छाम्माय़ङ 2
2
सेङ्लावा म़युवाओ
1 # २:१ पेन्तिकोस : पेन्तिकोस य़ङ्ओ अ़तुप्माय़ङ पचास ओ। खोन्कि ओ य़ङ बुयाओ छाप्लाखादा ग्रिक य़ङ्लाम्पा ताओ ओ। ओसाआ इस्राएलिचिओ अ़चुओ अ़ऩङ्वा चाओ चानुचानि सिन्तुम। अ़देङ्या य़ङ्सिवा अ़तुक्वाऩङ्दा ‘पेन्तिकोस’ लामानुम। पेन्तिकोस्नि अ़लोवाङाओ यहुदिचिओ अ़चुचानुचाओ लेन ताहिदा हाङ्पा येसुएदा साकोङ्छ़ङ कामुचि अ़क्तेप्दा म़कोवान्चिन। 2खोन्कि मोदा म़प्च़क़क्दा नाम्चोक्दुङ्का अ़धिवाङ ह़क साप्तिन्वा साप्तुय़रु, खोन्कि मो ह़क्ओ अ़साप्माआ मोचि म़युङाङाओ खिम्ङा झारा साप्तुखात्तु। 3खोन्कि लेम्चिवात्नि म़काराङाओ मिओ अ़लाक्चि मोचिएदा खाङ्म़मुसान्चिन्किना मो मिओ अ़लाक्चि अ़धाङ-अ़धाङ म़लिसाकि मोदा म़युङाङाओ झारा साकोङ्छ़ङ कामुचिएदा म़युङा। 4खोन्किना मोचि झारा सेङ्लावाआ भेप्तुचिकि लावाआ सावा म़प़चि, खोन्कि मोचिआ नि य़ङ्चिदा चेप्मा अ़पुङ्सा।
5मोन्ग़रि हेन्खामादाओ झारा हेन्कोप्चिदाङ्का निनाम्हाङ कामित यहुदिचि यरुसलेम्दा म़ताकि म़युङाङा। 6ओवात्नि साकोङ्छ़ङ कामुचि नि य़ङ्चिदा म़चेवाङाओ म़एनुचिकि अ़धिवाङ म़ना मुक्ला साकोङ्छ़ङ कामुचि म़युङाङाओदा म़कोवान्चिन, खोन्कि मोचि दोम्तुदोचि। देकिनालो झाराकापाङ्आ खोचिओ अ़चुय़ङ्चिदा म़चेवाङाओ मो म़नाचिआ म़एनुचि। 7मोचि अ़न्नुनु दोम्तुदोचिकि अ़क्छा निएदा सेन्कासेन म़मुवा, “दि ओ झारा काचेप म़नाचि गालिलिचि माआङ कि? 8खोन्नालो देत्नि आन्कान झारासा ओ म़नाचि आन्य़ङ्चिदा म़चेप्याङ्ओ एनुम्योम्च़म? 9आन्कान ओदा खा-खाक्को पार्थिचि, मादिचि, एलामिचि, खोन्कि मेसोपोतामियायाङ्काओ, यहुदियायाओ, कापादोकियायाओ, पोन्तस, खोन्कि एसियादाओ, 10फ्रिगिया, पाम्फिलिया, मिस्र खोन्कि कुरेनिओ अ़च़क्दा छुक्ओ लिबिया धिखाहुप्चि खोन्कि रोम्दाङ्का हुसि बानिन्ओ यहुदि 11खोन्कि यहुदि साम्योक्दा कावाङ निरावा याइन्येन। क्रेत खाम्दाक्दाओ खोन्कि अरब हेन्कोप्दाओ यहुदिचिछाङ याइन्येन्नुछाङ मोचिआ आन्य़ङ्चिदा निनाम्हाङ्आ अ़मुवाओ तोक्पो काचिचिओ अ़तुक्वादा मोचि अ़क्छा निएदा म़चेप्याङ्ओ आन्कान एनुम्योम।” 12खोन्कि मोदा खाङ्सि काता म़नाचि झारा दोम्तुदोचिकि ओहा ना मोहा म़लिसा, “ओवाको म़दोम्दाओ काचि देत्निकि लिमा ऱ?”निकिना अ़क्छा निएदा सेन्कासेन मुमा अ़पुङ्सा।
13मेन खा-खाक्कोचिआ येसुएदा साकोङ्छ़ङ कामुचि सुङ्याङ्सा म़लोचि, “मोचि ना ब़द्धे अ़ऩङ्वा म़सेत्ओ दुङ्मायु म़दुङाकि सेरुङुचि!”
