Matiyə̈ 22

Ndoka pâ kpülü ndə̂kə̂ totə̂ ndə̂ köchë la ɛ̈chë

(Luk 14.15-24)

1Jezü kä tô pö la ndoka sə̈ andjê päkëdə̂: 2«Pö ndə̂ Gbölö gö-gbïɛ̈ ndə̂ tchêlafô wä batə̂ andə̂ ngâ gbïɛ̈ ndə̂ tche mbô kpülü ndə̂kə̂ to ɛ̈chë sə̈ modô ndə̂ yê. 3Tche wân a-earə̂ kua ndə̂ yê ndə̂kə̂ to rə̂ sə̈ azü ndə̂ a ê andjê ndə̂ kpülü nə̈, praâbalë azü nə̈ nyîâbo ndə̂kə̂ nə-a. 4Tche wân angâ a-earə̂ kua nə̈ ndə̂kə̂ to rə̂ sə̈ azü ndə̂ a ê andjê ndə̂ kpülü nə̈ päkëdə̂: ‹Më nyîkrə arə kpülü nə̈ nə̂ gbɛ̂. Më wön agia la jrôâ tə̂ andjê, a nyîkrə arə nə̂ gbɛ̂, nyë nə̈ atâ ndə̂ kpülü nə̈!› 5Praâbalë azü nə̈ wûn pö ndə̂ yê lâme batə̂ mbämbä pö, ânyë ngânə̈ ê âtə̂lə̂ kɨ̈ndɨ̈, tchanə̈ me ê ndə̂kə̂ ka rə. 6Angânə̈ kʉ̂ a-earə̂ kua ndə̂ gbölö akrə nə̈, kə̈ mbô andjë tə̂ chocho, ânyë kə̈ wôn andjê. 7Su gbïɛ̈ nə̈ kʉ̂ tchë, tche wân aturûgu ndə̂kə̂ won a-earə̂ kə̂ won azü lâme, kə̈ chô gö ndə̂ andjê. 8Pânə̈ tche tô rə̂ sə̈ a-earə̂ kə̂ mbo kua ndə̂ yê nə̈ päkëdə̂: ‹Më nyîkrə arə kpülü nə̈ nə̂ gbɛ̂, praâbalë azü ndə̂ a ê andjê ndə̂ kpülü nə̈ kʉ̂âbo sə̂ kpülü nə̈-a. 9Nyë ë gasa bhâlə̂ agbölö aköbo kə̂ e azü gbɛ̂ ndə̂ nyê gbo andjê, andjë nə ndə̂ kpülü nə̈.› 10A-earə̂ kua nə̈ ê, kə̈ pâla azü nə̈ gbɛ̂ ndə̂ andjë gbô andjê: Angbongbo azü la atchôtchô azü. Käko ânyë tchâalê ndə̂ kpülü nə̈ sɨ̂sɨ̈ la azü. 11Gbïɛ̈ nə̈ lî bhâ tchâalê ndə̂kə̂ wun ayirə nə̈. Tche wûn ngâ köchë dëkë tche yûâbo lə̂ba kpülü nə̈-a. 12Tche yû köchë nə̈ päkëdə̂: ‹Agü mê, mo mbö atöko ânyë kə̈ lî bhâtə âtə? Andə̂ zə̈ nə̈ lə̂ba kpülü nə̈ dâ?› Köchë nə̈ tôâbo pö balë-a. 13Gbïɛ̈ nə̈ tô rə̂ sə̈ a-earə̂ kua ndə̂ yê päkëdə̂: ‹Nyë ï da yê la könô yê, kə̈ yî tchë bhâ sûwu lə̂ bübü tchô, bhâye, kütû nyonyo lakə̂ zɨ tchə̂lə̂ da jï andjê wadje tâ.›» 14Ndə̂kə̂ ka pö nə̈, Jezü tô rə̂ päkëdə̂: «Tə̂ lëge nə̈, a ë azü tə̂ gbölösə̂nə̈, praâbalë a dɨ̈ andjê bâbalë.»

