Abadjângele 13
13
A wän Sôlo la Bärnäbâse ndə̂kə̂ mbo kua
1Lə̂ Egilîze ndə̂ Äntïyôche, a-earə̂ ndə̂ma Ndjapä la aköchë ndə̂ andjë nyisə̂ rə kä tâ: Bärnäbâse, Simeyön ndə̂ a ê rə̂ tə̂ yê pä bübü akrə, Lüsïûse akrə gö ndə̂ Sïrêne, Manayë ndə̂ andjë kʉ̂che la gbölö kömändâ Hërôde, la Sôlo. 2Tə̂ngâlo, ndə̂ andjë pâlatə̂ andjê ndə̂kə̂ voga Gbölö Gbïɛ̈ ânyë kə̈ kôsə̂ kɨ̈zɨ̂ ndə̂kə̂ to pö sə̈ Ndjapä, Kpɨ̂ki Yingö tô rə̂ sə̈ andjê päkëdə̂: «Nyë zä Bärnäbâse la Sôlo ngbî bëte mê ndə̂kə̂ pa andjë mbo kua ndə̂ më ê andjê ndə̂nə̈.» 3La tchêngbâ nə̈ ndə̂ andjë kôsə̂ kɨ̈zɨ̂ ânyë kə̈ tô pö sə̈ Ndjapä, andjë tô könô andjê pâ küma azü bïchuû lâme kə̈ zâ köbo sə̈ andjê ndə̂kə̂ pa andjë e etə̂.
Sôlo la Bärnäbâse wütu bhâlə̂ dälä ndə̂ Chîpre
4Käko Kpɨ̂ki Yingö wân Bärnäbâse la Sôlo ânyë andjë ê atə̂ Seləsï. Bhâye andjë â lə̂ batöo kə̈ ê atə̂lə̂ dälä ndə̂ Chîpre. 5Ndə̂ andjë wûtu bhâ Sälämîne, andjë mû pö Ndjapä kulə̂ anda kə̂ voga Ndjapä ndə̂ ajuîfu. Jâan-Mâreke sə̂ ndrotə̂ andjê ndə̂kə̂ za könô sə̈ andjê. 6Pânə̈ ndə̂ andjë rô kulə̂ adälä nə̈ gbɛ̂ ndjoa bhâ Päfôse, andjë gbô ngâ earə̂ yëwä bhâye ndə̂ tche tô rə̂ pä anyë də̈ earə̂ ndə̂ma Ndjapä. Tche wätə̂ juîfu ndə̂ rə̈ yê wû pä Bar-Jezü. 7Tche də̈ ngâ akrə lə̂ gûtə̂ azü ndə̂ goverenëre Sërzïûs Pölûs, tche də̈ akrə ndə̂ tche wûnsə̂ rə. Tche ê Bärnäbâse la Sôlo bhândə̂ yê, bëte tche nyïndə̂ kə̂ dje pö Ndjapä. 8Praâbalë Ëlïmâse earə̂ yëwä, (a ë rə̂ tə̂ yê la ma gerêke käko.) Tche kïtə̂ köbo tə̂ andjê ânyë kə̈ pû köbo ndə̂kə̂ pa goverenëre nə̈ zabô su yê zâ sə̈ Jezü-ê. 9Käko Sôlo ndə̂ ngâ rə̈ yê wû pä Pôlo sɨ̂ la Kpɨ̂ki Yingö kə̈ sə̂ lakə̂ cheko tchë, 10kə̈ tô rə̂ sə̈ tchë päkëdə̂: «Momö, ndə̂ kə̂ bolo azü la yepa sɨ̂sɨ̈ lə̂ zə̈ âtə, modô ndə̂ Jâbolo, mo kïtə̂ köbo tə̂ djîrə̂ rə. Dalatchêbâ kä ndə̂ mo gbotə̂ kə̂ ndɨ tchə̂lə̂ köbo Gbölö Gbïɛ̈ ndə̂ âwâ gbêwôn lâme? 11Ndə̂ azə̈ sə̂ âtə, könô Gbölö Gbïɛ̈ kä pâ zə̈: Mô wadje tə̂ earə̂ föla, lə̂ angâ alö, mô kä wun bata lo tee-a.» Posə̂nə̈, tchô ndrotə̂ yê bû bi-î, ânyë tche sə̂ lakə̂ tama tchô ndə̂kə̂ gbo ngâ akrə ndə̂kə̂ pa tche za könô yê ânyë kə̂ gbɨ tchë. 12Ndə̂ goverenëre nə̈ wûn rə ndə̂ âwûtu lâme, tche zâ su yê sə̈ Krîsiti, bëte pö ndə̂ Gbölö Gbïɛ̈ ndə̂ tche djê rə̂ zä su yê tə̂ gbölösə̂nə̈.