पत्रुस्ओ अ़यायोक
14खोन्किना पत्रुस एघारकापाङ छाम्माय़ङ्चिएनान एवाकि अ़धिवाङ य़ङ्आ मोचि लोचि, “यहुदि अ़ङ्यावाचि खोन्कि झारा यरुसलेम्दा कायुङ्चि ओ, खानानिन्आ त़खाम्योम्च़म्ओ खोन्कि त़एनुम्योम्च़म्ओ काचिओ अ़तुक्वादा अ़ङ्का खानानिन खाएत्नानिन। हान नुलोक एनानुम। 15खानानिन त़मित्तुम्च़म्वा ओचि म़सेत्ओ दुङ्मायु म़दुङाकि सेरुङुचिओ माआङ, देकिनालो ओन्ग़रि ना अ़वाय़ङ्ओ नौ ओन्ङा साङायुङ्सा। 16मेन ओचिएदा लियाङ्ओ म़दोम्दाओ काचिओ अ़तुक्वादा ब़द्धेकादोङ बुया योएल निनाम्हाङ्य़ङ खाकालुआ खालुसुओ ओ य़ङ तालायुङ्सा,
17‘निनाम्हाङ म़य़ङ्याङ, आदेङ्ओ लेन्चिदा,
झारा म़नाचि अ़ङ्का अ़ङ्लावा पाक्तुङ्प़ङ्च़ङ।
खोन्कि आम्नुओ दुवाछा छाचिकि मेत्छाछा छाचि निनाम्हाङ्य़ङ म़चेप,
खोन्कि आम्नुओ थाङाछाचिआ सेन्चिचि म़खाचि,
खोन्कि आम्नुओ खोक्पा म़नाचिआ सेन्माङ्चि म़खाचि।
18मो लेन्चिदा अ़ङ्हारुक्चिएदा
खोन्कि अ़ङ्हारुक्माचिएदा, अ़ङ्लावा पाक्तुङ्प़ङ्च़ङ,
खोन्कि मोचि निनाम्हाङ्य़ङ म़चेप।
19अ़ङ्का नाम्छ़ऱदु म़दोम्दाओ काचिचि मुङ्च़ङ,
खोन्कि हेन्खामायु ह़, मि
खोन्कि धेक्धेक्धेक्वाओ तुङ्ऱक्ओ बुन्चि खाङ्मुसुङ्च़ङ।
20हाङ्पाओ मो अ़च़वाङ खोन्कि अ़सावापोरि लेन तामा बुया,
नाम कुन्चियाधेक्धेक लिखात, खोन्कि लादिप्मा ह़दा फान्नान्चिन।
21मेन झारा साङ्आ हाङ्पाओ अ़चुऩङ बुउ,
खो निनाम्हाङ्आ अ़लेन।’#योएल २:२८-३२
22इस्राएल म़नाचि ओ, ओ य़ङ्चि एनानुम्च़म! नासरत्ओ येसु आम्नुओ बुदा निनाम्हाङ्आ सावा काचिचि, म़दोम्दाओ काचिचि खोन्कि बुन्चिलाम्पा अ़य़साओ निकिना खाङ्अ़मुसा। मो खानानिन नुलोक त़सिन्तुम्योम। 23निनाम्हाङ्आ अ़मुवाओ अ़चुमित्चिऩङ्वात्नि खोन्कि आदेङ लिओ काचि सिन्मा अ़चुतायालाम्पा ओ येसु ख्रिस्त खानानिन ऩप़न्युङ्सिन। मेन खानानिन्आ निनाम्हाङ्ओ अ़य़ङ्हुप्वा मान्च़कादाचिओ अ़चुछुक्दा येसु त़पाक्तुम्प़म्च़म, खोन्कि मोचि खोक्को क्रुस्दा ख़न्सेत्त़मेत्तुम्च़म। 24खोन्नुछाङ निनाम्हाङ्आ खोक्को स़मादामाओ अ़चाअ़त्मादाङ्का अ़फोङ्साकि म़सुवादाओदाङ्का अ़लासाखोन्तालोइसा, देकिनालो खोक्को स़माओ अ़सावाआ लाप्मायुङ्मा मान्ऱदो। 25दाउद हाङ ब़द्धेकादोङ बुया येसुओ अ़तुक्वादा य़ङायुङ्सा,
‘अ़ङ्का अ़ङ्ङेङ्चिदाङ्का अ़क़ऩङ,
देकिनालो अ़ङ्हाङ्पा अ़धुन अ़ङ्बुदा म़युङ्याङ्ओ