Lapöo ndə̂ a yo rə̂ tchânə̂ gbölö gbïɛ̈ Sezäre

(Mar 12.13-17; Luk 20.20-26)

15Käko afarizïɛ̈n ê kə̈ pâlatə̂ andjê, kə̈ vû Jezü ndə̂kə̂ pa kütû lə̂ köbosə̂ pö ma yê andjë gbo tchë. 16Andjë wân angâ adjisîpili ndə̂ andjê la angâ azü tchâtchâ Hërôde ndə̂kə̂ to rə̂ sə̈ Jezü päkëdə̂: «Earə̂ kə̂ nyisə̂ rə, ârâ wûnsə̂ nə̈ nə̂ pä pö ndə̂ mo tô rə̂, la rə ndə̂ mo nyîsə̂ nə̈ pâ köbo Ndjapä wätə̂ lëge nə̈. Mo mbôâbo ganô ndə̂ la akrə-a, kə̈ wûn-âbo kə̂ ge ndə̂ akrə-a. 17Bhâtə̂ su zə̈, amö to rə̂ sə̈ ârâ: Ndïɛ̈ zä köbo ndə̂kə̂ pa a yo lapöo tchânə̂ gbölö gbïɛ̈ Sezäre?» 18Praâbalë Jezü wûnsə̂ ngbongbo su andjê, kə̈ tô rə̂ sə̈ andjê päkëdə̂: «Nyënyê ndə̂ pö ma nyê wâ ngbî tə̂kə̂ mbo rə ndə̂ nyê âtə, bëte giamâ kä ndə̂ nyê vu mê? 19Nyë mä ngâ makətche sə̈ mê ndə̂ a yo rə̂ la lapöo.» Andjë kâ la ngâ makətche nə̈ sə̈ tchë. 20Jezü tô rə̂ sə̈ andjê päkëdə̂: «Nyîsɨ̂ tchabâ kä âtə? Rə̈ tchabâ kä ndə̂ a mbô rə̂ pâ makətche âtə?» 21Andjë tô rə̂ päkëdə̂: «Andə̂ Sezäre kä.» Jezü tô rə̂ sə̈ andjê päkëdə̂: «Käko-ë, rə ndə̂ âwâtə̂ andə̂ Sezäre, nyë kʉ̈ rə̂ sə̈ Sezäre, rə ndə̂ âwâtə̂ andə̂ Ndjapä, nyë kʉ̈ rə̂ sə̈ Ndjapä.» 22Ndə̂ andjë djê apö ndə̂ tche tô rə̂ lâme, tchə̂lə̂ küma andjê gbɛ̂ djîngɨli, ânyë andjë gbôtə̂ yê, kə̈ rô etə̂.

Pö pâ kə̂ jo ndə̂ akuzü

(Mar 12.18-27; Luk 20.27-40)

23Kpôlə̂ lö nə̈ lâme, asadusïɛ̈n nə̂ ndola Jezü. Asadusïɛ̈n nə̈ də̈ azü ndə̂ andjë tô rə̂ pä akuzü joabô tee-a. Andjë yû Jezü päkëdə̂: 24«Earə̂ kə̂ nyisə̂ rə, Möyîze tö rə̂ alême päkëdə̂: ‹Âdə ngâ akrə âtchu ndə̂ tche zɨ̂âbô zɨ̂-î, yîngâ yê wä ndə̂kə̂ to ɛ̈chë nə̈ ngbâ yê, kə̂ zɨ bechë nə̈ la rə̈ yîngâ yê ndə̂ tche tchû lâme#22.24 Nyë dɨ̈ Det 25.5-6..› 25Dëkë, angâ ayîngâ mïndûu manə̈ bïchuû kä tâ alême lə̂ gûtə̂ ârâ, dokʉ̈ âyä andjê tô ɛ̈chë, kə̈ zɨ̂âbo tə̂ yê-a, kə̈ tchû-î, ânyë kə̈ gbôtə̂ ɛ̈chë nə̈ sə̈ yîngâ yê. 26Rə lâme mbö ndjë käko tə̂ bïchuû yîngâ yê, tə̂ vötaâ nə̈, zoo ëtə̂ yîngâ mïndûu manə̈ bïchuû nə̈. 27La tchêngbâ andjê gbɛ̂ ɛ̈chë nə̈ tchû ndjë-ê. 28Käko, lo nə̈ ndə̂ akuzü jo, ɛ̈chë lâme âwatə̂ ɛ̈chë ndə̂ tchabâ? Bëte andjê mïndûu manə̈ bïchuû gbɛ̂ tô tchë nə̂.» 29Jezü tô rə̂ ndə̂nə̈ sə̈ andjê päkëdə̂: «Nyë tchâ köbo nə̂, bëte nyë wûn-âbo sə̂ Mbëtï Ndjapä la gbôgbô ndə̂ yê-a. 30Lo nə̈ ndə̂ akuzü jo, aköchë la aɛ̈chë kä to bata tə̂ andjê tee-a, andjë âwa batə̂ aânje ndə̂ tchêlafô. 31Âdə andə̂ pö ndə̂kə̂ jo ndə̂ akuzü, nyë dɨ̂âbo rə̂ lə̂ Mbëtï Ndjapä? Tche tö rə̂ päkëdə̂: 32‹Më də̈ Ndjapä ndə̂ Abrahâmo, Ndjapä ndə̂ Izâke, Ndjapä ndə̂ Jakôbo.› Ndjapä wâbo tə̂ Ndjapä ndə̂ azü ndə̂ andjë tchû-a, praâbalë tche wätə̂ Ndjapä ndə̂ azü ndə̂ andjë wâ la tʉ̈rʉ̂ la andjê#22.32 Nyë dɨ̈ Eki 3.6..» 33Akpûlû azü ndə̂ andjë djê pö lâme tchə̂lə̂ küma andjê gbɛ̂ djîngɨli.

