Abadjângele 2
2
Kə̂ nə ndə̂ Kpɨ̂ki Yingö
1Ndə̂ lö Päntëkôte wûtu, azü ndə̂ Jezü pâlatə̂ andjê gbɛ̂ sə̂ tchô balë. 2Kpro kâkë, ngâ sɨ̈kɨ̈ ngâ rə kɨ̂ batə̂ gbölö yi ndə̂ âtô bhâ lafô ânyë kə̈ sə̂ lakə̂ mbo, yi nə̈ zâ tchâalê nə̈ gbɛ̂ ndə̂ andjë sə̂ tâ. 3Käko andjë wûn angâ arə batə̂ atïmï wo. Atïmï wo nə̈ krʉ̂ tchə̂lə̂ tə̂ yê kə̈ sə̂ ëpâ küma azü nə̈ balë balë gbɛ̂. 4Kpɨ̂ki Yingö sɨ̂ andjê gbɛ̂, ânyë andjë jêtə̂ kə̂ to pö la angâ ama gö ngbî ngbî batə̂ rə̂ ndə̂ Yingö nə̈ zâ rə̂ sə̈ andjê ndə̂kə̂ to rə̂.
5Dëkë angâ ajuîfu ndə̂ andjë zâtə̂ andjê gbɛ̂ sə̈ Ndjapä kä bhâ Jerûzalêmo. Andjë tö lə̂ agö pâ cho gbɛ̂ ânyë kə̈ nə̂. 6Kpûlû azü nə̈ âsə̈ dje tchə̂lə̂ gɨ̈ azü nə̈, andjë nə̂ kə̈ pâlatə̂ andjê. Tchə̂lə̂ küma andjê gbɛ̂ djîngɨli, bëte akrə balë balë djë azü ndə̂ Jezü ndə̂ andjë to pö la ma gö ndə̂ yê la tə̂ yê. 7Tchə̂lə̂ küma andjê gbɛ̂ djîngɨli, su andjê wâ ngbɨ̂ɨ̂, ânyë andjë tô rə̂ päkëdə̂: «Azü gbɛ̂ ndə̂ andjë to pö âtə də̂âbo azü gö ndə̂ Galilë? 8Ämbö atöko ânyë akrə balë balë lə̂ gûtə̂ azə̂ djê ma gö ndə̂ yê lə̂ ma andjê? 9Lə̂ gbâtə̂ azə̂, angânə̈ tö lə̂ agö ndə̂ Pärëtêse la Medï la Ëlâme ânyë kə̈ nə̂. Angânə̈ də̈ azü gö ndə̂ Mezopotamï la Judë la Käpädôse la Pôn-on la Azï 10la Firijï la Panfilï la Ejîpiti la agö ndə̂ Libï ndola Sïrêne; angânə̈ tö bhâ Rômo ânyë kə̈ mbô gö tchâtə. 11Angânə̈ tö bhâ Kërête ndjë la Arabï, ajuîfu kä tâ la azü ndə̂ andjë wâbô wâtə̂ ajuîfu ânyë kə̂ bata ndïɛ̈ ndə̂ Möyîze. Azə̂ gbɛ̂ djë andjê lə̂ ma gö ndə̂ azə̂ la tə̂ azə̂, ndə̂ andjë sə̂ lakə̂ to pö ndə̂ agbölö arə ndə̂ Ndjapä mbô rə̂!» 12Ndə̂ tchə̂lə̂ küma andjê gbɛ̂ djîngɨli ânyë andjë wûn-âbô sə̂ pö ndə̂ andjë to rə̂ tô-ê, andjë sə̂ lakə̂ yutə̂ andjê lə̂ gbâtə̂ andjê päkëdə̂: «Arə âtə nyïndə̂ kə̂ to rə̂ atöko?» 13Praâbalë angânə̈ sə̂ lakə̂ mo azü ndə̂ Jezü nə̈ päkëdə̂: «Pî rôpâ azü âtə nə̂!»
