Abadjângele 14
14
Pôlo la Bärnäbâse ë atə̂ Ïkönïwûme
1Ndə̂ Pôlo la Bärnäbâse wûtu bhâ Ïkönïwûme, rə nə̈ mbô batə̂ anə̈ ndə̂ âwûtu bhâ Äntïyôche: Andjë lî bhâlə̂ nda kə̂ voga Ndjapä ndə̂ ajuîfu, kə̈ mû pö ânyë angbängbä ajuîfu la azü ndə̂ andjë wâbô wâtə̂ ajuîfu zâ su andjê sə̈ Jezü. 2Praâbalë angâ ajuîfu ndə̂ andjë kôsə̂ kə̂ za su andjê sə̈ Jezü bôlo angâ azü ndə̂ andjë wâbô wâtə̂ ajuîfu ndə̂kə̂ pa su andjê ndɨ tə̂ arə̂mâ ndə̂ azə̂ lə̂ Krîsiti. 3Lə̂ arə lâme gbɛ̂, Pôlo la Bärnäbâse sə̂ bhâ Ïkönïwûme ndə̂nə̈ gû. Andjë mûâbo pö ndə̂ Gbölö Gbïɛ̈ la wa-a, bëte andjë zä su andjê gbɛ̂ pâ yê. Tche zä gbôgbô sə̈ andjê ndə̂kə̂ mbo akpɨ̈ngbɨ̈ rə la arə ndə̂ âropâ küma azü, ndə̂kə̂ nyisə̂ nə̈ sə̈ azü päkëdə̂: Apö ndə̂ a tô rə̂ pâ pö ndə̂ tchôtchô su yê wätə̂ lëge nə̈. 4Tchə̂lə̂ azü lə̂ gö nə̈ krʉ̂ tchə̂lə̂ tə̂ yê: Angânə̈ zâ tchêngbâ ajuîfu ânyë angânə̈ zâ tchêngbâ abadjângele. 5Azü ndə̂ andjë wâbô wâtə̂ ajuîfu la ajuîfu la amakündji ndə̂ andjê, djêtə̂ andjê ndə̂kə̂ mbo abadjângele la gbôgbô, ndə̂kə̂ nye andjê la täme. 6Ndə̂ abadjângele wûnsə̂ pö nə̈, andjë kpê kə̈ ê atə̂lə̂ gö ndə̂ Lîsetere la Dêrebe, agbölö agö ndə̂ Likaonï, ndjë la agö ndə̂ âwâ ndrotə̂ andjê. 7Bhâye, andjë mû Tchôtchô Pö.
Pôlo la Bärnäbâse wütu bhâ Lîsetere la Dêrebe
8Bhâ Lîsetere, ngâ köchë alême kä tâ ndə̂ tche ngêwele, a zɨ̈ tchë zɨ̈ la rə̂ bëte tche nə̂âbo lo balë-a. 9Tə̂ngâlo, tche djê Pôlo ndə̂ tche mu pö. Pôlo chêko tchə̂lə̂ la köchë nə̈ kə̈ wûn rə̂ pä tche zä su yê sə̈ Jezü ndə̂kə̂ pa tche tcha. 10Pôlo tô rə̂ sə̈ tchë ngbôô päkëdə̂: «Alafô, kə̈ krʉ̂ pâ da zə̈!» Köchë nə̈ kû atə̂ lafô ânyë kə̈ jêtə̂ kə̂ nə. 11Ndə̂ azü nə̈ wûn rə ndə̂ Pôlo mbô rə̂ lâme, andjë sə̂ lakə̂ on ngbôô la ma gö ndə̂ azü ndə̂ Likaonï päkëdə̂: «Andjapä zä tə̂ azü ânyë kə̈ jrê pu azə̂!» 12Andjë ë rə̂ tə̂ Bärnäbâse päkëdə̂: «Zə̂se», kə̈ ê rə̂ tə̂ Pôlo pä «Hërëmêse», bëte Pôlo kä ndə̂ âtô pö nə̈. 13Ngâ earə̂ kə̂ wa ngela ndə̂ nda ndjapä ndə̂ Zə̂se lâme, ndə̂ âwâ ndola manda gbadja gö nə̈, kʉ̂ akökö abâgala, kə̈ î afûfû akʉ̈kʉ̂ ëtə̂ kʉ̂tê andjê, kə̈ kâ la andjê tə̂ ma gbadja nə̈. Tchetchë la kpûlû azü nə̈ nyîndə̂ kə̂ wa ngela sə̈ abadjângele. 14Ndə̂ Pôlo la Bärnäbâse âsə̈ dje pö ndə̂nə̈, andjë srô tchə̂lə̂ lə̂ba tə̂ andjê, kə̈ kpê kə̈ lî lə̂ gbâtə̂ azü nə̈, ânyë kə̈ ôn ngbôô päkëdə̂: 15«Arə̂mä, nyë mbö rə âtə bëte giamâ? Ârâ də̈ ndjë azü batə̂ nyê! Ârâ nə̈ ndə̂kə̂ mu Tchôtchô Pö ndə̂kə̂ pa nyë gbotə̂ köbo andjapä ndə̂ andjë wâbô wâtə̂ ngâ rə lâme-ê, kə̂ dotə̂ nyê pu Ndjapä ndə̂ tche wâ la tchîsûwu. Tchetchë ndə̂ tche mbô tchêlafô la tchêbêche la gbölö ngû ngbro la arə gbɛ̂ ndə̂ âwâ lə̂nə̈. 16Dokʉ̈tchê, Ndjapä gbötə̂ azü pâ cho gbɛ̂ ndə̂kə̂ pa andjë za köbo ndə̂ su andjê nyîndə̂ nə̈. 17Ndjapä nyïsə̂ dâkâ ndə̂ yê lə̂ köbosə̂ atchôtchô arə ndə̂ gbô tchë sə̂ lakə̂ mbo rə̂ tə̂ azü: Tche wän nyïvrö bhâ lafô sə̈ nyê gundə̂sə̂ alö nə̈ ndə̂kə̂ pa arəgʉ le la köbo nə̈, tche kʉ̈ kɨ̈zɨ̂ sə̈ nyê ânyë kə̈ zâ mômô tə̂ su nyê tə̂ gbölösə̂nə̈#14.17 Nyë dɨ̈ Aps 147.8; Jer 5.24..» 18Ndə̂ abadjângele tô apö nə̈ gbɛ̂, praâbalë sə̂nə̈ kä tə̂ andjê ndə̂kə̂ kitə̂ köbo tə̂ kpûlû azü nə̈ ndə̂kə̂ pa andjë wa ngela sə̈ abadjângele nə̈.
