Matiyə̈ 23

La nyê gbö tə̂ afarizïɛ̈n la a-earə̂ kə̂ nyisə̂ ndïɛ̈

(Mar 12.38-40; Luk 11.43,46; 20.45-46)

1Käko Jezü tô pö sə̈ akpûlû azü nə̈ la adjisîpili ndə̂ yê päkëdə̂: 2«A-earə̂ kə̂ nyisə̂ ndïɛ̈ la afarizïɛ̈n, kua ndə̂ andjê wä ndə̂kə̂ nyisə̂ andïɛ̈ ndə̂ Möyîze. 3Käko äwäpä nyë lusə̂ andjê, kə̂ mbo rə gbɛ̂ ndə̂ andjë yukû nə̈, praâbalë nyë mböäbô rə mbô batə̂ andjê, bëte rə ndə̂ andjë nyisə̂ nə̈, andjë mbôâbo rə batə̂ rə̂-a. 4Andjë ï arə ndə̂ âlû kə̈ zâ rə̂ ëpâ kängä azü, praâbalë andjê la tə̂ andjê kösə̂ kə̂ grʉ rə̂ la dämba ɛ̈ könô andjê. 5Arə gbɛ̂ ndə̂ andjë mbo rə̂, andjë mbö rə̂ ndə̂kə̂ pa azü wun andjê la rə̂. Andjë mbö rə̂ ndə̂kə̂ pa tchə̂lə̂ ayɛ̈yɛ̈ kədjâ ndə̂ angâ apö lə̂ Mbëtï Ndjapä wa lə̂nə̈ lâme ge tə̂ gbölösə̂nə̈, ndə̂ andjë î rə̂ tə̂ könô andjê âdəndjë tə̂ küma andjê lâme. Andjë mbö rə̂ ndə̂kə̂ pa ndöma lə̂ba ndə̂ a sɨ̂ rə̂ tə̂ ma gbölö lə̂ba ndə̂ andjê wa gɛ̂ɛ̂-ë#23.5 Angâ ajuîfu mbö tâ käko ndə̂kə̂ rɨ su andjê pâ andïɛ̈ ndə̂ Ndjapä. Nyë dɨ̈ Nomb 15.38-41.. 6Andjë nyïndə̂ kə̂ sə tchê ëpâ adokʉ̈ angendë lə̂ akpülü la adokʉ̈ angendë ndə̂ âwâ lə̂ anda kə̂ voga Ndjapä. 7Andjë nyïndə̂ nə̈ pä azü po ndə̂ anyê sə̂nə̈ ndə̂ kpûlû azü wa tâ, ânyë azü e anyê pä ‹a-earə̂ kə̂ nyisə̂ rə›. 8Andə̂ nye nə̈, nyë nyïäbô nyîndə̂ nə̈ ndə̂kə̂ pa a e nyê ‹earə̂ kə̂ nyisə̂ rə-ê›, bëte earə̂ kə̂ nyisə̂ rə wä balë, ânyë nyë wä gbɛ̂ tə̂ ayîngâ. 9Nyë ëäbô ngâ akrə ê pâ cho âtə pä ‹bha-ê›, bëte nyë wä kütû la Bha balë, tchanə̈ ndə̂ tche sə̂ bhâ lafô. 10Nyë nyîâbô nyîndə̂ nə̈ pä a e nyê ‹Makündji-î›, bëte nyë wä kütû la Makündji balë, tche də̈ Krîsiti. 11Gbölö akrə lə̂ gbâtə̂ nyê wadje tə̂ earə̂ kua ndə̂ nyê. 12Akrə ndə̂ tche mbôtə̂ yê gbölö, a âmboadje tchë, tche wa kpîɛ̂kpîɛ̂ rə̂, ânyë akrə ndə̂ tche mbôtə̂ yê kpîɛ̂kpîɛ̂ rə̂, a âmboadje tchë, tche wa gbölö.»

