Abadjângele 5
5
Änänîâse la Safîra
1Ngâ köchë ndə̂ rə̈ yê wû pä Änänîâse djëtə̂ yê la ɛ̈chë ndə̂ yê Safîra ânyë kə̈ kâ ngâ kɨ̈ndɨ̈ ndə̂ andjê. 2Tchetchë la ɛ̈chë ndə̂ yê, andjë nyîkrə pö ndə̂kə̂ kitə̂ ngâ makətche nə̈, kə̈ kʉ̂ adɨ̂ nə̈, kə̈ kâ la rə̂ kə̈ gbôtâ tchâtchâ abadjângele. 3Praâbalë Pîêre yû tchë päkëdə̂: «Änänîâse, bëte giamâ mo gbôtə̂ köbo sə̈ Satäa ânyë tche lî bhâlə̂ su zə̈? Kɨ̈ndɨ̈ ndə̂ mo kâ rə̂ lâme, mo kïtə̂ tchâkalâ makətche nə̈, kə̈ kâ mô yepa sə̈ Kpɨ̂ki Yingö#5.3 Nyë dɨ̈ Jan 13.2.. 4Mo wä âme ndə̂kə̂ bata kɨ̈ndɨ̈ ndə̂ zə̈ lâme. Ndə̂ mo kâ rə̂ lâme, makətche nə̈ də̈ andə̂ zə nə̈. Mo wä ndə̂kə̂ mbo arə gbɛ̂ ndə̂ mo nyîndə̂ nə̈ la makətche nə̈. Bëte giamâ kä ndə̂ mo nyîkrə rə̂ tə̂ su zə̈ ndə̂kə̂ mbo tə̂ rə käko-ë? Mo môâbo yepa lâme sə̈ azü-a, praâbalë mo mö rə̂ sə̈ Ndjapä!» 5Ndə̂ Änänîâse djê pö nə̈, tche tê gbô kə̈ tchû-î. Azü gbɛ̂ ndə̂ andjë djê pö ndə̂ rə lâme, wawa mbô andjê tə̂ gbölösə̂nə̈. 6Abechë-ɛ̈köchë nə̂, kə̈ gʉ̂â krʉkrʉ yê la lə̂ba ânyë kə̈ ê la rə̂ ndə̂kə̂ chi rə̂.
7La tchêngbâ dalo ndola vötaâ ɛ̈chë ndə̂ yê lî, kə̈ wûn-âbo sə̂ rə ndə̂ âmbô lâme-a. 8Pîêre yû tchë päkëdə̂: «To rə̂ sə̈ mê, kɨ̈ndɨ̈ ndə̂ nyë kâ rə̂ lâme, makətche nə̈ gbɛ̂ kä âtə?» Tche tô rə̂ ndə̂nə̈ päkëdə̂: «Ɛn-ɛn, gbô sə̂nə̈ gbɛ̂ kä!» 9Käko Pîêre tô rə̂ sə̈ tchë päkëdə̂: «Bëte giamâ kä ndə̂ momö la köchë ndə̂ zə̈, nyë nyîkrə rə̂ tə̂ su nyê ndə̂kə̂ bolo Yingö ndə̂ Gbölö Gbïɛ̈ âtə? Amö djë rə̂, azü ndə̂ andjë chî köchë ndə̂ zə̈ kä lə̂ manda. Andjê zadje mö ânyë kə̂ roadje ndjë la mö!» 10Kpro kâkë, tche tê gbô tchâtchâ Pîêre kə̈ tchû-î. Abechë-ɛ̈köchë nə̈ lî kə̈ wûn rə̂ pä tche tchû nə̂. Käko andjë zâ tchë, kə̈ ê la tchë ndə̂kə̂ chi tchë ndrotə̂ köchë ndə̂ yê. 11Azü ndə̂ Egilîze la azü gbɛ̂ ndə̂ andjë djê pö ndə̂nə̈, wawa mbô andjê tə̂ gbölösə̂nə̈.
