Jọnụ 4

Isi Nke Ẹnọ

Jizọsị Lẹ Okpoho Sameria

1Ogẹn Jesu gi nwan marịn nị ndị itu-Farisi a nụgụọ nị ndị alị hụn rị a la wẹ a tọ a bannị Jesu lẹ ndị rị e mẹ mirin Chuku ẹka a a karịgụọdẹ ndị rị a la wẹ a tọ a bannị Jọnụ hụn e mẹ mirin-Chuku — 2bụ ẹlẹ Jesu lẹ enwẹn ẹ rị e mẹ wẹ mirin-Chuku, ndị nsọnmazụụn a rị e mẹ wẹ — 3ya kẹ Jesu nọ gha Judia pụ, kinkọ Galili. 4Ọ nọ ghashi alị Sameria makẹlẹ ọ rị mkpa n'ọ ghashi ẹ. 5Ya ọ nọ pụha obodo ohu w'a kpọ Sika hụn rị imẹ Sameria, ẹhụ alị Jekọpụ ye Josẹfụ nwa a. 6Ọmị Jekọpụ rị ebẹhụ. Ndụn gụ Jesu o gi jẹn ijẹn. Ọ nọ nọdị alị ẹhụ ọmị hụ. (Ihiẹn rịkẹ ọkụrọkụ mmẹbụọ efinnaị anwụn gi a rị isi rọ.)

7Ya kẹ okpoho Sameria ohu nọ bịa d'a dọrị mirin. Jesu nọ sị a, “Ye m mirin ra.”

8Ndị nsọnmazụụn Jesu e shigụọ imẹ obodo d'e ṅọnhẹn ihiẹn-oriri ogẹn hụ.

9Okpoho hụ wụ onyẹ Sameria nọ sị a, “Nanị kẹ ịyụ, onyẹ Ju, dọn nwan a rịọ mmẹ wụ onyẹ Sameria mirin, bụ ndị Ju ara sọn ndị Sameria mẹkọ#4.9 Ara gi mkpu mọbụ afẹrẹ ndị Sameria gi ri ihiẹn-oriri mọbụ ra mirin ri ihiẹn-oriri mọbụ ra mirin.?” 10Jizọsị nọ sị a, “Omẹni i te marịn ihiẹn Osolobuẹ e ye lẹ onyẹ rị a sị ị, ‘Ye m mirin ra’, nkẹ y'a rịọ a, n'o ye i mirin hụn e ye ndụn.” 11Okpoho hụ nọ sị a, “Diọkpa, ọmịnị mi emi bụ y'e gi mkpu wẹ gi a dọ mirin. Elebe y'a nọ nwan wẹhẹ mirin ahụn e ye ndụn?! 12Yụ kazị Jekọpụ nẹdi ẹnyi kanị ye ẹnyi ọmịnị? Kẹ ya kẹ ụmụ a kẹ anụ a a razịghọ mirin rịn'a?” 13Jesu nọ sị a, “Onyẹ ragụ mirinni, ẹgụn mirin jẹnkọ d'a gụnzị a. 14Kanị onyẹ ra mirin m jẹnkọ d'e ye ẹ, onwọnni ogẹn ẹgụn mirin e gizi gụn a elu-ụwanị, mirin hụ k'e họnrindẹ isi-mirin imẹ hụnyẹ, a mụpụhan'a ndụn itẹbitẹ.”

15Okpoho hụ nọ sị a, “Diọkpa, ye m nwan mirin hụ amamgbe ẹgụn-mirin a gụnzị m mọbụ a bịamazị m ebeni d'a dọrị mirin.”

16Jizọsị nọ sị a, “Jẹn d'a kpọha di i, y'e kinhẹn ebeni.”

17Okpoho hụ nọ sị a, “Enwọn m di.” Jesu nọ sị a, “Ezioku kẹ i ku ebe ị nọ sị, ‘Enwọn m di’, 18makẹni ọsụọn'a nị y'a lụpụgụọ di isẹn, okẹnnyẹ yụ lẹ ya rị nwan ẹlẹ di i. Ezioku k'i ku!”