Pôlo la Bärnäbâse wütu bhâ Äntïyôche pâ cho ndə̂ Pisidï
13Pôlo la angâ yê a-earə̂ kua â lə̂ batöo bhâ Päfôse, andjë ë atə̂ Perejë, lə̂ gö ndə̂ Panfilï. Praâbalë Jâan-Mâreke gbôtə̂ andjê tchâme kə̈ dôtə̂ yê atə̂ Jerûzalêmo. 14Andjë âlafô bhâ Perejë kə̈ ê atə̂ Äntïyôche, lə̂ gö ndə̂ Pisidï. Lə̂ lö sabäa, andjë lî lə̂ nda kə̂ voga Ndjapä kə̈ sə̂ ëbêche. 15Pânə̈ ndə̂ a dɨ̂ a-Mbëtï-ndïɛ̈ la andə̂ earə̂ ndə̂ma Ndjapä, amakündji ndə̂ nda kə̂ voga Ndjapä tô rə̂ sə̈ Pôlo la Bärnäbâse päkëdə̂: «Arə̂mä, âdə nyë âwa la angâ apö ndə̂ âza gbôgbô tə̂ su azü gö nə̈, nyë tö rə̂!» 16Pôlo âlafô kə̈ mbô könô yê ânyë kə̈ tô rə̂ päkëdə̂: «Azü ndə̂ Isarayële la azü gbɛ̂ ndə̂ andjë voga Ndjapä, nyë djë mê! 17Ndjapä ndə̂ azü gö ndə̂ Isarayële dɨ̈ araâta azə̂ lə̂ gûtə̂ azü tchêbêche gbɛ̂. Tche mbö rə̂ ânyë azü gö nə̈ ngbâ tə̂ gbölösə̂nə̈, sə̂nə̈ ndə̂ andjë sə̂ alême lə̂ gö ndə̂ Ejîpiti. Pânə̈ tche wûtu la andjê lə̂ köbosə̂ gbôgbô ndə̂ yê. 18Lə̂ ngû ndola tə̂ azü bïchuû, tche bâta andjê la kɨ̈zɨ̂ bhâlə̂ kpaɛ̈gâ. 19La tchêngbâ nə̈ ndə̂ tche wôn azü pâ agö mïndûu manə̈ bïchuû ndə̂ Kanän, tche krʉ̂ tchə̂lə̂ acho nə̈ tə̂ azü ndə̂ yê ndə̂kə̂ pa äwatə̂ andə̂ andjë nə̈#13.19 Nyë dɨ̈ Det 7.1; Joz 14.1.. 20Arə nə̈ lâme gbɛ̂ mbö ngû ndola ngbangbo voanə̈ la tə̂ azü bïchuû tchêpâ nə̈ lə̂ könô gbɛ̂ (450).