Abadjângele mbö akpɨ̈ngbɨ̈ rə
12Abadjângele mbö akpɨ̈ngbɨ̈ rə la arə ndə̂ âropâ küma azü lə̂ gbâtə̂ azü gö. Azü ndə̂ Jezü gbɛ̂ pâlatə̂ andjê tchâmbrönda ndə̂ rə̈ nə̈ wû pä tchâmbrönda ndə̂ Salomön. 13Ngâ akrə ngbî sə̂âbo lə̂ gûtə̂ andjê-a, praâbalë azü nə̈ tö tchôtchô pö ndə̂ andjê. 14Akpûlû aköchë la aɛ̈chë ndə̂ andjë wâ ëpânə̈ ëpânə̈ zâ su andjê sə̈ Gbölö Gbïɛ̈, ânyë kə̈ pâlatə̂ andjê la azü ndə̂ Jezü. 15Azü wütu la a-earə̂ tə̂kömbô ndroma köbo, a kʉ̈ andjê ëpâ kʉ̈ngrʉ âdəndjë pâ gbogbo ndə̂kə̂ pa Pîêre âsə̈ ro, tchâkrʉzrö yê ro pâ angânə̈ lə̂ gbâtə̂ andjê. 16Kpûlû azü ndə̂ andjë tô kulə̂ ayɛ̈yɛ̈ gö ndrotə̂ Jerûzalêmo nə̂ la a-earə̂ tə̂kömbô ndjë la azü ndə̂ angbongbo atchozö mbo andjê; andjë gbɛ̂ tchâ-ê.
A mbö abadjângele tə̂ gêgêe nə̈
17Käko gbölö earə̂ kə̂ wa ngela sə̈ Ndjapä la azü gbɛ̂ ndə̂ andjë sə̂ ndrotə̂ yê, ndə̂ ânyîndə̂ kə̂ to rə̂ pä kpûlû azü ndə̂ asadusïɛ̈n, andjë mbô gbölö su tə̂ abadjângele ânyë kə̈ nyîndə̂ kə̂ mbo ngâ rə. 18Andjë kʉ̂ abadjângele nə̈ kə̈ yî andjê atə̂lə̂ nda kânga ndə̂ azü gbɛ̂. 19Praâbalë lə̂ bütchî nə̈, ngâ ânje ndə̂ Gbölö Gbïɛ̈ krô manda nda kânga nə̈, kə̈ wûtu la abadjângele nə̈, ânyë kə̈ tô rə̂ sə̈ andjê päkëdə̂: 20«Nyë êë atə̂lə̂ gbölö nda Ndjapä, kə̂ mu apö gbɛ̂ ndə̂ âza tchîsûwu sə̈ azü.» 21Abadjângele djê ma ânje nə̈: Pö mbatchâ, andjë ê atə̂lə̂ gbölö nda Ndjapä, kə̈ sə̂ lakə̂ nyisə̂ rə sə̈ azü.
