लूका 4
4
येशूक परीक्षा
मत्ती ४:१-११; मर्कूस १:१२-१३
1येशू पवित्र आत्मक अगुवाइ पाक यर्दन लद्यमसे घुम्ल। तब पवित्र आत्मा उहाँह उजार ठाउँम लैगैलन। 2उ ठाउँम येशू चालीस दिनसम रहबेर शैतान उहाँक परीक्षा करल। उ समयम कुछु नैखैलकओर्से उहाँह महा कर्रसे भुँख लग्लन।
3तब शैतान उहाँह कहल, “यदि अप्न परमेश्वरक छावा हुइटी कलसे, यी पत्थ्रह रोटी बनाई।”
4येशू कल, “धर्मशास्त्रम असिक लिखल बा, ‘मनै खैना चिजले केल नैबच्ट।’”#व्य ८:३
5तबदोस्र शैतान येशूह ढ्याङ ठाउँम लैजाक एक्कघरीम संसारक सब राज्य देखाइल। 6शैतान उहाँह कहल, “मै यी सारा राज्यक अधिकार ओ गौरव अप्नह देहम, काजेकलसे यी सब महीह देगैल् बा। मै चहलसे जेहीह फे देहसेक्ठुँ। 7महीह दण्डवत् कर्बी कलसे, यी सब अप्नक होजाई।”
8येशू कल, “धर्मशास्त्रम असिक लिखल बा, ‘टैँ परमप्रभु परमेश्वरह केल दण्डवत् करस ओ उहाँक केल सेवा करस।’”#व्य ६:१३
9शैतान येशूह यरूशलेमम लैगैल्, ओ उहाँह मन्दिरक टुप्पम लैजाक कहल, “यदि अप्न जाट्टीसे परमेश्वरक छावा हुइटी कलसे, यिहाँसे फन्की, 10काजेकलसे धर्मशास्त्रम असिक लिखल बा:
‘परमेश्वर आपन स्वर्गदूतन
टुँहार रक्षा करक लाग अह्रैहीँ।#भज ९१:११
11तब टुँहार पौली पत्थ्रम नैठोक्याई कैक
हुँक्र आपन हाँठले टुँहीन ठाम्डरहीँ।’”#भज ९१:१२
12येशू ओहीह कल, “धर्मशास्त्रम यी फे लिखल बा, ‘टैँ परमप्रभु आपन परमेश्वरक परीक्षा जिन करस।’”#व्य ६:१६
13असिक शैतान हरकिसिमले येशूक परीक्षा कैक स्याकल् त, और मौका नैआइट्समक लाग उहाँह छोर्क चलगैल्।
येशूक सेवा सुरु
मत्ती ४:१२-१७; मर्कूस १:१४-१५
14तबदोस्र येशू पवित्र आत्मक शक्ति पाक गालील क्षेत्रम घुम्ल। उहाँक बारेम खबर आसपासक इलाकम फैलल्। 15उहाँ उ क्षेत्रम सभाघर-घरम जाक मनैन सिखाइँट्, ओ मनैजुन उहाँक प्रशंसा करँट्।
नासरत सहरम येशूह इन्कार
मत्ती १३:५३-५८; मर्कूस ६:१-६
16येशू आपन हुर्कलक सहर नासरतम घुम्ल ओ सड्डकअस बिसैना दिनम सभाघरम गैल। उहाँ धर्मशास्त्र पह्रक लाग ठह्रेइल त, 17उहाँह यशैया अगमवक्तक लिखल किताब#४:१७ किताब: उ समयम प्रयोग कैजिना किताब आजकाल प्रयोग कैजिना किताबअस नैरह। उ किताब विशेष कागतक नम्मा पन्नम लिखल रह, ओ नैपहर्ना समयम उ किताब सुरक्षासहित ढरक लाग बेरजाए (उप्रक चित्र हेरी)। यी अवस्थम, परमेश्वरक आराधना कर्ना ओ उहाँक वचन सिखैना समयम सार्वजनिक रूपले पह्रक लाग पुरान नियमक धेर किताब सभाघरम ढैजाए। देलन। येशू किताब बिठ्नाक यी खण्ड निक्रैल ओ पहर्ल,