19Okpoho hụ nọ sị a, “Diọkpa, a hụnọlẹ m'a nị ị wụ onyẹ-amụma. 20Ndị nẹdi ẹnyi kanị nọ uguni fe Chuku, bụ ụnụ ndị Ju sị Jerusalẹm kẹ ịhịan k'a nọrịrị fe Chuku.”

21Jesu nọ sị a, “Okpoho, kweri ihiẹn m rị e ku: ogẹn lala, hụn ụnụ jẹnkọlẹni d'a nọzị kẹ elu uguni kẹ imẹ Jerusalẹm fe Chuku-Nẹdi. 22Ụnụ amarịn onyẹ ụnụ rị e fe; kanị, ẹnyi nwẹn a marịnghọ onyẹ ẹnyi rị e fe, makẹni ẹka ndị Ju kẹ nzụọpụha gha lala. 23Ogẹn laladẹ, ẹghẹẹ, o rugụọdẹ nwan, hụn ndị e fe ezigbo ofufe k'e gi fe Chuku-Nẹdi ofufe imẹ-mmọn lẹ nke ezioku. Makẹni ndị hụn e fe ẹrịra kẹ Chuku-Nẹdi chọkọ. 24Osolobuẹ wụ mmọn, ẹlẹ ịhịan; ndị k'e fen'ẹ k'e ferịrị a ofufe imẹ-mmọn#4.24 Ẹlẹ ofufe ihiẹn ẹnya e legha. lẹ nke ezioku.”

25Okpoho hụ nọ sị a, “A marịnghọ m nị Onyẹ Nzụọpụha Hụ Osolobuẹ Tumẹ hụn w'a kpọ Kraịstị lala; ọ bịa, n'ọ gwachanrịnghọ ẹnyi ihiẹn ile.”

26Jesu nọ sị a, “Mmẹ hụn rị a gwa ị oku rọ.”

27Ogẹn hụ hụra kẹ ndị nsọnmazụụn a gi kinhẹn. Ọ tụka wẹ ẹnya n'ọ rị e sọn okpoho e ku; kanị onwọnni onyẹ sị, “K'ị chọ?” mọbụ “Kị rị e dun'ẹ e ku?” 28Ya kẹ okpoho hụ nọ la ite mirin ẹ tọ, kinzi imẹ obodo, sị ndị rịn'a, 29“Bịa nị d'e lee onyẹ gwa m ihiẹn ile m mẹ!! Onyẹ ma kẹ ịya wụ Kraịstị?” 30Wẹ nọ gha imẹ obodo rujẹnmẹ ebe ọ rị.

31Ogẹn hụ, ndị nsọnmazụụn Jesu hụ a rịọ a, “Onyẹ-nkuzi, dodo ri ihiẹn-oriri.” 32Kanị ọ nọ sị wẹ, “M nwọn ihiẹn m'e ri hụn ụnụ marịnlẹni.” 33Ya kẹ ndị nsọnmazụụn a nọ jụma ibe wẹ, “O nwọndẹ nwan onyẹ wẹhẹn'ẹ ihiẹn-oriri ra?”

34Jizọsị nọ sị wẹ, “Ihiẹn-oriri m wụ imẹ uche onyẹ zini m lẹ ịrụnchanrịn ọrụn a. 35Ẹlẹ ụnụ a sị, ‘Ọ họdụzị ifọn ẹnọ nị wẹ ghọma ihiẹn-ugbo?’ Kanị, m rị a sị ụnụ, lehunmẹ ni ẹnya nị ụnụ hụn nị ihiẹn-ugbo a kagụọlẹ w'a ghọ. 36Onyẹ rị a ghọnị hụ a ghọ, a narịn ụgwọ-ọrụn a, e kpọntọnị ndụn itẹbitẹ, kẹni hụn kụnn'a lẹ hụn ghọn'a nwọngbama ịghọghọ. 37O mẹgụọ nwan kẹ wẹ dọn e ku ẹ:

‘Onyẹni kụn;

onyẹni ghọ.’ ”

38“M zi ụnụ d'a ghọ ihiẹn ụnụ rụnlẹni; ndị ọzọ a rụngbugụọ enwẹn wẹ; ụnụ a bịagụọ d'a ghọ ihiẹn wẹ rụn.”

