लूका 3
3
बप्तिस्मा देहुइया यूहन्नक सेवा
मत्ती ३:१-१२; मर्कूस १:१-८; यूहन्ना १:१९-२८
1रोमी राज्यम सिजर तिबेरिअसक#३:१ सिजर तिबेरिअसक बाबा लग्ना सिजर अगस्टस मुल त, ऊ रोमी साम्राज्यक द्वासर सम्राट हुइलह। शासन कर्लक पन्ध्र वर्ष होरलहन। उ ब्याला पन्तियस पिलातस यहूदिया क्षेत्रम बडाहाकिम,#३:१ सिजर तिबेरिअस पिलातसह यहूदिया, सामरिया, ओ इदुमीया क्षेत्रम शासन करक लाग बडाहाकिम नियुक्त कर्लह। पिलातसक प्रधान कार्यालय सिजरीयम रलहन, तर हुँकहार और प्रधान कार्यालय यरूशलेमम फे रलहन। हेरोद अन्तिपास गालील क्षेत्रम शासक,#३:१ हेरोद महान मुल त, हुँकहार शासन करल क्षेत्रह हुँकहार तीन भाइ छावन अर्किलौस, अन्तिपास ओ फिलिप द्वितीय बँट्ल। हेरोद अन्तिपास गालील ओ पेरिया क्षेत्रक शासक रलह। यिह हेरोद पाछ बप्तिस्मा देहुइया यूहन्नह काट लगैलह (लूका ९:९)। हिँकहार बाबा हेरोद महानजुन येशूह मुवैना कोसिस कर्लह (मत्ती २:१६-१८)। हेरोद अन्तिपासक भैया फिलिप इतुरिया ओ त्राखोनितिस क्षेत्रम शासक, ओ लुसानियास अबिलेने क्षेत्रम शासक रलह। 2हन्नास ओ कैयाफा जुन प्रधान पूजारीहुँक्र रलह। उह समयम जकरियक छावा उजार ठाउँम रहुइया यूहन्ना परमेश्वरक सन्देश पैल। 3तब यूहन्ना यर्दन लद्यक आसपासक इलाकम जाक असिक प्रचार कर्ल, “पाप क्षमा पाइक लाग आपन-आपन पापी मन परिवर्तन करल प्रमाणक रूपम बप्तिस्मा लेओ।” 4असिक अगमवक्ता यशैयक लिखल यी बात पूरा हुइल्:
“उजार ठाउँम चिल्ला-चिल्लाक बोलुइयक आवाज सुन्जाइटा,
‘प्रभु आइक लाग उहाँक मार्ग तयार पारो,
उहाँक डगर स्वाझ बनाओ।#यशै ४०:३-५
5सब गञ्ज्रीगुञ्ज्रा भाँठ परी
ओ सब पख्वापर्वत्वा सम्याइ परी।
टेँह्रिबाङ्गा डगर स्वाझ
ओ अरबर डगर रग्रगाँट् बनाइ परी।#३:५ यी पदक अर्थ हो: मनै परमेश्वरम शङ्का नैकरपरट्, तर पूरा विश्वास करपर्ठा, घमण्डी नैहुइपरट्, तर नम्र हुइपर्ठा।
6तब सब मनै परमेश्वरक देहल मुक्ति देखहीँ।’”
7बगालिक बगाल मनै बप्तिस्मा लिहेक लाग यूहन्नकठे अइल। तर यूहन्ना कल, “टुह्र साँपन्हक सन्तान! परमेश्वरक दण्डसे उम्क टुँहन के कहल?#मत्ती १२:३४; २३:३३ 8टुन्हक पापी मन परिवर्तन हुइलक प्रमाण टुन्हक्के जीवन ह्वाए। तर ‘हम्र अब्राहामक सन्तान हुइटी’ कटिम टुह्र उम्क पैबी कैक जिन सोँचो। मै टुँहन कहटुँ, परमेश्वर यी पत्थ्रमसे फे अब्राहामक लाग सन्तान उत्पन्न करसेक्ठ।#यूह ८:३३ 9रूख्वक जरीम कुह्रार परस्याकल। उहओर्से असल फारा नैफरैना सब रूख्वा ढलाजाई, ओ आगीम फाँकजाई।”#मत्ती ७:१९
10मनै यूहन्नह पुछ्ल, “ओसिन हो कलसे, हम्र का करी?”
