Abadjângele 1
1
Jezü zä bâlâ ndə̂kə̂ wan Kpɨ̂ki Yingö
1Gbölö akrə Tëöfîle, lə̂ dokʉ̈ mbëtï ndə̂ më mbô rə̂ sə̈ mö, më tö pö ndə̂ arə gbɛ̂ ndə̂ Jezü mbô rə̂ la arə ndə̂ tche nyîsə̂ nə̈ alême sə̂nə̈ ndə̂ tche jêtə̂ kə̂ mbo kua ndə̂ yê 2ndjoa ësə̂nə̈ ndə̂ a kênga la tchë atə̂ lafô. Dokʉ̈tchê ndə̂kə̂ pa tche kenga atə̂ lafô, lə̂ köbosə̂ gbôgbô ndə̂ Kpɨ̂ki Yingö, tche zä bâlâ alême tə̂ abadjângele ndə̂ yê ndə̂ tche dɨ̂ andjê bëte kua ndə̂ yê. 3La tchêngbâ kuzü yê, tche mätə̂ yê alême sə̈ andjê lə̂ aköbo ngbî ngbî, ânyë kə̈ nyîsə̂ nə̈ sə̈ andjê pä anyë kä la tʉ̈rʉ̂ la anyê. Lə̂ alö tə̂ azü bïchuû, tche mâtə̂ yê tə̂ andjê, ânyë kə̈ sə̂ lakə̂ to pö pâ Gbölö gö-gbïɛ̈ ndə̂ Ndjapä sə̈ andjê. 4Tə̂ngâlo, ndə̂ tche sə̂ lakə̂ zɨ rə la andjê, tche zâma sə̈ andjê päkëdə̂: «Nyë gböäbô gbô bhâ Jerûzalêmo-ê, praâbalë nyë krʉ̈ bëte rə ndə̂ Bha mê zâ bâlâ nə̈ lâme. Mëmê ndjë gbɛ̂ më tô pö ndə̂nə̈ sə̈ nyê alême nə̂#1.4 Nyë dɨ̈ Luk 24.49.! 5Jâan zä batɛ̂me ndə̂ ngû sə̈ azü, praâbalë lə̂ angâ alö, Ndjapä âzadje batɛ̂me ndə̂ Kpɨ̂ki Yingö sə̈ nyê#1.5 Nyë dɨ̈ Mat 3.11; Mar 1.8; Luk 3.16; Jan 1.33..»
Jezü kënga atə̂ lafô
6Andjanə̈ ndə̂ andjë pâlatə̂ andjê ndrotə̂ Jezü yû tchë päkëdə̂: «Gbölö Gbïɛ̈, angaâtə kä ndə̂ mo ka la Gbölö gö-gbïɛ̈ nə̈ sə̈ azü gö ndə̂ Isarayële?»
7Jezü tô rə̂ ndə̂nə̈ sə̈ andjê päkëdə̂: «Pö ndə̂kə̂ wunsə̂ alö nə̈ la adalo nə̈ wûn-âbo nyê-a. Kütû Bha mê balë kä ndə̂ ânyîkrə rə̂ bhâtə̂ su yê lə̂ köbosə̂ gbôgbô ndə̂ yê. 8Praâbalë nyê gboadje ngâ gbôgbô, gbôgbô nə̈ lâme də̈ gbôgbô ndə̂ Kpɨ̂ki Yingö ndə̂ âjreadje pâ nyê. Käko nyê toadje apö ndə̂ arə ndə̂ nyë wûnsə̂ nə̈ pâ mê bhâ Jerûzalêmo, lə̂ agö ndə̂ Judë gbɛ̂, la andə̂ Samarï, zoo kupâ cho gbɛ̂#1.8 Nyë dɨ̈ Mat 28.19; Mar 16.15; Luk 24.47-48..» 9La tchêngbâ pö ndə̂ tche tô rə̂ lâme, tche kênga atə̂ lafô kpôlə̂ la andjê, praâbalë ndə̂ gbô andjê sə̂ lakə̂ wun tchë, ngâ ndrö gʉ̂â sə̂ yê lə̂ la andjê. 10Ndə̂ gbô andjê ndə̂po lakə̂ wun tchô ngbâ yê atə̂ lafô, angâ aköchë bïchuû ndə̂ andjë yû grôgrô lə̂ba, nə̂ kə̈ krʉ̂ ndrotə̂ andjê. 11Aköchë lâme tô rə̂ sə̈ andjê päkëdə̂: «Nyënyê ndə̂ azü gö ndə̂ Galilë, nyë krʉ̈ tchâtə lakə̂ wun tchô atə̂ lafô bëte giamâ? Jezü ndə̂ a zâ tchë lə̂ gûtə̂ nyê ânyë kə̈ kênga la tchë atə̂ lafô lâme, tchê kadje ndjë ngbâ yê batə̂ rə̂ ndə̂ nyë wûn tchë lakə̂ kenga atə̂ lafô lâme.»
