Marko 3

Oltung'ani oikaolo enkeeya enkaina

(Mat 12.9-14; Lk 6.6-11)

1Neitoki Yesu ajing enkaji e ntumo, netii ine oltung'ani oikaolo enkeeya enkaina. 2Neing'or iltung'ana ninye tenaa keishiunye ilo tamoyiai te nkolong e Sabato, pee etum aaitang'oro ninye. 3Nejoki Yesu ilo tung'ani oikaole enkaina “Wou ene.” 4Nejoki ninche, “Kaa naishoruno too nkitanapat mataas te nkolong e Sabato, metaasi isupati anaa metaasi intorrok, meitopoki ana metaari metua?” Kake etigirate lelo tung'ana. 5Nekurraki Yesu pooki nkonyek te ngoro, eisinanuo te nkaraki nerook oishuaa, nejoki ilo tung'ani “Intorioi enkaina ino!” Neitorioo, neishiu, enkaina. 6Neipang Ilfarisayo, nepuo nabo kata aanya enkiguana eboitare esirit oo le Herode, pee egilunore ninye eing'oru olosek oarie Yesu metua.

Eshomo Yesu tenebo lkipaareta lenyena embata enaiposha

7Nerrinyo Yesu teine te nebo o lkipaareta lenyena aapuo enaiposha e Galilaya, nesuj olorora kitok oing'uaa Galilaya; o looing'uaa Yudea 8o Yerusalem o Idumea o lido kekun le Yordan o lorora kitok oing'uaa Tiro o Sidon; etoning'o nena pooki naataasa Yesu, nepuonu enetii ninye. 9#Mk 4.1; Lk 5.1-3Nejoki lkipaareta lenyena meitobirakini empeut te nkaraki olorere, pee merratanyi ninye; 10amu eidipa aishiunye lkumok, ometaa keiding'akino lelo pooki oomuoyiaa ejo maiseyie. 11Naa ore ake pee emaniki iloiriruani ooiduruk, nerriaa te dukuya ninye ebuaku aajo, “Ira iyie Enkerai e Nkai!” 12Nekurraki areiki ajoki pee melikioo.

Etegelua Yesu ilkipaareta tomon o aare

(Mat 10.1-4; Lk 6.12-16)

13Neilepaki Yesu oldoinyo, neipotu lelo ooyieu ninye openy nepuonu enetii ninye. 14Negelu tomon o aare, ooisiritore ninye, pee etum airriwai metolikioi ororei le Nkai; 15neisho ninche enkitoria naararie iloiriruani. 16Neisho Simon enkarna ajo Petero; 17Yakobo le Sebedayo, o Yohana olalashe Yakobo, neisho lelo enkarna ajo Boanerge, aa keji Ilenkikurrukur: 18Andrea, o Filipo, o Bartolomayo, o Matayo, o Tomas, o Yakobo le Alfayo o Tadayo, o Simon olkanaani, 19o Yudas Iskariot, laa ninye otakaldayie. Nelo ang.

Yesu o Beelsebul

(Mat 12.22-32; Lk 11.14-23; 12.10)

20Neitoki ake olorere aasoto, metaa metumoki Yesu o lkipaareta lenyena aainosa endaa. 21Ore pee ening iltung'ana lenyena le sotua, nepuo pee epuo aaibung, amu kejo, “Etarruoyie elukunya.” 22#Mat 9.34; 10.25Nejo laiteng'enak loo nkitanapat ootadoutuo eing'uaa Yerusalem, “Beelsebul eeta, naa ninye etumie engolon naararie loiriruani.” 23Neipotu enetii ninye, nejoki too nkitanyaanyukot, “Kaji eiko pee eidim Sheitani ataarai Sheitani? 24Teneoro enkitoria tiatua, nemeidim ina kitoria aitasho. 25Naa te neoro enkaji tiatua kewan, nemeidim ina aji aitasho. 26Naa te netudumakine Sheitani kewan aor, meitashe, kake keiting. 27Meetae oltung'ani oidim atijing'a enkaji o ltung'ani ogol nearaa masaa enyena, eitu eng'as aen ilo ogol, pee etumoki taa ataara enkaji enye. 28Esipa ajoki intae, epalakini ltung'ana ng'ok pooki, o emorore pooki namorisho ake; 29#Lk 12.10kake ore oloba anaa olomor Enkiyang'et sinyati, metum empalakinoto aikata, kake etum eng'oki ntarasi.” 30Amu ketejo ninche, “Oloirirua oiduruk eeta ninye.”

Ng'otonye Yesu o lalashera lenyena

(Mat 12.46-50; Lk 8.19-21)

31Nelotu ng'otonye Yesu o lalashera lenyena; ore eitashe ninche te boo neirriwaa enkutuk meipoti ninye. 32Netoni olorere aamanita ninye; nejokini, “Etii ng'utunyi o lalashera linono boo kinkilikuanu.” 33Newaliki ajoki, “Ai ng'ae yieyio o lalashera laainei?” 34Ore pee eitaman inkonyek lelo oomanita ninye, nejo, “Noolo yieyio o lalashera laainei! 35Ore pooki ng'ae oas enayieu Enkai, ninye olalashe lai, o enkanashe ai o yieyio.”

Currently Selected:

Marko 3: BIBLIAPRO

Highlight

Copy