Pîêre mü pö sə̈ kpûlû azü
14Pîêre âlafô kə̈ krʉ̂, tchetchë la angâ yê abadjângele lə̂ könô gbɛ̂ tchêpâ nə̈ balë, ânyë tche sə̂ lakə̂ to pö ngbôô päkëdə̂: «Nyënyê azü gö ndə̂ Judë la azü gbɛ̂ ndə̂ andjë mbô gö bhâ Jerûzalêmo, äwäpä nyë dje tchə̂lə̂ rə ndə̂ âmbô âtə djîrə̂, nyë dëka tü nyê kə̈ djê pö ndə̂ mê. 15Ɛ̂n-ɛ̈n, pî mbôâbo azü âtə-a, batə̂ rə̂ ndə̂ nyë tô rə̂ bhâlə̂ su nyê lâme-a. Ndə̂ gbô azə̂ sə̂ po la mbatchâ ânyë dalo wâ mïndûu manə̈ voanə̈ âtə? 16Praâbalë pö ndə̂ earə̂ ndə̂ma Ndjapä Jöwɛ̂le tô rə̂ alême mbô gundə̂sə̂ nə̈ nə̂, tche tö rə̂ päkëdə̂:
17‹Ndjapä tö rə̂ päkëdə̂:
Lə̂ adɨ̂ alö,
mê gboadje tə̂ köbo sə̈ Yingö ndə̂ mê ndə̂kə̂ jre pâ azü gbɛ̂,
amodô la aɛ̈wünrə ndə̂ nyê toadje ndə̂ma mê,
amodô ndə̂ nyê wun-adje angâ arə batə̂ lü,
azü ndə̂ andjë dû wun-adje küma andjê.
18Tə̂ lëge nə̈, lə̂ alö nə̈ lâme,
mê gboadje tə̂ köbo ndə̂kə̂ pa
Yingö ndə̂ mê jre pâ a-earə̂ kua ndə̂ mê tə̂ aköchë la aɛ̈chë,
ânyë andjê toadje ndə̂ma pö ndə̂ mê.
19Mê mboadje arə ndə̂ âropâ küma azü bhâ lafô,
ânyë kə̂ mboadje akpɨ̈ngbɨ̈ rə pâ cho:
A wun-adje jï la wo la gbölö ngʉ̂wo.
20Lo âdoadje tə̂ yê tə̂ tchə̂lə̂ bütchî,
nyîpï âdroadje gboo batə̂ jï.
La tchêngbâ nə̈, lo Gbölö Gbïɛ̈ wutu,
lö lâme wadje tə̂ gbölö lö la lö ndə̂ âlû.
21Käko azü gbɛ̂ ndə̂ andjê eadje rə̈ Gbölö Gbïɛ̈,
andjê tchadje lə̂ kuzü#2.21 Ndə̂kə̂ to tə̂ yɛ̈yɛ̈ da 17 ëtə̂ 21, nyë dɨ̈ Jow 3.1-5..›
22«Azü ndə̂ Isarayële, nyë djë pö ndə̂ mê âtə! Jezü akrə gö ndə̂ Näzärête ndə̂ Ndjapä nyîsə̂ yê sə̈ nyê lâme, lə̂ köbosə̂ yê tche mbö akpɨ̈ngbɨ̈ rə la arə ndə̂ âropâ küma azü la asɨ̂nyî arə lə̂ gbâtə̂ nyê. Nyë wûnsə̂ arə nə̈ lâme nə̂ gbɛ̂. 23Köchë lâme, a gbötə̂ yê tchânə̂ nyê lə̂ köbosə̂ nə̈ ndə̂ Ndjapä nyîkrə rə̂ dokʉ̈tchê tə̂ su yê#2.23 Nyë dɨ̈ Mat 27.35; Mar 15.24; Luk 23.33; Jan 19.18.. Nyë zâ tchë sə̈ azü ndə̂ andjë wûn-âbô sə̂ Ndjapä wûn, andjë î tchë bhâtə̂ yö ndə̂ gba ânyë kə̈ wôn tchë. 24Praâbalë Ndjapä jô tchë lə̂ kuzü lakə̂ ji tchë lə̂ nyonyo ndə̂ kuzü, bëte kuzü wâbo la gbôgbô ndə̂kə̂ kitə̂ yê-a. 25Tə̂ lëge nə̈, Davîdi tö pö ndə̂ yê päkëdə̂:
‹Më wün Gbölö Gbïɛ̈ tchâtchu mê logbɛ̂, də ndôkö könô mê,
ngâ rə ndə̂kə̂ ngbangi mê wâbo-a. 26Bëte rə̂ kä ndə̂ su mê wâ la mômô,
ânyë më pâ düwü la mômô.
