Lûke 6
6
Pö pâ lö sabäa
(Mat 12.1-8; Mar 2.23-28)
1Lə̂ ngâ lö sabäa#6.1 Ädə̈ lö ndə̂ ajuîfu yatə̂ andjê lə̂nə̈, kə̂ e atə̂lə̂ nda Ndjapä ndə̂kə̂ voga tchë., Jezü sə̂ lakə̂ ro kulə̂ akɨ̈ndɨ̈ blë, adjisîpili ndə̂ yê sə̂ lakə̂ krʉa ngâ küma blë nə̈, kə̈ nâna rə̂ tchânə̂ andjê, kə̈ sə̂ lakə̂ zɨ ndjî nə̈. 2Angâ afarizïɛ̈n tô rə̂ sə̈ andjê päkëdə̂: «Bëte giamâ kä ndə̂ nyë mbô rə ndə̂ ndïɛ̈ kôsə̂ nə̈ pä a mbo rə̂ lə̂ lö sabäa?» 3Jezü tô rə̂ ndə̂nə̈ sə̈ andjê päkëdə̂: «Nyë dɨ̂âbo mbëtï pâ rə ndə̂ Davîdi mbô rə̂ tə̂ngâlo, ndə̂ gʉ rôpâ yê la azü ndə̂ yê lâme? 4Tche lî bhâlə̂ nda Ndjapä, kə̈ kʉ̂ amâpa ndə̂ a kʉ̂ rə̂ ngbî bëte Ndjapä, ânyë kə̈ zɨ̂ rə̂, kə̈ kʉ̂ ndjë rə̂ sə̈ azü ndə̂ yê. Dëkë ndïɛ̈ tö rə̂ pä kütû earə̂ kə̂ wa ngela sə̈ Ndjapä kä ndə̂ âzɨ rə̂.» 5Jezü kä tô rə̂ sə̈ andjê päkëdə̂: «Modô ndə̂ Akrə wätə̂ gbölö akrə pâ lö sabäa.»
Jezü tchä ngâ köchë ndə̂ könô yê ngêwele
(Mat 12.9-14; Mar 3.1-6)
6Lə̂ ngâ lö sabäa, Jezü lî lə̂ nda kə̂ voga Ndjapä kə̈ sə̂ lakə̂ nyisə̂ rə sə̈ azü. Ngâ köchë kä bhâye ndə̂ könô yê də ndôkö ngêwele. 7A-earə̂ kə̂ nyisə̂ ndïɛ̈ la afarizïɛ̈n chêko Jezü gbôô ndə̂kə̂ wun rə̂ pä tchê tchadje ngâ akrə lə̂ lö sabäa. Andjë nyîndə̂ kə̂ za ngâ pö lə̂ küma yê. 8Praâbalë Jezü wûnsə̂ pö ndə̂ âwâ bhâtə̂ su andjê gbɛ̂. Tche tô rə̂ sə̈ köchë ndə̂ könô yê ngêwele lâme päkëdə̂: «Alafô kə̈ krʉ̂ tchâtə tchâtchu azü gbɛ̂.» Köchë lâme âlafô kə̈ krʉ̂. 9Pânə̈ Jezü tô rə̂ sə̈ andjê päkëdə̂: «Më yü nyê: Ndïɛ̈ ndə̂ azə̂ tö rə̂ atöko? Äwä ndə̂kə̂ mbo tchôtchô rə? Ndə̂kə̂ mbo ngbongbo rə lə̂ lö sabäa? Ndə̂kə̂ tcha akrə? Ndə̂kə̂ won akrə?» 10Käko Jezü wûn tchə̂lə̂ la andjê balë balë gbɛ̂, kə̈ tô rə̂ sə̈ köchë lâme päkëdə̂: «Yorʉa tchə̂lə̂ könô zə̈.» Tche yôrʉa tchə̂lə̂ nə̈, ânyë könô yê dâka ëngbânə̈. 11Praâbalë su andjê kʉ̂ andjê tə̂ gbölösə̂nə̈, andjë sə̂ lakə̂ to rə̂ lə̂ gbâtə̂ andjê, pö ndə̂ rə ndə̂ andjë nyîndə̂ kə̂ mbo rə̂ tə̂ Jezü.