Azü ndə̂ pö ma andjê wâ ngbî tə̂kə̂ mbo rə ndə̂ andjê

(Mar 12.40; Luk 11.39-52; 20.45-47)

13«Nyonyo kä tə̂ nyê, a-earə̂ kə̂ nyisə̂ ndïɛ̈ la afarizïɛ̈n. Pö ma nyê wä ngbî tə̂kə̂ mbo rə ndə̂ nyê, nyë tchü manda Gbölö gö-gbïɛ̈ ndə̂ tchêlafô tə̂ azü. Nyënyê la tə̂ nyê, nyë nyîâbo ndə̂kə̂ li bhâye-a, praâbalë nyë kïtə̂ köbo tə̂ azü ndə̂ andjë nyîndə̂ kə̂ li bhâye.

[ 14«Nyonyo kä tə̂ nyê a-earə̂ kə̂ nyisə̂ ndïɛ̈ la afarizïɛ̈n. Pö ma nyê wä ngbî tə̂kə̂ mbo rə ndə̂ nyê, nyë kʉ̈ arə tchâalê gbɛ̂ tə̂ aɛ̈chë lə̂ ndavrö, kə̂ to pö ndə̂ nyê sə̈ Ndjapä gü tə̂ gbölösə̂nə̈ ndə̂kə̂ pa azü wun nyê, Ndjapä âwadje ngbanga tə̂ gbölösə̂nə̈ lə̂ küma nyê#23.14 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 14 âtə wâbo lə̂nə̈-a. Nyë dɨ̈ Mar 12.40.!]

15«Nyonyo kä tə̂ nyê, a-earə̂ kə̂ nyisə̂ ndïɛ̈ la afarizïɛ̈n. Pö ma nyê wä ngbî tə̂kə̂ mbo rə ndə̂ nyê, nyë ë katchôgbɛ̂ pâ cho, ndjë la agbölö ngû ngbro ndə̂kə̂ gbo akrə balë ndə̂kə̂ pa tche bata ndïɛ̈ ndə̂ Möyîze. Âdə tche âza tchêngbâ nyê nə̂, nyê mbo rə̂ pä tche te lə̂ wo ndə̂ âju pïï etə̂ sûsunə̈ bïchuû âro andə̂ nye nə̈.

16«Nyonyo kä tə̂ nyê, nyënyê ndə̂ a-earə̂ föla ndə̂ nyê nyisə̂ köbo sə̈ angâ nyê a-earə̂ föla, kə̂ to rə̂ päkëdə̂: ‹Âdə ngâ akrə âdeba la rə̈ gbölö nda Ndjapä, âmbôâbo rə-a. Praâbalë âdə tche âdeba la rə̈ lôlo ndə̂ âwâ bhâlə̂ gbölö nda Ndjapä, äwäpä tche mbo rə bä nə̈.› 17A-earə̂ ngbɨ̈lə̈ la a-earə̂ föla! Lə̂ gbâtə̂ lôlo la gbölö nda Ndjapä, anə̈bâ kä ndə̂ ârô ngâ yê? Lôlo âdəndjë gbölö nda Ndjapä ndə̂ âmbo rə̂ pä lôlo wa ngbî bëte Ndjapä? 18Nyë kä tô rə̂ päkëdə̂: ‹Âdə ngâ akrə âdeba la rə̈ gbalâka, âmbôâbo rə-a. Praâbalë âdə ngâ akrə âdeba la rə̈ ngela ndə̂ âwâ pâ gbalâka, äwäpä tche mbo rə bä nə̈.› 19Nyënyê ndə̂ a-earə̂ föla âtə, lə̂ gbâtə̂ ngela la gbalâka, anə̈bâ kä ndə̂ ârô ngâ yê? Ngela âdəndjë gbalâka ndə̂ âmbo rə̂ pä ngela wa ngbî bëte Ndjapä? 20Akrə ndə̂ tche dêba la rə̈ gbalâka dëkë tche dëba la rə̈ gbalâka ndjë la arə gbɛ̂ ndə̂ âwâ pânə̈. 21Akrə ndə̂ tche dêba la rə̈ gbölö nda Ndjapä, dëkë tche dëba la rə̈ gbölö nda Ndjapä ndjë la rə̈ Ndjapä ndə̂ tche sə̂ tchâalê nə̈. 22Akrə ndə̂ tche dêba la rə̈ tchêlafô, dëkë tche dëba la rə̈ ngendë ndə̂ Ndjapä, ndjë la rə̈ akrə ndə̂ tche sə̂ ëpânə̈.

