Jọnụ 3

Isi Nke Ẹtọ

Kẹ Nikodimọsụ Dọn Chọha Jizọsị

1O nwọn onyẹ Itu Farisi w'a kpọ Nikodimọsụ, onyẹ ohu imẹ ndị-isi ndị Ju. 2Okẹnnyẹni gi uhinhin chọha Jizọsị, sị a, “Onyẹ-nkuzi, ẹnyi a marịnghọ n'ị wụ onyẹ-nkuzi gha ebe Osolobuẹ rị bịa, makẹlẹ onwọnni onyẹ k'a s'ẹka rụn ọrụn-atụmẹnya ndịnị ị rị a rụn mmanị Osolobuẹ nọyen'ẹ.”

3Jesu nọ sị a, “Ezioku kẹ m rị a gwa ị, mmanị wẹ mụdọnzi ịhịan, ọ saẹka hụn Alị-eze Osolobuẹ.” 4Nikodimọsụ nọ sị a, “Nanị w'a dọnzi nwan mụdọnzi ịhịan ebe ọ kagụ ẹgẹdi?! N'ọ sazị ẹka banyezi ẹfọ nnẹ ẹ, a mụzị w'a nke mgbe ẹbụọ?” 5Jizọsị nọ sị a, “Ezioku kẹ m rị a gwa ị, mmanị wẹ gi mirin lẹ Mmọn-nsọ mụ ịhịan, ọ saẹka banye Alị-eze Osolobuẹ. 6Hụn ịhịan mụ wụ ịhịan; hụn Mmọn-nsọ mụ wụ nke imẹ-mmọn. 7Y'a tụlẹ i ẹnya nị m sị, ‘Wẹ sikọ d'a mụdọnzigụrịrị ụnụ.’ 8Ufere e feshi ebe ọ chọ, ụnụ a nụ ụzụn a, kanị ụnụ ara marịn ebe ọ gha fela mọbụ ebe o fekọ. Ẹrịra kẹ onyẹ ọwụlẹ Mmọn Osolobuẹ mụ rị.”

9Ya kẹ Nikodimọsụ nọ sị Jizọsị, “Nanị ihiẹn ndịnị e dọn saẹka mẹ?”

10Jizọsị nọ sị a, “Onyẹ-nkuzi kị wụ imẹ Izrẹlụ bụ y'a marịn ihiẹn ndịnị? 11Ezioku kẹ m rị a gwa ị, ẹnyi rị e ku ihiẹn ẹnyi marịn, a shịa ẹri ihiẹn ẹnyi hụn, kanị ụnụ ara gi ẹri ẹnyi dọn. 12M hụ e gi ihiẹn rị elu-ụwa a gwa ụnụ oku, ụnụ egini ẹ dọn, m gi ihiẹn rị elu-igwee gwa ụnụ oku, nanị ụnụ a dọn gi ẹ dọn? 13Onwọnni onyẹ jẹntu elu-igwee wezụka onyẹ hụn gha elu-igwee bịa — mmẹ Nwa nke Ịhịan.

14“Kẹ Mozizi dọn weshi agwọ hụ elu imẹ atụ, ẹrịra kẹ wẹ k'e weshi Nwa nke Ịhịan elu, 15kẹni onyẹ ọwụlẹ hụn kwerinin'ẹ hụn ụzọ nwọn ndụn itẹbitẹ.

16“Makẹni Osolobuẹ nwọn ihiẹn-ọsụsụọ ndị rị ụwa ọda-ọda, ya haịn o gi we akpụ Nwa ohu o nwọn ye, n'ọ wụrụ nị onyẹ ọwụlẹ kwerinin'ẹ alakọ iwi, kama o nwọn ndụn itẹbitẹ. 17Ẹlẹ ikpe kẹ Osolobuẹ zi Nwa a d'a ma ndị rị ụwa, o zi ẹ kẹni wẹ gha ẹka a nwọnrin nzụọpụha. 18Ikpe amanị onyẹ hụn kwerinin'ẹ, kanị ikpe a magụọlẹ onyẹ hụn kwerilẹni, o gilẹni kwerini ẹfan akpụ Nwa ohu Osolobuẹ mụ. 19Ọnwan kẹ wẹ gi hangbu wẹ eṅẹn: nị ukpẹ a bịagụọ imẹ ụwa, kalẹ ishi a ka ịhịan a sụọ karị ukpẹ, makẹni eje-ihiẹn kẹ w'e mẹ. 20Ndị ile e mẹ eje-ihiẹn ara chọ nị wẹ gi ẹnya hụn ukpẹ; w'a ra bịa ebe ukpẹ rị amamgbe eje-ihiẹn wẹ rị e mẹ a pụha ifọn.