Jezü dɨ̈ abadjângele 12
(Mat 10.1-4; Mar 3.13-19)
12Tə̂ngâlo, Jezü kênga atə̂lə̂ küma aga ndə̂kə̂ to pö sə̈ Ndjapä, kə̈ tô pö sə̈ Ndjapä lə̂ bütchî nə̈ tɨkpɨî. 13Tchô krâ, tche ê adjisîpili ndə̂ yê, kə̈ dɨ̂ andjê lə̂ könô gbɛ̂ tchêpâ nə̈ bïchuû, kə̈ ê rə̂ tə̂ andjê pä abadjângele. Azü nə̈ də̈: 14Chemön, ndə̂ a ê ndjë rə̂ tə̂ yê pä Pîêre la yîngâ yê Anderë la Jâke la Jâan la Fïlîpe la Bartelemï la 15Matiyə̈ la Tomä la Jâke modô ndə̂ Alefë la Chemön ndə̂ tche wâtə̂ ngâ zëlôte#6.15 Zëlôte: Azü ndə̂ a ê rə̂ tə̂ andjê pä «zëlôte», andjë wätə̂ abechë gö ndə̂ andjë mbô kʉ̈ʉ̈ bëte gö ndə̂ andjê ndə̂kə̂ pa ngâ bechë gö ngbî wabô wâtə̂ gbïɛ̈ pâ andjê. la 16Jüdâse modô ndə̂ Jâke la Jüdâse Ïsïkärïyôte ndə̂ tchê wadje tə̂ earə̂ kə̂ yosə̂ Jezü.
Jezü nyïsə̂ rə sə̈ kpûlû azü, kə̈ tchâ a-earə̂ tə̂kömbô
(Mat 4.23-25)
17Jezü jrê la andjê tə̂ aga nə̈, kə̈ krʉ̂ sə̂ ngâ kpakpa tchô, sə̂nə̈ ndə̂ angbängbä adjisîpili ndə̂ yê sə̂ tâ. Kpûlû azü ndə̂ andjë tô bhâlə̂ agö ndə̂ Judë gbɛ̂ la Jerûzalêmo la azü tə̂ maga ngû ndə̂ Tîre la Sidön ndə̂ andjë nə̂, andjë sə̂ ndjë tchâme. 18Andjë nə̈ ndə̂kə̂ dje Jezü, ndjë ndə̂kə̂ pa tche tcha andjê lə̂ tə̂kömbô ndə̂ andjê. Tche tchâ ndjë azü ndə̂ angbongbo atchozö mbo andjê. 19Azü gbɛ̂ pü köbo ndə̂kə̂ grʉ tchë, bëte ngâ gbôgbô wütu lə̂ yê, kə̈ tchâ andjê gbɛ̂.
A-earə̂ mômô la a-earə̂ nyonyo
(Mat 5.1-12)
20Käko Jezü kênga la yê, kə̈ wûn adjisîpili ndə̂ yê kə̈ tô rə̂ päkëdə̂:
«Nyë kä la mômô,
nyënyê ndə̂ nyë wâtə̂ a-earə̂ yûkü,
bëte nyë wätə̂ azü ndə̂ Gbölö gö-gbïɛ̈ ndə̂ Ndjapä!
21Nyë kä la mômô,
nyënyê ndə̂ gʉ nyu nyê angêta,
bëte tchə̂lə̂ nyê sɨadje!
Nyë kä la mômô,
nyënyê ndə̂ nyê kɨ angêta,
bëte nyê moadje tə̂ nyê.
22Nyë kä la mômô,
âdə azü âkosə̂ nyê,
kə̂ gro nyê,
kə̂ dro nyê,
kə̂ to ngbongbo pö la rə̈ nyê bëte Modô ndə̂ Akrə!
23Âdə arə nə̈ lâme âsə̈ mbo tə̂ nyê, nyë wä la mômô. Nyë kü atə̂ lafô la mômô, bëte ngâ gbölö tchôtchô rə kä lakə̂ krʉ bëte nyê bhâ lafô. Bëte araâta andjê yüku a-earə̂ ndə̂ma Ndjapä alême käko-ë.
24Praâbalë nyonyo kä tə̂ nyê,
nyënyê ndə̂ rə ndə̂ nyê wâ tâ,
bëte lə̂ köbosə̂ arə ndə̂ nyë wâ la rə̂ lâme, nyë gbô andə̂ nye nə̈ tchôtchô kə̂ sə nə̂!
25Nyonyo kä tə̂ nyê,
nyënyê ndə̂ tchə̂lə̂ nyê sɨ̂ angêta,
bëte gʉ ânyuadje nyê!
Nyonyo kä tə̂ nyê,
nyënyê ndə̂ nyê motə̂ nyê angêta,
bëte nyê wadje la nyonyo, kə̂ kɨadje.
