Lûke 4
4
Jâbolo bölo Jezü
(Mat 4.1-11; Mar 1.12-13)
1Jezü sɨ̂sɨ̈ la Kpɨ̂ki Yingö, tche tô bhâtə̂ ngû ndə̂ Jurudɛ̈n kə̈ kângbâ yê, ânyë Kpɨ̂ki Yingö tôngo tchë kə̈ ê la tchë atə̂lə̂ kpaɛ̈gâ. 2Jâbolo vû tchë bhâye lə̂ lö tə̂ azü bïchuû. Jezü zɨ̂âbo rə lə̂ alö nə̈ lâme-a. Ndə̂ alö nə̈ lâme âsə̈ ro, gʉ nyû tchë. 3Käko Jâbolo tô rə̂ sə̈ tchë päkëdə̂: «Âdə mo âdə Modô ndə̂ Ndjapä, to rə̂ sə̈ täme âtə âdôtə̂ yê tə̂ mâpa.» 4Jezü tô rə̂ ndə̂nə̈ sə̈ tchë päkëdə̂: «Mbëtï Ndjapä tö rə̂ päkëdə̂: ‹Akrə sə̂âbo sûwu âtə kütû bëte mâpa-a#4.4 Nyë dɨ̈ Det 8.3..›»
5Jâbolo kâ ê la tchë tʉ̂rʉ bhâ lafô, kə̈ nyîsə̂ agö-gbïɛ̈ ndə̂ tchêbêche gbɛ̂ sə̈ tchë, 6kə̈ tô rə̂ sə̈ tchë päkëdə̂: «Më âza gbôgbô sə̈ mö ndə̂kə̂ sə pâ agö ndə̂ tchêbêche âtə gbɛ̂ la arə ndə̂ âwâ pânə̈. A kʉ̂ arə lâme nə̂ gbɛ̂ sə̈ mê, më kä la gbôgbô ndə̂kə̂ kʉ rə̂ sə̈ akrə batə̂ su mê nyîndə̂ nə̈. 7Âdə mo âgʉte tchâtchâ mê, mê kʉadje arə lâme gbɛ̂ sə̈ mö.» 8Jezü tô rə̂ ndə̂nə̈ sə̈ tchë päkëdə̂: «Mbëtï Ndjapä tö rə̂ päkëdə̂: ‹Äwäpä mo voga Ndjapä Gbölö Gbïɛ̈ ndə̂ zə̈, kə̂ mbo kütû rə̂ la tchë#4.8 Nyë dɨ̈ Det 6.13..›»
9Jâbolo kâ ê la tchë atə̂ Jerûzalêmo, kə̈ zâ tchë bhâlə̂ küma gbölö nda Ndjapä, kə̈ tô rə̂ sə̈ tchë päkëdə̂: «Âdə mo âdə Modô ndə̂ Ndjapä, amö to lə̂ küma nda âtə kə̈ tê atə̂ bêche, 10bëte Mbëtï Ndjapä tö rə̂ päkëdə̂: ‹Ndjapä âzadje ma sə̈ aânje ndə̂ yê ndə̂kə̂ bata mö. 11Andjê âza mö ëtchânə̂ andjê ânyë mo gʉteabô da zə̈ gʉ̂te tə̂ ngâ täme-ê#4.11 Nyë dɨ̈ Aps 91.11-12..›» 12Jezü tô rə̂ ndə̂nə̈ sə̈ tchë päkëdə̂: «Mbëtï Ndjapä tö rə̂ päkëdə̂: ‹Âwâbo pä mo bolo Ndjapä Gbölö Gbïɛ̈ ndə̂ zə̈-a#4.12 Nyë dɨ̈ Det 6.16..›» 13Ndə̂ Jâbolo vû tchë lə̂ arə gbɛ̂ tʉrʉ-ê, tche gbôtə̂ Jezü, kə̈ rô tʉ̂rʉ etə̂ ndə̂kə̂ sə bëte ngâ lö.
Jezü jëtə̂ kə̂ mbo kua ndə̂ yê bhâ Galilë
14Jezü dôtə̂ yê atə̂ Galilë, tche sɨ̂sɨ̈ la gbôgbô ndə̂ Kpɨ̂ki Yingö. A sə̂ lakə̂ to pö ndə̂ yê lə̂ agö nə̈ gbɛ̂. 15Tche nyïsə̂ rə lə̂ anda kə̂ voga Ndjapä, azü gbɛ̂ tö tchôtchô pö ndə̂ yê.
Azü ndə̂ Näzärête kösə̂ Jezü
(Mat 13.53-58; Mar 6.1-6)
16Jezü ê atə̂ Näzärête, gö ndə̂ tche kʉ̂che lə̂nə̈. Lə̂ lö sabäa tche lî lə̂ nda kə̂ voga Ndjapä batə̂ rə̂ ndə̂ tche mbo tchê rə̂ logbɛ̂. Tche âlafô ndə̂kə̂ dɨ Mbëtï Ndjapä. 17A zâ mbëtï ndə̂ Ezayï earə̂ ndə̂ma Ndjapä sə̈ tchë. Tche vrô tchêla mbëtï nə̈, kə̈ gbô sə̂nə̈ ndə̂ âtô rə̂ päkëdə̂:
18«Yingö ndə̂ Gbölö Gbïɛ̈ kä pâ mê,
tche sü kâdâ lə̂ küma mê ndə̂kə̂ nə la Tchôtchô Pö sə̈ a-earə̂ yûkü.