Âdə krʉkrʉ mê âwa bhâlə̂ cho akuzü,
su mê wadje pâ zə̈.
27Bëte mô gboabô tə̂ mê bhâsə̂ tchô ndə̂ akuzü tee-a,
mô gboabô tə̂ akrə ndə̂ zə̈ ndə̂ tche dâka gbɛ̂,
ndə̂kə̂ pa tche fo lə̂ cho akuzü tee-a.
28Mo nyïsə̂ aköbo ndə̂ tchîsûwu sə̈ mê,
mô zadje mômô sə̈ mê lə̂ la zə̈#2.28 Ndə̂kə̂ to tə̂ yɛ̈yɛ̈ da 25 ëtə̂ 28, nyë dɨ̈ Aps 16.8-11, ndə̂ âwâ lə̂ bəndɨ Mbëtï Ndjapä la ma gerêke..›
29«Arə̂mä, më nyïndə̂ kə̂ to pö djîrə̂ sə̈ nyê päkëdə̂: Davîdi ndə̂ tche də̂ âta azə̂, tche tchü ânyë a chî tchë, praâbalë gbô cho yê kä lə̂ gbâtə̂ azə̂ angêta. 30Tche wä alême tə̂ earə̂ ndə̂ma Ndjapä, kə̈ wûnsə̂ nə̈ pä Ndjapä dëba sə̈ tchë ndə̂kə̂ za ngâ akrə pâ mawo ndə̂ yê ânyë tche sə pâ mbätä-gbïɛ̈ la tchêngbâ yê#2.30 Nyë dɨ̈ Aps 132.11; 2 Sam 7.12-13.. 31Davîdi wünsə̂ nə̈ dokʉ̈tchê pä Krîsiti joadje lə̂ kuzü, ârə̂ kä ndə̂ tche tô rə̂ päkëdə̂:
‹Ndjapä gboabô tə̂ anyë bhâsə̂ tchô ndə̂ akuzü tee-a,
tchê gboabô tə̂ anyê, ânyë tə̂ anyê fo lə̂ cho akuzü tee-a.›
32«Jezü lâme, Ndjapä jö tchë lə̂ kuzü, azə̂ gbɛ̂ wûn rə̂ la la azə̂ nə̂. 33A kênga la tchë bhâ lafô kə̈ zâ tchë də ndôkö könô Ndjapä, tche gbô Kpɨ̂ki Yingö tchânə̂ Bha nə̈ ndə̂ tche zâ bâlâ tə̂ pö ndə̂ yê alême, ânyë kə̈ wân tchë ndə̂kə̂ jre pâ azə̂. Ârə̂ kä ndə̂ nyë wûn rə̂ ânyë kə̂ dje rə̂ âtə. 34Davîdi ndə̂ tche âbô â lo balë bhâ lafô tö rə̂ päkëdə̂:
‹Gbölö Gbïɛ̈ Ndjapä tö rə̂ sə̈ Gbölö Gbïɛ̈ ndə̂ mê päkëdə̂:
Amö sə də ndôkö könô mê,
35zoo mê mbo rə̂ pä a-earə̂ kə̂ kosə̂ zə̈
wa batə̂ mbätä ëtchâtchâ da zə̈#2.35 Nyë dɨ̈ Aps 110.1..›
36«Äwäpä azü ndə̂ Isarayële gbɛ̂ wunsə̂ pö âtə djîrə̂: Jezü ndə̂ nyë wôn tchë bhâtə̂ yö ndə̂ gba lâme, Ndjapä mbö rə̂ pä tche watə̂ Gbölö Gbïɛ̈ la Krîsiti!»
