Matayo 7
7
Minguanare pee mikinguenareki
(Lk 6.37-38,41-42)
1“Eminguanare pee meiguanareki intae. 2#Mk 4.24Amu ore enkiguana ning'uanarere, naa ninye eiguanareki intae; ore enintorisiokiki ilkulikae, naa ninye eitorisiokini intae. 3Kainyoo pee ing'uraa entubuloi natii enkong'u o lalashe lino, nimidol olchata otii enkong'u ino makewan? 4Anaa kaji inko ti nijoki olalashe lino, ‘Inchooki maitayu entubuloi te nkong'u ino;’ etii olchata atua enkong'u ino makewan? 5Lo sunkuroi, tang'asa intayu ilo shata te nkong'u ino makewan pee itumoki atoduaa oleng, aitayu ina tubuloi te nkong'u o lalashe lino.
6“Emincho ildiein entoki nasinya, niminang'akiki ilului#7.6 ilului: lulu, isoito sidain oogol enkinyiang'a inyi ilbitiro pee meituny too nkejek enye, neibelekenyakino intae aanya.
Entoomonu, Eng'oru, Entooshiosh
(Lk 11.9-13)
7“Entoomonu pee eishori intae; eng'oru naa itumutumu entooshiosh kutuk aji pee eboluni intae. 8Amu ore pooki oomonu neishori, ore olooshiosh neboluni. 9Anaa kalo tung'ani te intae laa, te neomon enkerai endaa, neisho ninye osoit? 10Aashu aa te neomon osinkirri, neisho olasurai? 11Aiti niyiololo intae oora torrok aaishoo inkera inyi inkishoorot sidain, kebaa eitulusoo naleng Papa linyi otii keper aisho intokitin sidain lelo oomon ninye? 12#Tob 4.15; Lk 6.31Metaa ore pooki niyieuu neitaas intae iltung'ana entaasa sii intae ninche nena, amu kuna nkitanapat o loibonok le Nkai.
Kishomi napirik
(Lk 13.24)
13“Entijing intae te nkishomi napirik amu dapash kishomi nelala enkoitoi nalo enkiminata, naa kumok iloojing ina kishomi nalala. 14Amu kepirik kishomi naa ronkai enkoitoi nalo enkishon, naa ilkuti ootum ina kishomi napirik.
Too lng'anayio eyiolouni olchani
(Lk 6.43-44)
15“Entorrip ate too loibonok le lejare oopuonu enitii eishopito inkilani oo ntare, kake ore atua ninche, naa isuyian ooata enkarri. 16#Esek 27.6Too lng'anayio lenye iyiolouu. Keitayuni isabibu too lkiku anaa ilng'abolo too ilkeek loo ilkiku? 17Neijia etiu, eiu pooki shani sidai ilng'anayio sidain, neiu pooki shani torrono ilng'anayio torrok. 18Meidim olchani sidai atoiu ilng'anayio torrok, nemeidim sii olchani torrono atoiu ilng'anayio sidain. 19#Mat 3.10; Lk 3.9Ore pooki shani lemeiu ilng'anayio sidain, nedung'i aauroo nenang'akini enkima. 20#Mat 12.33Neijia naa etiu, too lng'anayio lenye iyiolouu ninche.
Eitu aekata ayiolou intae
(Lk 13.25-27)
21“Mme pooki tung'ani laajo ‘Olaitoriani, Olaitoriani,’ ojing enkitoria e Nkai, kake ilo oas enayieu Papa lai otii keper. 22Aayooki aajoki ilkumok teina olong, ‘Olaitoriani, Olaitoriani, keitu kimbonisho te nkarna ino, nikiaraa iloiriruani te nkarna ino, nikiaas ine nking'asia te nkarna ino?’ 23#Olk 6.8Naa kashirraki ina kata ajoki ninche, ‘Eitu aekata ayiolou intae, enchom entung'uayioki intae, ilaasak loo ntorok.’
Ilbakunot aare ooduta
(Lk 6.47-49)
24“Metaa ore pooki ng'ae oning lelo rorei laainei neas, neitanyaanyukieki oltung'ani otesheta ng'en enkaji enye te ndapidapoi, 25nesha enchan, nenang'unye enkare, nekutu olkutati, neosh ina aji, neitu euroo; amu etuunokoki olkitamanyunoto lenye shumata endapidapoi.
26“Naa ore pooki ng'ae oning kulo rorei laainei nemeas, neitanyaanyukieki oltung'ani omoda otesheta enkaji enye te shumata osinyai; 27nesha enchan nenang'unye enkare, nekutu olkutati, neosh ina aji, neurori neaku kitok euroroto enye.”
28 #
Mk 1.22; Lk 4.32 Ore pee eidip Yesu kulo rorei, neing'asia siamon#7.28 siamon: Iltung'ana kumok, olorora kitok. te nkiteng'enare enye; 29amu eiteng'ena Yesu ninche anaa oloata enkidimata nemetiu anaa ilaiteng'enak lenye loo nkitanapat.
Currently Selected:
Matayo 7: BIBLIAPRO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018