19Angâ ajuîfu tö bhâ Äntïyôche lə̂ gö ndə̂ Pisidï, angânə̈ tô bhâ Ïkönïwûme ânyë kə̈ nə̂; kə̈ mbô rə̂ pä kpûlû azü nə̈ nyində̂ tchêngbâ pö ndə̂ andjê. Käko andjë nyê Pôlo la täme, kə̈ gbɨ̂ tchë kə̈ wûtu la tchë lə̂ gö nə̈, kə̈ wûntî pä tche tchû nə̂. 20Praâbalë sə̂nə̈ ndə̂ adjisîpili pâlatə̂ andjê ndrotə̂ yê, tche âlafô kə̈ lî atə̂lə̂ gö nə̈. Lö balë la tchêngbâ nə̈, tchetchë la Bärnäbâse andjë ê atə̂lə̂ gö ndə̂ Dêrebe.
Pôlo la Bärnäbâse dötə̂ andjê atə̂ Äntïyôche lə̂ gö ndə̂ Sirï
21Pôlo la Bärnäbâse mü Tchôtchô Pö lə̂ gö ndə̂ Dêrebe ânyë kpûlû azü wâtə̂ adjisîpili. La tchêngbâ nə̈, andjë dôtə̂ andjê atə̂ Lîsetere, Ïkönïwûme ndjë la Äntïyôche lə̂ gö ndə̂ Pisidï. 22Andjë zä wängö sə̈ adjisîpili ndə̂kə̂ za gbôgbô tə̂ su andjê, kə̈ yûkû nə̈ sə̈ andjê ndə̂kə̂ pa andjë ndəpo kpôpâ su andjê ndə̂ andjë zâ rə̂ sə̈ Jezü. Andjë tö rə̂ sə̈ azü nə̈ päkëdə̂: «Äwäpä azə̈ wun yûkü tə̂ gbölösə̂nə̈ ânyë kə̂ li bhâlə̂ Gbölö gö-gbïɛ̈ ndə̂ Ndjapä.» 23Pôlo la Bärnäbâse nyîsə̂ akpôkpô azü kə̈ kʉ̂ andjê tə̂ küma a-Egilîze nə̈ balë balë gbɛ̂. La tchêngbâ nə̈ ndə̂ andjë kôsə̂ kɨ̈zɨ̂ ndə̂kə̂ to pö sə̈ Ndjapä, andjë gbôtə̂ akpôkpô azü nə̈ ëtchânə̂ Gbölö Gbïɛ̈, ndə̂ andjë zâ su andjê sə̈ tchë.
24La tchêngbâ nə̈, andjë rô lə̂ gö ndə̂ Pisidï kə̈ wûtu lə̂ gö ndə̂ Panfilï. 25Andjë mû pö Ndjapä lə̂ gö ndə̂ Perejë la tchêngbâ nə̈, andjë ê atə̂lə̂ gö ndə̂ Atalï. 26Andjë âlafô tchâme, kə̈ â lə̂ batöo kə̈ dôtə̂ andjê atə̂ Äntïyôche lə̂ gö ndə̂ Sirï. Lə̂ gö nə̈ lâme kä ndə̂ a kʉ̂ andjê alême ëtchânə̂ Ndjapä ndə̂kə̂ pa tchôtchô su yê wa pâ andjê, tə̂ pö ndə̂ kua ndə̂ andjë mbô rə̂ ânyë âkâ lâme. 27Ndə̂ andjë wûtu bhâ Äntïyôche, andjë pâla azü ndə̂ Egilîze kə̈ nyîsə̂ tchêngbâ arə gbɛ̂ ndə̂ Ndjapä mbô rə̂ lə̂ köbosə̂ andjê sə̈ azü ndə̂ Egilîze nə̈. Andjë nyîsə̂ köbosə̂ nə̈ ndə̂ Ndjapä jî köbo sə̈ azü ndə̂ andjë wâbô wâtə̂ ajuîfu ânyë andjë zâ su andjê sə̈ Jezü. 28Pôlo la Bärnäbâse sə̂ la azü ndə̂ Krîsiti ndə̂ Äntïyôche lə̂ angbängbä alö.
Currently Selected:
Abadjângele 14: lnl
Highlight
Share
Copy

Want to have your highlights saved across all your devices? Sign up or sign in
© Wycliffe Bible Translators, Inc.