Abadjângele 4
4
Pîêre la Jâan tchâtchu gbölö kpûlû ndə̂ a-earə̂ kə̂ wa ngbanga
1Sə̂nə̈ ndə̂ Pîêre la Jâan sə̂ lakə̂ to pö sə̈ azü nə̈, a-earə̂ kə̂ wa ngela sə̈ Ndjapä la makündji ndə̂ aturûgu ndə̂ gbölö nda Ndjapä la asadusïɛ̈n wûtu. 2Su andjê kʉ̂ andjê tə̂ gbölösə̂nə̈, bëte Pîêre la Jâan sə̈ lakə̂ nyisə̂ rə sə̈ azü lakə̂ mu pö pä, Jezü jô lə̂ kuzü nə̂. Käko azü joadje ndjë lə̂ kuzü. 3Azü nə̈ kʉ̂ andjê, kə̈ yî andjê bhâlə̂ nda kânga, kə̈ krʉ̂ bëte tchêmbatchâ bëte lo zɨ̂ nə̂. 4Lə̂ gûtə̂ azü ndə̂ andjë djê pö nə̈, angbängbä azü zâ su andjê sə̈ Krîsiti. Kə̂ ngba ndə̂ andjê wä ndola sâke mïndûu (5 000).
5Ndə̂ tchô krâ, amakündji ndə̂ ajuîfu la akpôkpô azü la a-earə̂ kə̂ nyisə̂ ndïɛ̈ pâlatə̂ andjê bhâ Jerûzalêmo. 6Hâne, gbölö earə̂ kə̂ wa ngela sə̈ Ndjapä kä tâ, tchetchë la Käyîfu la Jâan la Alegezândere la azü gbɛ̂ ndə̂ andjë sə̂ lə̂ bûngrɨ̂ ndə̂ gbölö earə̂ kə̂ wa ngela sə̈ Ndjapä nə̈. 7Andjë zâ Pîêre la Jâan tchâtchu andjê ânyë kə̈ yû andjê päkëdə̂: «Nyë mbö arə lâme la rə̈ tchabâ? La gbôgbô ndə̂ tchabâ?» 8Käko Kpɨ̂ki Yingö sɨ̂ Pîêre ânyë tche tô rə̂ sə̈ andjê päkëdə̂: «Nyënyê ndə̂ amakündji ndə̂ ajuîfu la akpôkpô azü, 9a sə̈ lakə̂ yu ârâ angêta tə̂ pö ndə̂ tchôtchô rə ndə̂ ârâ mbô rə̂ tə̂ köchë ndə̂ tche ngêwele lâme, a yü ârâ tə̂ köbo ndə̂ tche tchâ la rə̂. 10Nyënyê ndə̂ azü ndə̂ Isarayële gbɛ̂, äwäpä nyë wunsə̂ ngâ rə balë: La rə̈ Jezü Krîsiti akrə gö ndə̂ Näzärête kä ndə̂ köchë âtə krʉ̂ lə̂ gûtə̂ nyê la tchôtchô tə̂ yê. Jezü Krîsiti ndə̂ nyë bhî tchë alême tə̂ yö ndə̂ gba, praâbalë Ndjapä jô tchë lə̂ kuzü. 11Jezü lâme kä ndə̂ Mbëtï Ndjapä tô pö ndə̂ yê päkëdə̂:
‹Täme ndə̂ a-earə̂ kə̂ mbo nda gbôtâ,
ârə̂ kä âkə̈ mbôtə̂ yê tə̂ gbôgbô täme da nda nə̈#4.11 Nye dɨ̈ Aps 118.22..›
12«Akrə wâbo ndə̂kə̂ tcha lə̂ kuzü lə̂ köbosə̂ ngâ rə̈ ngbî-a, bëte pâ cho gbɛ̂ ngâ rə̈ ngbî ndə̂ Ndjapä zâ rə̂ sə̈ azü ndə̂kə̂ pa andjë tcha lə̂ köbosə̂ nə̈ wâbo balë-a.»
