लूका 2
2
येशू जन्मलक
मत्ती १:१८-२५
1उ समयम सिजर अगस्टस आपन रोमी राज्यभर मनैन्हक जनगणना लेहहो कैक हुकुम देल। 2रोमी राज्यम पैल्हक फ्यारा लिहल मनैन्हक जनगणना हो यी। उ ब्याला सिरिया क्षेत्रम कुरेनियस बडाहाकिम रलह।#२:२ गालील क्षेत्रक उत्तरओर अवस्थित सिरिया क्षेत्र रोमी साम्राज्यक एकठो क्षेत्र रह, जहाँक बडाहाकिम गालील ओ यहूदियम फे अधिकार चलाइँट्। कुरेनियसजुन उ क्षेत्रम शासन करक लाग रोमी सरकारक नियुक्त करल बडाहाकिम रलह। रोमी सम्राटसे हुँकहार लग्घक सम्बन्ध रलहन ओ उ एकठो शक्तिशाली सैनिक कमान्डर रलह। 3सबजन नाउँ लिखाए आपन-आपन पुर्खन्हक सहरम जाइटलह।
4योसेफ गालील क्षेत्रक नासरत सहरसे राजा दाऊदक सहर#२:४ दाऊदक सहर: दाऊदक सहर कलक दाऊदक राज्य करल सहर नैहो, तर उहाँ जन्मलक ओ हुर्कलक सहर हो। योसेफ नाउँ लिखाइक लाग आपन बैठल सहर नासरतसे बेथलेहेमम गैल। यहूदिया क्षेत्रक बेथलेहेमम गैल, काकरकि योसेफ दाऊद वंशक रलह। 5योसेफसे भ्वाज हुइना कैक मरियमक ठकौनी खैलकओर्से, योसेफ मरियमह आपनसँग लेक नाउँ लिखाए गैल।#२:५ आपनसँग लेक नाउँ लिखाए गैल: येशू वास्तवम योसेफक छावा नैरलह, काकरकि येशू जन्मट्सम मरियम ओ योसेफ एक्कम नैसुत्लरलह। येशूक वास्तविक बाबा त परमेश्वर रलहन। हेरी लूका १:३१-३५। उ ब्याला मरियम गर्भवती रलही। 6हुँक्र उहँ रहलम मरियमक लर्का जन्मैना दिन पुग्गैलिन। 7धर्मशालम ठावँ नैरलकओर्से मरियम पैल्हा छावा गोठोम जन्मैली ओ लुगले सेहँर्क सुतैली।
भेँरी चह्रुइयन ओ स्वर्गदूत
8उह गाउँक लग्घ डँरोम भेँरी चह्रुइयन रात्क आपन भेँरीन्हक रेखदेख करँट्। 9प्रभुक स्वर्गदूत एकचोट्टे हुँकन्हकठे देखपर्ल त परमप्रभुक तेज अजरार हुँकन्हकम झ्वाल्लसे चम्कलिन्। यी देख्क हुँक्र बरा जोरसे डरैल। 10तब स्वर्गदूत हुँकन् कल, “जिन डराओ, काकरकि मै सक्कु मनैन् आनन्द लग्ना खुशीक खबर लेक टुन्हकठे आरनु। 11आज दाऊदक सहरम मुक्ति देहुइया ख्रीष्ट प्रभुक जन्म होरलन। 12टुह्र यी चिन्हले उहाँह चिह्न्बो: टुह्र लर्कह लुगले सेहँर्क ड्वाँरम सुताइल देख्बो।”
13तबहेँ उ स्वर्गदूतकसँग और धेर स्वर्गदूत असिक परमेश्वरक प्रशंसा करँट् देखपर्ल,
14“सर्वोच्चम रना परमेश्वरह
महिमा ह्वाए,
पृथ्वीम जौन मनैनसे उहाँ खुशी बाट,
हुँकन शान्ति ह्वाए।”
15असिक प्रशंसा कैक स्वर्गदूत स्वर्गम घुम्ल। हुँक्र स्वर्गम घुम्ल त भेँरी चह्रुइयन अप्न-अप्न कल, “चोलो, हम्र बेथलेहेमम जाक उहाँ घटल घटना ओ परमप्रभुक कहल बात हेरी।”
