1 Ilkorinto 2
2
Olkilikuai oipirta Kristo otashoki
1Ore naa etiu nejia, lalashera laainei o nkanashera, eitu alotu enitii te nkarriyiano oo nkirorot aashu te ng'eno, apa pee alotu aliki intae ina sipata naisudoro e Nkai. 2Atumuta apa ajo mayieu nayiolou toki tiatua intae neme Yesu Kristo ake, naa ilo otashoki. 3#Iat 18.9Ore ina kata pooki atii atua intae kashal apa, naureisho naikirikira. 4Neitu aasishore irorei oomelok le ng'eno airorita o te likioroto ai, kake aataasishore enkitoduaaroto e Nkiyang'et o engolon, 5pee meaku eng'eno e tung'ani eitasheyie enkirukoto inyi kake te ngolon e Nkai eitashe.
Eng'eno nagol e Nkai
6Nikiaasishore ake sii irorei le ng'eno te lelo ootubulutua, kake mme eng'eno ele porror neme ene lelo ooitoreisho tele porror amu eidipa ninche aataa keish. 7Aa eng'eno e Nkai naisudoro kilimu, eng'eno naisudoro apake, naa Enkai naiguanua te nkiterunoto, te nkaraki enkitoo ang. 8#Bar 3.14-17Nemeetae hoo obo le lelo aitoriak lena kop otoning'uo ina, amu tenaa ketoning'utuo, anaata eitu epuo aashe Olaitoriani le nkitoo; 9#Isa 64.4; Esek 1.9,10kake, ore anaa enajo ilkigerot,
“Eneitu hoo edol enkong'u neitu hoo ening enkiok,
neitu hoo ejing oltau lo ltung'ani,
ninye eitobiraka Enkai lelo oonyor ninye.”
10Iyiook etaboloko Enkai kuna baa te Nkiyang'et. Enkiyang'et najur pooki toki, o metabaiki enguton e Nkai. 11Aing'ae nayiolo inaatii oltau lo ltung'ani neme enkiyang'et natii atua ilo tung'ani? Nejia naa etiu, Enkiyang'et e Nkai ake nayiolo inaatii oltau le Nkai. 12Mme nkiyang'et e na kop kitang'amutua iyiook kake enkiyang'et naing'uaa Enkai kitang'amutua, pee kitum aatayiolo nena kishoorot naaishoo Enkai iyiook. 13Ninye ena nikilimu, neme too rorei oolimu eng'eno e tung'ani kake too rorei ootuutaka iyiook Enkiyang'et neibalakinye nena e nkiyang'et lelo tung'ana le nkiyang'et. 14Menyorraa oltung'ani ake le nkop inkishorunot e Nkiyang'et e Nkai; emodai nena te ninye; nemening'u nena amu te nkiyang'et ake eidimi aatujur. 15Nejur ninye oltung'ani le nkiyang'et pooki toki, hoo nemeetae olojur ninye. 16#Isa 40.13Ae ng'ae doi, otayiolo indamunot o Laitoriani metaa keutaa ninye? Kake kiata endamunoto e Kristo.
Currently Selected:
1 Ilkorinto 2: BIBLIAPRO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018
