छाम्माय़ङ 3
3
अ़क्छा पेसोला नुवाओ
1अ़क लेन पत्रुस खोन्कि युहन्ना यहुदिचिओ यामात्मा ग़रि लिसाकि अ़खोलेन सुम्काकोम साङाहिदा निनाम्हाङ ब़क्खाखिम्दु यामात्सि लोन्ताङाचि। 2अ़माआ तोक्तुओ ग़रिदाङ्काङा अ़क्छा पेसोला म़ना युङाङा, खो अ़लेन्खिन्तुम अ़म़नाचिआ अ़खुयाताराकि खान्नुओनि अ़लोवाङाओ निनाम्हाङ ब़क्खाखिम्ओ अ़वाङ्खा लाम्दा निनाम्हाङ ब़क्खाखिम्दा कावाङ म़नाचिएदा फेक्वा दोत्ने निकिना अ़युङ्सादाङा। 3पत्रुस खोन्कि युहन्ना निनाम्हाङ ब़क्खाखिम्ओ अ़बुक्लुङ्दा वाङ्मा मुवाङाचिओ खाचिकि खोसाआ मोचि फेक्वा दोत्तुचि। 4पत्रुस खोन्कि युहन्नाआ खो नुलोक अ़चोआदिसाचु, खोन्कि पत्रुस्आ खो लो, “आन्काच्याएदात्नि खाचोवा!” 5खोन्किना खोसाआ दिदि अ़प़ङाच़ङ हे नि मिनाकि खोचि चोउचि। 6खोन्किना पत्रुस्आ खो लो, “अ़ङ्काएदा हाराक्वा खोन्कि रुपा ना मात्द़ङ, मेन दि अ़ङ्काएदा युङ्याङ, मो अ़ङ्का खाना प़ना। नासरत्ओ येसु ख्रिस्तओ अ़चुऩङ्दा कोला!” 7खोन्किना मो म़नाओ अ़चुप्ताङ्छुक्दा लाउकि पत्रुस्आ पुउलोइसु, खोन्कि मोन्ग़रिङा मो म़नाओ अ़लाङ्चि खोन्कि अ़लाङ्म़क्चि म़नुवा। 8खोन्किना खो पुवालोन्ताकि ओह्यात्नि-मोह्यात्नि कोन्मा पुङ्सु। खोन्किना खो कोन्याङ्सा तान्याङ्सा निनाम्हाङ्ओ अ़चुऩङ चोन्याङ्सा खोचिएनान निनाम्हाङ ब़क्खाखिम्दा वाङा। 9मोदाओ झारा म़नाचिआ खो कोलाङाओ खोन्कि निनाम्हाङ्ओ अ़चुऩङ चोन्तुङुओ अ़खा। 10खोन्कि मोचिआ निनाम्हाङ ब़क्खाखिम्दाओ खान्नुओनि अ़लोवाङाओ वाङ्खा लाम्दा अ़धुन चा दोत्याङ्सा कायुङ ओ म़नाङा ओ निकिना अ़सिन्ता, खोन्कि खो देत्निकि ओन्ग़रि कोन्मा रुवा निकिना मोचि झारा अ़न्नुनु दोम्तुदोचि।
निनाम्हाङ ब़क्खाखिम्दा पत्रुस्ओ अ़य़ङ्खान
11खोन्किना मो चाकादोत्आ पत्रुस खोन्कि युहन्ना अ़ऩङानुमाआ मान्लेत्दोचिहिदा झारा मोदाओ म़नाचि दोम्तुदोचि, खोन्किना सोलोमन सिकुवानि अ़लोवाङाओदा झारा म़नाचि खोचिएदा लोत्याङ्सा म़ता। 12पत्रुस्आ मो म़नाचि खाचिकि मोचि लोचि, “इस्राएलि अ़ङ्यावाचि ओ, ओ पेसोला म़ना नुवाओदा देकि खानानिन त़दोम्तिन्दान्येन? खोन्कि खानानिन देकि आन्काच्याएदात्नि होन्नि त़चोप्निङ्नि? आन्काच्या आन्चुवाओ सावा खोन्कि साम्योक्आ ओ काकोन मुवाचुवाओनि खानानिन त़मिनिन्येन? 13अब्राहाम्ओ अ़निनाम्हाङ, इसहाक्ओ अ़निनाम्हाङ खोन्कि याकुब्ओ अ़निनाम्हाङ, आन्सुन्तुम्चिओ अ़चुनिनाम्हाङ्आ अ़चुछा येसुओ अ़चुऩङ तोक्पो अ़मुवा। खानानिन्आ ओ येसु रोमि हाङ्काचि कामुचि त़लाप्तुम्प़म्च़म, खोन्कि पिलातस्आ खोक्को लेत्मा अ़छ़ङ मुनुछाङ खानानिन खोसोओ अ़बुदा मान्काङ्त़दान। 