Marko 4

Enkitanyaanyukoto o launoni

(Mat 13.19; Lk 8.48)

1 # Lk 5.1-3 Neitoki Yesu aiteru aiteng'enisho te mbata e naiposha e Galilaya. Neiturrurrokino iltung'ana kumok oleng, o metijing'a atua empeut aton tiatua enaiposha; netoni lelo tung'anak te nkop natoyio te mbata e naiposha. 2Neutaki Yesu ninche mbaa kumok too nkitanyaanyukot nejoki:

3“Entoning! Eshomo olaunoni aunisho. 4Ore eunisho nedoiki kulikae anterera embata e nkoitoi, nepuonu motonyi aanya. 5Nedoiki kulikae enkop oo soito nemetii inkulupuok kumok, nesioki aabulu, naa ore ake pee ebulu amu megut nkulupuok; 6ore pee eilepu enkolong nepej, naa ore amu meeta intona netoyu. 7Nedoiki kulikae anterera atua lkiku nebulu lelo kiku negor, metaa eitu eiu ilng'anayio. 8Nedoiki kulikae anterera atua nkulupuok sidain nebulu neiu ilng'anayio, neponari aaiu maa tomoni uni, maa ntomoni ile, maa iip.”

9Nejo Yesu, “Oloata nkiyiaa naaning'ishore, toning'o.”

Tipat oo nkitanyaanyukot

(Mat 13.10-17; Lk 8.9-10)

10Ore etaa Yesu ake, neikilikuan lelo ooboitare tenebo lkipaareta lenyena enajo nena kitanyaanyukot. 11Nejoki Yesu, “Eishooki intae entayiolo mbaa nemeibala e nkitoria e Nkai, kake ore te lelo ootii auluo, etiu mbaa pooki anaa nkitanyaanyukot; 12#Isa 6.9,10pee te neing'or, neing'or nemedol, naa te nening, nening nemejing'aa, pee meibelekenyakino ake Enkai, nepalakini.”

Eibalakinye Yesu ninche ina kitanyaanyukoto o launoni

(Mat 13.18-23; Lk 8.11-15)

13Nejoki Yesu ninche, “Aimining'ung'u ena kitanyaanyukoto? Kaji naa inkoko pee ining'ung'u nkulie kitanyaanyukot pooki?

14“Ore olaunoni, ororei eun. 15Naa kulo ilootii embata e nkoitoi, ine eunieki ororei. Ore pee ening; nelotu Sheitani nabo kata aya ilo rorei otuunoki tiatua ninche. 16Naa inji etiu lelo ootuunoki te nkop oo soito, lelo laa, ore pee ening ororei, neng'amu nabo kata te ng'ida; 17nemeeta ntona tiatua ate, kake kebikie enkiti kata; kake ore pee elotu osina anaa enkisilisilore te nkaraki ilo rorei, nerrorro nabo kata. 18Ore lelo ootunokoki atua lkiku; naa lelo ooning ilo rorei, 19kake ore pee ejing'aki nyamalaritin e nkop, o eng'ida oo masaa, o eng'uarrata e kulie tokitin, negor ilo rorei, metaa meisho etum ilng'anayio. 20Kake ore lelo ootuunokoki enkulupuoni sidai, naa lelo ooning ilo rorei neiruk nepik iltauja neiu ilng'anayio maa tomoni uni, maa ntomoni ile, maa iip.”

Oltaa oitoiporo to ltoo

(Lk 8.16-18)

21 # Mat 5.15; Lk 11.33 Nejoki Yesu ninche, “Keyauni oltaa nepising'ari to ltoo, aashu epiki orunku le erruat? Mme eneiperere epiki? 22#Mat 10.26; Lk 12.2Amu meetae entoki naisudoyioki neme keji ake pee eibalunyeki; nemeetae entoki natunukaki neme keji ake pee eibalayu. 23Oloata nkiyiaa naaning'ishore, toning'o.”

24 # Mat 7.2; Lk 6.38 Nejoki ninche, “Enining'o entobiraki ena nining'itoto; amu ore emborei ninchooyo iyie naa ninye kinchori sii iyie, nikiponikini. 25#Mat 13.12; 25.29; Lk 19.26Amu keponikini ilo oata aaisho kulie; ore ilo lemeeta, neoruni ina naata.”

Enkitanyaanyukoto e nkantererai ebulu

26Nejo Yesu, “Etiu enkitoria e Nkai anaa te neisuaaki oltung'ani lanterera enkop. 27Neirura, neinyototo dama o kewarie, nerumishoyu lanterera nebulu, nemeyiolo ninye eneikununye. 28Enkop naitubulu openy, neng'asunye mbenek, neitoki ntapuka neitoki ilng'anayio aabulaki. 29#Yoe 3.13Kake ore pee eku ilng'anayio, neitayu oltung'ani olalem adung'u amu etabawua enkikesare.”

Enkantererai e karadali

(Mat 13.31-32,34; Lk 13.18-19)

30Nejo Yesu, “Kainyoo kintanyaanyukie enkitoria e Nkai, anaa kaa kitanyaanyukoto kiaasishore te ninye? 31Etiu anaa enkantererai kini, enaa ore euni te nkop, ninye enkini aisul ilanterera le nkop; 32kake ore pee euni nebulu, aisul inkeek e ntim, neitayu lng'osil, o metaa kepuonu imotonyi e shumata aapik inkajijik oloip lenye.”

Enaas inkitanyaanyukot

33Neinosaki Yesu iltung'anak ilo rorei aiko neijia too nkitanyaanyukot kumok, anaa enaidima ninche aatoning. 34Neitu eirorie metii enkitanyaanyukoto, kake ore pee eaku ninye ake o lkipaareta lenyena neibalakinye ninche pooki toki.

35Ore ina olong pee eaku teipa, nejoki Yesu lkipaareta lenyena, “Ematalang aapuo lido kekun.” 36Neing'uaa olorere nerik ninche ninye, etiu anaa duoo ake, teina peut. Netii kulie peuti ine te nebo ninye.

37Nedumunye olkutati kitok, nedam ilopir le nkare ina peut, o metaa keiput enkare. 38Kake etii ninye Yesu siadi empeut, eirura epetita enkirishet e lukunya; neinyeyie lkipaareta lenyena ninye nejoki, “Olaiteng'enani, aimme toki te iyie te nikindaaya?” 39Neinyototo Yesu neisikong osiwuo, nejoki enaiposha, “Tigirayu! Ntirring'ayu.” Neish osiwuo, neitiring'a enkare oleng. 40Nejoki ninche, “Kainyoo pee itureishote?” 41Neiputukuny ninche, nejokino, “Ai ng'ae doi ele? Olaa kening ninye osiwuo o enaiposha?”

Currently Selected:

Marko 4: BIBLIAPRO

Highlight

Copy