18“परमप्रभुक आत्मा म्वारम बा,#४:१८ परमप्रभुक आत्मा म्वारम बा: याकर मतलब येशू बप्तिस्मा लेहबेर उहाँकम ढुकुरक रूपम पवित्र आत्मा अइल घट्ना हो (हेरी लूका ३:२२)।
काकरकि गरीब मनैन खुशीक खबर सुनाइक लाग
परमेश्वर महीह नियुक्त कैरख्ल।
कैदम परल मनैन छुट्कारा देहक लाग,
आन्धर मनैन देख्नाहा बनाइक लाग,
थिचोमिचोम परल मनैन मुक्ति देहक लाग,#यशै ६१:१-२
19ओ परमप्रभु मनैन दया देखैना वर्ष आरहल कैक घोषणा करक लाग
परमेश्वर महीह पठारख्ल।”
20येशू किताब बन्द कैक सेवकह देल ओ सिखाइक लाग बैठ्ल।#४:२० सिखाइक लाग बैठ्ल: सिखैना मनैया सिखाइक लाग बैठ्ना उ समयक चलन रलहन। सभाघरम रहल सबजन्हक नजर उहाँकम रलहन। 21तब येशू हुँकनसे बट्वाइलग्ल, “धर्मशास्त्रम लिखल यी वचन आज टुह्र सुन्टी-सुन्टी पूरा होरहल।”#४:२१ यिहाँ येशू अप्न मुक्ति देहुइया रलक बात बट्वाइट जौन बात यशैयक्मसे लेगैल् खण्डम बट्वागैल् बा। और अर्थम, उहाँ ख्रीष्ट रलह जेहीह यहूदीहुँक्र हुँकन पाप ओ बन्धनमसे मुक्ति देहक लाग अश्या लग्लरलह।
22सबजन उहाँक प्रशंसा कर्ल ओ उहाँक कृपापूर्ण वचन सुन्क छक्क पर्ल। हुँक्र कल, “का यी योसेफक छावा नैहुइट?”
23तब येशू हुँकन कल, “टुह्र पक्क फे महीह यिह आहान त कबो, ‘ऐ बैदावा, पैल्ह अपन्हेह चोखाओ,’#४:२३ ऐ बैदावा, पैल्ह अपन्हेह चोखाओ: यी उखानक मतलब हो: आपन नातपात ओ चिन्हल मनैन्हक भलाइ कर इन्कार कर्ना मनै औरजन्हक भलाइ कर नैपरट्। हुँक्र स्वाँचट कि येशू (जेहीह हुँक्र सामान्य व्यक्ति मन्लबाट) अप्न मुक्ति देहुइया रहल बात कहट। याकर मतलब, यदि उहाँ मुक्ति देहुइया हुइट कलसे, और ठाउँम उहाँ अचम्मक काम करलअस आपन गाउँम कैक देखाइपरल, अचम्मक काम कैक नैदेखाइट्सम ओसिक घमण्ड नैकरपरल। येशू हुँकन्हक स्वाँचल यिह बातह व्यक्त करट। अर्थात् ‘कफर्नहुमम करलअस यिहाँ आपन सहरम फे अचम्मक काम करो।’ 24जाट्टीसे मै टुँहन कहटुँ, कौनो अगमवक्तह फे आपन गाउँक मनै स्वीकार नैकर्ट।#यूह ४:४४ 25म्वार वचन सत्य हो, एलियक समयम तीन वर्ष छ मैन्हासम खडेरीक कारण सारा देशम भारी अनिकाल परल रह। उ ब्याला इस्राएलम धेर विधवन रलह।#१ राज १७:१; याक ५:१७ 26परमेश्वर एलियह उ देशक कौनो विधवकठे फे नैपठैल, तर सीदोन क्षेत्रक सारपत गाउँम एकठो विधवकठे केल पठैलह।#१ राज १७:८-१६ 27ओसहेँक एलिशा अगमवक्तक समयम इस्राएलम धेर कोररोगिन रलह। तर परमेश्वर सिरिया देशक नामानह बाहेक और कौनोजहन नैचोखैल।”#२ राज ५:१-१४