«Pânə̈ Ndjapä kʉ̂ a-earə̂ kə̂ wa ngbanga sə̈ andjê ndjoa ëtə̂ earə̂ ndə̂ma Ndjapä Samuɛ̈le#13.20 Nyë dɨ̈ Aju 2.16; 1 Sam 3.20.. 21Andjë yûkû nə̈ ndə̂kə̂ gbo ngâ gbïɛ̈, Ndjapä zâ Säwîli sə̈ andjê, modô ndə̂ Kîche, akrə pâ mawo ndə̂ Bejamɛ̈n, tche sə̈ pâ mbätä-gbïɛ̈ lə̂ ngû tə̂ azü bïchuû#13.21 Nyë dɨ̈ 1 Sam 8.5,19; 10.21.. 22Ndə̂ Ndjapä kôsə̂ yê, tche zâ Davîdi batə̂ gbïɛ̈. Tchetchë kä ndə̂ Ndjapä tô tchôtchô pö ndə̂ yê päkëdə̂: ‹Më gbô Davîdi modô ndə̂ Jesë nə̂, akrə ndə̂ tche mbô rə gundə̂sə̂ su mê, tchê mboadje rə gbɛ̂ ndə̂ su mê nyîndə̂ nə̈#13.22 Nyë dɨ̈ 1 Sam 13.14; 16.12; Aps 89.21..› 23Lə̂ köbosə̂ ngâ akrə pâ mawo ndə̂ Davîdi kä ndə̂ Ndjapä mbô rə̂ pä Jezü wutu ndə̂kə̂ watə̂ earə̂ kə̂ tcha azü ndə̂ Isarayële gundə̂sə̂ bâlâ ndə̂ yê. 24Dokʉ̈tchê ndə̂kə̂ pa Jezü nə, Jâan-Batîse mü pö sə̈ azü ndə̂ Isarayële päkëdə̂: ‹Äwäpä andjë gbotə̂ bəndɨ kə̂ mbo rə ndə̂ andjê ânyë kə̂ gbo batɛ̂me#13.24 Nyë dɨ̈ Mar 1.4; Luk 3.3..› 25Ndə̂ Jâan ndô tə̂kə̂ ka kua ndə̂ yê, tche tô rə̂ päkëdə̂: ‹Nyë wünsə̂ nə̈ pä më də̈ tchabâ? Akrə ndə̂ nyë krʉ̂ bëte tchë lâme də̂âbo mê-a. Nyë djë rə̂: Tchê nəadje la tchêngbâ mê, më kʉ̂âbo sə̂kə̂ zu awû adakpo tə̂ da yê-a#13.25 Nyë dɨ̈ Mat 3.11; Mar 1.7..›
26«Arə̂mä, âdə nyë âwatə̂ azü pâ mawo ndə̂ Abrahâmo âdəndjë andjanə̈ lə̂ gûtə̂ nyê ndə̂ andjë voga Ndjapä, azəzə̂ kä ndə̂ Ndjapä wân pö ndə̂kə̂ tcha azü lə̂ kuzü sə̈ azə̂! 27Azü gö ndə̂ Jerûzalêmo la amakündji ndə̂ andjê, wûn-âbo sə̂ Jezü-a, kə̈ wâ ngbanga kuzü lə̂ küma yê. Andjë mbö tâ käko gundə̂sə̂ apö ndə̂ a-earə̂ ndə̂ma Ndjapä ndə̂ a dɨ tchê rə̂ logbɛ̂ lə̂ alö sabäa. 28Ndə̂ andjë gbôâbô ngâ pö gbô lə̂ küma yê ndə̂kə̂ pa a wa ngbanga kuzü pâ yê, andjë yûkû nə̈ sə̈ Pïlâte ndə̂kə̂ pa tche won tchë#13.28 Nyë dɨ̈ Mat 27.22-23; Mar 15.13-14.. 29Pânə̈ ndə̂ andjë mbô rə gbɛ̂ ndə̂ Mbëtï Ndjapä tô rə̂ tə̂ pö ndə̂ yê, andjë zû tchë tə̂ yö ndə̂ gba nə̈ ânyë kə̈ chî tchë lə̂ ngâ cho akuzü#13.29 Nyë dɨ̈ Mat 27.57-61; Mar 15.42-47.. 