A zä Mätïâse ëlə̂ kpâlâ Jüdâse
12Käko abadjângele jêtə̂ aga ndə̂ rə̈ nə̈ wû pä aga ndə̂ a-Olivï, ânyë kə̈ dôtə̂ andjê atə̂ Jerûzalêmo. Aga nə̈ gü la Jerûzalêmo kilômɛ̂tere balë. 13Ndə̂ andjë wûtu bhâ Jerûzalêmo, andjë lî bhâlə̂ darə də lafô ndə̂ andjë gbo tchê tə̂ andjê tâ. Azü nə̈ də̈ Pîêre la Jâan la Jâke la Anderë la Fïlîpe la Tomä la Bartelemï la Matiyə̈ la Jâke modô ndə̂ Alefë la Chemön ndə̂ tche mbô kʉ̈ʉ̈ ndə̂kə̂ ji azü lə̂ ngbâa, ndjë la Jûde modô ndə̂ Jâke. 14Logbɛ̂, andjë päla tchê tə̂ andjê gbɛ̂ balë ndə̂kə̂ to pö sə̈ Ndjapä, andjê la angâ aɛ̈chë, la Malê, anyï Jezü ndjë la ayîngâ Jezü.
15Tə̂ngâlo, azü ndə̂ Jezü pâlatə̂ andjê. Kə̂ ngba ndə̂ andjê gbɛ̂ wä ngbangbo balë la tə̂ akrə gbɛ̂ (120). Pîêre âlafô lə̂ gbâtə̂ andjê kə̈ tô rə̂ päkëdə̂: 16«Arə̂mä, äwäpä rə ndə̂ Kpɨ̂ki Yingö tô pö ndə̂nə̈ lə̂ Mbëtï Ndjapä lə̂ ma Davîdi mbo gundə̂sə̂ nə̈. Kpɨ̂ki Yingö nə̈ tö pö pâ Jüdâse, earə̂ kə̂ nyisə̂ köbo sə̈ azü ndə̂ andjë zâ Jezü#1.16 Nyë dɨ̈ Aps 41.10.. 17Jüdâse wä alême ngâ azə̂ lə̂ kua, ânyë kə̈ mbô ndjë kua balë la azə̂. 18Tche ë alême kə̈ yô ngâ kɨ̈ndɨ̈ la makətche ndə̂ tche gbô rə̂ ngbâ ngbongbo rə ndə̂ yê. Tche tê bhâye la küma yê, vü yê srô ânyë chêtê yê gbɛ̂ vô ëbêche. 19Azü ndə̂ Jerûzalêmo gbɛ̂ djê pö ndə̂nə̈. Andjë ê rə̂ tə̂ kɨ̈ndɨ̈ nə̈ lâme la ma gö ndə̂ andjê päkëdə̂: ‹Hakeldamä›, ndə̂ ânyîndə̂ kə̂ to rə̂ päkëdə̂: ‹Kɨ̈ndɨ̈-jï.› 20A mbö rə̂ lə̂ mbëtï ndə̂ Apösômo päkëdə̂#1.20 Nyë dɨ̈ rə̂ lə̂ Aps 69.26; 109.8.:
‹Äwäpä tchə̂lə̂ nda ndə̂ yê wa ämbämbänə̈,
ngâ akrə loabô lô lə̂nə̈-ê.›
A kä mbô ndjë rə̂ lə̂ mbëtï nə̈ päkëdə̂:
‹Äwäpä ngâ akrə za kua nə̈ ngbâ yê.›
21«Angâ azü kä tâ ndə̂ andjë zâ tchêngbâ azə̂ lə̂ alö gbɛ̂ ndə̂ Gbölö Gbïɛ̈ Jezü nə̂ la azə̂ kulə̂ agö, 22ätö tə̂ batɛ̂me ndə̂ Jâan ndjoa tə̂ lo nə̈ ndə̂ a kênga la tchë atə̂ lafô. Äwäpä ngâ akrə balë lə̂ gbâtə̂ andjê sə ëtə̂ kʉ̂tê azə̂ ndə̂kə̂ pa azə̈ la tchë to pö ndə̂ arə ndə̂ azə̈ wûnsə̂ nə̈ pâ kə̂ jo ndə̂ Jezü lə̂ kuzü sə̈ azü#1.22 Nyë dɨ̈ Mat 3.16; Mar 1.9; Luk 3.21; Mar 16.19; Luk 24.51..»
23Andjë mâ azü bïchuû ëtchâtchu andjê: Jozêfu ndə̂ a ê rə̂ tə̂ yê pä Bäräsäbâse, ndə̂ ngâ rə̈ yê wû pä Jüsütûsu la Mätïâse. 24La tchêngbâ nə̈ andjë tô pö sə̈ Ndjapä päkëdə̂: «Gbölö Gbïɛ̈, mo wünsə̂ su azü gbɛ̂, käko lə̂ gbâtə̂ azü bïchuû âtə, amö nyisə̂ tchanə̈ ndə̂ mo dɨ̂ tchë sə̈ ârâ, 25ndə̂kə̂ mbo kua ndə̂ badjângele lə̂ kpâlâ Jüdâse ndə̂ tche gbôtə̂ kua nə̈ ndə̂kə̂ e bhâsə̂ tchô ndə̂ âdə̂ andə̂ ye nə̈.» 26Pânə̈ andjë tâ kʉ̂kâ ndə̂kə̂ wunsə̂ akrə ndə̂ Ndjapä eadje tchë. Rə nə̈ tê la rə̈ Mätïâse, ânyë a zâ tchë ëtə̂ kʉ̂tê abadjângele lə̂ könô gbɛ̂ tchêpâ nə̈ balë.
Currently Selected:
Abadjângele 1: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