28यी सुन्क सभाघरम रहल सब मनै रिसले चूर हुइल। 29हुँक्र जर्याकजुरुक उठ्क येशूह घुचेट्टी सहरसे बाहर निक्रैल। हुँकन्हक यी सहर पर्वत्वम रलहन। हुँक्र उहाँह उह पर्वत्वक भीरमसे गिराइ खोज्ल, 30तर उहाँ हुँकन्हक बीचमसे निपुच्क चलदेल।
भूतन हप्कैना अधिकार
मर्कूस १:२१-२८
31तबदोस्र येशू गालील क्षेत्रक कफर्नहुम सहरम गैल ओ बिसैना दिन सभाघरम जाक सिखाइलग्ल। 32उहाँक शिक्षा सुनुइयन छक्क पर्ल काकरकि उहाँ पूरा अधिकारसे सिखाइँट्।#मत्ती ७:२८-२९
33उ घरम भूत्वा लागल एकठो मनैया फे रह। ऊ चिल्लैटी कहल, 34“नासरतक येशू, हमन का कराइक लाग बाटी? का अप्न हमन नाश कर आरली? मै चिह्न्ठुँ, अप्न परमेश्वरक पठाइल पवित्र जन हुइटी।”
35येशू ओहीह असिक हप्कैल, “चूप लाग्! ओहीह छोर्!” तब भूत्वा उ मनैयह सबजन्हक सामुन्नेम मूर्छा पारल ओ ओहीह छोर्क गैल्। तर ओहीह कुछु च्वाटपटक नैलग्लस।
36यी देख्क सबजन छक्क पर्ल ओ अप्न-अप्न कहलग्ल, “हिँकहार बोली कसिन बाटन! हिँकाहारठे भूतन हप्कैना अधिकार ओ शक्ति बाटन, ओ हुँक्र हिँकहार कहल मन्ठ!” 37तब कफर्नहुम सहरक आसपासक इलाकम येशूक बयान फैल्लन।
धेर जन चोखैलक
मत्ती ८:१४-१७; मर्कूस १:२९-३४
38येशू सभाघरमसे निकर्क सिमोनक घर गैल। सिमोनक सासू जरकमार एकदम बेराम रलही। ओठे रहल मनै “हुँकहीन चोखादी” कैक येशूसे बिन्ती कर्ल। 39तब उहाँ हुँकहार पन्ज्र जाक जरह “छोर्!” कना आज्ञा देल, ओ हुँकहीन जर छोर्लिन्। तबदोस्र ऊ जुरुक्कसे उठ्गैली ओ उहाँहुँकन्हक मानमर्जाट् करलग्ली।
40दिन बुरबेर, मनै येशूकठे धेर किसिमक रोग लागल मनैन अन्ल। उहाँ हुँकन्हकम हाँठ ढै-ढैक सबजहन चोखैल। 41भूत उहाँह “अप्न परमेश्वरक छावा हुइटी” कैक चिल्लैटी मनैन छोर्ल। हुँक्र उहाँह ख्रीष्ट हुइट कैक चिह्न्लकओर्से, उहाँ हुँकन हप्काक ब्वाल नैदेल।#४:४१ ब्वाल नैदेल: भूत येशूक बारेम बट्वाइल बातले नाहीँ, तर उहाँकऽ ब्वालल् वचन ओ करल कामले मनै उहाँह “मनैन मुक्ति देहक लाग आइल ख्रीष्ट” हुइट कैक चिन्हहीँ कना उहाँक विचार रहलहुँहीन। सायद यिहकारणले, येशू भूतन ब्वाल नैदेल (मर्कूस ३:१२ हेर्क तुलना करी)।
यहूदिया क्षेत्रम वचन प्रचार कर्लक
मर्कूस १:३५-३९
42द्वासर दिन बिहान्क, येशू सुनसान ठाउँम गैल, तर मनै उहाँह खोज्टी गैल। हुँक्र उहाँह भेँटैल त, “हमन जिन छोरी” कैक बिन्ती कर्ल। 43तब येशू जवाफ देल, “मै और-और सहरम फे जाक परमेश्वरक राज्यक बारेम खुशीक खबर प्रचार करपर्ठा, काकरकि यिह कामक लाग परमेश्वर महीह पठारख्ल।” 44असिक उहाँ सारा यहूदिया क्षेत्रम सभाघरम जाक प्रचार कर्ल।
Currently Selected:
लूका 4: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