21“Kanị ndị hụn e mẹ ihiẹn rị mma a bịa ebe ukpẹ rị, kẹni ịhịan ile hụn a nị ihiẹn Osolobuẹ chọ kẹ wẹ rị e mẹ.”

Jọnụ Esọnni Jizọsị Ma Usue

22Omẹgụ, Jizọsị lẹ ndị nsọnmazụụn a nọ shi ẹgbẹrẹ Judia, ọ nọ du wẹ nọdị ebẹhụ. Ọ hụ e mẹ ịhịan mirin-Chuku k'ọ rị ebẹhụ. 23Jọnụ nkẹ rị obodo Ẹnọnụ hụn nọkunmẹ Salim e mẹzikwọ mirin-Chuku, makẹni mirin rị ebahụn ọda-ọda, wẹ hụ e jẹnburu ẹ d'e mẹ mirin-Chuku.

24W'e ke bu Jọnụ che imẹ ụlọ-ngan ogẹn ahụn.

25Ya k'o gi mẹni ebe ndị nsọnmazụụn Jọnụ lẹ onyẹ Ju rị a dọ oku ẹhụ w'a chan wẹ gi e fe ẹhụ, 26wẹ nọ bịa d'e kunrun Jọnụ, sị a, “Onyẹ-nkuzi, lee nwan nị onyẹ hụ yụ lẹ ya rịtan nfetu Iyi Jọdanị, hụn ị gwa ịhịan ile oku ẹ, rị nwan e mẹ mirin-Chuku, ịhịan ile hụ e jẹnburu ẹ.”

27Jọnụ nọ shịarị wẹ, sị, “Onwọnni ihiẹn e ru ịhịan ẹka mmanị wẹ gha elu-igwee y'ẹ ya. 28Ụnụ lẹ enwẹn ụnụ wụ ọshẹri m nị e kughọ m'a nị ‘Ẹlẹ m Kraịstị, kanị wẹ zi m d'a kwan'a ụzọ.’ 29Onyẹ rị a lụ okpoho nwọn okpoho ahụn ọ rị a lụ. Ọwụ a wuzohụ ẹhụ a, a ghọghọ n'ọ rị a nụ olu ẹ. Ịghọghọ m e zuọlẹ nwan oke. 30Kraịstị k'a gha a waye; mmẹ nwẹn k'a gha e belụa.

31“Onyẹ gha elu-igwee bịa ka ịhịan ile; onyẹ gha elu-ụwa bịa gha elu-ụwa bịa, o ku oku ihiẹn rị elu-ụwa. Hụn gha elu-igwee bịa ka ịhịan ile. 32Ọ hụ e ku ihiẹn ọ hụn lẹ ihiẹn ọ nụ, kanị onwọnni onyẹ e gi ẹri ẹ e dọn. 33Onyẹ gi oku ẹ dọn a ghọsịọlẹ nị Osolobuẹ wụ onyẹ-ezioku. 34Makẹni onyẹ Osolobuẹ zihẹ rọ, o ku oku Osolobuẹ, ufiri nị Osolobuẹ eyen'ẹ Mmọn-nsọ yehọdụ. 35Chuku-Nẹdi nwọn ihiẹn-ọsụsụọ Nwa a wụ Kraịstị, o bugụọ ihiẹn ile che ẹ ẹka. 36Onyẹ hụn kwerini Nwa Osolobuẹ nwọn ndụn itẹbitẹ; onyẹ kwerilẹnini Nwa Osolobuẹ ahụnkọ ndụn; kama, iwe-lẹ-ọnụma kẹ Osolobuẹ k'e gi sọn ẹ.”

Currently Selected:

Jọnụ 3: ikkBI

Highlight

Copy