11यूहन्ना हुँकन कल, “दुइठो झुल्वा रहल मनैया नङ्ट रहुइयह एकठो देह। ओसहेँक खैना चिज रहल मनैया भुँख्ल रहुइयनसे बाँट।”
12बप्तिस्मा लिह आइल कर उठुइयन फे यूहन्नह पुछ्ल, “गुरुजी, हम्र का करी?”#लूक ७:२९
13उहाँ हुँकन कल, “रोमी सरकारक त्वाकलसे धेर कर जिन उठाओ।”
14सिपाहीहुँक्र फे पुछ्ल, “हम्र का करी?”
ऊ हुँकन कल, “अत्याचार कैक या धम्की देक किहुह जिन लुटो। किहुह झूटा दोष जिन लगाओ। आपन तलबम सन्तोष रहो।”
15मनै मुक्ति देहुइया ख्रीष्ट हाली आजैहीँ कैक बट्या ह्यारँट्। हुँक्र यूहन्नह “ख्रीष्ट यिह हुइट कि?” कैक विचार करटलह। 16तब यूहन्ना हुँकन कल, “मै त पानीक बप्तिस्मा देठुँ। तर महीसे शक्तिशाली एक जन अइटीबाट। मै त उहाँक जुत्तक टेनी छोर्ना योग्यक फे नैहुइटुँ। उहाँ टुँहन पवित्र आत्मा ओ आगीले बप्तिस्मा देहहीँ। 17ओसैना सुपा उहाँक हाँठम बाटन। उहाँ अनाज ओसाक बखारीम ढरहीँ ओ भुसजुन कबु नैबुट्ना आगीम जरादेहीँ।” 18यूहन्ना अस्त-अस्त धेर अर्तीउपदेश देटी मनैन उत्साह देल ओ खुशीक खबर प्रचार कर्ल।
19यूहन्ना गालील क्षेत्रक शासक हेरोदह खुल्लमखुल्ला हप्कैल, काकरकि ऊ आपन भैयक गोसिन्या हेरोदियासह लेरख्लह ओ और धेर खराब काम कैरख्लह।#मत्ती १४:३-४; मर्क ६:१७-१८ 20तब हेरोद यूहन्नह जेलम डर्ल। असिक ऊ आपन धेर खराब कामम और एकठो खराब काम थप्ल।
येशूक बप्तिस्मा
मत्ती ३:१३-१७; मर्कूस १:९-११
21जेलम पर्नासे आघ, यूहन्ना मनैन बप्तिस्मा देहबेर, येशू फे बप्तिस्मा लिह अइल। बप्तिस्मा लिहबेर, येशू परमेश्वरसे प्रार्थना करटलह। तब स्वर्ग उघ्रल 22ओ पवित्र आत्मा ढुकुरक रूपम उहाँकम अइलन। तब स्वर्गसे असिन आवाज आइल, “टुँ म्वार प्रिय छावा हुइटो। मै टुँहीनसे धेर खुशी बाटुँ।”#उत २२:२; भज २:७; यशै ४२:१; लूक ९:३५
येशूक वंशावली
मत्ती १:१-१७
23येशू मनैन परमेश्वरक वचन सिखैना काम सुरु करबेर लगभग तीस वर्षक रलह। मनै येशूह योसेफक छावा कहँट्।
योसेफ एलिक छावा रलह।
24एलि मत्तातक छावा रलह।
मत्तात लेवीक छावा रलह।
लेवी मल्कीक छावा रलह।
मल्की यान्नक छावा रलह।
यान्ना योसेफक छावा रलह।
25योसेफ मत्ताथियासक छावा रलह।
मत्ताथियास आमोसक छावा रलह।
आमोस नहूमक छावा रलह।
नहूम इसलीक छावा रलह।
इसली नग्गैक छावा रलह।
26नग्गै माथक छावा रलह।
माथ मत्ताथियासक छावा रलह।
मत्ताथियास सेमैनक छावा रलह।
