Lûke 5

Jezü ë adokʉ̈ adjisîpili

(Mat 4.18-22; Mar 1.16-20)

1Tə̂ngâlo, Jezü krʉ̂ tə̂ maga gbölö kpakpa ngû ndə̂ Jënëzärête. Akpûlû azü nə̂ kə̈ tâkpa ndrotə̂ yê lakə̂ gbrogbrotə̂ andjê ndə̂kə̂ dje pö Ndjapä. 2Tche wûn külû bïchuû tə̂ maga ngû nə̈. A-earə̂ kə̂ pu agiangû nə̈ jrê lə̂nə̈, kə̈ sə̂ lakə̂ djutu gbânda ndə̂ andjê. 3Jezü â lə̂ ngâ külû nə̈ balë ndə̂ âwâtə̂ andə̂ Chemön, kə̈ yûkû nə̈ sə̈ Chemön nə̈ pä tche gi tîɛ̂ külû nə̈ boo atə̂lə̂ gûgû nə̈. Jezü sə̂ ëlə̂ külû nə̈, kə̈ sə̂ lakə̂ nyisə̂ rə sə̈ kpûlû azü nə̈.

4Ndə̂ Jezü tô pö nə̈ gbɛ̂, tche tô rə̂ sə̈ Chemön päkëdə̂: «Amö gi külû nə̈ atə̂sə̂ dälï nə̈, pânə̈ momö la angâ zə̈ nyë yï gbânda ndə̂ nyê lə̂ ngû ndə̂kə̂ pu agiangû.» 5Chemön tô rə̂ ndə̂nə̈ sə̈ tchë päkëdə̂: «Earə̂ kə̂ nyisə̂ rə, ârâ mbö kua lə̂ bütchî âtə tɨkpɨî, kə̈ gbôâbo ngâ rə balë-a. Âbatə̂ mo tô rə̂, më âyi gbânda nə̈.»

6Ndə̂ andjë yî rə̂, andjë gbô agiangû tə̂ gbölösə̂nə̈, tchə̂lə̂ gbânda nə̈ jêtə̂ kə̂ soa la agiangû nə̈-ê. 7Andjë hrâ angâ andjê ndə̂ andjë sə̂ lə̂ ngâ külû nə̈ lâme pä andjë nə pu anyê. Andjë nə̂, kə̈ kʉ̂ agiangû zoo tchə̂lə̂ külû nə̈ bïchuû gbɛ̂ sɨ̂-î, kə̈ sə̂ lakə̂ mîndî mïndi. 8Ndə̂ Chemön wûn rə̂ käko, tche gʉ̂te tchâtchâ Jezü, kə̈ tô rə̂ päkëdə̂: «Gbölö Gbïɛ̈, gitə̂ zə̈ tə̂ mê bhâchï, bëte më də̈ earə̂ ngbongbo rə.» 9Tchâme, wawa mbô Chemön la azü gbɛ̂ ndə̂ andjë sə̂ ndrotə̂ yê, bëte agiangû ndə̂ andjë gbô andjê tə̂ gbölösə̂nə̈ lâme. 10Araagü nə̈ ndə̂ andjë yî gbânda la andjê, Jâke la Jâan amodô ndə̂ Zebede wä ndjë gbɛ̂ la wawa. Jezü tô rə̂ sə̈ Chemön päkëdə̂: «Mboabô wa mbô-ê, ndə̂kə̂ to tə̂ tchô angêta, mo âwatə̂ earə̂ kə̂ pu azü.» 11Andjë kâ la akülû ndə̂ andjê bhâ ma djagɨ̈ ngû, kə̈ gbôtə̂ arə ndə̂ andjê gbɛ̂, kə̈ tê ngbâ Jezü.

Jezü tchä ngâ earə̂ broma

(Mat 8.1-4; Mar 1.40-45)

12Ndə̂ Jezü sə̂ lə̂ ngâ gö, ngâ köchë kadje ndə̂ broma kûku tchë gbɛ̂. Tche âsə̈ wun Jezü, kə̈ tê tchâtchâ yê, kə̈ dɨ̂ tchə̂lə̂ ma yê päkëdə̂: «Gbölö Gbïɛ̈, mo ânyində̂ nə̈, mbo rə̂ ndə̂kə̂ pa tə̂ mê daka-ê.» 13Jezü yï könô yê, kə̈ grʉ̂ tchë, kə̈ tô rə̂ päkëdə̂: «Më nyîndə̂ nə̈ nə̂, tə̂ zə̈ däka-ê!» Djîrə̂, broma nə̈ gbôtə̂ köchë lâme-ê. 14Jezü tô rə̂ sə̈ tchë la gbôgbô päkëdə̂: «Toabô rə̂ tô sə̈ ngâ akrə-ê. Praâbalë amö e kə̂ matə̂ zə̈ tə̂ earə̂ kə̂ wa ngela sə̈ Ndjapä, kə̂ kʉ rə ndə̂ Möyîze tô pö ndə̂nə̈ alême ndə̂kə̂ nyisə̂ nə̈ sə̈ azü gbɛ̂ pä tə̂ zə̈ dâka nə̂.» 15Käko a sə̂ lakə̂ to pö ndə̂ Jezü etə̂. Agbölö akpûlû azü pâlatə̂ andjê ndə̂kə̂ dje Jezü, ndjë ndə̂kə̂ pa tche tcha andjê lə̂ tə̂kömbô ndə̂ andjê. 16Praâbalë Jezü gbôtə̂ andjê kə̈ ê atə̂sə̂ ngâ tchô ndə̂ azü sə̂âbô sə̂ tâ-ê ndə̂kə̂ to pö sə̈ Ndjapä.

