Abadjângele 12
12
A wön Jâke ânyë kə̈ yî Pîêre bhâlə̂ nda kânga
1Sə̂nə̈ lâme, gbïɛ̈ Hërôde#12.1 Ätö pö ndə̂ Hërôde Agripä; tche wä alême gbïɛ̈ pâ Judë gbɛ̂, ndə̂kə̂ to tə̂ ngû 41 la tchêngbâ nə̈ ndə̂ a zɨ̂ Jezü Krîsiti. sə̈ lakə̂ mbo gbôgbô tə̂ angâ azü ndə̂ Egilîze. 2Tche zâma ânyë a wôn Jâke yîngâ Jâan la besala. 3Ndə̂ tche wûn rə̂ pä rə ndə̂ tche mbô rə̂ lâme fü tə̂ ajuîfu, tche wân tchô ndə̂kə̂ pa a za Pîêre. Rə nə̈ wä lo kpülü ndə̂ mâpa ndə̂ djëvö wâbô wâ lə̂nə̈. 4Ndə̂ andjë zâ Pîêre kə̈ yî tchë bhâlə̂ nda kânga, kpûlû aturûgu voanə̈ sûsunə̈ voanə̈ kä ndə̂ âbata tchë. Hërôde nyïkrə rə̂ tə̂ su yê ndə̂kə̂ pa a wa ngbanga lə̂ küma yê lə̂ la azü gbɛ̂ la tchêngbâ kpülü ndə̂ Pâke. 5Käko a bâta Pîêre bhâlə̂ nda kânga, praâbalë azü ndə̂ Egilîze sə̂ lakə̂ to pö sə̈ Ndjapä la gbôgbô tə̂ pö ndə̂ yê.
Ânje ndə̂ Ndjapä jï Pîêre lə̂ nda kânga
6Lə̂ bütchî nə̈ ndə̂kə̂ pa âdə tchô âkra Hërôde wa ngbanga ndə̂ Pîêre lə̂ la azü gbɛ̂, Pîêre lô lə̂ gûtə̂ aturûgu bïchuû. A î tchë la djingîli bïchuû ânyë kə̈ kʉ̂ aturûgu ndə̂kə̂ bata manda nda kânga nə̈. 7Kpro kâkë, ânje ndə̂ Gbölö Gbïɛ̈ wûtu, ngâ rə batə̂ wo tchô dələ̂ darə ndə̂ Pîêre sə̂ tâ. Ânje nə̈ jô Pîêre lakə̂ bhi tchë tə̂ krʉ yê. Ânje nə̈ tô rə̂ sə̈ tchë päkëdə̂: «Alafô gasa-ê!» Käko adjingîli nə̈ zû tə̂ könô Pîêre kə̂ tû-î. 8Ânje nə̈ tô rə̂ sə̈ tchë päkëdə̂: «Amö i tchêpâ lə̂ba ndə̂ zə̈ la wû, kə̈ î wû dakpo ndə̂ zə̈.» Pîêre mbô tâ käko. Ânje nə̈ kä tô rə̂ päkëdə̂: «Yu gbölö krʉ lə̂ba ndə̂ zə̈, kə̈ nə̂ ngbâ mê.» 9Pîêre wûtu kə̈ zâ tchêngbâ yê. Tche wûn-âbo sə̂nə̈ pä rə ndə̂ ânje mbô rə̂ lâme wätə̂ lëge rə-a, praâbalë tche wüntî pä anyë lûlü. 10Andjë rô dokʉ̈ tchô ndə̂ aturûgu sə̂ tâ, kə̈ rô bïchuû nə̈ ânyë la tchêngbâ nə̈, andjë wûtu lə̂ manda ndə̂ a mbô rə̂ la wɛ̂n, ndə̂ âwûtu atə̂lə̂ gö nə̈. Manda nə̈ krôtə̂ yê la tə̂ yê tchâtchu andjê ânyë andjë wûtu. Ndə̂ andjë sə̂ lakə̂ ro lə̂ köbo, kpro kâkë ânje nə̈ gbôtə̂ Pîêre kə̈ rô etə̂.
11Pânə̈ küma Pîêre kâ lanə̈ ânyë tche tô rə̂ päkëdə̂: «Angaâtə, më wûnsə̂ nə̈ nə̂ pä rə nə̈ wätə̂ lëge nə̈: Gbölö Gbïɛ̈ wän ânje ndə̂ yê ânyë tche jî mê tchânə̂ Hërôde ndjë lə̂ angbongbo rə gbɛ̂ ndə̂ ajuîfu krʉ̂ ndə̂kə̂ mbo rə̂ tə̂ mê.»