Ndïɛ̈ ndə̂ ârô adɨ̂ nə̈ gbɛ̂

(Mar 12.28-34; Luk 10.25-28)

34Ndə̂ afarizïɛ̈n djê rə̂ päkëdə̂ Jezü ngbô ma asadusïɛ̈n nə̂ ëtâ, andjë pâlatə̂ andjê. 35Ngâ earə̂ kə̂ nyisə̂ ndïɛ̈ balë lə̂ gbâtə̂ andjê vû Jezü, tche yû tchë päkëdə̂: 36«Earə̂ kə̂ nyisə̂ rə, ndïɛ̈ nə̈bâ kä ndə̂ ârôpâ adɨ̂ nə̈ gbɛ̂?»

37Jezü tô rə̂ sə̈ tche päkëdə̂: «‹Amö nyində̂ Ndjapä Gbölö Gbïɛ̈ ndə̂ zə̈, la su zə̈ gbɛ̂, la yingö ndə̂ zə̈ gbɛ̂, la kə̂ rɨ tchə̂lə̂ zə̈ gbɛ̂#22.37 Nyë dɨ̈ Det 6.5..› 38Ndïɛ̈ lâme kä ndə̂ âwâtə̂ gbölö nə̈, kə̈ dâka kə̈ rô adɨ̂ nə̈ gbɛ̂. 39Bïchuû ndïɛ̈ nə̈ wä ndjë batə̂ dokʉ̈ nə̈: ‹Äwäpä mo nyində̂ ngâ zə̈ akrə batə̂ tə̂ zə̈#22.39 Nyë dɨ̈ Lev 19.18..› 40Ndïɛ̈ ndə̂ Möyîze la mbëtï ndə̂ a-earə̂ ndə̂ma Ndjapä tö gbɛ̂ lə̂ andïɛ̈ bïchuû lâme.»

Mesï la Davîdi

(Mar 12.35-37; Luk 20.41-44)

41Ndə̂ afarizïɛ̈n pâlatə̂ andjê, Jezü yû andjê päkëdə̂: 42«Bhâtə̂ su nyê, nyë tö rə̂ atöko pâ pö ndə̂ Krîsiti? Tche də̈ modô ndə̂ tchabâ?» Andjë tô rə̂ sə̈ tchë päkëdə̂: «Tche də̈ modô ndə̂ Davîdi.» 43Jezü tô rə̂ sə̈ andjê päkëdə̂: «Tchïtchï sə̂nə̈ atöko, lə̂ köbosə̂ Yingö, Davîdi ê rə̂ tə̂ yê pä ‹Gbölö Gbïɛ̈?› Bëte Davîdi tö rə̂ päkëdə̂:

44‹Gbölö Gbïɛ̈ Ndjapä tö rə̂ sə̈ Gbölö Gbïɛ̈ ndə̂ mê päkëdə̂:

Amö sə̈ də ndôkö könô mê zoo,

mê mbo rə̂ pä a-earə̂ kə̂ kosə̂ zə̈ wa ëtchâtchâ da zə̈#22.44 Nyë dɨ̈ Aps 110.1; Ahe 1.3,13..›

45«Âdə Davîdi âe rə̂ tə̂ yê pä ‹Gbölö Gbïɛ̈›, tche âkä watə̂ modô ndə̂ Davîdi tchïtchïnə̈ atöko?» 46Akrə balë wâbo la gbôgbô ndə̂kə̂ to ngâ pö balë ndə̂nə̈ sə̈ tchë-a. Ätö tə̂ lo nə̈ lâme, ngâ akrə lə̂ gbâtə̂ andjê kâ yûâbo Jezü la ngâ pö balë-a.

Currently Selected:

Matiyə̈ 22: lnl

Highlight

Copy