Gbölö earə̂ kə̂ wa ngela sə̈ Ndjapä la azü gbɛ̂ ndə̂ andjë sə̂ ndrotə̂ yê, andjë ê akpôkpô azü ndə̂ ajuîfu, ânyë andjë pâlatə̂ andjê la azü ndə̂ gbölö kpûlû ndə̂ a-earə̂ kə̂ wa ngbanga gbɛ̂. La tchêngbâ nə̈, andjë wân tchô ndə̂kə̂ pa a kʉ abadjângele nə̈ bhâlə̂ nda kânga kə̂ ka la andjê ëtchâtchâ andjê. 22Praâbalë, ndə̂ aturûgu nə̈ wûtu bhâlə̂ nda kânga nə̈, andjë gbôâbo andjê-a. Aturûgu nə̈ dôtə̂ andjê pu kpûlû ndə̂ a-earə̂ kə̂ wa ngbanga nə̈, ânyë kə̈ tô tchêngbâ pö nə̈ sə̈ andjê päkëdə̂: 23«Ndə̂ ârâ ê bhâlə̂ nda kânga nə̈, ârâ wûn manda nə̈ ndə̂ a tchû rə̂ la köbo nə̈ ëtâ, ânyë aturûgu sə̂ lakə̂ bata rə̂. Praâbalë, ndə̂ ârâ krô manda nə̈, ârâ gbôâbo ngâ akrə balë-a!» 24Ndə̂ agbölö a-earə̂ kə̂ wa ngela sə̈ Ndjapä la makündji ndə̂ aturûgu ndə̂ gbölö nda Ndjapä âsə̈ dje pö nə̈, tchə̂lə̂ küma andjê gbɛ̂ djîngɨli lə̂ köbosə̂ abadjângele, ânyë andjë yûtə̂ andjê lə̂ gbâtə̂ andjê tə̂ rə ndə̂ âwûtu âtə. 25La tchêngbâ nə̈ ngâ akrə nə̂ kə̈ tô rə̂ sə̈ andjê päkëdə̂: «Aköchë ndə̂ nyë yî andjê bhâlə̂ nda kânga lâme, andjë kä bhâlə̂ gbölö nda Ndjapä lakə̂ nyisə̂ rə sə̈ azü!»
26Makündji ndə̂ aturûgu la aturûgu ndə̂ yê ê kə̈ kʉ̂ abadjângele nə̈, kə̈ kâ la andjê. Praâbalë andjë mbôâbo gbôgbô tə̂ abadjângele nə̈-a, bëte andjë mbö wa ndə̂kə̂ pa azü nə̈ nyeabô andjê nyê la täme-ê. 27Ndə̂ andjë kâ la abadjângele nə̈, andjë krʉ̂ tchâtchu azü ndə̂ gbölö kpûlû ndə̂ a-earə̂ kə̂ wa ngbanga nə̈. Gbölö earə̂ kə̂ wa ngela sə̈ Ndjapä yû andjê päkëdə̂: 28«Ârâ kösə̂ nə̈ sə̈ nyê la gbôgbô ndə̂kə̂ pa nyë ka nyîâbô sə̂ rə nyî la rə̈ köchë lâme-ê. Praâbalë kə̂ nyisə̂ rə ndə̂ nyê kä zâ tchô lə̂ Jerûzalêmo gbɛ̂! Nyë nyïndə̂ kə̂ ka la pö kuzü köchë lâme ëpâ ârâ!#5.28 Nyë dɨ̈ Mat 27.25.» 29Pîêre la adɨ̂ abadjângele tô rə̂ ndə̂nə̈ sə̈ andjê päkëdə̂: «Äwäpä ârâ djë ma Ndjapä ärö ndə̂kə̂ dje ma azü. 30Nyënyê kä ndə̂ âwôn Jezü bhâtə̂ yö ndə̂ gba, praâbalë Ndjapä ndə̂ araâta azə̂ jô tchë lə̂ kuzü. 31Ndjapä kênga tchë də ndôkö könô yê ndə̂kə̂ pa tche watə̂ Makündji la Earə̂ kə̂ tcha azü, kə̈ zâ köbo sə̈ azü ndə̂ Isarayële ndə̂kə̂ pa andjë gbotə̂ bəndɨ kə̂ mbo rə ndə̂ andjê, ânyë Ndjapä koadje pö lə̂ küma andjê. 32Ârâ tö pö ndə̂ arə ndə̂ ârâ wûnsə̂ nə̈ pâ arə ndə̂ âwûtu lâme, ârâ la Kpɨ̂ki Yingö ndə̂ Ndjapä zâ tchë sə̈ azü ndə̂ andjë mbo rə gundə̂sə̂ pö ma yê.»
