Abadjângele 3
3
Pîêre tchä ngâ köchë ndə̂ tche ngêwele
1Tə̂ngâlo, Pîêre la Jâan sə̂ lakə̂ e atə̂lə̂ gbölö nda Ndjapä ndə̂kə̂ to pö sə̈ Ndjapä lə̂ dalo vötaâ ndə̂ tchêndə̂gölo. 2Ngâ köchë kä tâ ndə̂ a zɨ̂ tchë, dëkë tche ngêwele nə̂. A nə̈ tchê la tchë logbɛ̂ kə̂ za tchë lə̂ manda gbölö nda Ndjapä ndə̂ rə̈ nə̈ wû pä «Tchôtchô manda», ndə̂kə̂ pa tche yukû rə tchânə̂ azü ndə̂ andjë li atə̂lə̂ gbölö nda Ndjapä nə̈. 3Ndə̂ tche âsə̈ wun Pîêre la Jâan ndə̂ andjë li atə̂lə̂ gbölö nda Ndjapä, tche yû andjê ndə̂kə̂ pa andjë za ngâ rə sə̈ tchë. 4Andjë chêko tchë ânyë Pîêre tô rə̂ sə̈ tchë päkëdə̂: «Wun ârâ ânyë!» 5Käko tche wûn andjê gbôgbôgbô, bëte tche wüntî pä andjê zadje ngâ rə sə̈ anyê. 6Pîêre tö rə̂ sə̈ tchë päkëdə̂: «Më wâbo la makətche âdəndjë lôlo-a, praâbalë rə ndə̂ më wâ la rə̂, më âza rə̂ sə̈ mö: La rə̈ Jezü Krîsiti ndə̂ Näzärête, alafô kə̈ nə̂!» 7La tchêngbâ nə̈ Pîêre zâ könô yê də ndôkö kə̈ kênga tchë. Kpro kâkë, ada yê la abülüngbɨ̈-da yê kpokpo tə̂ yê. 8Tche kû atə̂ lafô, kə̈ krʉ̂ pâ da yê ânyë kə̈ jêtə̂ kə̂ nə. Tche lî la andjê atə̂lə̂ gbölö nda Ndjapä. Tche nə̂, kə̈ kû atə̂ lafô lakə̂ voga Ndjapä. 9Azü gbɛ̂ wûn tchë ndə̂ tche sə lakə̂ nə lakə̂ voga Ndjapä. 10Ndə̂ azü wûnsə̂ nə̈ pä köchë âtə sə̈ tchê alême ëbêche ndroma Tchôtchô Manda ndə̂ gbölö nda Ndjapä lakə̂ yukû rə tchânə̂ azü, tchə̂lə̂ küma andjê gbɛ̂ djîngɨli, su andjê sə̂ lakə̂ ta tə̂ rə ndə̂ âmbô tə̂ yê lâme.
Pîêre mü pö lə̂ gbölö nda Ndjapä
11Köchë nə̈ nyîâbo ndə̂kə̂ gbotə̂ Pîêre la Jâan-a. Tchə̂lə̂ küma azü nə̈ gbɛ̂ djîngɨli, ânyë andjë gbɛ̂ sə̂ lakə̂ kpe pu andjê tchâmbrönda ndə̂ a ê rə̂ tâ pä tchâmbrönda ndə̂ Salomön. 12Ndə̂ Pîêre wûn rə̂ käko, tche tô rə̂ sə̈ kpûlû azü nə̈ päkëdə̂: «Azü ndə̂ Isarayële, bëte giamâ kä ndə̂ tchə̂lə̂ küma nyê djîngɨli pâ rə ndə̂ âmbô âtə? Nyë sə̈ lakə̂ wun ârâ gbôgbôgbô käko bëte giamâ? Nyë wûntî pä köchë ndə̂ tche nə̂ lâme, ârâ kä ndə̂ âmbô rə̂ la gbôgbô ndə̂ ârâ pä tche nə? Âdəndjë rə̂ ndə̂ ârâ zâtə̂ ârâ gbɛ̂ sə̈ Ndjapä kä? 13Ndjapä ndə̂ Abrahâmo, Ndjapä ndə̂ Izâke, Ndjapä ndə̂ Jakôbo, Ndjapä ndə̂ araâta azə̂, tche lüsə̂ Jezü earə̂ kua ndə̂ yê. Praâbalë nyë zâ tchë tchânə̂ agbölö azü gö ndə̂ nyê, andjë kôsə̂ yê tchâtchu Pïlâte. Dëkë, Pïlâte nə̈ nyïndə̂ kə̂ ji tchë. 14Nyë kösə̂ akrə ndə̂ tche wâ ngbî bëte Ndjapä, kə̈ wätə̂ djîrə̂ akrə, ânyë kə̈ yûkû nə̈ sə̈ Pïlâte ndə̂kə̂ pa tche ji ngâ earə̂ kə̂ won azü. 15Nyë wön makündji ndə̂ tche za tchîsûwu sə̈ akrə, praâbalë Ndjapä jô tchë lə̂ kuzü, azə̈ wûn rə̂ la la azə̂ nə̂ gbɛ̂. 16Lə̂ köbosə̂ kə̂ za su sə̈ Ndjapä la rə̈ Jezü kä ndə̂ âtchâ köchë ndə̂ nyê sə lakə̂ wun tchë ânyë kə̈ wûnsə̂ yê âtə. Bëte kə̂ zâ su sə̈ Ndjapä ndə̂ âtô bhândə̂ Jezü kä ndə̂ tə̂ köchë lâme kâ dâka gbɛ̂ kpô tchâtchu nyê la azə̂ gbɛ̂ âtə.