23«Nyonyo kä tə̂ nyê a-earə̂ kə̂ nyisə̂ ndïɛ̈ la afarizïɛ̈n, pö ma nyê wä ngbî tə̂kə̂ mbo rə ndə̂ nyê, nyë kʉ̈ dîme ndə̂ akʉ̈kʉ̂-gûsû ndə̂ nyê, praâbalë nyë wün gbölö pö ndə̂ ndïɛ̈ lə̂ la nyê ämbämbänə̈. Gbölö pö ndə̂ ndïɛ̈ nə̈ wä ndə̂kə̂ mbo rə djîrə̂, kə̂ wun nyonyo azü, kə̂ mbo rə gundə̂sə̂ pö ndə̂ tche tô rə̂. Rə ndə̂ âwâ pä nyë mbo rə̂ kä lâme, kə̂ wun-abô rə̂ wûn batə̂ mbämbä rə-ê. 24Nyënyê ndə̂ a-earə̂ föla ndə̂ nyê nyisə̂ köbo sə̈ angâ nyê âtə. Nyë mbö rə̂ gbɛ̂ ndə̂kə̂ kitə̂ köbo tə̂ akpîɛ̂kpîɛ̂ akrôâ ndə̂kə̂ te lə̂ ngû ndə̂ nyê ndjo rə̂, praâbalë nyë mëra chamö!

25«Nyonyo kä tə̂ nyê, a-earə̂ kə̂ nyisə̂ ndïɛ̈ la afarizïɛ̈n, pö ma nyê wä ngbî tə̂kə̂ mbo rə ndə̂ nyê, nyë djütu kʉ̂tê akangûchi la kʉ̂tê kalângʉ, praâbalë tchə̂lə̂ akangûchi la akalângʉ nə̈ sɨ̂sɨ̈ la arə ndə̂ ngbä la angbongbo gʉ su nyê. 26Mo ndə̂ farizïɛ̈n ndə̂ la zə̈ fô âtə! Amö djutu tchə̂lə̂ kangûchi nə̈ dokʉ̈tchê ânyë tchêpâ nə̈ groadje vuu-ë.

27«Nyonyo kä tə̂ nyê, a-earə̂ kə̂ nyisə̂ ndïɛ̈ la afarizïɛ̈n, pö ma nyê wä ngbî tə̂kə̂ mbo rə ndə̂ nyê, nyë kʉ̈tə̂ nyê la cho akuzü ndə̂ a brô tchêpâ nə̈ la kpâke, tchêpâ nə̈ fü tə̂ gbölösə̂nə̈, praâbalë bhâlə̂ nə̈ aföfö arə balë balë gbɛ̂ la agbäbï akuzü kä tâ. 28Nyënyê ndjë, lə̂ la azü nyë kʉ̈tə̂ nyê la adjîrə̂ azü, praâbalë su nyê sɨ̂sɨ̈ la apö ma nyê ndə̂ âwâ ngbî tə̂kə̂ mbo rə ndə̂ nyê la ngbongbo rə.