अ़ङ्का खाङ्योङ। देकिनालो खोक्को अ़ङ्चुप्ताङ छुक्लिप्पा म़युयाङ।
26खोन्ओसा अ़ङ्साकोङ्वाओ ब़द्धे अ़ऩङा नुयाङ्कि मिन्मा चानुमाओ छाम लुङ्योङ,
खोन्कि अ़ङ्पोक तामित्मादा ह़ङ।
27देकिनालो खानानिन्आ अ़ङ्लावा सित्म़ङ्चि युङ्खादा त़छिरिन्दान्मिन,
खोन्कि खानानिन सेङ्याङ्ओ म़नाओ अ़चुपोक क़माखात्मा त़प़न्मिन।
28खानानिन अ़ङ्का ह़ङ्खालाम खाङ्त़मेत्नियुङ्नि।
खानानिन्आ अ़ङ्का आम्नुओ बुदा ब़द्धे अ़ङ्ऩङा त़नुङाऩङ।’#साम्ऱङ्भुङ १६:८-११
29यहुदि ब़ब़, नाना खोन्कि निछाचि ओ, आन्सुन्तुम दाउद्ओ अ़तुक्वादा अ़ङ्का खानानिन राक्एनान खाएत्मा ऱनानिन। खो सुवादाकि अ़खुम्ता, खोन्कि खोसोओ अ़एप्मा आय़ओ लेन्तारि ओदा आन्कान्एदाङा युङ्याङ। 30मेन दाउद अ़क्छा निनाम्हाङ्य़ङ खाकालु ओ, खोन्ओसा निनाम्हाङ्आ खोसोओ अ़छावारिदाङ्का अ़क्छा अ़चुहाङ्युङ्खादा अ़युङ निकिना निनाम्हाङ्आ हिप्याङ्सा किरे म़चाओ खोसाआ सिन्तुङु। 31निनाम्हाङ्आ मुमा अ़मुवाङाओ काचि दाउद्आ बुयाङा सिन्तुओसा ख्रिस्तओ अ़चुलामाखोन्मालोन्माओ अ़तुक्वादा खालुवा, ‘खोक्को निनाम्हाङ्आ सित्म़ङ्चि युङ्खादा मान्छित्दाअ़दा, खोन्कि खोक्कोसोओ अ़चुपोक्छाङ एप्मादा क़मा मान्प़अ़दा।’ 32ओ येसुङा निनाम्हाङ्आ म़सुवादाओदाङ्का अ़लासाखोन्तालोइसा, खोन्कि ओ य़ङ्ओ आन्कान झारा अ़सालुम्स़ङ युङिन्येन। 33खोन्ओसा निनाम्हाङ्आ येसु अ़झोइसाकि तोक्पो अ़मुवा, खोन्कि निनाम्हाङ्आ अ़हिप्ताओ सेङ्लावा येसु अ़पुवा, खोन्किना येसुआ आन्कान सेङ्लावा च़लोक म़पुवायुङ्सा। मो खानानिन ओन्ग़रि त़खाम्योम खोन्कि त़एनुम्योम। 34देकिनालो दाउद निनाम्मादुत्नि मान्खात्युक, खोन्नुछाङ दाउद येसुओ अ़तुक्वादा य़ङायुङ्सा,
‘निनाम्हाङ्आ अ़ङ्हाङ्पा येसु म़लोचि,
“अ़ङ्चुप्ताङ्छुक्लिप्पा युङा,
35देम्खातारि अ़ङ्का आम्ङेङ्चि
आम्लाङ्थेम्भेन्यु अ़मुऩङ्च़ङ।”’#साम्ऱङ्भुङ ११०:१
36खोन्ओसा झारा इस्राएलिचिआ ओ य़ङ अ़नुछ्या सिन्मादोत, ओ येसु क्रुस्दा खानानिन्आ त़ख़न्तुम्सेरुम। खोक्कोङा निनाम्हाङ्आ हाङ्पा खोन्कि ख्रिस्त अ़मुवायुङ्सा।”
37पत्रुस य़ङाओ य़ङ म़नाचिआ अ़एनाकिना अ़चुसाकोङ्वा अ़न्नुनु चाअ़त्सा, खोन्किना मोचिआ पत्रुस खोन्कि नि छाम्माय़ङ्चि म़सेनुचि, “ब़ब़-निछाचि ओ, खोन्नालो आन्कान्का दे च़मादोत?”
