागि डु़ल्मा बेनो फल्साका#१५:२३ याक्के बाछा इस्राएलीमिमका लागि छो़म भ्रपा सो़। खोक्नी, मा गुइ पिइ-डुङीमा गेर्सिद्वाकी। 24हेङालोने ओराम सिडाम होङङा लु़ङडोम बाइडा, लावो ओम्लो नु़डाम बु। दाम्स्ताम बाइडा लावो ओम्लो ख्लोस्तामा इकीमाडा रोक्ताम बु।’ मेकोतिमा मेर्मिमका ग्रुला पेम्डि-डुम्डिमा गेर्सिक्तो छो़म्मु चो़म्मिडी।
25“मेकोतिलो उ तोङदी चो़ ये-दडा खारी बेत्तोङा लेड्डु़। गु ये-दलामका ख्लोस्तामा नेम फार्डा रोक्फाड्डालो काम्सो बेत्तो छो़म्तोङा बेपा गुका थो़स्तु़। 26मेम्मा डु़ल्चो़मिमगोडाम कोलेलाई येड्डु़, मा ‘नेमडा हाम दु़म्तोङा बु?’ र्वाक्तामा गुका हिलाबु़डु़। 27मे डु़ल्चो़का र्वाक्ता, ‘इनी ल्वाक ख्लोसिम्डिमा रोम्डिम बु, गुमी नु़पाङा ख्लोसिम्डिमा रोम्डिमका इनी पापका चाडकाम लागि डु़ल्मिडिम बेनो फल्मिडी।’
28“ओराम ल्वा थो़स्तु़मा उ वाकाम छोक्चो बक्ता, मा नेमगोनो वो लमु मेबिसावा। लावो उ पाप पाखा लुक्तामा उ चो़लाई नेमगोनो बिकामा बिका बु़डु़। 29लावो गुका उ पापनुङ र्वाक्ता, ‘रेप्नी, आकोम थसम्म गो इनी डु़ल्चो़ होङङा दु़म्साका खारी बेउहोम बुङु। गानी र्वाक्निम खोत्ले ल्वा बिसिङ्डो। लावो आ ङोप्सो़मिमनुङ ग्रुला पोमु लागि कोले छ्वाराकु चो़ ङा वो हेल्लो वो मेग्वाङ्निवा। 30छो़लो़मा मेसेमडा खउलुङ पार्पा मेराम इनी चो़ रोलो ने चाडकाम लागि डु़ल्मा बेनो वो मेरामकाम लागि फल्नी।’
31“मेकोतिमा उ पापका गुलाई र्वाक्ता, ‘थाकु, गाना ने हेल्लो लोवो गोनुङङा बुनामिम बु, मा खोत्ले आमा खाप्ची वो इमाङा सो़। 32लावो गुइ आनेप पोमु-डुमुमा गेर्सिद्वामु बासिक्पाङा बु, हेङालोने इमा ल्वाक सिडाम बाइडा, लावो आथा नु़पाङा ख्लोसिड्डामा रोक्ता, दाम्स्ताम बाइडा, ओम्लो ख्लोस्तामा इकीमाडा रोक्ताम बु’।”
Currently Selected:
लूका 15: THUL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