33Ndə̂ a-earə̂ kə̂ wa ngbanga nə̈ âsə̈ dje apö lâme, su andjê kʉ̂ andjê tə̂ gbölösə̂nə̈, ânyë andjë nyîndə̂ kə̂ won abadjângele nə̈. 34Praâbalë ngâ köchë âlafô lə̂ gûtə̂ a-earə̂ kə̂ wa ngbanga nə̈, tche də̈ farizïɛ̈n ndə̂ rə̈ yê wû pä Gamaliyɛ̈le. Tche də̈ earə̂ kə̂ nyisə̂ ndïɛ̈ ndə̂ azü kpê wa yê tə̂ gbölösə̂nə̈. Tche âlafô kə̈ yûkû nə̈ pä a wutu la abadjângele nə̈ ësûwu ânyë. 35Pânə̈ tche tô rə̂ päkëdə̂: «Azü ndə̂ Isarayële, la nyê gbö tə̂ rə ndə̂ nyê mboadje rə̂ tə̂ azü lâme. 36Lə̂ angâ alö ndə̂ ârô, Tëdâse wûtu, kə̈ tô rə̂ päkëdə̂: Anyë də̈ ngâ gbölö akrə, azü ndola ngbangbo voanə̈ zâ tchêngbâ yê. Praâbalë pânə̈ ndə̂ a wôn tchë, azü gbɛ̂ ndə̂ andjë zâ tchêngbâ yê lâme krʉ̈ tchə̂lə̂ tə̂ andjê katchôgbɛ̂, ânyë andjë rô gbɛ̂. 37La tchêngbâ nə̈ Jüdâse, akrə gö ndə̂ Galilë wûtu, sə̂nə̈ ndə̂ a mbo sändjëmä. Tche zrô angbängbä azü, andjë zâ tchêngbâ yê. A wôn ndjë tchë-ê ânyë azü ndə̂ andjë zâ tchêngbâ yê krʉ̂ tchə̂lə̂ tə̂ andjê katchôgbɛ̂. 38Angaâtə, më tö rə̂ sə̈ nyê: Nyë mbö bata ngâ rə mbô tə̂ aköchë âtə-ê, nyë gbötə̂ andjê, andjë gû-î. Âdə rə ndə̂ aköchë âtə nyîkrə pö ndə̂kə̂ mbo rə̂, la rə ndə̂ andjë mbô rə̂ âtə, ârə̂ âto bhândə̂ akrə, ârə̂ âyu me yü bhola-ê. 39Praâbalë âdə rə ndə̂ andjë nyîkrə pö ndə̂kə̂ mbo rə̂ la rə ndə̂ andjë mbô rə̂ âtə âto bhândə̂ Ndjapä, nyë wâbo la gbôgbô ndə̂kə̂ kitə̂ köbo tâ-a! La nyë gbö-ê, nyë mböäbô kʉ̈ʉ̈ mbô la Ndjapä-ê!»
A-earə̂ kə̂ wa ngbanga nə̈ nyîndə̂ pö ndə̂ Gamaliyɛ̈le. 40Andjë ê abadjângele nə̈, kə̈ bhî andjê, ânyë kə̈ zâma la gbôgbô sə̈ andjê ndə̂kə̂ pa andjë ka êâbô rə̈ Jezü ê balë-ê. Pânə̈ andjë gbôtə̂ abadjângele nə̈-ê. 41Ndə̂ abadjângele nə̈ wûtu lə̂ nda kpûlû ndə̂ a-earə̂ kə̂ wa ngbanga nə̈, su andjê gbɛ̂ wâ la mômô, bëte Ndjapä wün andjê tə̂ adjîrə̂ azü bëte rə̂ ndə̂ andjë wûn yûkü bëte rə̈ Jezü. 42Logbɛ̂, andjë sə̈ lakə̂ nyisə̂ Tchôtchô Pö lə̂ gbölö nda Ndjapä ndjë ku tchâalê ndə̂ azü pä Jezü də̈ Krîsiti.
Currently Selected:
Abadjângele 5: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