38खोन्कि पत्रुस्आ मोचि लासुलोचि, “खानानिन झारा आम्नुओ हेवाचिदाङ्का लासानिन्कि येसु ख्रिस्तओ अ़चुऩङ्दा बप्तिस्मा लोआनिन, खोन्कि आम्नुओ हेवाचि लेत्लुवानिन। खोन्नालो सेङ्लावा मोहाङा त़तोक्तुम। 39ओ हिप्माय़ङ आम्नुओ खोन्कि आम्नुओ छाचिओ निकिना ओ, खोन्कि अ़थाया कायुङ्चि झारा साङ-साङ आन्हाङ्पा निनाम्हाङ्आ अ़चुम़ना लिसि म़बुत्तुचि, खोक्कोसाआ मोचि सेङ्लावा म़प़चि।”
40खोन्किना पत्रुस्आ नि ब़द्धे य़ङ्चिदा मोचि सालुम्स़ङ प़चिकि खोसाआ यायोक प़याङ्सा लोचि, “ओ हेन्खामादाओ अ़अ़त्पा म़नाचिएदाङ्का खानानिन निनाम्हाङ्एदा रात्लुवानिन।” 41खोन्किना खा-खाक्कोचि पत्रुस्आ लोचिओ य़ङ्दा साकोङ्छ़ङ म़मुवा, मोचि छाम्माय़ङ्चिआ बप्तिस्मा म़प़चि। खोन्कि मो लेन अ़चुरुहुप्दा आप्फात सुम्काहजारालेका म़नाचि म़तेप्ता।
हाङ्पाएदा साकोङ्छ़ङ कामुचिओ अ़चुच़माथाङ्मा
42खोन्कि मोचि छाम्माय़ङ्चिआ म़चिन्तुचिओ य़ङ्चिवा म़चुवाङा, यावायोक म़मुवाङा, पेम्पाक म़हासाचाङा, खोन्कि याम़माराङा। 43ख्रिस्तओ अ़चुछाम्माय़ङ्चिआ ब़द्धे म़दोम्दाओ काचिचि मुयाङ्सा बुन्चि खाङ्म़मुसुचि, खोन्कि झारा यरुसलेम्दाओ म़नाचिआ निनाम्हाङ च़लोक अ़कित्ता। 44हाङ्पाएदा साकोङ्छ़ङ कामुचि झारा अ़क्नि म़कोवान्यान्चिन, खोन्कि मोचिओ झारा अ़चुसामाचि अ़क्नि म़याङुङुचि। 45मोचिआ अ़चुचासुम्छेन्बिचि खोन्कि अ़चुसामाचि म़इनुचिकि खा-खाक्को म़हाप्तादिसाङा, खोचि म़हात्तुङुचि। 46मोचि अ़लेन्खिन्तुम निनाम्हाङ ब़क्खाखिम्दा अ़क्नि म़कोवान्यान्चिन, खोन्कि म़तोङाकि अ़चुखिम्चिदा अ़चुऩङानुयाङ्सा खोन्कि अ़नुवाक साकोङ्वाआ पेम्पाक म़हासाचाङा, 47खोन्कि अ़धुन निनाम्हाङ्ओ अ़चुऩङ अ़चोन्ताङा खोन्कि झारा म़नाचिआ मोचि ऩङाम़नुसुङुचि। खोन्कि हाङ्पाआ मोचिओ अ़चुरुहुप्दा अ़लेन्खिन्तुम साकोङ्छ़ङ कामु म़नाचि म़तेप्तुप़ङुचि।
Currently Selected:
छाम्माय़ङ 2: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