30Praâbalë Ndjapä jô tchë lə̂ kuzü. 31Lə̂ angâ angbängbä alö la tchêngbâ nə̈, tche mâtə̂ yê tə̂ azü ndə̂ andjë tô la tchë alême bhâ Galilë kə̈ nə̂ la tchë ndjoa bhâ Jerûzalêmo. Angaâtə, andjë də̈ azü ndə̂ andjë tô pö ndə̂ arə ndə̂ andjë wûnsə̂ nə̈ pâ yê tchâtchu azü gö ndə̂ Isarayële. 32Ârâ ndjë gbɛ̂, ârâ mü Tchôtchô Pö lâme sə̈ nyê ndə̂ Ndjapä zâ bâlâ tə̂ pö ndə̂nə̈ sə̈ araâta azə̂. 33Ndjapä mbö rə nə̈ lâme gbɛ̂ tə̂ azə̂, abechë pâ mawo ndə̂ andjê, sə̂nə̈ ndə̂ tche jô Jezü lə̂ kuzü, batə̂ rə̂ ndə̂ a mbô rə̂ lə̂ mbëtï ndə̂ Apösômo päkëdə̂:
‹Mo də̈ Modô ndə̂ mê,
angêta më wâ nə̂ tə̂ Bha zə̈.›
34«Ndjapä jö tchë lə̂ kuzü, tə̂ yê wâbo ndə̂kə̂ fo-a. Tche tö pö lâme alême päkëdə̂:
‹Mê kʉadje arə sə̈ nyê ndə̂ më zâ bâlâ tə̂ pö ndə̂nə̈ sə̈ Davîdi:
Arə nə̈ wätə̂ alëge arə, ndə̂ a kʉ̂ rə̂ ngbî bëte Ndjapä.›
35Bëte rə̂ kä ndə̂ tche kâ tô rə̂ lə̂ ngâ mbëtï ndə̂ yê päkëdə̂:
‹Mô gboabô tə̂ akrə ndə̂ zə̈ ndə̂ tche dâka gbɛ̂,
ndə̂kə̂ pa tche fo lə̂ cho akuzü tee-a#13.35 Ndə̂kə̂ to tə̂ yɛ̈yɛ̈ da 33 ëtə̂ 35, nyë dɨ̈ Aps 2.7; Eza 55.3; Aps 16.10..›
36Ndə̂ gbô Davîdi wâ la tʉ̈rʉ̂ la yê, tche mbö rə gbɛ̂ ndə̂ Ndjapä nyîndə̂ nə̈ pä tche mbo rə̂. La tchêngbâ nə̈ tche tchû, a chî tchë ndrotə̂ araâta nə̈ ânyë tche fô#13.36 Nyë dɨ̈ 1 Agbi 2.10. 37Praâbalë tchanə̈ ndə̂ Ndjapä jô tchë lə̂ kuzü, tche fôâbo-a. 38Arə̂mä, äwäpä nyë wunsə̂ nə̈ päkëdə̂: Lə̂ köbosə̂ Jezü kä ndə̂ Ndjapä tô pö ndə̂kə̂ ko pö lə̂ küma akrə, praâbalë nyë gbôâbo rə̂ lə̂ ndïɛ̈ ndə̂ Möyîze-a. 39Lə̂ köbosə̂ Jezü kä ndə̂ azü gbɛ̂ ndə̂ andjë zâ su andjê sə̈ Ndjapä, a kô pö lə̂ küma andjê. 40La nyê gbö-ê ânyë rə ndə̂ a-earə̂ ndə̂ma Ndjapä tô pö ndə̂nə̈ alême gboabô nyê gbô-ê. Andjë tö rə̂ päkëdə̂:
41‹Nyënyê ndə̂ azü ndə̂ nyë wûn pö Ndjapä
batə̂ ngbongbo rə,
nyë wün rə̂!
Andjë mbö wa ânyë kə̈ kpê etə̂!