14मेन खानानिन सेङ्याङ्ओ खोन्कि साम्योक्मि येसु ऩङात़छिरुम्कि आम्नुओ निकि पिलातस्एदा अ़क्छा म़नाकासेत लेत्प़त़लुन। 15खोन्कि खानानिन्आ अ़लुक्निन्ओ ह़ङ्म़ङ काप़पा येसु रोमि रात्खामिचि सेत्त़मेत्तुम्च़म, मेन निनाम्हाङ्आ खोक्को म़सुवादाओदाङ्का अ़लासाखोन्तालोइसा। खोक्को म़खोन्तालोन्ताओ आन्काच्या खायुङ्साचुवा। 16येसुओ अ़चुऩङ्दा साकोङ्छ़ङ मुन्काओसा ओ पेसोला म़ना नुवायुङ्सा। ओ पेसोला बुया देत्नि मुवाङाओ खानानिन त़खाम्ओङा ओ, खोन्कि त़सिन्तुम्योम्ओङा ओ। खो येसुएदा साकोङ्छ़ङ मुवाओसा खानानिन्आ त़खाम्योम्हिदाङा निनाम्हाङ्आ खो नुलोक अ़नुसा। 17हान, ब़ब़, नाना खोन्कि निछाचि ओ, अ़ङ्का सिन्तुङ्योङ, खानानिन खोन्कि आम्नुओ बुसुवाचिआ मान्सिन्त़दोम्ओसा येसु त़सेरुम्ओ। 18मेन ख्रिस्तआ दुखा आङ्मादोत निकिना निनाम्हाङ्आ ब़द्धे बुया झारा निनाम्हाङ्य़ङ खाकालुचिलाम्पा म़चेवाओ य़ङ खोक्कोसाआ अ़तासाला। 19खोन्ओसा हेवा मुमा छिरानुम्कि निनाम्हाङ्एदा लासानिन, खोन्किना निनाम्हाङ्आ आम्नुओ हेवाचि ऩलेत्तिन्प़न। 20खोन्किना निनाम्हाङ्आ खानानिन सावातोम्मा ऩप़न, खोन्कि बुयाङा अ़छेन्ताओ कालेन्पा ख्रिस्त येसु निनाम्हाङ्आ खानानिन ऩछुत्तिन्छोक्तिन। 21येसु ओन्ग़रि निनाम्मादु म़युङ्याङ। खोन्कि निनाम्हाङ्आ झारा सामाचि अ़ऩङ्वा अ़मुकि ओन्ङा खोक्को म़य़। मो य़ङ आराङ्राङ निनाम्हाङ्आ म़सेङ्याङ्ओ निनाम्हाङ्य़ङ खाकालुचिलाम्पा म़चेवायुङ्सा। 22मोसा य़ङायुङ्सा, ‘हाङ्पा निनाम्हाङ्आ अ़ङ्का ऩछेन्ताङ्वात्नि आम्नुओ म़नाचिदाङ्का अ़ङ्कावाको अ़क्छा निनाम्हाङ्य़ङ खाकालु अ़छेन। खोक्कोसाआ ऩलोन्ओ झारा य़ङ्चि खानानिन्आ नुलोक एन्मादोत। 23खा-खाक्कोचिआ निनाम्हाङ्य़ङ खाकालुओ अ़य़ङ ऩएनुन, मोचि निनाम्हाङ्ओ अ़चुम़नाचिदाङ्का म़फेउचि।’#य़ङ्हुप १८:१९ 24समुएल्एदाङ्का ओह्यात्नि झारा निनाम्हाङ्य़ङ खाकालुचि देम्पाङ म़चेवा, झारासा आइमित्ओ लेन्चिदा म़लियाङ्ओसो अ़तुक्वादा खाअ़लुसायुङ्सा। 25खानानिन निनाम्हाङ्य़ङ खाकालुचिओ अ़चुछाचि ओ, खोन्कि निनाम्हाङ्आ आम्नुओ सुन्तुम्चिएनान अ़मुवाओ हिप्माय़ङ खानानिन्एदाछाङ अ़ताला। देकिनालो निनाम्हाङ्आ अब्राहाम लो, ‘अ़ङ्का ओ हेन्खामादाओ झारा म़नाचि आम्छाचिलाम्पा आसिखा प़ङ्च़ङ।’#पुङ्चिपुक १२:३; २२:१८; २६:४ 26खोन्कि खानानिन झारा इस्राएलिचि आम्नुओ अ़त्लो काचिचिदाङ्का लामाकि आसिखा प़मा निकिना निनाम्हाङ्आ अ़छेन्ताओ अ़चुछा येसु बुया खानानिन्एदा अ़य़सा।”
Currently Selected:
छाम्माय़ङ 3: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