16हुँक्र झट्ट-झट्ट गैल, त मरियम, योसेफ ओ ड्वाँरम सुताइल लर्कह भेँटैल। 17हुँक्र उ लर्कह देख्ल त, उहाँक बारेम स्वर्गदूतन्हक कहल बात सबजहन सुनैल। 18यी बात सुनुइयन सबजन छक्क पर्ल। 19तर मरियम यी सब बात मनम ढर्लरली ओ याकर अर्थ का हुई कैक सोँच्टीरली। 20भेँरी चह्रुइयन ज्या सुनरख्लह, उह देख्लकओर्से हुँक्र परमेश्वरक महिमा ओ स्तुति कर्टी घुम्ल।
येशूह मन्दिरम अर्पण कर्लक
21लर्का जन्मलक आठवाँ दिनम, लर्कक् खतना कैगिलन। ओ हुँक्र उहाँक नाउँ येशू ढर्ल, काकरकि मरियम गर्भवती हुइनासे आघ स्वर्गदूतक देहल नाउँ रह यी।#लेवी १२:३; लूक १:३१
22लर्का पाक मोशक व्यवस्था अनुसार हुँकन्हक च्वाखा हुइना दिन पुग्लन त, हुँक्र लर्कह परमेश्वरक आघ अर्पण कर यरूशलेमक मन्दिरम#२:२२ यरूशलेमक मन्दिरम: लर्का अर्पण कर्ना काम मन्दिरक एकठो चोकम करँट्। लैगैल।#लेवी १२:६-८ 23काकरकि परमप्रभुक व्यवस्थम “पैल्ह जन्माइल छावह परमेश्वरक आघ अर्पण करपर्ठा” कैक लिखल बा।#प्रस १३:२,१२ 24च्वाखा हुइक लाग परमप्रभुक व्यवस्था अनुसार हुँकन ढुकुर या परेउनक एक जोह्र्या छौना बलि चह्राइपरन। उहओर्से हुँक्र बलि चह्राए गैल।
शिमियोन परमेश्वरक प्रशंसा कर्लक
25उह समयम यरूशलेमम शिमियोन नाउँ रहल एकठो मनैया रलह। ऊ धर्मी जीवन जियँट् ओ परमेश्वरक भक्ति करँट्। ऊ पवित्र आत्मक अगुवाइ पाइल मनै रलह ओ इस्राएलीन मुक्ति देहुइया ख्रीष्टक बट्या ह्यारँट्। 26हुँकहीन “टुँ परमप्रभुक पठाइल ख्रीष्टह नैद्याखट्सम नैमुबो” कैक पवित्र आत्मा आघहेँ थाहाँ देरख्लहन। 27पवित्र आत्मक अगुवाइ पाक शिमियोन मन्दिरक अङ्नम गैल। मोशक व्यवस्था अनुसार मरियम ओ योसेफ येशूह अर्पण कर मन्दिरम आनल ब्याला शिमियोन उहँ रलह। 28शिमियोन लर्कह क्वारम लेक परमेश्वरक प्रशंसा कर्टी कल,
29“हे परमप्रभु, अप्नक कहल बात लागल।
आब मै अप्नक दास शान्तिसे मुव पाऊँ,
30काकरकि मै आपनऽ आँखिले मुक्ति देहुइयह द्याख पैनु।
31अप्न सब जातिक मनै
मुक्ति देख्नागरी उहाँह पठारख्ली।
32उहाँ यहूदी जात नैरहल मनैन
डगर देखैना अजरारअसक हुइट,
ओ हम्र इस्राएलीन्हकम आदर अनुइया फे उहँ हुइट।”#यशै ४२:६; ४९:६; ५२:१०
33येशूक डाई-बाबा आपन लर्कक् बारेम शिमियोनक कहल बात सुन्क छक्क पर्ल। 34शिमियोन हुँकन आशिष देल ओ लर्कक् डाई मरियमह कल, “परमेश्वरक पक्का करल बात का बा कलसे, यी लर्कक् कारण इस्राएलम धेर जन्हक पतन हुहीन ओ धेर जन्हक उत्थान हुहीन। परमेश्वर उहाँह एकठो चिन्हक रूपम पठारख्ल, तर धेर जन उहाँह इन्कार करहीँ, 35ओ असिक हुँकन्हक विचार प्रकट हुहीन। तब टुँ फे तरवालले मुटुम ग्वाभलअस दुःखक अनुभव कर्बो।”