29«Nyonyo kä tə̂ nyê, a-earə̂ kə̂ nyisə̂ ndïɛ̈ la afarizïɛ̈n, pö ma nyê wä ngbî tə̂kə̂ mbo rə ndə̂ nyê, nyë nyïkrə acho akuzü ndə̂ a-earə̂ ndə̂ma Ndjapä, kə̈ nyîkrə atchôtchô arə pâ acho akuzü ndə̂ adjîrə̂ azü. 30La tchêngbâ nə̈ nyë tô rə̂ päkëdə̂: ‹Âdə ârâ âsə alême sə̂ araâta ârâ, ârâ pâlabô tə̂ ârâ la andjê ndə̂kə̂ won a-earə̂ ndə̂ma Ndjapä tee-a.› 31Käko nyë nyïsə̂ tə̂ nyê la tə̂ nyê pä nyë də̈ abechë ndə̂ azü ndə̂ andjë wôn a-earə̂ ndə̂ma Ndjapä alême. 32Äfü pä nyë sə kpôtâ, kə̂ ka kua ndə̂ araâta nyê dôkʉ̈tchê tâ alême ânyë! 33Aɛ̈krʉ̂, nyënyê ndə̂ akângê âtə! Nyë âmbo atöko ndə̂kə̂ kpe tə̂ ngbanga ndə̂ a dɨ̂ rə̂ bëte nyê lə̂ wo ndə̂ âju pïï etə̂ âtə? 34Nyë djë rə̂! Bëte rə̂ kä, mê wan-dje a-earə̂ ndə̂ma Ndjapä, la a-earə̂ kə̂ wunsə̂ rə la a-earə̂ kə̂ nyisə̂ ndïɛ̈ sə̈ nyê. Nyê kä won-adje angânə̈, kə̂ bhiadje angânə̈ tə̂ ayö ndə̂ gba. Nyê bhiadje andjê kulə̂ anda kə̂ voga Ndjapä ndə̂ nyê la föröngbö, lakə̂ groadje tchêngbâ andjê kulə̂ agö balë balë. 35Käko-ë, ngbanga ndə̂ jï adjîrə̂ azü ndə̂ nyë wôn andjê lâme äkä lə̂ küma nyê. Ätö tə̂ Äbêle, djîrə̂ akrə, balë akrə nə̈ də̈ Zakarï modô ndə̂ Bärâchi ndə̂ nyë wôn tchë lə̂ gbâtə̂ tchô ndə̂ âfû gbɛ̂ la gbalâka ndə̂ a wa ngela pânə̈ lə̂ gbölö nda Ndjapä. 36Ɛn-ɛn, tə̂ lëge nə̈ më tö rə̂ sə̈ nyê, ngbanga jï azü ndə̂ a wôn andjê alême teadje pâ azü ndə̂ tchô angêta gbɛ̂!»

Jezü kɨ̈ tə̂ Jerûzalêmo

(Luk 13.34-35)

37«Jerûzalêmo, Jerûzalêmo, momö ndə̂ mo wôn a-earə̂ ndə̂ma Ndjapä. Azü ndə̂ Ndjapä wân andjê sə̈ mö, mo nyê andjê la täme andjë tchû-î! Sûsunə̈ atöko kä ndə̂ më nyîndə̂ kə̂ pala abechë ndə̂ zə̈ tchâtchâ mê batə̂ anyï ngötö pala ayɛ̈yɛ̈ nə̈ tchâtchâ mbrö yê, praâbalë mo nyîâbo ndə̂nə̈-a. 38Gö ndə̂ nyê âwa me bhuu la tə̂ yê. 39Bëte më tö rə̂ sə̈ nyê pä nyê kä wun-abô mê tee-a, zoo âwutu tə̂ lo nə̈ ndə̂ nyê to rə̂ päkëdə̂: ‹Gbölö gbïɛ̈ Ndjapä ë tchôtchô pö pâ akrə ndə̂ tche nə̂ la rə̈ zə̈#23.39 Nyë dɨ̈ Aps 118.26.!›»

Currently Selected:

Matiyə̈ 23: lnl

Highlight

Copy