26Nyonyo kä tə̂ nyê,
nyënyê ndə̂ azü gbɛ̂ to tchôtchô pö ndə̂ nyê,
bëte araâta andjê mbö tâ alême käko tə̂ azü ndə̂ andjë tô ndə̂ma Ndjapä la yepa.»
Nyë nyïndə̂ azü ndə̂ andjë kosə̂ nyê
(Mat 5.38-48; 7.12a)
27«Praâbalë më tö rə̂ sə̈ nyê, nyënyê ndə̂ nyê dje mê âtə: Äwäpä nyë nyində̂ a-earə̂ kə̂ kosə̂ nyê, kə̂ mbo dâkâ tə̂ azü ndə̂ andjë kôsə̂ nyê. 28Nyë ë tchôtchô pö pâ azü ndə̂ andjë e ngbongbo pö pâ nyê, kə̂ to pö sə̈ Ndjapä bëte azü ndə̂ andjë mbo nyê la yûkü. 29Âdə ngâ akrə ârʉa ngälâ zə̈, amö dje balë nə̈ sə̈ tchë. Âdə ngâ akrə âza krʉ lə̂ba ndə̂ zə̈, amö gbotə̂ tchâtchâ nə̈ sə̈ tchë. 30Akrə ndə̂ tche yûkû rə tchânə̂ zə̈, amö za rə̂ sə̈ tchë. Âdə ngâ akrə âza rə ndə̂ zə̈, amö yuabô kû nə̈ yû-î. 31Rə ndə̂ nyë nyîndə̂ nə̈ pä azü mbo rə̂ tə̂ nyê, äwäpä nyë mbo ndjë rə̂ tə̂ azü.
32«Âdə nyë ânyi kütû ndə̂ azü ndə̂ andjë nyîndə̂ nyê, tchôtchô rə giamâ kä ndə̂ nyê gbo rə̂ ngbânə̈? A-earə̂ ngbongbo rə ndjë gbɛ̂ nyïndə̂ azü ndə̂ andjë nyində̂ andjê. 33Âdə nyë âmbo dâkâ kütû tə̂ azü ndə̂ andjë mbô dâkâ tə̂ nyê, tchôtchô rə giamâ kä ndə̂ nyê gbo rə̂ ngbânə̈? A-earə̂ ngbongbo rə gbɛ̂ mbö ndjë tâ käko. 34Âdə nyë âmbo geda ndə̂ nyê kütû sə̈ azü ndə̂ nyë wûn andjê pä andjë âgi rə̂ sə̈ nyê ëngbânə̈, tchôtchô rə giamâ kä ndə̂ nyê gbo rə̂ ngbânə̈? A-earə̂ ngbongbo rə gbɛ̂ kʉ̈ ndjë rə ndə̂ andjê sə̈ angâ andjê, ndə̂kə̂ pa andjë kʉ rə̂ sə̈ andjê ngbânə̈. 35Praâbalë awäpä nyë nyində̂ azü ndə̂ andjë kôsə̂ nyê, nyë mbö dâkâ, nyë mbö geda, kə̂ yuabô kû nə̈ yû-î pä a gi rə̂ sə̈ nyê ëngbânə̈-ê. Nyê gboadje ngâ gbölö tchôtchô rə ngbânə̈, kə̂ wadje tə̂ abechë ndə̂ Ndjapä ndə̂ tche sə̂ bhâ lafô. Bëte Ndjapä mbö dâkâ tə̂ azü ndə̂ andjë wûn-âbo sə̂kə̂ za ayîabâ wûn-î, la angbongbo azü. 36Äwäpä nyë mbo dâkâ batə̂ rə̂ ndə̂ Bha nyê mbô ndjë rə̂.»
Nyë wäbô ngbanga wâ lə̂ küma angâ nyê
(Mat 7.1-5)
37«Nyë wäbô ngbanga wâ lə̂ küma angâ nyê, ânyë Ndjapä wabô ndjë ngbanga wâ lə̂ küma nyê. Nyë zäbô pö zâ lə̂ küma angâ nyê, ânyë Ndjapä zabô ndjë pö zâ lə̂ küma nyê. Nyë kö pö lə̂ küma angâ nyê lə̂ gbâtə̂ nyê, käko Ndjapä ko pö lə̂ küma nyê. 38Nyë kʉ̈ rə sə̈ azü ânyë Ndjapä kʉ ndjë rə sə̈ nyê. A âvoadje angbängbä andjî rəgʉ lə̂ gbölö kədjâ lə̂ba ndə̂ nyê. A ânyoanyoadje rə̂, kə̂ ndopro rə̂ ndə̂kə̂ pa äsɨ, kə̂ sə lakə̂ tûtü ëbêche! Käko Ndjapä âkʉ rə sə̈ nyê batə̂ rə̂ ndə̂ nyê kʉ ndjë rə sə̈ angâ nyê.»