सेमैन योसेखक छावा रलह।
योसेख योदक छावा रलह।
27योदा योआनन्क छावा रलह।
योआनन् रेसक छावा रलह।
रेसा यरुबाबेलक छावा रलह।
यरुबाबेल शालतिएलक छावा रलह।
शालतिएल नेरीक छावा रलह।
28नेरी मल्कीक छावा रलह।
मल्की अद्दीक छावा रलह।
अद्दी कोसामक छावा रलह।
कोसाम एलमादमक छावा रलह।
एलमादम एर्क छावा रलह।
29एर् यहोशूक छावा रलह।
यहोशू एलीएजरक छावा रलह।
एलीएजर योरीमक छावा रलह।
योरीम मत्तातक छावा रलह।
मत्तात लेवीक छावा रलह।
30लेवी शिमियोनक छावा रलह।
शिमियोन यहूदक छावा रलह।
यहूदा योसेफक छावा रलह।
योसेफ योनानक छावा रलह।
योनान एल्याकीमक छावा रलह।
31एल्याकीम मलेअक छावा रलह।
मलेआ मिन्नक छावा रलह।
मिन्ना मत्ताथक छावा रलह।
मत्ताथा नातानक छावा रलह।
नातान दाऊदक छावा रलह।
32दाऊद यिशैक छावा रलह।
यिशै ओबेदक छावा रलह।
ओबेद बोअजक छावा रलह।
बोअज सल्मोनक छावा रलह।
सल्मोन नहशोनक छावा रलह।
33नहशोन अम्मीनादाबक छावा रलह।
अम्मीनादाब आरामक छावा रलह।
आराम हेस्रोनक छावा रलह।
हेस्रोन फारेसक छावा रलह।
फारेस यहूदक छावा रलह।
34यहूदा याकूबक छावा रलह।
याकूब इसहाकक् छावा रलह।
इसहाक अब्राहामक छावा रलह।
अब्राहाम तेरहक छावा रलह।
तेरह नाहोरक छावा रलह।
35नाहोर सरुगक छावा रलह।
सरुग रऊक छावा रलह।
रऊ पेलेगक छावा रलह।
पेलेग एबेरक छावा रलह।
एबेर शेलहक छावा रलह।
36शेलह केनानक छावा रलह।
केनान अर्पक्षदक छावा रलह।
अर्पक्षद शेमक छावा रलह।
शेम नोअक छावा रलह।
नोआ लेमेखक छावा रलह।
37लेमेख मतुशेलहक छावा रलह।
मतुशेलह हनोकक् छावा रलह।
हनोक येरेदक छावा रलह।
येरेद महलालेलक छावा रलह।
महलालेल केनानक छावा लरह।
38केनान एनोशक छावा रलह।
एनोश सेतक छावा लरह।
शेत आदमक छावा रलह।
आदम परमेश्वरक छावा रलह।#३:३८ आदम परमेश्वरक छावा रलह: जौन हिसाबले येशू परमेश्वरक छावा रलह, उह हिसाबले आदम परमेश्वरक छावा नैरलह। आदम एकठो मनैया केल रलह ओ परमेश्वरक बराबरम कसहोँक फे नैरलह। ऊ परमेश्वरद्वारा सृष्टि कैगैल ओ परमेश्वर बाबाअसक होक हुँकहार वास्ता कर्ल। यी अर्थम, ऊ परमेश्वरक छावा हुइट। यिह अर्थम, हम्र, आदमक सन्तान हुइलकओर्से, परमेश्वरक छाई-छावन हुइटी। जे होस, येशू पूर्ण मनै ओ पूर्ण परमेश्वर रलह।
Currently Selected:
लूका 3: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