37Ndə̂ azü nə̈ âsə̈ dje pö lâme käko, âzâ su andjê tə̂ gbölösə̂nə̈, ânyë andjë yû Pîêre la angâ abadjângele päkëdə̂: «Arə̂mä, azə̈ âmbo atöko?» 38Pîêre tô rə̂ ndə̂nə̈ sə̈ andjê päkëdə̂: «Nyë gbötə̂ bəndɨ kə̂ mbo rə ndə̂ nyê, äwäpä akrə balë balë lə̂ gûtə̂ nyê gbo batɛ̂me la rə̈ Jezü Krîsiti, ânyë Ndjapä ko pö lə̂ küma yê, käko nyê gboadje arə ndə̂ Kpɨ̂ki Yingö. 39Bëte Ndjapä zä bâlâ tə̂ nyê la abechë ndə̂ nyê. Tche zä ndjë bâlâ bëte angbängbä azü gbɛ̂ ndə̂ andjë sə̂ lə̂ ngrɨ̈ngrɨ̈ tchô, ndə̂ Ndjapä Gbölö Gbïɛ̈ ndə̂ azə̂ eadje andjê.»
40Pîêre kä tô angâ angbängbä apö sə̈ andjê. Tche mbö rə̂ gbɛ̂ ndə̂kə̂ pa andjë gamba pö nə̈ lakə̂ to apö ndə̂kə̂ za gbôgbô tə̂ su andjê. Tche tö rə̂ päkëdə̂: «Azü ndə̂ tchô angêta wätə̂ angbongbo azü; äwäpä nyë wutu lə̂ gbâtə̂ andjê ânyë kə̂ tcha lə̂ kuzü!» 41Azü ndə̂ andjë gâmba pö ndə̂ Pîêre, andjë gbô batɛ̂me. Tə̂ lö nə̈ lâme, azü ndola sâke vötaâ lî lə̂ gbâtə̂ azü ndə̂ Krîsiti.
Kə̂ sə ndə̂ adokʉ̈ azü ndə̂ Krîsiti
42Andjë zätə̂ andjê gbɛ̂ ndə̂kə̂ dje abadjângele lakə̂ nyisə̂ rə ndə̂ andjê logbɛ̂. Andjë mända rə, kə̂ sə balë, kə̂ zɨ rə balë#2.42 Nyë dɨ̈ 20.7., kə̂ to pö sə̈ Ndjapä. 43Abadjângele mbö akpɨ̈ngbɨ̈ rə la arə ndə̂ âropâ küma azü la asɨ̂nyî arə, âmbô rə̂ pä wawa sə̂ lakə̂ mbo azü gbɛ̂. 44Azü gbɛ̂ ndə̂ andjë zâ su andjê sə̈ Krîsiti pâlatə̂ andjê balë, kə̈ ngbô arə gbɛ̂ ndə̂ andjë wâ la rə̂ balë ëtâ. 45Andjë kä arə ndə̂ andjê, la acho ndə̂ andjê, kə̂ krʉ tchə̂lə̂ makətche nə̈ lə̂ gbâtə̂ andjê gbɛ̂, ânyë akrə balë balë gbö rə gundə̂sə̂ rə ndə̂ tche nyîndə̂ nə̈. 46Logbɛ̂, andjë pälatə̂ andjê batə̂ akrə balë bhâlə̂ gbölö nda Ndjapä, andjë zɨ̈ rə sə̂nə̈ balë kulə̂ anda ndə̂ andjê, andjë zɨ̈ rə nə̈ la mômô ndjë la tchôtchô su. 47Andjë sə̈ lakə̂ voga Ndjapä, ânyë azü gbɛ̂ nyîndə̂ andjê. Logbɛ̂ Gbölö Gbïɛ̈ mbö rə̂ ânyë angâ azü ndə̂ andjë tchâ lə̂ kuzü lî lə̂ gbâtə̂ andjê.
Currently Selected:
Abadjângele 2: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