39Jezü kä tô ndjë ngâ ndoka sə̈ andjê päkëdə̂: «Earə̂ föla gbɨtɨabô ngâ yê tee-a. Âwâbo käko-ë? Âdə ârə̂ âwa käko, dëkë andjê gburə̂ gbɛ̂ teadje atə̂lə̂ kudû. 40Djisîpili rôâbo earə̂ kə̂ nyisə̂ rə sə̈ tchë-a. Praâbalë âdə tche âwunsə̂ rə nə̈ nə̂, kə̂ wa batə̂ akrə ndə̂ tche nyîsə̂ rə nə̈ sə̈ tchë. 41Bëte giamâ kä ndə̂ mo wun kütû bë ndə̂ âwâ lə̂ la ngâ zə̈ ânyë kə̈ wûn-âbô gbölö yö ndə̂ âwâ lə̂ la zə̈ wûn-î? 42Atöko kä ndə̂ mo tô rə̂ sə̈ ngâ zə̈ päkëdə̂: ‹Ngâ mê, sə gii më tchôâkra bë ndə̂ âwâ lə̂ la zə̈ âtə›, ânyë momö ndə̂ zə nə̈, mo wûn-âbô gbölö yö ndə̂ âwâ lə̂ andə̂ zə nə̈ wûn-î? Momö ndə̂ pö ma zə̈ wâ ngbî tə̂kə̂ mbo rə ndə̂ zə̈ âtə, äwäpä mo tchoakra gbölö yö lə̂ la zə̈ dokʉ̈tchê, kə̂ wun tchô ngrôô, ânyë kə̂ tchoakra bë lə̂ la ngâ zə̈.»
Yö la lêlê yö
(Mat 7.16-20; 12.33-35)
43«Bëte tchôtchô yö lêâbo ngbongbo lêlê nə̈-a, ânyë ngbongbo yö le ndjë tchôtchô lêlê nə̈-a. 44A wünsə̂ yö balë balë tə̂ lêlê nə̈. A kʉ̂loabô fîge tə̂ ayö ndə̂ âwâ la chi-a, kə̈ kʉ̂loabô ndjë lêlê vînye lə̂ awû ndə̂ âwâ la chi-a. 45Tchôtchô akrə wütu la tchôtchô rə ndə̂ âwâ bhâtə̂ su yê. Ngbongbo akrə wütu la ngbongbo rə ndə̂ âwâ bhâtə̂ su yê. Bëte rə ndə̂ ârôpâ nə̈ bhâtə̂ su akrə kä ndə̂ âwutu lə̂ ma yê.»
Pö pâ anda bïchuû
(Mat 7.24-27)
46«Bëte giamâ kä ndə̂ nyê e mê ‹Gbölö Gbïɛ̈, Gbölö Gbïɛ̈›, ânyë kə̈ mbôâbô rə mbô gundə̂sə̂ apö ndə̂ më tô rə̂ sə̈ nyê-ê? 47Akrə ndə̂ tche nə̂ pu mê, kə̈ djê pö ndə̂ mê, ânyë kə̈ mbô rə gundə̂sə̂ nə̈, mê nyiadje sə̂ rə ndə̂ tche wâ batə̂ rə̂. 48Tche wä batə̂ ngâ köchë ndə̂ tche jêtə̂ kə̂ mbo nda ndə̂ yê. Tche djî kudû nə̈ âlî, kə̈ nyîkrə da nda nə̈ pâ täme. Âdə ngû âvo katchôgbɛ̂, ânyë kʉ̈la gbölö ngû nə̈ tâ nda nə̈, nda nə̈ tuabô tee-a, bëte a mbö nda nə̈ la köbo nə̈. 49Praâbalë akrə ndə̂ tche djê pö ndə̂ mê, ânyë kə̈ mbôâbô rə mbô gundə̂sə̂ nə̈, tche wä batə̂ ngâ köchë ndə̂ tche mbô nda ndə̂ yê pâ mbämbä cho, kə̈ nyîkrəabô da nə̈ la täme-a. Âdə kʉ̈la gbölö ngû âvo, ânyë kə̈ tâ nda nə̈, nda nə̈ âtu, kə̂ ndɨ gbɛ̂.»
Currently Selected:
Lûke 6: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