Ndị Sameria E Kwerini Jesu

39Ndị Sameria bu ọda bi obodo hụ kwerini Jesu, makẹni okpoho hụ sị, “Ọ gwa m ihiẹn ile m mẹ!” 40Ogẹn ndị Sameria gi bịa d'e kunrun Jesu, wẹ nọ rịọ a n'o sọn wẹ nọdị. Ya ọ nọ sọn wẹ nọdị akpọhịn ẹbụọ. 41Ya kẹ ndị bu ọda nọzị kwerinin'ẹ makẹ ihiẹn wẹ nụ ọnụ a. 42Wẹ nọ sị okpoho hụ, “Ẹlẹzi ihiẹn i ku sụọ kẹ ẹnyi gi kweri, makẹlẹ ẹnyi lẹ enwẹn ẹnyi a nụọlẹ ọnụ a, marịn nị ọnwan wụ Onyẹ-nzụọpụha ụwa nke-esi.”

Jizọsị A Zụọ Nwa Onyẹ-isi ọrụn Eze

43Akpọhịn ẹbụọ a ghafegụ, Jesu nọ gha Sameria pụ, shi Galili. 44Jizọsị lẹ enwẹn ẹ e kugụọ a nị w'a ra gbaye onyẹ-amụma alị a.

45Ogẹn o gi ru Galili, ndị Galili nọ nabanhan a, makẹni a hụngụọ wẹ ihiẹn ile o mẹ imẹ Jerusalẹm ogẹn Mmẹmmẹ-nghafe, makẹni wẹ nwẹn e jẹnzighọ mmẹmmẹ hụ.

46Ọ nọ bịazị obodo Kana rị Galili ebe ọ nọ gi mirin họnrin manya.

O nwọn okẹnnyẹ ohu emu rị a kụ nwa a okẹnnyẹ imẹ Kapanọm rịzị Galili. Okẹnnyẹni rị ndị-isi ọrụn eze. 47Ọ nụ nị Jizọsị a ghagụọ Judia kinhẹn Galili, ọ nọ buru ẹ, rịọ a bịa d'a zụọ nwa a makẹni o d'a nwụn. 48Ya Jesu nọ sị a, “Mmanị ụnụ hụn ahịma lẹ ihiẹn atụmẹnya, ụnụ ekwerikọ.” 49Onyẹ-isi ọrụn hụ nọ sị a, “Diọkpa bịa dodo, nwa m gini d'a nwụn.”

50Jizọsị nọ sị a, “Lama, nwa ị anwụnkọ.” Okẹnnyẹ hụ nọ kweri oku Jizọsị gwa a, ọ nọ lama. 51Ebe ọ lakọ, idibo ẹ nọ kunrun ẹ, gwa a nị nwa a hụ mma. 52Ọ jụ wẹ ele ogẹn k'o gi rị mma, wẹ nọ sị a, “Ọkụrọkụ ohu efinnaị ụnyanhụn kẹ ẹhụ-ọkụn hụ gi hapụ a.”

53Nẹdi nwata hụ nọ nyanhan nị ogẹn hụ daị kẹ Jizọsị gi sị a, “Nwa ị anwụnkọ.” Ufiri ẹ, ya lẹ ezi-lẹ-ụlọ a nọ kwerini Jesu. 54Ọnwan wụ ọrụn-atụmẹnya nke ẹbụọ Jesu rụn k'ọ gha Judia lụaha Galili.

Currently Selected:

Jọnụ 4: ikkBI

Highlight

Copy