Tche wän mê ndə̂kə̂ to rə̂ sə̈ a-earə̂ kânga pä a jî andjê nə̂,
ndə̂kə̂ za kə̂ wun tchô sə̈ a-earə̂ föla.
Tche wän mê ndə̂kə̂ ji azü ndə̂ a yuku andjê,
19ndə̂kə̂ to pö ndə̂ ngû ndə̂ Gbölö Gbïɛ̈ mbo dâkâ lə̂nə̈#4.19 Nyë dɨ̈ Eza 61.1-2..»
20La tchêngbâ nə̈ Jezü gʉ̂â tchêla mbëtï nə̈, kə̈ zâ rə̂ ëngbânə̈ sə̈ earə̂ kə̂ mbo kua nə̈, kə̈ sə̂ ëbêche. Azü gbɛ̂ ndə̂ andjë sə̂ ndjë lə̂ nda kə̂ voga Ndjapä nə̈ wûn Jezü gbôô. 21Käko Jezü jêtə̂ kə̂ to rə̂ sə̈ andjê päkëdə̂: «Pö lə̂ mbëtï âtə wâ nə̂ tə̂ lëge nə̈ angêta âtə ndə̂ nyë sə̂ lakə̂ dje rə̂ âtə.» 22Azü gbɛ̂ tö pö ndə̂ Jezü, tchə̂lə̂ küma andjê gbɛ̂ djîngɨli bëte atchôtchô pö ndə̂ âwûtu lə̂ ma yê. Andjë sə̂ lakə̂ yutə̂ andjê päkëdə̂: «Modô ndə̂ Jozêfu də̂âbo tchë âtə?» 23Jezü tô rə̂ sə̈ andjê päkëdə̂: «Nyê toadje ndoka âtə sə̈ mê tə̂ lëge nə̈ päkëdə̂: ‹Dokotöro, amö tcha tə̂ zə̈ la tə̂ zə̈.› Nyë âto ndjë rə̂ me sə̈ mê päkëdə̂: ‹Ârâ djê pö ndə̂ arə gbɛ̂ ndə̂ mo mbô rə̂ bhâ Käpërënäyûmo lâme nə̂, äwäpä mo mbo ndjë arə nə̈ lâme tchâtə lə̂ gö ndə̂ zə̈.›»
24Jezü kä tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: A lûâbo sə̂ ngâ earə̂ ndə̂ma Ndjapä lə̂ gö ndə̂ yê-a. 25Tə̂ lëge nə̈ më tö rə̂ sə̈ nyê päkëdə̂: Losə̂ Elïe earə̂ ndə̂ma Ndjapä, nyïvrö nyîâbo lə̂ ngû vötaâ la nyîpï mïndûu manə̈ balë-a, ânyë gʉ zâ gö nə̈ gbɛ̂. Lə̂ lö lâme, aɛ̈chë lə̂ ndavrö ngbä tə̂ gbölösə̂nə̈ lə̂ gö ndə̂ Isarayële. 26Ndjapä wân-âbo Elïe sə̈ ngâ ɛ̈chë lə̂ gûtə̂ andjê lâme-a. Tche wän Elïe kütû sə̈ ngâ ɛ̈chë lə̂ ndavrö ndə̂ tche sə̂ bhâ Sareptä, gö ndə̂ âwâ lə̂ Sidön. 27Ndjë, losə̂ Elizë earə̂ ndə̂ma Ndjapä, a-earə̂ broma rö sə̂nə̈ lə̂ gö ndə̂ Isarayële. Elizë tchâbo ngânə̈ lə̂ gûtə̂ andjê-a. Praâbalë tche tchä kütû Naamän, akrə gö ndə̂ Sirï.»
28Ndə̂ azü gbɛ̂ ndə̂ andjë sə̂ lə̂ nda kə̂ voga Ndjapä nə̈ âsə̈ dje pö lâme, tchə̂lə̂ andjê kʉ̂ andjê tə̂ gbölösə̂nə̈. 29Andjë gbɛ̂ âlafô, kə̈ zâ Jezü, kə̈ wûtu la tchë lə̂ gö nə̈, kə̈ zâ tchë bhâlə̂ küma aga ndə̂ andjë mbô gö ndə̂ andjê pânə̈, ndə̂kə̂ nyoto tchë atə̂ bêche. 30Praâbalë Jezü wûtu lə̂ gûtə̂ andjê kênê-ê, kə̈ rô etə̂.