13Ndə̂ a-earə̂ kə̂ wa ngbanga nə̈ wûn rə̂ pä Pîêre la Jâan tö pö la gbôgbô, ânyë kə̈ wûn ndjë sə̂nə̈ pä, andjë də̈ ambämbä azü ndə̂ andjë wûn-âbo sə̂ mbëtï-a, tchə̂lə̂ küma andjê gbɛ̂ djîngɨli. Andjë wûnsə̂ nə̈ pä, aköchë âtə sə̈ alêe ndrotə̂ Jezü. 14Ndə̂ andjë wûn köchë ndə̂ tche tchâ lâme, ânyë tche krʉ̂ ndrotə̂ Pîêre la Jâan, andjë wâbo la ngâ pö balë ndə̂kə̂ to rə̂-a. 15Käko andjë zâma ndə̂kə̂ pa a wutu la andjê lə̂ gbölö kpûlû ndə̂ a-earə̂ kə̂ wa ngbanga nə̈ âtə sûwu. Pânə̈ andjë sə̂ lakə̂ gama andjê lə̂ gbâtə̂ andjê. 16Andjë tö rə̂ päkëdə̂: «Azə̈ âmbo giamâ tə̂ azü âtə? Bëte azü ndə̂ Jerûzalêmo gbɛ̂ wûnsə̂ nə̈ nə̂ pä, tə̂ lëge nə̈ andjë mbö ngâ kpɨ̈ngbɨ̈ rə. Azə̈ wâbo ndə̂kə̂ vusə̂ nə̈-a. 17Praâbalë ndə̂ azü gö gbɛ̂ djêâbô pö nə̈ djê lâme, äwäpä azə̈ hrali aköchë âtə, ânyë andjë ka to bata ngâ pö tô balë la rə̈ Jezü sə̈ ngâ akrə-ê.»
18Andjë ê Pîêre la Jâan kə̈ kôsə̂ nə̈ sə̈ andjê la gbôgbô ndə̂kə̂ pa andjë kä êâbô rə̈ Jezü ê, âdəndjë ndə̂kə̂ kä nyisə̂ rə la rə̈ yê-ê. 19Praâbalë Pîêre la Jâan tô rə̂ ndə̂nə̈ sə̈ andjê päkëdə̂: «Ndə̂kə̂ dje ma Ndjapä lakə̂ dje ma nyê, anə̈bâ kä âkə̈ wâ djîrə̂ lə̂ la Ndjapä? Nyënyê la tə̂ nyê, nyë wä tchə̂lə̂ ngbanga nə̈! 20Andə̂ ârâ, rə ndə̂ ârâ wûn rə̂ ânyë kə̈ djê rə̂ âtə, ârâ wâbo ndə̂kə̂ ngbo ma ârâ pânə̈-a.» 21A-earə̂ kə̂ wa ngbanga nə̈ kä hrâli andjê tə̂ gbölösə̂nə̈, pânə̈, andjë jî andjê. Andjë gbôâbo ngâ pö ndə̂ âmbô rə̂ pä andjë wa ngbanga lə̂ küma andjê tə̂ pö ndə̂nə̈-a, bëte azü gbɛ̂ sə̈ lakə̂ voga Ndjapä bëte rə ndə̂ âwûtu lâme. 22Köchë ndə̂ tche tchâ lə̂ köbosə̂ kpɨ̈ngbɨ̈ rə lâme, ngû yê rö ngû tə̂ azü bïchuû.
Azü ndə̂ Jezü tö pö sə̈ Ndjapä
23La tchêngbâ nə̈ ndə̂ a jî andjê, Pîêre la Jâan kâ pu angâ andjê ânyë kə̈ tô ndə̂ma pö ndə̂ agbölö a-earə̂ kə̂ wa ngela sə̈ Ndjapä la akpôkpô azü tô rə̂ sə̈ andjê. 24Ndə̂ angâ andjê djê pö nə̈, andjë pâlatə̂ andjê batə̂ akrə balë, kə̈ tô pö sə̈ Ndjapä päkëdə̂: «Gbölö Akrə, momö kä ndə̂ âmbô tchêlafô la tchêbêche la gbölö ngû ngbro la arə gbɛ̂ ndə̂ âwâ lə̂nə̈!#4.24 Nyë dɨ̈ Eki 20.11; Aps 146.6. 25Lə̂ köbosə̂ Kpɨ̂ki Yingö, mo zä pö ndə̂ zə̈ lə̂ ma âta ârâ. Davîdi, earə̂ kua ndə̂ zə̈, tche tö rə̂ päkëdə̂:#4.25 Ndə̂kə̂ to tə̂ yɛ̈yɛ̈ da 25 ëtə̂ 26, nyë dɨ̈ Aps 2.1-2, ndə̂ âwâ lə̂ bəndɨ Mbëtï Ndjapä la ma gerêke.
‹Bëte giamâ azü pâ cho gbɛ̂ sə̂ lakə̂ mbo arə kâkë?