हन्ना परमेश्वरक प्रशंसा कर्लक
36उहब्याला हन्ना नाउँक अगमवादिनी अइली। ऊ आशेर कना कुलक फनुएलक छाई रलही। ऊ भ्वाज हुइलक साती वर्षम विधवा हुइलही ओ आम्हीसम विधवऽ पलरलही। 37ऊ धेर बुह्रारलही, चौरासी वर्षक होरलही। ऊ सड्ड परमेश्वरक आराधना कर्टी रातलाग मन्दिरम पलिरहँट् ओ ब्रत रह्क परमेश्वरसे प्रार्थना फे करँट्। 38योसेफ ओ मरियम शिमियोनकठे पलरहल समयम, हन्ना हुँकन्हकठे जाक परमेश्वरक प्रशंसा कर्ली, ओ इस्राएलक छुट्कारक बट्या हेरुइयन् येशूक बारेम बटोइली।
39परमप्रभुक व्यवस्था अनुसार करपर्ना सक्कु काम सेक्क मरियम ओ योसेफ गालील क्षेत्रक नासरत सहरम रहल आपन घर घुम्ल।#मत्ती २:२३ 40नाबालक येशू हुर्कटी ओ बलगर हुइटीगैल, उहाँक अक्किलबुद्धि अइटी गैलन। परमेश्वरक अनुग्रह उहाँक जीवनम रलहन।
येशू मन्दिरम
41येशूक डाई-बाबा आपन चलन अनुसार “यहूदी मुक्ति-दिवस” कना टिहार मनाए सालो यरूशलेम जाइँट्।#प्रस १२:१-२७; व्य १६:१-८ 42येशू बाह्र वर्षक हुइल त मुक्ति-दिवस मनाए हुँक्र उहाँह लेक यरूशलेम गैल। 43मुक्ति-दिवस मनाक सेक्ल त हुँक्र घरओर घुम्ल। तर येशू यरूशलेमम पलरल। यी बात उहाँक डाई-बाबह थाहाँ नैरलहन। 44येशू बगालिम केक्रोसँग अइटीहुहीँ कना सोँच्क हुँक्र दिनभरिक डगर नेङ्ल। सन्झ्यासम फे हुँक्र उहाँह नैदेख्ल त आपन नातपात ओ चिन्हल मनैन्हक बगालिम उहाँह खोज्ल। 45आपन छावह नैभेटैल त हुँक्र उहाँह ख्वाज यरूशलेमओर घुम्ल। 46हुँक्र उहाँह तीसर दिन मन्दिरम भेँटैल। उहाँ यहूदी गुरुनसे बैठ्क हुँकन्हक बात ओनैने प्रश्न पुछ्ने करटलह। 47येशूक अक्किलबुद्धि ओ जवाफ सुन्क सबजन छक्क पर्ल। 48उहाँक डाई-बाबा उहाँह हुँकन्हकठे बैठल देख्क धेर अचम्म मन्ल। उहाँक डाई कली, “छावा, टुँ हमनसे असिक नैकरपर्नारह। हेरो! टुँहार बाबा ओ मै पीरले टुँहीन खोज्टीअइली।”
49येशू हुँकन कल, “टुह्र महीह काजे ख्वाज परल? मै आपन बाबक घरम रहपर्ठा कना का टुँहन थाहाँ नैरह?” 50तर येशूक बात हुँक्र नैबुझ्ल।
51तबदोस्र येशू आपन डाई-बाबकसँग नासरत घुम्ल ओ हुँकन्हक आज्ञाकारीम पलरल। उहाँक डाई यी सब बात आपन मनम ढर्लरली। 52असिक येशू बुद्धिम ओ शरीरम हुर्कटीगैल, ओ उहाँ परमेश्वर ओ मनैन्हक निगाहा पैटिरल।#१ शमू २:२६; हितो ३:४
Currently Selected:
लूका 2: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