12Ndə̂ tche âsə̈ dje tchə̂lə̂ rə lâme, tche ê atə̂ tchâalê ndə̂ Malê, anyï Jâan ndə̂ ngâ rə̈ yê wû pä Mâreke. Kpûlû azü pâlatə̂ andjê bhâye lakə̂ to pö sə̈ Ndjapä. 13Pîêre gʉ̂gʉ manda gbadja nə̈, ngâ earə̂ kua tə̂ bechë-ɛ̈chë nə̂ ndə̂kə̂ kro manda gbadja nə̈, rə̈ yê wü pä Rôde. 14Ndə̂ tche djê tchə̂lə̂ gɨ̈ Pîêre, tche wâ la mômô, kə̈ gbôtə̂ kə̂ kro manda gbadja nə̈ ânyë kə̈ kpê la rö ndə̂kə̂ to rə̂ sə̈ azü nə̈ pä, Pîêre kä sûwu. 15Andjë tô rə̂ sə̈ tchë päkëdə̂: «Nyî âmbo mö!» Praâbalë gbô tchë sə̂ lakə̂ to rə̂ sə̈ andjê päkëdə̂: «Rə nə̈ wätə̂ lëge nə̈.» Käko andjë tô rə̂ ndə̂nə̈ päkëdə̂: «Ânje ndə̂ yê kä.» 16Praâbalë gbô Pîêre sə̂ lakə̂ gʉgʉ manda gbadja nə̈ ânyë andjë krô rə̂. Ndə̂ andjë wûn tchë, tchə̂lə̂ küma andjê gbɛ̂ djîngɨli. 17Tche mbô könô yê tə̂ andjê ndə̂kə̂ pa andjë sə gii-ï, tche tô tchêngbâ pö ndə̂ rə ndə̂ Gbölö Gbïɛ̈ mbô rə̂ ânyë tche wûtu lə̂ nda kânga. Tche kä tô rə̂ päkëdə̂: «Nyë êë, kə̂ to pö ndə̂nə̈ sə̈ Jâke#12.17 Jâke âtə də̈ modô ndə̂ Malê ndə̂ tche zɨ̂ Jezü lâme. la arə̂mâ lə̂ Krîsiti.» La tchêngbâ nə̈ tche wûtu kə̈ rô atə̂lə̂ ngâ gö ngbî. 18Ndə̂ tchô krâ, aturûgu nə̂ katchôgbɛ̂, andjë sə̂ lakə̂ yutə̂ andjê päkëdə̂: «Giamâ kä ndə̂ âgbô Pîêre âtə?» 19Hërôde zâma ndə̂kə̂ pa a pu tchë, praâbalë andjë gbôâbo tchë-a. Käko Hërôde yû aturûgu nə̈. La tchêngbâ nə̈, tche zâma ndə̂kə̂ pa a won andjê. Pânə̈ Hërôde alafô bhâ Judë kə̈ ê atə̂ Sezarë ânyë kə̈ sə̂ bhâye lə̂ angâ alö.
Kuzü Hërôde
20Su Hërôde kʉ̂ tchë tə̂ gbölösə̂nə̈ tə̂ azü gö ndə̂ Tîre la Sidön. Azü gö nə̈ djëtə̂ andjê ndə̂kə̂ e ndə̂kə̂ wun tchë. Andjë ë dokʉ̈tchê kə̈ wûn Bläsütûse, makündji-kua ndə̂ gbïɛ̈ ndə̂kə̂ pa tche to tchôtchô pö ndə̂ andjê sə̈ gbïɛ̈. La tchêngbâ nə̈ andjë ê ndə̂kə̂ djetə̂ andjê la Hërôde ndə̂kə̂ pa zɨtɨ su ka lə̂ gûtə̂ andjê. Bëte kɨ̈zɨ̂ tö bhâlə̂ gö ndə̂ gbïɛ̈ Hërôde ânyë kə̂ ro atə̂lə̂ gö ndə̂ andjê. 21Ndə̂ lo nə̈ tâ tâ, Hërôde yû lə̂ba-gbïɛ̈ ndə̂ yê, kə̈ sə̂ lə̂ ngendë-gbïɛ̈ ânyë kə̈ tô pö sə̈ andjê lə̂ la azü gbɛ̂. 22Azü nə̈ sə̂ lakə̂ ta wârə̂ lakə̂ to rə̂ päkëdə̂: «Âdə̂âbo akrə kä ndə̂ âto pö âtə-a, ngâ ndjapä kä!» 23Praâbalë posə̂nə̈, ânje ndə̂ Gbölö Gbïɛ̈ bhî Hërôde la tə̂kömbô, bëte tche vôgabô Ndjapä-a, atchô-tchə̂lə̂ lôlo tchə̂lə̂ yê ânyë tche tchû-î.
24Sə̂nə̈ lâme, pö Ndjapä sə̂ lakə̂ êë atə̂ tchâtchu nə̈ lakə̂ za tchô gbɛ̂. 25Ndə̂ Bärnäbâse la Sôlo kâ kua ndə̂ andjê lə̂ gûtə̂ azü ndə̂ Krîsiti bhâ Jerûzalêmo, andjë zâ Jâan, ndə̂ ngâ rə̈ yê wû pä Mâreke potə̂ andjê, kə̈ dôtə̂ andjê la tchë atə̂ Äntïyôche.
Currently Selected:
Abadjângele 12: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