Jezü grö ngbongbo tchozö lə̂ ngâ köchë bhâ Käpërënäyûmo
(Mar 1.21-28)
31Jezü ê atə̂ Käpërënäyûmo, gö ndə̂ âwâ lə̂ Galilë, kə̈ sə̂ lakə̂ nyisə̂ rə sə̈ azü logbɛ̂ lə̂ lö sabäa. 32Tchə̂lə̂ küma azü nə̈ gbɛ̂ djîngɨli lə̂ köbosə̂ kə̂ nyisə̂ rə ndə̂ yê, bëte tche tö pö la gbôgbô ndə̂ Ndjapä. 33Lə̂ nda kə̂ voga Ndjapä nə̈, ngâ köchë kädje la ngbongbo tchozö lə̂ yê. Tche sə̂ lakə̂ ta wârə̂ päkëdə̂: 34«Êe! Giamâ mo nyîndə̂ nə̈ tə̂ ârâ, Jezü akrə gö ndə̂ Näzärête, mo nə̈ ndə̂kə̂ won ârâ wön? Më wûnsə̂ zə̈ nə̂ gbɛ̂: Mo wä ngbî kə̈ dâka gbɛ̂, ndə̂ Ndjapä wân mö!» 35Jezü hrô la tchë la gbôgbô, kə̈ tô rə̂ sə̈ tchë päkëdə̂: «Ngbo ma zə̈ tâ! Kə̈ wûtu lə̂ köchë âtə-ê!» Ngbongbo tchozö nə̈ yî köchë lâme kpukulukpu ëbêche lə̂ la azü gbɛ̂, kə̈ wûtu lə̂ yê, kə̈ mbôâbo ngâ ngbongbo rə tə̂ yê balë-a.
36Tchə̂lə̂ küma azü gbɛ̂ djîngɨli, andjë sə̂ lakə̂ yutə̂ andjê päkëdə̂: «Pö âtə nyïndə̂ kə̂ to rə̂ atöko? Köchë âtə tö pö la gbôgbô sə̈ angbongbo atchozö andjë wûtu nyê-o!» 37Pânə̈ pö ndə̂ Jezü zâ tchə̂lə̂ agö nə̈ gbɛ̂.
Jezü tchä angbängbä azü ndə̂ andjë wâ la tə̂kömbô
(Mat 8.14-17; Mar 1.29-34)
38Jezü wûtu lə̂ nda kə̂ voga Ndjapä nə̈, kə̈ ê atə̂ tchâalê ndə̂ ngâ köchë ndə̂ rə̈ yê wû pä Chemön. Tə̂ ɛ̈chë-mbïɛ̈ Chemön wô tə̂ gbölösə̂nə̈, a yûkû nə̈ sə̈ Jezü pä tche mbo ngâ rə tə̂ pö ndə̂ yê. 39Jezü ndrâ pâ yê, kə̈ hrô la tə̂kömbô ndə̂ wo kʉ̂tə̂ yê nə̈, ânyë tə̂kömbô ndə̂ wo kʉ̂tə̂ yê nə̈ gbôtə̂ yê-ê. Posə̂nə̈ tche âlafô, kə̈ sə̂ lakə̂ kʉ kɨ̈zɨ̂ sə̈ andjê.
40La zɨtɨ tchêndə̂gölo nə̈, azü gbɛ̂ ndə̂ andjë wâ la a-earə̂ tə̂kömbô ngbî ngbî bhândə̂ andjê, andjë nə̂ la a-earə̂ tə̂kömbô nə̈ sə̈ Jezü. Tche tô könô yê pâ andjê balë balë gbɛ̂, kə̈ tchâ andjê. 41Angbongbo atchozö wûtu lə̂ angâ azü nə̈ tə̂ gbölösə̂nə̈ lakə̂ on ngbôô päkëdə̂: «Mo də̈ Modô ndə̂ Ndjapä!» Jezü hrô la andjê, kə̈ kîtə̂ köbo tə̂ andjê ndə̂kə̂ po-ê, bëte andjë wûnsə̂ nə̈ nə̂ pä tche də̈ Krîsiti.
Jezü mü pö lə̂ anda kə̂ voga Ndjapä
(Mar 1.35-39)
42Ndə̂ tchô krâ, Jezü wûtu lə̂ gö nə̈, kə̈ ê atə̂sə̂ ngâ tchô ndə̂ azü sə̂âbô sə̂ tâ-ê. Ngâ kpûlû azü sə̂ lakə̂ pu tchë. Ndə̂ andjë gbô tchë, andjë kîtə̂ yê ndə̂kə̂ pa tche roabô rô tə̂ andjê. 43Praâbalë Jezü tô rə̂ sə̈ andjê päkëdə̂: «Äwäpä më mu Tchôtchô Pö ndə̂ Gbölö gö-gbïɛ̈ ndə̂ Ndjapä sə̈ azü lə̂ adɨ̂ gö nə̈, bëte rə̂ kä ndə̂ Ndjapä wân mê.» 44La tchêngbâ nə̈ Jezü mû pö lə̂ anda kə̂ voga Ndjapä lə̂ agö ndə̂ Judë.
Currently Selected:
Lûke 4: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