17«Arə̂mä, ndə̂ azə̈ sə̂ âtə, më wûnsə̂ nə̈ nə̂ pä rə ndə̂ nyënyê la amakündji ndə̂ nyê mbô rə̂ tə̂ Jezü, nyë wûn-âbo sə̂nə̈-a. 18Praâbalë Ndjapä mbö rə gundə̂sə̂ nə̈ ndə̂ tche tô rə̂ lə̂ ma a-earə̂ ndə̂ma yê alême. Tche tö rə̂ päkëdə̂: Krîsiti wun-adje yûkü#3.18 Nyë dɨ̈ Luk 24.26-27.. 19Käko nyë gbötə̂ bəndɨ kə̂ mbo rə ndə̂ nyê, kə̂ ka pu Ndjapä, ânyë tche ko pö lə̂ küma nyê. 20Käko ânyë Gbölö Gbïɛ̈ zadje angâ alö ndə̂kə̂ yatə̂ sə̈ nyê. Tchê wan-adje Krîsiti ndə̂ tche dɨ̂ tchë dokʉ̈tchê bëte nyê, ndə̂ tche də̂ Jezü. 21Krîsiti səadje bhâ lafô zoo âwutu tə̂ lo nə̈ ndə̂ Ndjapä ka nyikrə arə gbɛ̂ tə̂ täfo nə̈. Batə̂ rə̂ ndə̂ Ndjapä tô rə̂ alême lə̂ ma a-earə̂ ndə̂ma yê ndə̂ tche kʉ̂ andjê ngbî bëte tchë. 22Möyîze tö rə̂ alême päkëdə̂: ‹Gbölö Gbïɛ̈ Ndjapä wan-adje ngâ earə̂ ndə̂ma yê sə̈ nyê batə̂ mê, tchê wadje tə̂ ngâ yîngâ nyê. Nyê djeadje apö gbɛ̂ ndə̂ tchê toadje rə̂ sə̈ nyê. 23Akrə ndə̂ tche kôsə̂ kə̂ dje pö ma earə̂ ndə̂ma Ndjapä lâme, a âjiadje tchë lə̂ gûtə̂ azü ndə̂ Ndjapä ânyë kə̂ won-adje tchë#3.23 Nyë dɨ̈ Det 18.15,18-19..› 24Ätö tə̂ Samuɛ̈le ndjoa ëtə̂ a-earə̂ ndə̂ma Ndjapä la tchêngbâ yê, andjë gbɛ̂ tö pö ëngbâ ngânə̈ ëngbâ ngânə̈ tə̂ pö ndə̂ alö ndə̂ âwûtu lâme. 25Apö ndə̂ a-earə̂ ndə̂ma Ndjapä tô rə̂ alême wä bëte nyê. Nyë lï lə̂ madɨ̈ ndə̂ Ndjapä zâ rə̂ sə̈ araâta nyê lâme lə̂ köbosə̂ nə̈ ndə̂ tche tô rə̂ sə̈ Abrahâmo päkëdə̂: ‹Lə̂ köbosə̂ ngâ akrə pâ mawo ndə̂ zə̈, mê eadje Tchôtchô pö pâ azü lə̂ abûngrɨ̂ pâ cho gbɛ̂#3.25 Nyë dɨ̈ Jen 22.18; 26.4..› 26Tə̂ pö ndə̂ nyê kä ndə̂ Ndjapä nyîsə̂ earə̂ kua ndə̂ yê dokʉ̈tchê ânyë kə̈ wân tchë ndə̂kə̂ e tchôtchô pö pâ nyê, ndə̂kə̂ mbo rə̂ pä akrə balë balë gbotə̂ bəndɨ kə̂ mbo rə ndə̂ yê.»
Currently Selected:
Abadjângele 3: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