Jezü tchä ngâ köchë ndə̂ tche ngêwele

(Mat 9.1-8; Mar 2.1-12)

17Tə̂ngâlo, Jezü sə̂ lakə̂ nyisə̂ rə. Afarizïɛ̈n la a-earə̂ kə̂ nyisə̂ ndïɛ̈ sə̂ ndrotə̂ yê. Andjë tö lə̂ ayɛ̈yɛ̈ gö gbɛ̂ ndə̂ âwâ bhâ Galilë, la Judë, la gö ndə̂ Jerûzalêmo ânyë kə̈ nə̂. Gbôgbô ndə̂ Gbölö Gbïɛ̈ kä la tchë ânyë tche tchâ a-earə̂ tə̂kömbô.

18Angâ azü zâ ngâ köchë ndə̂ tche ngêwele pâ kʉ̈ngrʉ, kə̈ nə̂ la tchë. Andjë nyïndə̂ kə̂ li la tchë ndə̂kə̂ za tchë kpô tchâtchu Jezü, 19kə̈ wûn-âbo sə̂nə̈ ndə̂ andjë li la tchë tâ-a, bëte kpûlû azü nə̈. Käko andjë â la tchë lə̂ küma nda, kə̈ krô grʉ̈, kə̈ jrê tchë la kʉ̈ngrʉ ndə̂ yê nə̈ ëlə̂ gûtə̂ azü kpô tchâtchu Jezü. 20Ndə̂ Jezü wûn rə̂ ndə̂ andjë zâ su andjê gbɛ̂ sə̈ tchë, tche tô rə̂ sə̈ köchë ndə̂ tche ngêwele lâme päkëdə̂: «Köchë, a kô pö lə̂ küma zə̈ nə̂.» 21A-earə̂ kə̂ nyisə̂ ndïɛ̈ la afarizïɛ̈n jêtə̂ kə̂ to rə̂ bhâtə̂ su andjê päkëdə̂: «Köchë âtə də̈ tchabâ ânyë kə̈ drô Ndjapä âtə? Tchabâ âwâ ndə̂kə̂ ko pö lə̂ küma azü? Kütû Ndjapä balë!» 22Jezü wûnsə̂ pö bhâtə̂ su andjê, kə̈ tô rə̂ sə̈ andjê päkëdə̂: «Nyë rɨ̈ tchə̂lə̂ nyê käko bëte giamâ? 23Ndə̂kə̂ to rə̂ päkëdə̂: ‹A kô pö lə̂ küma zə̈ nə̂›, la ndə̂kə̂ to rə̂ päkëdə̂: ‹Alafô kə̈ nə̂›, anə̈bâ kä ndə̂ âwâtə̂ mömö nə̈? 24Praâbalë më nyïndə̂ nə̈ pä nyë wunsə̂ nə̈ pä Modô ndə̂ Akrə kä la gbôgbô pâ cho âtə ndə̂kə̂ ko pö lə̂ küma azü.» Käko Jezü tô rə̂ sə̈ köchë ndə̂ tche ngêwele lâme päkëdə̂: «Më tö rə̂ sə̈ mö: Alafô, kə̈ zâ kʉ̈ngrʉ ndə̂ zə̈, kə̈ gûgü atə̂ndə̂ zə̈!» 25Posə̂nə̈, köchë nə̈ âlafô lə̂ la azü gbɛ̂, kə̈ zâ kʉ̈ngrʉ ndə̂ tche lô pânə̈ âme, kə̈ gû atə̂ndə̂ yê lakə̂ voga Ndjapä. 26Tchə̂lə̂ küma azü nə̈ gbɛ̂ djîngɨli, wawa mbô andjê, andjë sə̂ lakə̂ voga Ndjapä, kə̈ tô rə̂ päkëdə̂: «Ârâ wün ngâ kpɨ̈ngbɨ̈ rə ndə̂ ârôpâ küma azü angêta!»