Bëte giamâ azü gö nyîkrə apö ndə̂ angâ arə,
ânyë tchêngbâ nə̈ wâ ämbämbänə̈ âtə?
26Agbïɛ̈ pâ cho älafô ndə̂kə̂ mbo kʉ̈ʉ̈,
amakündji ndə̂ agö djëtə̂ andjê ndə̂kə̂ kosə̂ Gbölö Gbïɛ̈ la Krîsiti ndə̂ yê.›
27«Tə̂ lëge nə̈, Hërôde la Pônse Pïlâte, andjê la azü pâ cho la azü ndə̂ Isarayële pälatə̂ andjê lə̂ gbölö gö âtə. Andjë nyïkrə pö tə̂ Jezü, earə̂ kua ndə̂ zə̈ ndə̂ tche wâ ngbî bëte mö, tchanə̈ ndə̂ mo dɨ̂ tchë ndə̂kə̂ watə̂ Mesï#4.27 Nyë dɨ̈ Eza 61.1; Mat 27.1-2; Luk 23.7-11.. 28Käko andjë mbö arə gbɛ̂ ndə̂ mo nyîkrə rə̂ dokʉ̈tchê tə̂ su zə̈, rə ndə̂ mo nyîndə̂ nə̈ lə̂ köbosə̂ gbôgbô ndə̂ zə̈. 29Angaâtə, Gbölö Gbïɛ̈, amö dje pö ndə̂ andjë to rə̂ lakə̂ hrali ârâ âtə. Amö za gbôgbô sə̈ ârâ ndə̂kə̂ pa ârâ muabô pö ndə̂ zə̈ mû la wa-ê. 30To könô zə̈ pâ ârâ ndə̂kə̂ pa ârâ tcha a-earə̂ tə̂kömbo, kə̂ mbo akpɨ̈ngbɨ̈ rə la arə ndə̂ âropâ küma azü la rə̈ Jezü, earə̂ kua ndə̂ zə̈ ndə̂ tche wâ ngbî bëte mö.» 31Pânə̈ ndə̂ andjë tô pö sə̈ Ndjapä, sə̂nə̈ ndə̂ andjë pâlatə̂ andjê tâ trô-ê. Kpɨ̂ki Yingö sɨ̂ andjê ânyë andjë mû pö Ndjapä la gbôgbô.
Azü ndə̂ Jezü krʉ̈ tchə̂lə̂ rə ndə̂ andjê lə̂ gbâtə̂ andjê
32Akpûlû azü ndə̂ andjë zâ su andjê sə̈ Krîsiti wä batə̂ akrə balë, kə̈ wâ la su balë. Akrə balë balë tôâbo rə̂ päkëdə̂: «Rə ndə̂ mê wä kütû tə̂ andə̂ me nə̈-a!» Praâbalë rə gbɛ̂ ndə̂ andjë wâ la rə̂, andjë päla rə̂ balë ëtâ#4.32 Nye dɨ̈ 2.44-45.. 33Abadjângele mü pö ndə̂kə̂ jo ndə̂ Gbölö Gbïɛ̈ Jezü lə̂ kuzü la gbôgbô tə̂ gbölösə̂nə̈, ânyë Ndjapä mbô tchôtchô su tə̂ andjê gbɛ̂ tə̂ gbölösə̂nə̈. 34Ngâ earə̂ yûkü balë wâbo lə̂ gûtə̂ andjê-a, bëte azü ndə̂ andjë wâ la akɨ̈ndɨ̈ âdəndjë anda, andjë kä rə̂ kə̂ ka la makətche nə̈, 35kə̂ gbotâ tchâtchâ abadjângele. Pânə̈ abadjângele krʉ tchə̂lə̂ nə̈, akrə balë balë gbö rə gundə̂sə̂ rə ndə̂ tche nyîndə̂ nə̈. 36Ngâ köchë kä tâ ndə̂ rə̈ yê wû pä Jozêfu, abadjângele ë rə̂ tə̂ yê pä Bärnäbâse ndə̂ ânyîndə̂ kə̂ to rə̂ pä: «Earə̂ kə̂ za gbôgbô tə̂ su.» Tche də̈ ngâ akrə pâ mawo ndə̂ Levï, a zɨ̈ tchë bhâ Chîpre. 37Tche kä ngâ kɨ̈ndɨ̈ ndə̂ yê, kə̈ kâ la makətche nə̈ kə̈ gbôtâ ëtchâtchâ abadjângele.
Currently Selected:
Abadjângele 4: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