Tə̂ lëge nə̈, sə̂nə̈ ndə̂ gbô andjê wâ la tʉ̈rʉ̂ la andjê,
mê mboadje ngâ rə,
rə nə̈ lâme, âdə akrə âto tchêngbâ pö ndə̂nə̈ sə̈ nyê,
nyê gambabô rə̂ balë tee-a#13.41 Nyë dɨ̈ Hab 1.5, ndə̂ âwâ lə̂ bəndɨ Mbëtï Ndjapä la ma gerêke..›»
42Ndə̂ Pôlo la Bärnäbâse âsə̈ wutu lə̂ nda kə̂ voga Ndjapä nə̈, azü nə̈ yûkû nə̈ sə̈ andjê tə̂ gbölösə̂nə̈ ndə̂kə̂ pa andjë ka tô kütû pö nə̈ lâme lə̂ lö sabäa ngbânə̈. 43Pânə̈ ndə̂ andjë krʉ̂ tchə̂lə̂ tə̂ andjê, angbängbä ajuîfu la azü ndə̂ andjë sə̂ lakə̂ bata ndïɛ̈ ndə̂ Möyîze zâ tchêngbâ Pôlo la Bärnäbâse. Andjë sə̈ lakə̂ to pö sə̈ azü nə̈ ndə̂kə̂ pa andjë ndəpo logbɛ̂ lakə̂ zatə̂ andjê pâ tchôtchô su ndə̂ Ndjapä.
44Ndə̂ ngâ lö sabäa âsə̈ wütu, azü gö nə̈ gbɛ̂ pâlatə̂ andjê ndə̂kə̂ dje pö ndə̂ Gbölö Gbïɛ̈. 45Ndə̂ ajuîfu wûn kpûlû azü nə̈, andjë wâ la gbölö su, ânyë andjë sə̂ lakə̂ kosə̂ apö ndə̂ Pôlo ânyë kə̈ sə̂ lakə̂ dro tchë. 46Käko Pôlo la Bärnäbâse kâ tô rə̂ la gbôgbô sə̈ andjê päkëdə̂: «Nyënyê âme kä ndə̂ ârâ wâ ndə̂kə̂ mu pö Ndjapä sə̈ nyê dokʉ̈tchê. Praâbalë nyë kôsə̂ nə̈ ânyë kə̈ wûntə̂ nyê pä, nyë kʉ̂âbo sə̂kə̂ gbo tchîsûwu ndə̂ logbɛ̂ logbɛ̂-a. Käko ârâ âdotə̂ ârâ pu azü ndə̂ andjë wâbô wâtə̂ ajuîfu. 47Bëte Gbölö Gbïɛ̈ zâma sə̈ ârâ päkëdə̂:
‹Më âmbo rə̂ pä mo watə̂ ngbänga ndə̂ azü pâ cho âtə,
ndə̂kə̂ pa mo mu pö ndə̂kə̂ tcha lə̂ kuzü kupâ cho gbɛ̂#13.47 Nyë dɨ̈ Eza 49.6..›»
48Ndə̂ azü ndə̂ andjë wâbô wâtə̂ ajuîfu âsə̈ dje pö nə̈, andjë wâ la mômô lakə̂ voga pö ndə̂ Gbölö Gbïɛ̈. Andjanə̈ ndə̂ a dɨ̂ andjê ndə̂kə̂ gbo tchîsûwu ndə̂ logbɛ̂ logbɛ̂, andjë zâ su andjê sə̈ Jezü. 49Pö ndə̂ Gbölö Gbïɛ̈ zâ tchə̂lə̂ gö nə̈ gbɛ̂. 50Praâbalë ajuîfu yî ngâ pö lə̂ gûtə̂ aɛ̈chë ndə̂ andjë wâtə̂ küma azü ndə̂ andjë sə̂ lakə̂ voga Ndjapä, la agbölö azü gö nə̈ ndə̂kə̂ pa andjë mbo gbôgbô tə̂ Pôlo la Bärnäbâse. Pânə̈ andjë grô andjê lə̂ gö ndə̂ andjê. 51Käko aköchë bïchuû lâme gʉ̂gʉ cho tchâda andjê lə̂ gö nə̈#13.51 Nyë dɨ̈ Mat 10.14; Mar 6.11; Luk 9.5; 10.11., la tchêngbâ nə̈ andjë ê atə̂ Ïkönïwûme. 52Âdə andə̂ adjisîpili ndə̂ andjë sə̂ bhâ Äntïyôche, su andjê sɨ̂sɨ̈ la mômô la Kpɨ̂ki Yingö.
Currently Selected:
Abadjângele 13: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