Jezü ë Levï ndə̂kə̂ nə ngbâ yê

(Mat 9.9-13; Mar 2.13-17)

27La tchêngbâ nə̈ Jezü wûtu, kə̈ wûn ngâ earə̂ kə̂ pala makətche-lapöo ndə̂ rə̈ yê wû pä Levï. Tche sə̂ bêche bhâ sə̂nə̈ ndə̂ a pala makətche-lapöo tâ. Jezü tô rə̂ sə̈ tchë päkëdə̂: «Nə ngbâ mê!» 28Levï âlafô, kə̈ gbôtə̂ kua ndə̂ yê gbɛ̂, kə̈ zâ tchêngbâ Jezü. 29Pânə̈ Levï mbô ngâ gbölö kpülü bhâ tchâalê ndə̂ yê sə̈ Jezü. Angbängbä a-earə̂ kə̂ pala makətche-lapöo la angâ azü ngbî kä ndjë lakə̂ zɨ rə la andjê. 30Afarizïɛ̈n la a-earə̂ kə̂ nyisə̂ ndïɛ̈ sə̂ lakə̂ to tchə̂lə̂ pö nə̈, andjë tö rə̂ sə̈ adjisîpili ndə̂ Jezü päkëdə̂: «Bëte giamâ kä ndə̂ nyê zɨ rə, lakə̂ ndjo rə la a-earə̂ kə̂ pala makətche-lapöo la a-earə̂ ngbongbo rə?» 31Jezü tô rə̂ ndə̂nə̈ sə̈ andjê päkëdə̂: «Âdə̂âbo azü ndə̂ tə̂ andjê wâ la sə̂nə̈ kä ndə̂ âe ndə̂kə̂ wun dokotöro-a, praâbalë kütû a-earə̂ tə̂kömbô kä ndə̂ âe ndə̂kə̂ wun tchë. 32Më nə̂âbo ndə̂kə̂ e adjîrə̂ azü-a, praâbalë më nə̈ bëte a-earə̂ ngbongbo rə, ndə̂kə̂ pa andjë gbotə̂ bəndɨ kə̂ mbo rə ndə̂ andjê.»

Pö ndə̂kə̂ kosə̂ kɨ̈zɨ̂ lakə̂ to pö sə̈ Ndjapä

(Mat 9.14-17; Mar 2.18-22)

33Afarizïɛ̈n tô rə̂ sə̈ Jezü päkëdə̂: «Adjisîpili ndə̂ Jâan-Batîse kösə̂ kɨ̈zɨ̂ lakə̂ to pö sə̈ Ndjapä logbɛ̂, adjisîpili ndə̂ ârâ ndjë gbɛ̂. Praâbalë andjandə̂ zə nə̈ kä lakə̂ zɨ rə, lakə̂ ndjo rə.» 34Jezü tô rə̂ sə̈ andjê päkëdə̂: «Lə̂ kpülü ndə̂kə̂ totə̂ ndə̂ köchë la ɛ̈chë; köchë ndə̂ ɛ̈chë nə̈ âsə tâ, azü ndə̂ a ê andjê ndə̂ kpülü nə̈, andjë âkosə̂ kɨ̈zɨ̂? Âdə̂âbo käko-a. 35Lo nə̈ âtadje tâ ndə̂ a za köchë nə̈ tə̂ andjê. Tə̂ lo nə̈ lâme kä ndə̂ andjê kosə̂ kɨ̈zɨ̂ lakə̂ to pö sə̈ Ndjapä.»

36Jezü tö ndjë pö la ndoka sə̈ andjê päkëdə̂: «Ngâ akrə sroabô ndöma täfo lə̂ba ndə̂kə̂ sɨ rə̂ sə̂ ku bəndɨ nə̈ tee-a. Tche âmbo tâ käko, kə̂ ndɨ täfo lə̂ba nə̈, ndöma nə̈ lâme dakabô ndjë la bəndɨ lə̂ba nə̈ tee-a. 37Akrə wâbo ndə̂kə̂ su täfo pî lə̂ abəndɨ akədjâ-pî-a#5.37 Bhândə̂ ajuîfu, a mbö kədjâ-pî la kpoto gia ânyë kə̂ su pî lə̂nə̈.. Ârə̂ âdəabô də̂ käko, täfo pî nə̈ soadje tchə̂lə̂ akədjâ-pî nə̈, pî nə̈ tu gbɛ̂ ëbêche, akədjâ-pî nə̈ ndɨ-î. 38Äwäpä a su täfo pî lə̂ atäfo akədjâ-pî! 39Akrə ndə̂ tche ndjô kpɨlɨ pî nyiabô ndə̂kə̂ ndjo täfo nə̈ tee-a, bëte tche âto rə̂ päkëdə̂: ‹Bəndɨ nə̈ kä ndə̂ âtchô.›»

Currently Selected:

Lûke 5: lnl

Highlight

Copy